MITULUNGI vs NGRUSAK

 

Rebo Pahing 24 Agustus 2022

BENINGE EMBUN ESUK

Yeremia 7 : 27-34

Jabur 10

Lukas 6 : 6-11

Gusti Yésus nuli ngandika marang para ahli Torèt lan wong Farisi mau: “Aku arep takon: Apa sing didhawuhaké déning prenatané agama marang kita ana ing dina Sabbat? Gawé becik, apa gawé ala? Mitulungi apa ngrusak nyawa?”

Lukas 6 : 6

 

Ing basa jawa ana istilah “Kosok-balen”, yakuwi tembung kang dadi mungsuhe, kayata “ Cedhak karo Adhoh, Dawa karo Cendak,  Sugih karo Mlarat. Kabeh mau nggambarake kahanane jagad kang isih manggon ana ing “tataran spiritual dualitas”, anane mung loro, apik mungsuh elek, peteng mungsuh padhang lan sakbanjure. Kabeh mau tumeka saiki jik diuripi dening menungsa, sanadyan jarene wis beragama, ananging kerep ora dong babagan urip sing sejati.

 

Ana pangandikane Gusti Yesus kang tinulis ing Injil Lukas, ing kono nyritakake gambaran urip kang anane mung rong perkara, utawa ana  neng dimensi dualitas. Anane Gusti ngendikani kaya mengkono kuwi, merga para wong sing diwulang pancen ijik manggon neng tataran spiritual dualitas. Ing Injil Lukas bab 6 ayat 6-11 dicritaake babagan carane para ahli toret metani salahe Gusti Yesus. Oiya, para ahli toret kuwi keturunane tekan saiki okehe ngeram, malah mbokmenawa ana sing maca tulisan iki, ciri-cirine seneng metani salahe liyan. Hehe..  Mbalik neng critane Injil Lukas, nalika iku dina sabat, ndelalah ana wong sing tangane ceko..Ngerti kang kaya mengkono kuwi, para ahli toret nyanggong, nggoleki salahe Gusti. Ana ing penemune ahli toret, marasake wong lara neng sabbat kuwi dosa, merga nerak ukume Gusti Allah.

 

Ndelalah Gusti marasake, lan banjur nakoni marang ahli toret, babagan dhawuhe Gusti ing dina sabat. “ Apa sing didhawuhake ing dina Sabat,gawe becik apa gawe ala? MITULUNGI apa NGRUSAK? Jan-jane para ahli toret ngerti yen ing dina sabat kudu tumindak apik, ing dina sabat kudu MITULUNGI lan ora malah NGRUSAK, ananging merga atine wis buket-lekoh dening kekarepaning kamanungsan, mula ora direwes babagan tumindak katresnan, anane mung bengak-bengok bab katresnan.

Apa ing jaman saiki, patrap urip kaya dene ahli toret kuwi jik ana? Waduh, aku ora wani ngarani, sumangga para pamaos mirsani piyambak.Yen ora, ayo ngrungkone jagongane Lik Ndoleng ce’es.

 

“Jo, apa bedane “kegiatan rohani” lan lelaku rohani?” Takone Lik Ndoleng marang Dalijo, nalika mbengi kuwi jagongan neng Lincak Sor Talok.

“Ya cetha beda ta Leng, saiki seka tembunge wae wis beda..”Kang Solebo malah sing mangsuli.

“Ora tekok kowe Bo,rasah crigis!” Semaure Lik Ndoleng.

“Yen kegiatan rohani, kuwi ya mung kegiatan kang katone rohani Lik.Manggon neng papan-papan karohane, nembang utawa nyanyi karohanen, maca buku karohanen.Ananging ora dadi lelakuning urip.Lha, yen LELAKU ROHANI kuwi, tumindak sing ora nengenake kamanungsan, mung manut panuntune dhawuh Sang Roh. Biasane lelaku rohani kuwi ora gathuk karo kekarepan raga kamanungsan Lik” Semaure Dalijo sinambi udud.

“Weh, apa kuwi tegese olehku ngibadhah saksuwene iki klebu “kegiatan rohani” ya Jo?” Takone Lik Ndoleng.

“Lha kuwi kari Paklik sing isa mangsuli, apa saksuwene iki ancase karohane Paklik MITULUNGI liyan apa malah NGRUSAK liyan?” Semaure Dalijo.

“Lha olehmu mogakne Markun dines luar kota kae, ora merga ben tambah mukti urip lan kariere Leng, kui merga niatmu arep njawil Wasti..” Unine Kang Solebo, sinambi nyumet jisamsune.

“Duss..!! Konangan cahh.!!” Grenengane Lik Ndoleng.

 

mbah’e

SENGIT

 

Kemis Legi 18 Agustus 2022

BENINGE EMBUN ESUK

Yesaya 6 : 1-19

Jabur 71 : 1-5

Ibrani 12 : 3-17

Padha ngèlingana prekara-prekara sing dialami déning Gusti Yésus, nalika ngadhepi wong dosa sing ngesokaké sengiting atiné marang Panjenengané. Jaganen supaya atimu aja nglokro lan semplah. Awit enggonmu perang nglawan dosa kuwi durung nganti mutahaké getihmu.

Ibrani 12 : 3-4

 

Mbokmenawa kabeh sing maca tulisan iki,mbuh kuwi lanang apa wadon, lemu utawa langsing, bagus lan uga ayu, wis nate krungu bab tembung SENGIT, yakuwi tembung sing unik. Lha lire kepiye kok tembung SENGIT kuwi kinaranan unik? Lha meh kabeh piwulang agama menggak cikben  menungsa ora ngrumati lan nguripi tembung iki, lan nalika  disesorahi babagan iki, okeh sing manthug-manthug sajak  paham lan kaya-kayane pancen wegah ngrumati lan nguripi sing kinaranan SENGIT. Ananging jebul malah kosokbaline, sanadyan tembunge emoh, wegah, nampik  karo tembung iki, lha kok klakuanne malah nguri-uri sing jenenge SENGIT.

 

Okeh bungkus utawa “kemasan” kang digawe menungsa kanggo nutupi dayaning hawa SENGIT kuwi. Ana sing nganggo ukara, “ Kritik yang membangun..”. ana uga sing nggunakne ukara, “Demi kebaikan bersama…” Lha sing luwih ngagetake yakuwi nyilih konsep karohanen, “ Ini mencari kehendak Tuhan…” Kamangka sejatine kuwi kabeh  klakone mung linambaran rasa sing dadi jejere tulisan esuk iki, SENGIT. Pancen menungsa kwi titah sing lipete ngungkuli Welut, lunyu anggone oleh rembug…

 

Ana piwulang kitab suci kang tinulis neng Ibrani bab 12 ayat 2 lan papat, kang isa dadi pepeling lan panglipur marang sapa wae, mirunggan sing bener-bener wani “Ngliwati” dalan Salibe Gusti. Ing kana kabeh dielingake cikben kelingan marang kepiye anggone Gusti Yesus nandhang sangsara ora merga luput lan salahe, ananging merga hawaning SENGIT kang mubal-mubal saka liyan. Lha emanne, liyan kuwi dudu wong sing ora wanuh piwulange agama, malah kosokbaline, para penggedene agama ing wektu kuwi. merga rasa SENGIT marang Gusti Yesus, para penggede agama Yahudi ngonceki lupute Gusti,ngompori wong parisi cikben uga SENGIT marang Gusti, lan pungkasane nyiksa,milara,lan mateni Gusti Yesus.

 

Sing dadi inti sarining piwulange suci dina iki yakuwi, yen ing urip wektu iki ana sing ngrasakne panandhang abot, ana sing ngrasakne sawabing daya SENGIT, ora usah wedi, ora usah kuwair, merga sing diadepi durung ana sekuku-ireng  dibandingake kasangsarane Gusti Yesus, kang tuwuh ya amarga SENGIT. Wong okeh ing jamanne Gusti Yesus ora ngerti babarblas apa sejatine lupute Gusti Yeus, ananging merga diubub’I terus dening para penggedhe Agama, yen jare  Gusti nerak pepakon agama, jare Gusti nglawan leluhur lan sakpanunggalane, mula nganti tumeka ing pucuking rasa SENGIT, lan marakne tega nyiksa, milara lan pungkasane mateni Gusti Yesus. Wong okhe ing wektu kuwi babarlas ora nggagas rasane ibu Maryam sing atine perih nyawang putrane dipilara kaya durjana, wong rumangsane sing ngukum kuwi nembe netepi kersane Gusti.

 

Babagan SENGIT kuwi tetep ana seka mbiyen, saiki lan tumeka sakumure jagad iki. Mula diati-ati karo rasaning ati,aja luput mbiji lan ngrasa, aja mung merga nuruti kareping ati,aja merga nembe nyekel pangwasa, aja dupeh nembe keceh bandha, njur sakwiyah-wiyah marang liyan, merga daya SENGIT. Sepisan meneh, aja ngrumati dayaning SENGIT.

 

“Jo, kira-kira acara HUT NKRI wingi neng istana kae pihak oposisi piye ya?” Takone Lik Ndoleng marang Dalijo.

“Paling yam aide Lik, wong pancen uripe wus kinemulan SENGIT…”Semaure Dalijo karo nglinthing udude.

“Setuju Dalijo aku Leng, pancen yen wis ginubetan SENGIT, kencana katon wingka, ananging yen seneng,  wingka katon kencana..”Kang Solebo melu urun rembug.

“Jrett..saiki kok kaya pujangga kowe Bo, bareng mulih ndea dadi wicaksana..” Unine Lik Ndoleng.

“Lambemu Leng…” Semaure Kang Solebo.

“Muga-muga sing wus wanuh agama, ora ngrumati lan nguri-uri rasa sing kinaranan SENGIT..”Unne Dalijo, sinambi nyumet thingwene.

“Weh, jokleru Jo, malah sing wanuh agama kuwi sing seneng ngingu lan ngrumati SENGIT, dibungkus karo bungkus maneka werna…” Semaure Lik Ndoleng.

“Kaya sameyan ya Lik, mbungkus SENGIT karo kang Markun, lumanthar ethok-ethok apik..kamangka lamis…”Unine Iin, melu urun rembug.

“Jindulll…cah siji iki…!!” Grenenge Lik Ndoleng.

 

Mbah’e

NAMPIK

Selasa Wage 16 Agustus 2022

BENINEGE EMBUN ESUK

Yesaya 5 : 24-30

Jabur 74

Para Rasul 7 : 44-53

Kowé nampik dhawuhé Pangéran, Kang Mahakwasa, Allahé Israèl. Mulané kaya déné damèn lan suket garing entèk tapis dimangsa ing geni, kaya mengkono uga oyodmu bakal bosok kabèh, kembangmu dadi garing lan sirna kabur ing angin.

Yesaya 5: 24

 

NAMPIK kuwi tegese nulak utawa ora nampa, dene apa sebab-musabab’e kok isa NAMPIK kuwi bisa maneka werna, isa merga ora ganthuk, isa merga abot lan liya-liyane. Kosokbaline tembung NAMPIK kuwi Nampa, kang tegese nrima samubarang dumadi ana ing awak utawa uripe, sanadyan cengkah utawa ora jumbuh karo kekarepan kamanungsane. Dadi babagan tembung NAMPIK lan Nampa kuwi perkara sing lumrah lumaku ana ing lakuning urip menungsa lan titah liyane ing njagad iki, kawit mbiyen tekan saiki lan bakalan saklawase jagad mubeng.

 

Babagan NAMPIK lan Nampa kuwi nate dadi pangandikane Gusti kang  uga minangka piweling saka Gusti Allah tumrap menungsa nalika jamane nabi Yesaya. Ing wektu kuwi kahanane menungsa  padha ora nampa Pangandikane Gusti utawa NAMPIK dhawuhe Gusti, kaya kang tinulis neng Yesaya 5: 24, “ Kowe NAMPIK dhawuhe Pangeran Kang Mahakwasa…” Akibat NAMPIK Pangandikane Pangeran Kang Mahakwasa, mulane  menungsa dadi kaya damen lan suket garing kang entek resik merga kaobong dening geni, dene oyode bakalan bosok lan kembang-kembange dadi garing, pungkasane dadi resik lan ilang tanpa guna.

 

Lha jan-jane apa ta Pangandikane Pangeran marang menungsa kok sajak abot temenan anggone nglakoni kuwi? Apa dikon nawu segara? Apa dikongkon njuggrugake gunung? Dudu, dhawuhe Pangeran Kang Mahakwasa kuwi cikben menungsa manembah marang Gusti Allah kanthi tulus,iklas,jujur lan kuwi mung isa dilakoni lumantar nglakoni patraping urip WELAS ASIH marang titahe Gusti Allah. Jamane Yesaya, babagan ngibadhah apik temenan, ananging ora ngener marang Gusti Allah, mung nguja kemaremaning kamanungsan.Katone sengkut ngibadhah, ananging  babarblas ora nglakoni katresnan kaya kersane Gusti. Kuwi kabeh kang kinaranan NAMPIK dhawuhe Gusti Allah.

 

Njur apa ing jaman saiki kahanan kaya menungsa ing jamane nabi Yesaya kuwi ijik ana?Wah, yen kuwi BENINGE EMBUN ESUK ora wani mbiji utawa “menilai”, merga babagan mbiji utawa “menilai”kuwi mung Gusti Allah kang kagungan. Mung wae, payo ndeleng menjero, ndeleng neng telenging batin, apa wis  isa ngayahi dhawuhe Gusti Allah apa durung, babagan nresnani sakpepadha, bab sangkul-sinangkul lan lung-tinulung, kuwi isane kejawab mung nalika wening ing batin. Mula saka kuwi, payo ngasah landheping bebuden kanggo maca lakuning jaman, carane ngasah landheping bebuden kuwi mung srana lumebu ing jagading wening, sakliyane kuwi sajake ora ana dalan liyane. Sing kudu dieling, aja nganti pisan-pisan NAMPIK dhawude Gusti, sanadyan lara neng ati, merga sing sapa sing NAMPIK mesti bakalan resik kobong dening kahanan.

 

“Jo, jian…iki mbahe apa kleru nggawe judhuling tulisan..kok sajak ora kepenak aku macane?” Lik Ndoleng sore kuwi gupuh neng Lincak SOr Talok, njajal njaluk katrangan saka Dalijo.

“Weh, babagan apa Lik? Apa babagan kriminalitas?” Dalijo sajak melu gupuh.

“Nulis jejering tulisan kok saru….kamangka wis kadhung diwaca wong akeh…” Katrangane Lik Ndoleng meneh.

“Leng, endi sing mbok karepake?” Takone kang Solebo.

“Mosok judule tulisan BENINGE EMBUN ESUK saru..nyebut sing sinengker..”Wangsulane Lik Ndoleng.

“Disawang sing permana ta Leng, kowe jebule ora isa mbedakne hurp “E” karo hurup “A”, apa malah merga pikiranmu sing wis buthek, mula nyawang wae ora tabling?” Unine Kang Solebo.

“Oalah, aku sing luput lur, raisa mbedakne E karo A…”Semaure Lik Ndoleng sinambi nyumet udude sing mau kober mati merga gupuh.

“Mula, aja keSUSU mbiji, njur kemrungsung…diwaca kanthi permana..” Ngendikane Pakde Kento, sing njedul meneh, sakwise suwei ora njedul.

 

Mbah’e..

NGGANGSIRI

 

Setu Legi 13 Agustus 2022

BENINGE EMBUN ESUK

Yesaya 3 : 18-4:6

Jabur 80 : 1-2,8-19

Matheus 24 : 15-27

“Kénging menapa pageripun Paduka jugrugaken, ngantos saben tiyang ingkang langkung ngrampasi? Andhapan sami nggangsiri, lan kéwan ing ara-ara sami nyengguti?”

Jabur 80 : 13-14

 

NGGANGSIRI kuwi tembung kag asale saka lingga Gangsir, yakuwi kewan kang memper Jangkrik, bedane yen Gangsir kuwi isa nduduk lemah dadi bolongan minangka omahe, mula njur diarani NGGANGSIR, yen Jangkrik arang sing isa nduduk lemah kanggo omahe, isane mung nunut bolongan sing wis ana. Mula saka kuwi tembung NGGANGSIRI isa diwenehi arti tumindak kanthi sengaja kanggo nduduk lemah cikben dadi bolongan lan sakwise dadi bolongan isa ndadekake apa wae kang ana ing ndhuwure dadi rubuh utawa ambruk. Neng kitab Jabur ana crita babagan kahanan kang lumaku, nalika Asaf ngrasa yen kabeh diorak-arik dening Gusti. Kahanan kuwi kayadene taman sing tandurane anggur lan pager-pagere digawe jugrug lan lemah kanggo papane oyod-oyode digawe bolong kaya omah Gangsir, mula kinaranan NGGANGSIRI.

 

Apa kang tinulis ing kitab Jabur kuwi sejatine gegambarane urip neng alam-ndonya iki, yen urip bebrayan kuwi kaya  dene taman utawa kebon kang isine wit-witan. Jenenge wae taman utawa pakebonan, mesti wae ana bates-batese kang ditandhani lumantar pager lan wit-witane ya mesti ana oyod-oyode, kabeh isa sinawang endhah-edipeni nalika tanpa ana gangguan saka apa wae. Ananging nalika ana angin lesus,pagere isa jugrug lan nalika lemahe okeh  Gangsire mesti papan oyod-oyode dadi ringkih lan gampang ambrol, ora bakuh meneh.

Angin Lesus neng urip bebaryan kuwi isa wae awujud omongan sing diumbar mrana-mrene lan isa ngrubuhake pager-pagering katresnan, kamangka sing diumbar kuwi suwung, tanpa isa babarblas merga ora ngerti sing sakbenere. Dene kang kinaranan NGGANGSIRI kuwi tumindak sing ora katon, ananging malah mbebayani merga mbolongi saka njero. Yen disawang katon apik, kayane ora ana apa-apane, kamangka njerone wis bolong merga kahanan NGGANGSIRI wis lumaku lan sansaya ndadra.

 

Mula saka kuwi para sedulur, diawas lan diati-ati ing sakabehe, ora mesti kahanan sing katone apik lan nyenengake kuwi asli. Ora sithik sing mung lamis, kaya gawehane Gangsir sing mbolongi lemah tanpa sinawang lan ujug-ujug ambrol la rusak kahanane. Mula saka kuwi, payo padha ngati-ati,payo padha eling lan waspada karo panggaawe-panggawe kang asipat Gangsir kang pancen gaweane NGGANGSIRI, cikben ora ambruk tatanan apik kang wis rinengga dening Gusti. Uga marang sapa wae sing tanpa sadhar malah ngayahi ayahane GANGSIR, ndang padha eling, merga sanadyan kuwi marakne ayem merga isa nggawe omah, tumindak kuwi isa ngrusak tatanane jagad, lan ngrusak kersane Gusti.

 

“Jo, tandhuran Jeruk sing nembe tuwuh nggonmu kae kena apa kok ana sing alum?” Takone Kang Solebo nalika sore kuwi ngunoni tanduranne.

“Mikirku mung kurang siraman banyu Kang, jebul ngisore ana omah Gangsir, bolongane okeh, mula njur ambruk..” Semaure Dalijo.

“Wah, pancen Gangsir kuwi gaweane ngono, mbolongi lemah, ora mikir kahanan ing sakndhuwure..” Omonge Kag Solebo meneh.

“Yen Gangsir pancen gaweane ngono lur, lha yen menungsa polah-tingkahe kaya Gangsir, utawa NGGANGSIRI pora malah kojur..Ketoke wae alus,apik, semanak….jebul mbolongi seka njero..”Unine Lik Ndoleng saka Sor Wit Klapa, ngeyup merga sajak kepanasen.

“Kaya sampeyan niku Lik, NGGANGSIRI brayate Kang Markun, sajake nukoni udud, ananging jik sok mbathi,njawil…”Iin teka nggawa kiriman sinambi urun rembug.

“Jindulll…cah siji iki….!!!” Swarane Lik Ndoleng, sinambi mbatin, pancen ayahan NGGANGSIRI kuwi ngrusak, ananging piye, lha asyik je njarag kahanan kuwi…

 

Mbah’e..

NGURIKI

 

Jemuah Kliwon 12 Agustus 2022

BENINGE EMBUN ESUK

Yesaya 3 :1-7

Jabur 80 : 1-2,8-19

Ibrani 10 : 32-39

Saben wong bakal ngarah nguriki *nguriki: ngakali.* pepadhané. Wong nom bakal ngrèmèhaké wong tuwa, lan wong cilik bakal ngrèmèhaké penggedhé.

Yesaya 3 : 5

 

NGURIKI kuwi tembung linggane Urik, sing tegese tumindak kanggo mareme butuhe dewe kanthi ngrugekake liyan.  Racake sing jik seneng tumindak Urik kuwi bocah cilik sing nalar pikirane durung tinarbuka. Lho mosok bocah cilik  kaya mengkono? iya, merga pangertene urip jik winates, yen pangertene wis sansaya omber, mesti isa milah lan milih. Yen bocah cilik kae sing penting karepe dewe klakon, ora perduli liyan, Mula kanggo nuruti kekarepane  isa nglakoni tumindak kang nggawa kapitunan marang liyan kang isa diarani Urik, dene tumindak urik  kanggo liyan kuwi isa diarani NGURIKI.

 

Saka jaman kuna-makuna sing jenenge menungsa kuwi seneng tumindak NGURIKI liyan murih mareme pepinginane. Kuwi uga tinulis neng kitab suci,cethane  neng kitab Yesaya bab 3. Ing kana tinulisan mengkene, “ Saben wong bakal ngarah NGURIKI pepadhane….” Lha kok isa kaya mengkono? Isa wae merga sing jenenge menungsa kang wus kinemulan dosa kuwi anane mung nggayuh apa kang dadi senenge dewe. Ing jamanne nabi Yesaya kahanan Urik lan NGURIKI kuwi lumaku nalika wong ana ing kahanan kang makmur. Mula aja salah penemu, nalika bangsa ngisrael ing jamanne Yesaya tumiba ing tumindak NGURIKI liyan kuwi nalika kahanane makmur, ora malah ngepasi rekasa.  Ora mung NGURIKI wae, ananging nalika menungsa mlebu ing jaman enak lan kepenak isa malah ndadekake bubrah tatanane, merga anggah-ungguh lan suba-sita ilang, wong enaom ora ngajeni wong tuwa lan sakpanunggalane.

 

Apa ing jaman ing jaman saiki lakuning menungsa sing kinaranan NGURIKI ya ijik ana? Kayane jik ana, mung wae kabeh ora perlu ngarani lan uga mbiji liyan. Lumantar tulisan BENINGE EMBUN ESUK ing dina iki, payo mulih lan nyawang awake dewe-dewe, apa tumindak sing ate dilakoni, nembe dilakoni lan arep dilakoni kuwi klebu NGURIKI liyan apa  ora NGURIKI liyan. Kabeh sing isa mbiji mung awake dewe-dewe, mbiji liyan malah tumiba ing kahanan NGURIKI, merga lyan ora ngerti apa kang dumadi ing njeroning batin wong liya, mula aja gampang mbiji lan sakbanjure NGURIKI cikben marem kekarepane.

 

“Lik, lha kok njenengan wingi kae jan-jane milih dadi seksi perlengkapan pas rapat pitulasan kae?” Takone Dalijo marang Lik Ndoleng.

“Haiyah, kuwi mergane pengin cedak karo Wasti Jo, mumpung Markun sibuk neng kantore..” Kang Solebo malah sing nyauri.

“Duss..ora ngono Bo..aku isaku mung ewang-ewang, mula aku siapku neng seksi perlengkapan..”Wangsulane Lik Ndoleng.

“Weh, kuwi klebu Urik lho Lik, lan tumindak kuwi klebu NGURIKI Kang Markun…merga paklik ngarah senenge dewe kanthi ngrugekake Kang Markun” Dalijo njajal menehi pangerten marang Lik Ndoleng.

“Jebule rung kapok Lik, wingi konangan yu Trinil, jik ngarah NGURIKI kang Markun wae..” Iin njedul sinambi nggawa kopi panas lan kacang godog.

“Duss..konangan meneh…!!” Batine Lik Ndoleng.

 

Mbah’e..

DIUJA

 

Kemis Wage 11 Agustus 2022

BENINGE EMBUN ESUK

Yesaya 2 : 5-11

Jabur Jabur 81 : 1-2,8-19

Ibrani 10 : 26-31

“Banjur DAKUJA supaya nglakoni karepé atiné kang wangkot; karebèn padha nindakaké apa sing dirancang manut karepé dhéwé!

Jabur 81:13

 

Tembung DIUJA kuwi linggane Uja, tegese ucul utawa tanpa tali. Mula saka kuwi tegese tembung DIJUA kira-kira mengkene : kahanan kang bebas tanpa tali pangikut, kahanan ucul lan  bebas nglakoni apa wae. Diuja kuwi memper tegese kaya tembung diumbar, yakuwi diuculake saka kendhang cikben bebas sak-paripolahe. Kang kudu dimangerteni sakliyane ana tembung DIUJA ana uga tembung DAKUJA, kang tegese pawongan kang menehi kahanan DIUJA. Paribasan ana pawongan kang nduweni kewan kayata sapi, sing nduwe karep Nguja kuwi sing nduwe lan kewane kang DIUJA, diculake cikben bebas.

 

Bab kahanan Uja Pangujan kuwi nate dadi pokok undheran piwulange kitab  suci, cethane neng kitab Jabur bab 81 ayate 13. Kitab Jabur 81 kuwi anggitane Asaf, salah sawijining pawongan waskita kang urip ing jaman kang cecaketan karo Duwd,mula arang sing ngerti yen sakliyane Dawud ana uga kang nganggit kitab jabur, salah sijine ya Asaf iki. Manut Asaf. ana wektune Gusti Allah NGUJA  marang menungsa, ngetogke sakparipolahe. Celakane, sing DIUJA ora rumangsa,  malah sansaya gembelengan kaya bener-benera dewe ing saklumahing bumi. Pepeling saka apa lan sapa wae mung dimbelgedesake. 

Kaya kang tinulis ing Jabur 81 ayat 13, ing kana cetha paseksine Asaf, “ Banjur DAKUJA supaya nglakoni karepe atine kang wangkot….” Dadi yen ana sing tumindak adigang-adigung kamangka wis dielikake aja daksiya marang liyan sing wis ngakoni salah lan lupute, sanadyan kuwi katone abdine Gusti, kuwi sejatine nembe nampa kahanan pangUJAn saka Gusti. Kuwi kahanan kang nate diprangguli dening Asaf, njur ditulis lan tumekane saiki dadi piwulang apik.

 

Ing jaman saiki babagan DIUJA kuwi ya ijik lumaku, ana sing nalika rumangsa nduweni pangwasa njur adigang-adigung lan adiguna. Emane, ana kalamangsane liyan, wong okeh utawa masayarakat sing dadi tamenge. kamangka kerep masyarakat ora ngerti babarblas. Saiki wis tuwuh penemu yen karepe wong okeh kuwi mesti bener, kayata nalika ana maling pitik kang kecekel, wong sakdesa kayane nduweni hak nuthugi,nyadhuki,ndugangi lan sing cetha NATONI, kamangka sing dicolong dudu pitike. Hukum kaya-kaya pancen NGUJA cikben menungsa MAREM ngayahi kareping atine. Ananging kudu dieling, isa wae kuwi pancen DIUJA dening Gusti, lan bebendhuning urip wis cumawis ing wektu kang wus cedhak banget. Mulane, sing padha ngati-ati!!! Pawongan kang dadi sasaran wutahing gethingmu kuwi ana sing momong, sanadyan mung meneng wae.

 

“Wingi critane wong sing konangan njupuk jambu neng kebon buah kae piye Jo? Apa siddha remuk diajar wong sakokehe?” Takone Lik Ndoleng marang Dalijo.

“Iyo Lik, mesakake banget. Wong anggone njupuk tanpa nembung ya merga kahanan, sing nduwe kebon pelite ngeram, kamangka wong kuwi butuh kanggo obate anake sing nembe kena demam berdarah, lumantar jambu kuwi, isa marasake” Semaure Dalijo, sinambi nyumet Sampoernane sing nukokne Lik Kempling.

“Mbuh Lur, kang saiki okeh menungsa sing NGUJA kekarepane dewe, ora nduweni urusan kok malah melu nggebugi, melu ndupaki lan melu NATONI,  kamangka sing ela-elu lan sing rumangsa nduweni pangwasa kuwi ya kayane beragama lho..” Semaure Kang Solebo, sinambi nyruput kopine.

“Sing padha Eling lan Waspada Lur, aja nganti keduga NGUJA kekarepaning ati,  sing wening la sabar..sing wicaksana..aja rumangsa nduwe pangwasa njur sakwiyah-wiyah karo liyan kang dianggep salah, kaya wong sing kepepet njupuk jambu kuwi..” Lik Ndoleng sajak wicaksana nanggepi kahanan.

“Tumben wicaksana Leng?” Takone kang Solebo.

“Bar kepthuk Yu Wasti ndek mau awan, pas ngeterake blanjane Iin kok Kang..mula ya sumeh..mbuh mau njawil apa ora..” Unine Dalijo.

“Denggelmu atos cahhh!!!” Lik Ndoleng sajak gembreneng.

 

Mbah’e..

NGLAKONI KEWAJIBANE

 

Rebo Pon 10 Agustus 2022

BENINGE EMBUN ESUK

Yesaya 24 : 14-23

Jabur 11

Lukas 12 : 41-48

Begja temenan abdi sing sarawuhé bendarané ketemu nglakoni kewajibané.

Lukas 12 : 43

 

Akeh gegambaran kanggo nggambarake urip neng ngalam-ndonya iki, ana sing ngarani kaya wong mampir ngombe, ana sing ngarani lelakuning urip nggayuh klanggengan, ana sing ngarani wektu kanggo reresik cikben isa manunggal sejti karo Kang Maha Langgeng lan an uga sing ngarani yen urip neng ngalam-ndonya iki Wayah Pasuwitan. Jenenge wae pasuwitan, mesti ana sing disuwitani lan kuwi isa kinaranan bendara. Ing penemu iki njur ana rong perkara, abdi lan bendara. Bendara sing disuwitani menungsa neng ngalam-ndonya iki ya Gusti Allah, kang wus nitahake.

 

Minangka abdi, mula ana kang dadi kewajibane marang bendarane,yakuwi ngayahi sabarang kang dadi prentahe bendarane. Babagan iki nate dadi piwulange Gusti Yesus kang tinulis ing Injil Lukas. Neng kana Gusti Yesus menehi piwulang babagan tanggungjawab. Nalika kuwi Gusti nembe memulang babagan tanggungjawab,lan Petrus takon kudu kepiye ngayahi tanggungjawab kuwi.Ing kana jebul ana sing wegah nampa tanggungjawab, ananging gelem nampa bebulihe, ana uga sing kebablasen nglakoni tanggungjwabe. Paribasan mung kejibah ngrumat limang perkara, lha ana abdi sing saking semangate njur thakah-thakah ngumat selawe tanggungjawab. Absi kuwi kumlungkung merga rumangsa cedak karo bendarane, rumangsa luwih bendara tinimbang bendara.

Nemahi kahanan kang kaya mengkono kuwi, Gusti ngelikake, Begja temenan abdi sing sarawuhe bendarane nglakoni  kewajibane. Mung winates nglakoni apa kang dadi kewajibane, ora luwih lan ya ora kurang. Lha yen kurang ya ora pener, uga yen kuwih, merga sing nglakoni sing luwih kuwi rumangsa dadi bendara, sanadyan mung abdi.

 

Ing jaman saiki babagan wegah ngayahi kewajiban lan ngayahi kewajiban ngluwihi tanggungjawabe kuwi ya ora sithik. Kabeh kepengin linuwih, malah kepara kepengin padha karo Gusti Allah. sing kudu dieling, menungsa tumiba ing dosa sepisanan kuwi merga kepengin dadi padha kaya Gusti Allah. Lan ing jaman saiki, menawa ana abdi sing ngayahi ayahan ngluwihi kewajibane, kuwi isa kinaranan  memper tumindake rama Adam lan ibu Kawa nalika tumiba ing dosa. Mulane, sing padha ngati-ati, aja endha saka kewajiban lan uga aja ngayahi ngluwihi kewajiban.

 

“Wah, saiki bareng munggah dadi panitia pitulasan, sajake Sukirmah sansaya nggleleng Jo.. ngakon rapat wae kaya tentara..” Sambate Lik Ndoleng nalika jagongan neng Lincak Sor Talok pas mulih seka rapat pitulasan.

“Cen padha sing takrasakne Leng, biyuh…saiki lagake ngungkuli presiden…kamangka mung ketua panitia pitulasan..mendhah-neo yen dadi lurah, mesti ndase sansaya gede..”Kang Solebo melu urun rasa-pangrasa.

“Pacen okeh wong sing seneng dialem, seneng ngayahi ngluwihi kang dadi wajibe. Lan manut kitab suci, dosa wiwitan menungsa kuwi nalika menungsa kepengin padha karo Gusti Allah.”Dalijo ya melu nimpahi rembug.

“Lha iya, Sukirmah kan biasane mung kesuSU miKIR oMAH,lha bareng didapuk dadi panitia..lagake jian…” Grundelane Lik Ndoleng.

“Haiyah, ora mung Sukirmah Leng, okeh wong sing seneng ngayahi ayahan kang sejatine dudu kewajibane, rumangsa isa njur kabeh dikwasani…welingku..sing padha ngati-ati..wae..” Unine Kang Solebo.

 

Mbah’e..

BARES

 

Selasa Pahing 9 Agustus 2022

BENINGE EMBUN ESUK

BARES ING ATI

Yesaya 24 : 1-13

JAbur 11

Ibrani 11 : 27-28

Merga Allah iku adil, lan rena marang kabeneran; wong sing barès atiné bakal ndeleng marang wedanané Allah. Jabur 11: 13

Tembung BARES  ing jaman saiki pancen arang sing  migunakne, mula ya ora nggumunake yen sithik sing ngerti tegese tembung kuwi. Sanadyan arang sing nggunakake tembung BARES, ananging  merga nduweni arti sing jero ing tata basa jawa, mula neng seratan-seratan adi-luhung jik dienggo. Lha jan-jane apa ta tegese tembung BARES kuwi? Tembung BARES kuwi yen ing basa ngindonesane Tulus, tumindak ing sakjroning urip tanpa ngangkah bebulih kang awujud materi utawa pepujan. Tulus kuwi isa uga tumindak kang dilakoni tanpa mikir piwales ing tembe mburine. Wah, apa ya ana menungsa sing bisa tumindak kaya mengkono kuwi, lha wong saiki kabeh pinetung bakulan utawa malah pinetung main judi,aku udu satus yen isa ya kudu antuk rongatus!! Cikben luwih wening mangerteni piwulang bab BARES, payo saiki nyinau saka critaning kitab suci.

Tembung BARES kuwi nate tinulis neng kitab Jabur, neng kana ditulis minangka paseksining urip kang dialami dening  Dawud kang nate dadi raja gung binantara neng ngisrael. Dene surasane tulisan mengkene, “ Merga Allah iku adil, rena marang kabenenran, wong sing BARES atine bakal ndeleng marang wedanane Allah” . Cetha banget yen sejatine Gusti Allah kuwi isa sideleng, isa disawang, isa disrawungi dening titah, sauger nduweni ati kang BARES. Lha kepriyen gegembarane ati menungsa kang BARES kuwi? Sing wani nampa sabarang kahanan kanthi blaka-sutha, sing wani ngakoni masa kang wus kawuri sanadyan ala lan peteng kanthi blaka. Wong sing BARES atie kuwi dudu wong sing ora nate salah, ananging wong sing wani ngakoni salah, wong sing BARES atine kuwi dudu wong sing katon sugih mblegedhu, ananging wong sing isa ngrasakake kasugihane Gusti kang wus ginelar ing jagad ginelar iki.

Jabur 11 kuwi anggitane  lan paseksine Dawud, lan mbokmenawa sing maca tulisan BENINGE EMBUN ESUK iki wis irsa babagan sejarah uripe Dawud, kang nate salah lan luput, kang nate mblangsar lan kleru milih dalan. Ananging sakwise eling lan sadhar lan uga wani  nampa “carae Gusti nresnani”, njur isa dadi pawongan kang bisa NDELENG WEDANANE GUSTI ALLAH. Lha endi buktine, endi potone? Pengalaman bab NYAWANG WEDANANE GUSTI ALLAH pengalaman batin, lan buktine lumantar urip pedinan. Sing cetha, sakwise nampa samubarang pepenget saka Gusti Allah, Dawud banjur dari resik atine, dadi wong kang nduweni ati kang BARES, lan isa nyawang Wedanane Gusti Allah. Sakwise kuwi, Dawud njur nganggit  kitab jabur kang dadi warisan suci tekan wektu iki.

“Jo, apa tenan jare Solebo wis tau kepethuk Gusti Allah? Kok sajake aku jik mangu-mangu ya…” Unine Lik Ndoleng nalika bengi kuwi jagongan neng Lincak Sor Talok.

“Weh, babagan mangu-mangu kuwi hakmu Lik, dudu hakku. Lan babagan Kang Solebo kepethuk utawa isa nyawang Gusti Allah kuwi ya babagan pengalaman batine dewekne. Ora usah menyangsikan utawa njaluk bukti pisik. Buktine lumaku bareng lakuning wektu Lik…” Semaure Dalijo sinambi nyumet udud’e,.

“Weh, kok saiki awakmu sajak wicaksana temenan Jo, bar mangan apa kowe kuwi…apa bar ngombe menyan?” Lik Ndoleng sajak gumun karo Dalijo, sing katon sansaya wicaksana.

“Haiyah, wicaksana lan ora kuwi kari olehmu nyawang Lik. Yen anggone Paklik nyawang kinantenan ati kang buthek, ati kang reget, netraning batin ya melu reget lan kabeh dadi blawur, kabeh katon elek..”Semaure Dalijo meneh, sinambi lier-lier, merga ewektu kuwi ademe pol tenan lan kanca-kancane sing kerep jejagongan ora njedul, mbuh wis kemulan sarung apa malah kemulan liyane.

 

Mbah’e..

 

SALINGUNA

 

Senen Legi 8 Agustus 2022

BENINGE EMBUN ESUK

WONG SING JIK SENENG NGANGGO PEDHANG

Yesaya 2 : 1-4

Jabur 11

Ibrani 11 : 1-7

Panjenengané bakal ngadili prekarané bangsa-bangsa, sing padha prekaran lan ndhawahaké putusané. Mulané pedhang-pedhang digemblèng kadadèkaké kajèn *kajèn: landheping luku.* sarta tumbak-tumbaké digawé arit. Bangsa-bangsa bakal padha ora perang menèh, lan ora ana sing latihan perang-perangan.

Yesaya 2 : 4

 

Saka jaman kuna makuna, sing jenenge Pedhang lan Tumbak kuwi pancen gaman kanggo perang, lan sing jenenge perang  kuwi mesti ancase ngalahake mungsuhe. Ora ana critane wong maju perang pengen kalah, mesti pengen menang. Dene  ing jagade perang kuwi sing jenenge menang kuwi nalika isa nelukake mungsuhe, malah kepara mateni lumantar gaman kang awujud pedhang lan tumbak kaya kang tinulisan ing ndhuwur. Lha njur kepriye bacuting crita babagan Perang nalika gaman kang awujud pedhang lan tumbak SALINGUNA didadekake Landheping Luku lan Tumbak didadekake Arit? Apa iya arep perang meneh?

 

Urip tentrem rahayu tanpa ana peperangan kuwi mbokmenawa kang dadi pengarep-arepe wong okeh, lan gegambaran urip tentrem dalam rahayu kuwi nalika apa kang mbiyen dadi gaman kanggo mateni mungsuhe SALINGUNA dadi piranti kanggo nggarap sawah lan tegale cikben ngetokake pepanenan kang isa kanggo cukuping kabutuhan pangan.

Pangandikane Gusti Allah lumantar nabi Yesaya marang Yehuda lan Israel cetha banget, yen kahanan tentrem kuwi nalika wis  ora ana perang lan apa kang dadi gegamaning perang SALINGUNA dadi piranti kanggo ngolah lemah cikben ngetokake pepanenan lan nyukupi butuhe urip para titahe Gusti Allah.

 

Lha yen saiki kan wis ora ana Perang kang nggunakne Pedhang lan Tumbak kanggo natoni utawa memateni liyan? Njur kepiye cak-cakane? Pancen saiki perang  kang nggunakne Pedhang lan Tumbak wis ora usum, ora njamane meneh, ananging babagan memungsuhan jik wae ana. Ing jaman saiki Pedhang lan Tumbak kuwi ngawujud ing dayaning gething utawa sengit ing antarane siji lan sijine. Lan menawa dirasakne landheping pedhang lang tumbak kuwi  jik kalah karo landheping sengit, gething, iri, srei lan kabeh daya negative kang dumunung ana ing uripe saben titah kang kinaranan menungsa. Njur piya carane cikben daya negative utawa energy negative kuwi bisa migunani? Ya kaya ndadekake SALINGUNA pedhang lan Tumbak dadi Landheping Luku lan Arit, payo saiki kabeh daya negative kang ancase mung ngrusak lan ngremuk kuwi digawe daya positif kanggo mbangun lan ngayoni, kanggo tulung tinulung lan sangkul sinangkul.

 

Lha apa mayar ta gawean cikben isa klakone SALINGUN kaya critane nabi Yesaya? Gampang lan angel kuwi mung gumantung karep, yen wis ana karep, kabeh kang angel rinasa gampang, kabeh kang abot rinasa entheng, kabeh kang adoh rinasa cedhak lan sakbanjure, apa wae dadi kepenak nalika ancase mung mbangun lan ndandani. Wis ngono ndisik, arep melu jagongan neng Lincak Sor Talok, wis suwe ora mrana.

 

“Jo, manut penemumu piye. apa mathuk karo omongane Solebo, yen urip iki kudu lung-tinulung lan sangkul-sinangkul? Yen aku durung mathuk, pomeneh tetulung sing manut pangrasaku wis natoni uripku..”Lik  Ndoleng miwiti rembugan babagan sing sajak rada sengrius.

“Aku amat-sangat mathuk Lik, urip kuwi ora dikon ngrusak, wong sig rusak wae kudu didandani, mula ya kudu sangkul-sinangkul…”Wangsulane Dalijo sinambi nyumet udude.

“Kae wacanen BENINGE EMBUN ESUK, ana crita bab SALINGUNA, Pedhang lan Tumbang dadi Landheping Luku lan Arit, ayo ngowahi kabeh kang ancase ala dadi apik, kanggo mbangun urip cikben sansaya kebak tentrem rahayu..”Unine Kang Solebo, sinambi mbukak jisamsune sing sajak jik wutuh.

“Wah, aku gek sadhar lur, jebul saksuwene iki aku kleru, luput. Merga ngrumati rasa serik lan srei ing njero ati. Wis, saiki arep tak SALINGUNA cikben dadi gaman kanggo kabecikan..”Grenenge Lik Ndoleng.

“Ndang njaluk ngapura karo Kang Markun,  merga ndek kapan kae jik kober njawi Yu Wasti..”Iin njedul sinambi nggawa kopi panas.

“Jindullll…cah siji iki..mestiiiii…” Swarane Lik Ndoleng sajak kagete poll.

 

Mbah’e..

NGLUMPUKAKE BANDHA

 

Setu Wage 6 Agustus 2022

BENINGE EMBUN ESUK

KUNCI BANDHA SWARGA

Yesaya 1 : 2-9, 21-23

Jabur 50 : 1-8,22-23

Matius 6 : 19-24

“Aja padha nglumpukaké bandha ana ing donya. Awit bandha donya kuwi bisa rusak déning rayap lan renget, lan kena dicolong maling.”

Matheus 6 : 19

 

Ora sithik wong  sing padha bingung babagan BANDHA donya, apa meneh babagan NGLUMPUKAKE lan sakbanjure nduweni. Lha kok bingung mergane apa? Paling ora bingunge kuwi mergane ada pangandikane Kitab Suci, kang surasane menggak anggone padha NGLUMPUKAKE BANDHA ing ndonya, merga kabeh sing asipat kadonyan kuwi ora langgeng. Lan kang njalari bingunge kuwi amarga urip neng ndonya kuwi ya butuh srana lan kurang luwihe kang dadi srananing urip kuwi BANDHA.

 

Sejatinya kang dadi kersane Gusti Allah kuwi ora menggak anggone menungsa nggolek lan  NGLUMPUKAKE BANDHA, ora, babarblas ora, amarga  Gusti ya luwih pirsa yen kabeh kuwi pancen sranane urip neng ndonya. Mung wae ora sithik menungsa sing njur lali karo sing dadi  Sumbering BANDHA , malah keblinger mung wanuhe marang BANDHAne. Babagan sing kaya mengkene iki sing ora dadi keparenge Gusti Kang Akarya Jagad, Gusti Kang Murba Ing Dumadi.

 

Sakdawane jaman, pancen menungsa kuwi kerep sulap karo gebyare BANDHA Donya lan amarga sulap kuwi njur lali karo sangkan paraning urip lan uga asal usule BANDHA kuwi.Amarga sulap karo BANDHA Donya, mulane ora sithik menungsa sing nguyak BANDHA Donya nganti tega marang sakpepadane lan ora mung tega, malah tumeka ing kahanan TEGELAN kaya kang tinulis neng BENINGE EMBUN ESUK dina kang kepungkur. Njur kepiye cikben tetep isa nguapa BANDHA lan kuwi jik dadi kersane Gusti Allah? Mayar, papanake wae BANDHA mung minangka srananing urip, dudu tujuanne urip. Yen kuwi wis isa dilakoni, BANDHA Donya sepira wae mesti dadi kersane Gusti, merga mung minangka srana kanggo nglakoni urip.

 

Yen ngerti sakpepadane kesrakat ananging mung meneng wae lan malah dipoyoki dadi sesawangan, kuwi durung isa mapanake BANDHA Donya minangka srananing urip kanggo ngluhurake Gusti,ananging ndadekake BANDHA Donya minangka tujuanne urip..

 

“Jo, wingi kae aku karo weruh ana sing ngopek degan nggonanmu sing  pinggir kali, kulon kluwih kae” Unine Lik Ndoleng Nalika ngeyup jejagongan neng Sor Wit Pelem tegal kulon ngomah.

“Weh, iyo Jo, aku ya weruh, ananging ngepasi aku nyunggi pakan sapi,mula ora tak gatekne” Pakde Komandan Darto melu urun rembug.

“Mbok ben wae ta Lik, Dhe. Niku lak nggih tiyang betah, mulane nalika mendhet nggih ben wae..” Semaure Dalijo sinambi nyumet udud linthingan dewe.

“Weh, kuwi klebu BANDHA lha Jo, saiki regane degan lumayan lho..” LIk  Ndoleng sajak esmosi.

“Ben wae Lik, BANDHA Donya kuwi mung srana, dudu tujuan uripku,mula nalika ana sing mbutuhake, ya ben..aku malah seneng isa andhum berkahe Gusti, sanadyan ora nembung, ora apa-apa,mbokmenawa ora kober nembung..” Semaure Dalijo sareh.

“Wah, yen kabeh penemune kaya awakmu, jagad iki kalkon tentrem  rahayu Jo..”Ngendikane Komandan pakde Darto, sinambi ngeriki kimpule sing kawit mau dibakar neng cedak galengan.

 

Mbah’e..

TEGELAN

 Jemuah Pon 5 Agustus 2022

BENINGE EMBUN ESUK

DAYANING WELAS ASIH

Yesaya 9 : 18-10:4

Jabur 50:1-8, 22-23

Para Rasul 7 : 1-8

Paukumané Pangéran, Allah Kang Mahakwasa sing ngobong tanah iki, lan wong-wongé kadadèkaké pakané geni. Wong padha tegelan; sing siji ora ngéman karo sijiné.

Yesaya 9 : 18

 

Sakdurunge mbacutake rembug lumantar tulisan, kudu dilempangake ndisik pangerten bab tembung TEGELAN, merga hora ana pilihan hurup, mula isa dadi salah tapsir. TEGELAN kuwi artine pawongan kang nduweni watak tega marang liyan, lan dudu ngarani omah kang jogane ora lemah meneh merga wis nganggo Tegel utawa Jobin. DAdi saiki wis cetha ya lurr, babagan tembung TEGELAN kuwi artine pawongan kang watak’e tega marang liyan  lan babar blas ora mikir marang liyan.

 

Ukara TEGELAN kuwi nate dingendikakne Gusti Allah lumantar nabi Yesaya nalikane bangsa ngisrael wangkot lan angel dkandani. Amarga wangkot lan angel dikandani, mulane uripe sakarepe dewe, ora isa dikendaleni lan isa murup kaya geni NGLAGAR  apa kang ana ing kiwa tengene. Kahanae wong pawongan sing ora manut kersane Gusti kuwi sakliyane isa awatak geni kang isa ngobong uga nduweni watak TEGELAN, tega marang liyan . Manut kita Yesaya, nalika antuk paukuman saka Gusti Allah, menusa (wong) padha TEGELAN, sing siji ora ngeman karo sijine.

Kahanan kang lumaku nalika pawongane padha TEGELAN mesti nggegirisi banget, polah-tingkahe ora dikendaleni dening beninge embun katresnan lan mesti sing bakalan kedadeyan ora apik.

 

Apa watak TEGELAN tumrap menungsa kuwi ya jik ana tekan ing jaman saiki? Yen babagan kuwi,  sumangga para sedulur pribadi sing kagungan hak kanggo mbiji, lumantar tulisan iki aku dewe ya ora nduweni hak kanggo mbiji. Mung wae, ana kang isa kanggo kaca pangilon, yakuwi nalika ana sing nembe nampa panandhang lan ora ditulungi, malah dipoyoki lan uga mung disawang, kuwi tandhane yen watag TEGELAN kuwi wus ngwasani.

 

“Nyawang apa Jo, kok sajak serius tenanan kuwi?” Takone Lik Ndoleng nalika ngeyup neng Sor Wit Pelem neng Tegalan kulon ndesa.

“Kuwi lho Lik, ana Ula mburu Kodok nganti sakkemenge, lan sakwise kena njur diuntal tanpa rasa welas babarblas” Semaure Dalijo sinambi mbenerake linthingane sing sajak durung bakoh.

“Aja meneh Ula sing mung kewan Jo, lha saiki kuwi ana menungsa sing ngluwihi..TEGELAN marang liyan..” Saka papan rada adoh Pakde Darto Komandan nyauri, sajak lagi ndukiri Kimpul, meh didadekne kripik.

“Weh, jebule kae swarane komandan Darto ta? Saiki kok aktip temen Ndan?” Takone Lik Ndoleng.

“Iya Kang Ndoleng, aku seneng melu ngangsu kawruh saka mbahe neng BENINGE EMBUN ESUK, suwe ora njedul, jebule mbahe jik lelaku batin, saiki sajake wis “on” meneh” Samaure Pakd Darto sinambi ngresiki Kimpul sing gluprut lemah.

“Yen TEGELAN kuwi kaya Lik Ndoleng, tega ngapusi Kang Markun, mung merga pengen njawil Yu Wasti” Saka Sisih wetan, njedul Iin ngirim sarapan lan melu semaur.

“Dusss..cah siji iki njedul, klakon remuk aku..” Unine Lik Ndoleng Lirih, sajak pekeweuh dirasani sing maca tulisan iki.

 

Mbah’e