TARUNG

 

Senen Pon 10 Mei 2021

BENINGE EMBUN ESUK

Pangandharing Toret 7 : 1-11

Jabur  93

1 Timotius 6 : 11-12

“Nanging kowe, heh, manungsaning Allah, ngedohana iku kabeh, ngaraha marang kaadilan, kamursidan, kasetyan, katresnan, kasabaran lan budi sareh. Nglakonana TARUNGing pracaya kang utama, nggayuha urip langgeng, kang dadi underane anggonmu katimbalan sarta anggonmu nglairake sahadat kang bener ana ing ngarepe seksi akeh.” 1 Timotius 6 : 11-12

 

TARUNG, sanadyan tembung iki dudu tembung padinan kang katujokake marang donyaning menungsa,ananging wis padha ngerti apa kuwi tegese. TARUNG kuwi tegese tetandingan ing antarane rong pihak utawa luwih kang tujuan utawa ancase kanggo menang lumantar nelukake pihak liyane. Sakngertiku, tembung TARUNG kuwi kanggo bangsane kewan, kayata Pitik Jago kang TARUNG, mbuh kuwi rebutan panganan utawa “ Bidadari Perpitikan”. Sing cetha, inga sakjroning kahanan TARUNG, kabeh ngupayakne supaya isa menang lumantar ngasorake liyan, lan mbokmenawa istilahe para winasis kang sinebut “ win-win solution” ora dikenal kanggone sing nembe TARUNG. Pokok’e kudu menang! Titik.

 

TARUNG kuwi ana sing disadari, mulane dicawisake, ananging uga ana sing ujug-ujug utawa mendadak. Yen wis dicawisake tegese wis ngerti kahanane mungsuhe, mbuh kuwi kakuwatan apa kekurangane. Dene yen ujug-ujug, durung ngerti sepira kekuwatan lan kaya ngapa kekurangane.. Ing sakjroning kahanan TARUNG, kudu paham kahanan, paham kakuwatan diri lan uga mungsuh kang nembe diadepi, yen ora ngerti babarblas, ngalamat meh ajur-mumur.

 

Ana piwulange Kitab Suci, cethane neng surat pastorale rasul Timotius kang memulang bab TARUNG. Lho, njur mungsuhe apa utawa sapa? Manut Timotius, mungsuh kang kudu diadepi kuwi isa awujud blegering menungsa lan uga awujud daya kakuwatan ala kang isa nyokot lan marakne uripe menungsa dikuwasani dening kakuwatan ala kuwi. Mungsuh kang kudu diadepi ing TARUNG jaman saiki, mungguhing wong nderek Gusti kuwi, yakuwi njejegake kaadilan. Akeh kahanan kang ora adil, okeh wong sing senenge nggolek menange dewe, senenge nyalahake liyan tanpa mangerti kahanane. Gambang mitenah, sanadyan durung ngerti kahanane, kuwi kang kudu dilawan. Uga ana mungsuh kuwate ngeram kang kinaranan Sombong utawa Kemaki, kuwi jian kerep nggodha marang menungsa, supaya timuba ing kahanan kang kaya mengkono kuwi, kamangka welinge Gusti Allah supaya urip andhap-asor lan ora nggoleki menange dewe.

 

Manut piwulange Timotius, teTARUNGane iman ing jaman saiki kuwi kanggo ngener marang urip kang langgeng. Mula saka kuwi, ngerti mungsuh kang bakalanne diadepi penting banget. Aja nganti malah ginecak dening mungsuh kuwi. Sing uga kudu disadari, mungsuh kuwi malah memba dadi pawongan utawa kahanan kang apik, keton sumeh, alus lan sakpiturute. Ananging aja kleru, sanadyan ketoke mesem, ananging ing kuwi sok nggegem racun kang sakwayah-wayah isa disawurake. Sing cetha, payo padha dingati-ati ngadepi urip neng jagad kang sansaya Gerang umure iki. Gunakne gaman sing pas, Pedanging Kesabaran,Mimis Katresnan, Panah Kesabaran, Tamenging Kabeneran kanthi gegondelan unen-unene Lik Ndoleng, becik ketitik ala ketara.

 

“Bo, aku krungu-krungu, jare wingi ana sing ngomongi Dalijo?” Takone Lik Ndoleng.

“Ya lumrah Leng, jenenge wong urip neng masyarakat. Apik lan ala ora gumantung kahanan, ananging gumantung sing arep ngarani..” Semaure Siwo Solebo.

“Mkasutmu piye Bo? Bingung akuu…” Lik Ndoleng sajak blas ora ngerti ngendikane Siwo Solebo.

“Ya kuwi lho, kahanane urip iki..aneh Leng. Sukses disujanani, rekasa dipoyoki…lan adate utawa budayane awake dewe kuwi budaya pengecut, cikri..wanine ngrasani..ora gelem adu-arep, bareng diadepi, njedindil kaya manuk kudanan..” Ngendikane Siwo Solebo.

“Nembe ngrembag napa niki?” IIn njedul, nggawa wedang lan pacitan.

“Ngrembug urip, sing kaya kahanane kewan TARUNG. njejgeake kahanan kang bener kuwi pancen angel In…” Ngendikane Siwo Solebo.

 

Mbah’e..