Kemis
Legi 11 April 2019
BENINGE
EMBUN ESUK
Yesaya
53:10-12
Jabur
31:9-16
Yokanan
8:51-59
“Begja-tiwas
kawula wonten ing asta Paduka, Paduka mugi ngluwari kawula saking tanganipun
satru, ingkang ngoyak-oyak kawula.” Jabur 31:16
SUMELEH kuwi linggane Seleh, sing tegese
mapanake barang ana neng papan tartantu, merga wus dipapanake, mula ora digegem
utawa dicekel meneh dening menungsa. Seka
lingga Seleh kuwi ya ana tembung nyelehake, sing tegese mapanake samubarang ing
papan sing wus kaangkah, mula saka kuwi SUMELEH isa diarani kahanan sing wis mapan kanthi
antheng lan rinasa aman. Tembung SUMELEH sakbanjure isa kanggo ngarani kahanan
sing ora mligi kanggo barang, ananging kanggo kahanane menungsa, sing tegese
masrahake samubarang ing uripe ana ing kahanan sing gumatok, la nana ing tata
kapercayan, SUMELEH kuwi wong sing wis total percaya marang sing maha kwasa.
Neng Kitab Jabur dicritakake kaya ngapa kandele
percayane Juru Jabur. Ing kana Juru Jabur wis pasrah, SUMELEH bab uripe. Juru Jabur
wis masrahne uripe sakwutuhe neng Astane Sing maha kwasa, kuwi minangka syarat
supaya diluwari saka sakabehing karubetaning urip. Dene pengalamaning Juru
Jabur bab karubetaning urip kuwi merga diuyak-uyak mungsuh sing ngener marah
urip lan keslametane. Juru Jabur masrahake uripe kuwi merga percaya, yen mung
Gusti Allah thok thill, sing isa maringi pitulungan sing sampurna, mula ya isa
SUMELEH temenan. Dadi, isane Juru Jabur SUMELEH kuwi merga kapercaya lan merga
pengalaman.
Ing jaman saiki, perkara SUMELEH kuwi rada
rumpil dalane, pomeneh yen kon SUMELEH marang Gusti. Menungsa ing jaman saiki
jik luwih percaya karo duwit tinimbang karo Gusti Allah. Titik’ane, aluwung ora
ngibadah tinimbang prei seka anggone mburu duwit. Iki kabeh isane klakon merga
ing pemikirane, Gusti Allah kuwi isa dinego,dijak nyang-nyangan lan isa
dimanipulasi. Isa uga diarani yen pangertene bab Gusti Allah kuwi mung cethek
banget, mula ya ora isa nyeleh’ake uripe marang Gusti, jik luwih ngrasa aman
nalika sumende marang duwite utawa bandane.
“Wah, aku wingenane kae jik rung trima yen
diarani ora nengenake Gusti, aku kesinggung yen merga ora setuju bab kertu
persembahan bulanan saben warga siji. Karepku sakomah siji, wong ya sumbere
siji”, Lik Ndoleng nggedumel bab kertu pisungsung, lan yen nesu jian raine Lik
Ndoleng kaya walang klilipen.
“Kuwi merga pikirane sampeyan kaya wong bakulan
neng pasar Lik. Pisungsung pratelan percayane dewe sing uripe dewe iki mung
merga dirumat dening Gusti, mula ya kudu mercayakne kabeh neng pangrumate
Gusti. Duwit kuwi mung srana, rasah pelit-pelit, kuwi kabeh merga seka Gusti. Sampeyan
sugih mbelgedu kuwi mung merga kamurahane Gusti wae, mula ya ayo percaya. Aja nyelehne
urip neng duwit Lik, neng sumendekne neng Gusti”, Dalijo dina kuwi sajak
wicaksana raumum, mbuh merga kena apa.
“Kang Dal, kok takrasane akhir-akhir iki dirimu
jian kaya Begawan, kowe ki jan-jane gek entuk wangsit apa she?”, Nduk I’in
nyoba nakoni Dalijo.
“Iki merga aku SUMELEH neng Gusti In, ora kaya
Paklik, jik luwih percaya karo bandane tinimbang karo Gusti”, Muni ngoneo karo
nglirik Lik Ndoleng sing jik mrengut, malah sansaya tambah, jian kaya Jingklong
Putus cinta.
“Dusss..lambemu Jooo…tak tapuk satusan ewu
sepuluh kowengko!!!”, Unine Lik Ndoleng,
yen iki ora mbatin merga erosi..eh emosi..
Mbahe..
Tidak ada komentar:
Posting Komentar