LEMPENG

Jemuah Kliwon 12 Oktober 2018

BENINGE EMBUN ESUK

Pangandaring Toret             5:22-33

Jabur                                    90:12-17

Lukas                                            11 : 5-26

“Sedulur-sedulurku wong Israèl! Padha sing tlatèn enggonmu nglakoni sakèhé dhawuhé Pangéran Allahmu marang kowé. Pepakon-pepakoné aja ana siji waé sing koklanggar.
Kabèh lakonana, supaya kowé slamet lan tetep manggonmu ing tanah sing kokenggoni kuwi.” PT 5:32-33

Lempeng kuwi osok baline seka bengkong, dene tegese lempeng kuwi yoiku lumaku manut karo pranatan. Kuwi yen bab LEMPENG kuwi digathukne ana ing tata urip kamanungsan. Pancen yen tegese asli lempeng kuwi lurus,ora ana enggak-enggokane, dene bengkong yokui barang sing pathing penthalit kahanane. Lha nalika dijumbuhake karo tata uripe menungsa, LEMPENG kuwi ya kawa sing takaturke, lumaku manut pranatan dene bengkong tegese lumaku sing ora manut pranatan. Sing mung disawang lan ora dilakoni, nglakoni urip lempeng kuwi kayane gampang, ning sejatine ya rumpil. Kuwi kaya wong nggraji, ketok’e manut garis sipat, ananging bareng ditrus-truske kok menggok, ya ora kanggo nggawe blabag sing dihasilke.

Piwulange Gusti ing dina iki, Jumat Kliwon 12 Oktober 2018, ngepasi wulang brayat, ngajak awake dewe ngilo bab urip iki. Ing pangilon kuwi awake dewe isa nyawang sing wus klakon, apa ya anggone dewe nglakoni timbalan bebrayatan iki wis LEMPENG, apa malah menggak-menggok sakkarepe dewe. Pancen njaga supaya tetep lumaku ana ing “TALI SIPAT” adeging brayat kuwi ora mayar, akeh goda lan reribete. Isa wae dilakoni kanthi mayar, ning ora krasa jebul lakuning brayat wus menggok adohh saka janji nalikane daup suci mbiyene.

Ana ing PT 5 ayat 32-32, Gusti ngelikne bangsa Ngisrael, supaya tlaten anggone nglakoni sakehe dawuhe Gusti. Tlaten supaya ara kleru lan kebat kliwat, tlaten supaya tetep lumaku ana ing dalanin kabeneran. Cen rumpil cen rekasa,kudu konsentrasi lan meper sakehing pepinginan sing ora jumbuh karo kersane Gusti. Gusti nglarang supaya aja nglanggar siji wae pranatane Gusti, kabeh kudu LEMPENG. Ya merga anggone kasil njaga urip sing tansah lumaku lempeng kuwi mau, adeging brayat isa sansaya bakoh.

“Lho, lik, jare wingi esuk arep mangkat neng sawah tiba ya? Lha ngapa ta Lik polahmu, wong bendina ya liwat kono?”, Pitakone Nduk I’in karo pakne cilik, Ndoleng.

“Bener yen bendina liwat, ning ngger liwat mesti mlengo ngidul, mulane njur nubruk mak-mak numpak pit onthel nggawa bronjong”, Dalijo mangsuli.

“Weladalah, kok isa ki lhooo??”, I’in sajak gumun.

“Kuwi merga paklik ora ngematke LEMPENGe dalan, malah mlengo nengen, nyawang Yu Wasti sing diodol kopi, merga ora gek mlinguk njur Lik Ndoleng nubruk ngarepe”, Dalijo njelaske.

“Mulane lik,,paklik, aja mung noleh Yu Wasti wae, lempengna lakuning brayatmu”, I’in ngotbahe paklik’e..

“Cen sing crigis kokean lambe ki koe kok Jooo, lha wong iki tiba merga kasruduk angkotan kok jare nglirik Wasti…hmmm njaluk dirujak koe Jooo..Dalijo”, Lik Ndoleng kemropok karo Dalijo, ananging Dalijo mung mesam-mesem ora karuan..

Lempengna Lakumu, supaya lancer uripmu..