Rebo
Legi 22 Desember 2021
BENINGE
EMBUN ESUK
Mikha
4 : 1-5
Lukas
1 : 46b-55
Efesus
2 : 11-22
“Nanging saiki kowe ana ing Sang Kristus
Yesus, kowe kang nalika samana “adoh”, saiki wus dadi “cedhak” marga saka rohe
Sang Kristus. Marga iya Panjenengane iku tentrem-rahayu kita, kang wus
manunggalake sakaro-karone dadi siji lan kang wus ngrubuhake tembok singgetan,
yaiku sesatron,” Efesus 2 : 13-14
Yen
kepengen nggabungake barang loro utawa luwih cikben kraket dadi siji kuwi
mbutuhake LEM. Dene anane LEM kuwi isa digawe saka macem-macem bahan, sing baku
fungsine LEM kuwi kanggo ngraketake . Anane digawe kraket lan dadi siji, mesti
nduweni ancas utawa tujuan, yakuwi cikben luwih apik, paling ora kanggo sing
ngeLEM, sanadyan tumrap liyan durung mesti. Okeh conto barang kang pisah utawa
cengkar njur diwenehi LEM cikben dadi siji utawa nyambung maneh, tur ya mestine
nggolek LEM kang kwalitase apik, ora LEM kang ecek-ecek.
Lumantar
piwulange kitab suci kang marakne menungsa kang amarga dosa wus kapisah karo
Gusti Allah dadi kraket meneh, yakuwi katresnane Gusti Yesus. Mula isa diarani
yen katresnane Gusti Yesus kuwi wus dadi LEM kang ngraketake sesambungan ing
anatarane menungsa minangka titah karo Gusti Allah minangka Sangkan Paraning
Tumitah. Mula saka kuwi, awit saka katresane Gusti Yesus, kudune kabeh kang
percaya marang Panjengane ora kena tukar-padu, ora kena gontok-gontokan mung
karana ngrumati kekarepaning kamanungsan.
Ing laying katresnane marang pasamuan Efesus, rasul Paulus ngelingke bab
katresnane Gusti Yesus kang wus dadi LEM
kang nggathukake, kang nunggilake, kang ngraketake sesambungan. Merga
katresnane Gusti kuwi wus ora ana sesinggetan meneh ing atarane suku bangsa lan
kahanan kang beda liyane, kabeh rumaket, kraket dadi siji.
Lha
ing jaman saiki apa dayane LEM merga katresnane Gusti Yesus kuwi ijik lumaku?
Ya tetep ijik lumaku, sanadyan tantangan ngruncah lan medot sesambungan katresnan
kuwi ya okehe ngeram. Amarga hardening kanepson menungsa kerep lali marang
jatining katresnan, mula njur ngilangi daya kraket saka LEM kang nunggilake.
Amarga drengke, srei lan srakah, LEM katresnan saka Gusti ilang dayane, lan wus
ora ngraketake sesambungan. Njur piye carane nguripake dayane LEM katresann
saka Gusti meneh? Payo ngalahake utawa nelukake sabarang pepinginan daging
utawa kamanungsan, merga kuwi mesti cengkah karo kersane Gusti. Kabeh
kekarepaning manungsa kang mung ngangkah seneng lan mareme dewe, kuwi mesti ora
cundhuk karo kersne Gusti, kuwi tegese ngilangi dayaning LEM kang ngraketake.
“Leng,
kenapa ora gelem dadi panitan natal?” Takone Kang Solebo marang Lik Ndoleng
nalika cangkrukan neng Lincak Sor Talok, ngepasi grimis ngricih.
“Wegahh…lha
dadi panitia mung kon dadi kongkonan, saben usul ora digagas.Sing digagas mesti
sing sugih-sugih..” Wangsulane Lik Ndoleng sajak erosi..opss.emosi ding.
“Lha
yen mung bab kaya mengkono we ae mutung, nengndi dayaning katresnanmu kanga
sale saka Gusti Leng?” Takone Kang Solebo meneh, sajak serius.
“Bener
Kang Solebo Lik, aja nganti katresnan peparinge Gusti kang ngraketake, kaya
piwulange mbahe neng BENINGE EMBUN ESUK dina iki, ora ana gunane, katresnan
kang sejati kuwi kaya dayane LEM,kang ngraketake..ora misahake..” Dalijo melu
urun rembug.
“Kowe
kabeh mung nyawang, aku sing ngrasakne..”Alesane Lik Ndoleng meneh.
“Kabeh
tau ngrasakne, tau ngalami Leng..sing waras kudu eling…aja ngilangi dayane LEM
katresnane Gusti..” Kang Solebo nywara meneh.
“Kaya
cintamu karo Yu Wasti kuwi lho Lik,
sanadyan wis dadi duweke Kang Markun, sanadyan ngrasakne tatu, tetep wae
kraket merga ana LEM kang ngraketake…” Iin melu nimbrung sakwise mulih seka
latihan neng nggreja.
“Jindulll…kuwi
meneh! Tapi cen iya ding In…dewekne cen “, Unine Lik Ndoleng.
“Lhaaa,
raktenan ta…..Konangan saiki..” Unine Iin sajak sansaya sora, lan Lik Ndoleng
isin merga keprucut jujur karo sing dirasakne.
@semesta
Tidak ada komentar:
Posting Komentar