LETHEG

Setu Pahing 11 April 2020

BENINGE EMBUN ESUK

Ayub 14:1-14

Jabur 31:1-5,16-17

1 Petrus 4:1-8

Mateus 27:57-66

Esuke, yaiku sawise dina pacawisan, para pangareping imam lan para Farisi padha bebarengan sowan menyang ing ngarsane Sang Pilatus lan padha matur: “Tuwan, kula sami kengetan, bilih juru panasaran punika nalika taksih gesang, cariyos makaten: Sawise telung dina Aku bakal tangi. Awit saking punika, karsaa ndhawuhaken, supados kuburipun kajagi ngantos dumugi tigang dintenipun; manawi boten, saged ugi para sakabatipun lajeng dhateng nyolong Piyambakipun, nunten cariyos dhateng tiyang kathah: Piyambakipun sampun tangi saking antawisipun tiyang pejah, satemah panasaran ingkang kantun badhe langkung awon langkung awon tinimbang ingkang rumiyin.” Mateus 27:62-64

LETHEG kuwi kondisi kang nggambarake kahanan samubrang, biasane banyu. LETHEG tumrap banyu yakuwi kahanan kan ora bening, ana uga kang ngarani buket lan uga butheg. Ing tulisan BENINGE EMBUN ESUK dina iki, setu pahing tanggal 11 April, aku sengaja nganggo tembung LETHEG. Tumrap banyu, kahanan LETHEG kuwi kahanan sing ora nyenengake, apa meneh yen arep dingo olah-olah, beda kanggone sing seneng mincing, merga nalika kahanane LETHEG, iwak luwih gamang dipancingi. Sepisan meneh, LETHEG kuwi kahanan sing ora apik, ora becik lan ora dadi kekarepane wong akeh. Njajal wae, sapa sing seneng nalika ngangsu banyune LETHEG, nalika arep adus banyune LETHEG lan nalika arep ngumbahi banyune LETHEG, mesti misuh-misuh.

Sanadyan sejatine tembung LETHEG kuwi kanggo banyu, ananging isa uga kagunakake kanggo ngarani kahananing bab liya, kayata bab kahananing ati. Nalika kahanane ati lagi LETHEG amarga gething, kabeh rinasa ala. Mula ana unen-unen saka para leluhur, nalika nemahi kahanan piker lan ati kang LETHEG, dadia banyu wegah nyawuk, dadia godhong wegah nyenggrok, dadio gandha wegah ngambu, ananging dadia duwit ya takjupuk…hehe.. Bab piker lan ras kang LETHEG amarga gething kuwi nate klakon neng jamane Gusti Yesus seda sinalib. Saking gethinge marang Gusti Yesus, ndadekne pikiran lan rasane para imam Yahudi LETHEG,lan kuwi tumeka ing wektu sakbubare Gusti seda lan dikubur. Sanadyan wis dadi layon lan kinubur ana ing sakjroning pakuburan kang tinutupan watu gedene ngeram, ananging nalika ati lan pikiran LETHEG, kuwi marakna menungsa tansah sujono.

Kabeh sing ngrumati pikiran lan rasa lan LETHEG kuwi ora nate merdika, ora nate ngrasakne tentrem rahayu. Kabeh kang sinawang LETHEG, sanadyan kuwi apik lan nyenengake. Nyawang tanggane panen akeh ngrasani, nyawang tanggane munggah pangkat nesu, nyawang kancane makarya sregep jare nggolek aleman, nyawang kancane ngaso merga kesel jare kesed  lan sakteruse. Pokok’e anggere piker lan atine LETHEG, kabeh sinawang ala, lan mbokmenawa sing maca tulisan iki nate ngalami, apa meneh ijik nyimpen pikiran LETHEG, mesti macane sinambi mesam-mesem dewe..hehe..hayo,awas disawang kiwa tengen lho…

Ben isa nyawang kahanan kabeh apik, pikiran lan rasa kang LETHEG kuwi kudu dibeningake, lan kepiye carane mbeningake kahanan kuwi? Sesuk sambung meneh ya…

“Jo, kae jan-jane Markun kuwi sregep apa mung njaluk aleman?” Takone Lik Ndoleng neng Dalijo, nalika bengi kuwi wedangan neng Nglincak Sor Talok.

“Ya cetha yen sregep, ora njaluk aleman. Kae tulus eklas Lik..” Semaure Dalijo.

“Yen manut pangrasaku kok ora ya Jo, Markun kae mung njaluk dialem..”Lik Ndoleng jik durung marem.

“Haiyah..kuwi lak sliramu ta Lik..sregep mung ben dialem Yu Wasti, ben diesemi. Bareng sing sregep kang Markun, sampeyan kobongan jenggot..kuwi merga pikiran lan atimu sing LETHEG, mula beningna sik Lik..kae sowan simbah’e, ben disuwuk lan LETHEGmu dadi bening” I’in nrocos sinambi ndondomi klambine bojone sing wis salin werna, sene Lik Ndoleng ung kukur-kukur sirah sing rambute mung kari limang ler..

Mbah’e..