NGRATAAKE

 

Senen Legi 6 Desember 2021

BENINGE EMBUN ESUK

NGRATAKAKE DALAN LURR

Yesaya 40 : 1-11

Jabur 126

Rum 8 : 22-25

Ana swara kang nguwuh-uwuh: “Nyawisna margi kagem Sang Yehuwah ana ing pasamunan, ngencengna dalan gedhe kagem Allah kita ana ing ara-ara samun! Saben ledhokan kaurugana, tuwin saben gunung lan tengger kawaratakna; tanah kang ana tengger-tenggere kadadekna tanah warata, sarta tanah kang mendhak mandhukul kadadekna papan lempar..”

Yesaya 40 : 3-4

 

Tembung NGRATAKAKE kuwi linggane rata, kang tegese ora ana kang nggronjal, isa uga diarani alus. Mula saka kuwi, NGRATAKAKE tegese tumindak kang dilakoni kanthi sengaja lan sadhar supaya kahanane dadi (luwih) rata utawa alus. Jenenge wae tumindak, mesti wani ngetohake tenaga, pikiran,bandha lan uga rasa. Sakwise kahanan dadi rata, sakumpamane kuwi dalan, mesti luwih kepenak nalika diliwati. Lan nalika sing ngliwati ngrasakake kepenak, mestine nduweni rasa seneng lan pungkasane ngaturake panuwun marang kang mranata urip, beda karo yen dalane nggronjal, mesti sing liwat kurang ngrasakne bungah.

 

Bab NGRATAKAKE kuwi winulang ana neng kitab suci, mirunggan neng kitab Yesaya 40. Ing kana ana dhawuhe Sang Yehuwah kang keprungu dening nabi Yesaya, cikben nyawisake dalan kanggo Sang Yehuwah. Dalan kang kudu dicawisake mau diupayakne cikben rata lan ora nggronjal. Sing puthuk dikepras, lansing mblegong diurug, kabeh  supayane dadi rata. Lha panggawean ngurug lan ngepras kuwi isa kinaranan NGRATAKAKE dalan. Jenenge wae NGRATAKAKE dalan, mesti butuh tenaga, butuh pra-beya, butuh wektu lan sakpanunggalane. Sing cetha butuh pangorbanan kang ora sithik gunggunge.

 

Lumatar BENINGE EMBUN ESUK ing dina iki, piwulang apik kang isa minangka pasinaon yakuwi bab nyawisi dalan kang rawuhe Gusti. Dene dalam kuwi isa uripe awake dewe iki, lan dalan kang nggronjal kuwi ya kahanane urip iki. Isa diibaratake, puthuk sing kepras kuwi kaya rasa gumunggung, angkuh, sombong, kemlinthi, sok semuci-suci, ngasorake liyan. Kuwi kabeh kang kudu dikeprasi,diratakake ben apik, ben mulus-lus kaya artis sing anu kae..hehe. Dene wujud’e ledhokan ing urip iki, kayata rasa asor, rumangsa ringkih terus, rumangsa sekeng utawa kami sekengen, mindher lan sakpanunggalane, kuwi kabeh kudu dirugi lan nalika ana sedulur sing raisa utawa rawani ngurug dewe, ayo direwangi aja malah dipoyoki lan ditinggal dewean. Kabeh kudu sangkul-sinangkul cikben dalane rata, mula kabeh kawean kanggo ngapikake dalan kuwi kinaranan NGRATAKAKE. Gampang apa angel ngayahi gawean NGRATAKAKE kuwi?Kari gelem apa ora, yen gelem, angel kaya ngapa mesti klakon, ananging yen wegah, mayara kaya ngapa mokal bisa klakon.

 

“Wingi sore seka ngendi Jo, saka serius temenan?” Takone Lik Ndoleng marang Dalijo, nalika jagongan neng Lincak Sor Talok.

“Seka ngancani Saimun, nembe ngadepi kahanan abot Lik..” Semaure Dalijo.

“Lha apa ora duwe sedulur, kok sliramu sing wong liya, mung tangga sedesa malah melu cawe-cawe ngagas kahanane Samun?” Takone Lik Ndoleng meneh.

“Lha apa luput aku tumindak ngono Lik? Apa kleru aku ngancani Saimun kang nembe semplah ing manah? Sedulur kuwi durung mesti gelem ngerti kahanan Lik, paling njedule neng kahanan padang, kaya wewayangan..nalika kahanan peteng lan rekasa, ditinggal…” Semaure Dalijo, sinambi nyumet MLDne.

“Bener Leng, kabeh kuwi sedulur. Lan sedulur kuwi ora mung rembug utawa trah, sedulur kuwi sing sapa gelem melu nyangga sanggane liyan…sing wani cucul lan berkorban. Apa gunane ngibadhah ndakik-ndakik yen tumindake blas ora pener..Iki malah kahanan kang pas kanggo netepi piwulange kitab suci, NGRATAKAKE dalane urip ben rawuhe Gusti neng urip lan atine dewe dalane mulus, ora nggronjal merga rasa srei,drengki, medit,pelit,kumlungkung lan sakpanunggalane..”Sesorahe Kang Solebo.

“Biyuh, kencokan roh apa Bo, kok wasismu ngeram. Yawis, kene, njaluk ududmu..nggonku entek..”Unine Lik Ndoleng sinambi ndudut jisamsune Kang Solebo.

“Pancen ramodal wae Lik…koken rembug..”Unine Iin, saka pawon  sinambi ngejoki kopi.

“Duss..cah siji kae nyoal-nyael wae…” Grenengane Lik Ndoleng.

 

 

@semesta