TEMBUNG

 

Setu Legi 8 Mei 2021

BENINGE EMBUN ESUK

Pangandharing Toret 32 : 44-47

Jabur 98

Markus 10 : 42-45

“Awitdene iki dudu tembung kang tanpa isi tumrap ing kowe, nanging iku uripmu, lan srana pangandika iki bakal dawa umurmu ana ing tanah kang kokparani, bakal kokenggoni, kalawan nyabrang ing bengawan Yarden.” Pangandharing Toret 32 : 47

 

TEMBUNG, sanadyan tansah dilakoni dening menungsa, ananging durung mesti okeh sing mangerti maknane. Dene sebab’e ora mangerti kuwi isa amarga males sinau, ananging amarga pancen ora sadhar yen kabeh kang ginelar ing jagad iki nduweni makna utawa arti. Tembung kuwi swara utawa tulisan kanga sale saka menungsa lan nduweni daya utawa kekuwatan. Dene saya utawa kekuwatan kuwi sing ora dimangerteni dening menungsa, mikire TEMBUNG kuwi ya mung TEMBUNG, babarblas ora nduweni daya apa-apa. TEMBUNG kuwi isa dipilah dadi (paling ora) rong perangan, TEMBUNG kang kaungelake lan uga TEMBUNG kang awujud tulisan. karo-karone nduweni daya kekuwatan kang ngedab-edabi samangsa dimangerteni.

 

Neng Kitab Pangandharing Toret, Gusti Allah nate ngendika bab daya kakuwataning TEMBUNG kuiw, ing kana ana unen-unen mangkene, “ Awitdene iki dudu TEMBUNG kang tanpa isi…” Tegese, ing sajroning TEMBUNG kuwi ana dayane, ana kakuwatane kang yen disadari an dipercayani jian gedene ngeram. Lumantar TEMBUNG, menungsa isa ndedonga marang Gusti, luamntar TEMBUNG uga menungsa isa nyuntak supata kang sawab’e (sanadyan ala) ya ngedab-edabi. Tumrap menungsa sing ngrasuk agama, TEMBUNG kuwi nduweni pungsi sing gede, kotbah/tausiah ya nganggo TEMBUNG, Ndonga ya nganggo TEMBUNG, memulang ya nganggo TEMBUNG.

 

Saka andharan sederhana ing ndhuwur, isa dijupuk pasinaon menawa TEMBUNG kang saksuwene iki tansah dadi gawean padinan nalika sesrawungan iki nduweni daya kakuwatan kang nggegirisi, mula aja bain-bain, aja sembrana. TEMBUNG kang wus kawetu saka tutug kuwi njedul saka telenging ati, lan ing kana kaya nggembol daya kakuwatan kang linuwih. Lumantar TEMBUNG menungsa isa ngrasa sansaya kuwat, mula ayo nggunakne TEMBUNG kanthi pener, lumantar TEMBUNG menungsa isa ngerti kersane Gusti kang winulang ing saben wayah.

 

“Lik, mbiyen kok rasido karo Yu Wasti kuwi critane piye?” Takone Dalijo, nalika sore kuwi neng Cakruk Sor Talok, nembe wong loro, liyane durung njedul, mbuh ngandi parane.

“Crigis Jo, apa ora ana topik liyane, takonmu kok mesti bab kuwi?” Semaure Lik Ndoleng lan malah genten takon.

“Ora Lik, ngene lho, aku bar maca tulisane mbah’e neng BENINGE EMBUN ESUK, jejere TEMBUNG, jarene mbah’e TEMBUNG kuwi nduweni daya kakuwatan kang nggegirisi…mula aku takon sampeyan, mumpung rungdo teka..” argumene Dalijo.

“Weh, apa ya ngono ya Jo? Sik..sik, jale takeling-elinge..hmmm…Oalahhh..iyo ik Jo..Mbiyen nalika aku jik nginceng si dia, aku pernah mbatin..ora kowe ya nggolek liyane…” Semaure Lik Ndoleng.

“Nahh..raktenan ta..kuwi TEMBUNG sing kwetu saka ati kaya donga Lik, lan akhire kebajut klakon..Mulane ngati-ati Lik..Merga jarene mbah’e, TEMBUNG kuwi isa awujud tulisan, swara lan uga batin..kuwi kabeh dayane poll lho Lik..apa sing wis kwetu, kuwi kaya janji…” Dalijo malah mulang Pakne Cilik sing rambute mung kari telung las kuwi.

“Rasah digetuni Lik, saiki ya jik isa tuka-tuku udud, ngiras-ngirus nyawang lan yen isa njawil nalika menehi duwite..jik asik kan Lik?” Iin ujug-ujug njedul, ora nggawakne kopi malah melu njarak.

“Dusss..kowe ngrungkone rembugane wong tuwek ya?” Lik Ndoleng kaya padatan, nggrememeng dewe.

 

Mbah’e..