SETU
PON 11 AGUSTUS 2018
BENINGE
EMBUM ESUK
1
Raja-raja 2:1-9
Mazmur
34 :1-8
Matius
23 :1-12
“Aku
iki bakal lunga ngliwati dalane samubarang kabeh kang ora langgeng, mulane
atimu disantosa lan tumindaka kaya wong lanang” Para Raja 2 : 2
Kabeh wis tahu ngrasakne apa kuwi sing diarani weling utawa
piweling. Jarwadasa seka tembung weling yokui disuwelne (disimpen) banjur
dieling-eling. Mula saka kuwi, weling kuwi samubarang sing wus kawuri, utawa
sing wus kelakon. Dene ancas utawa
tujuane weling yokui supayane sing diweling kui isa tumindak kanthi luwih
ngati-ati lan waspada. Lumantar weling kui sejatine bisa uga dimangerteni
minangka tanda tresna, amarga yen ora tresna mokal yen gelem nitip weling.
Weling uga nduweni ancas, cikben apa wae sing bakal digayuh bisa
klakon nganti purna. Anane weling kuwi amarga ana rasa kuwatir babagan lakuning
urip sing ara sithik panggoda sing bakal ngiringi lakuning manungsa. Sakwuse diweling,
banjur ana pangati-ati sing kuwih gede, sakmengkone bisa dadi daya panguripan
sing ndadegne sapa bae bisa tatag, njur isa teteg nganti tumekaning tutug, kaya
judul tulisan iki neng nduwur kui.
Bab piweling kui nate katidakake dening Prabu Dawud, nalika
nyedaki tinimbalan. Putra kinasihe yaokui Soleman diwelingi samubarang kabeh
bab urip lan panguripan, ancase ya supaya sakmengkone Soleman isa ngadepi urip
nganti tutug lan uga kanthi teteg. Minangka wongtuwa, Dawud ngrumangsani nduweni
tanggungjawab sing ora cilik babagan anak’e, mula cikben sakpungkure dewekne
anake isa urip kanthi prayoga, Dawud meling anak’e. isining piwelinge Dawud
marang anak’e kui supaya Soleman isa tumindak diwasa kaya wong lanang, tegese
tanggungjawab lan ora ingah-ingih utawa igras-igris.
Pasinaon sing bisa awake dewe jupuk saka andhanran iki paling ora
ana rong perkara. Siji kanggone wong tua, aja kesel lan bosen anggone memulang
marang anak, lan piwulang kui isa lumantar piweling, dene tumrap para bocah
utawa anak, tampanen kanthi bungah sakwernaning piweling saka wongtuwamu, kuwi
minangka tanda tresnane wong tuwa marang anak-anak’e.
“Lha yen aku diweling kon ngati-ati karo mbokmu cilik kuwi karepe
piyeJo?”, Paklik Ndoleng jik takon karo ponak’ane sing aran Dalijo.
“Yen kui merga sampeyan kerep nglirik randa lor kali Lik, sing
omahe cedak prapatan”, Wangsulane Dalijo karo mesem.
“Oooo..bocah..kui wis jaman kawuri, jaman mbiyen, saiki yo jik
kadangkala eling ding Jo”, Wangsulane Paklik Ndoleng.
Mulane ayo ngadepi urip iki kanthi setya tuhu marang kabecikan,
supaya isa tatag, teteg lan nganthi tutug.
Mbah’e
Tidak ada komentar:
Posting Komentar