Respon Anda adalah Nasib Anda

Di suatu pagi yang cerah Vincent Van Gogh seorang Maestro yang begitu terkenal lukisannya sedang asyik melukis sebuah taman yang ada di kota Paris.   Cuaca cerah, suhu sejuk dan hari begitu indah. Van Gogh sudah hampir 90% menyelesaikan lukisannya.   Tiba-tiba ada seorang wanita penasaran ingin tahu lukisannya dan mencoba mendekati sang Maestro.   Namun oleh karena tidak memperhatikan rumput yang tak rata wanita tersebut terjatuh dan menubruk Van Gogh yang sedang melukis.   Sebuah tarikan garis warna coklat muncul ditengah lukisan yang hijau nan asri tersebut. Dan cacat lah lukisannya.   Wanita tersebut minta maaf yang sebesar-besarnyanya atas kejadian itu.   Apa yang dilakukan Van Gogh? Sang Maestro hanya tersenyum sambil mengatakan, "Tidak mengapa, saya akan perbaiki."   Dia akhirnya mengubah guratan kecelakaan tersebut menjadi sebuah bangku kayu. Memang jadi aneh disebuah taman yang hijau asri ada sebuah bangku kosong ditengahnya.   Tapi justru keanehan itu membuat lukisan Van Gogh yang satu ini membuat orang berpikir apa maksud Van Gogh menciptakan kursi tersebut? Dan hal ini membuat lukisan tersebut paling terkenal diantara lukisan lainnya.   Respon Anda menentukan apa yang akan Anda peroleh dalam hidup ini. Ada begitu banyak pilihan respon dalam setiap peristiwa yang sedang terjadi di hadapan Anda.   Hanya orang yang memiliki kesadaran diri sehat yang akan memilih responnya secara sadar dan melanjutkan hidupnya dengan sikap mental positif.   Yang manakah Anda?

NYUMURUPI

Jemuah Pon 29 Nopember 2019

BENINGE EMBUN ESUK

Purwaning Dumadi 6 :1-10

Jabur 122

Lukas 21 :29-33

Gusti Yesus banjur paring pasemon mangkene: “Padha mawanga wit anjir lan wit apa bae. Manawa kowe padha nyumurupi yen wis padha semi, kowe padha ngreti dhewe, yen wis ngarepake mangsa panas. Mangkono uga manawa kowe padha nyumurupi lelakon mau, padha mangretia yen Kratoning Allah wis cedhak. Lukas 21:29-31

NYUMURUPI kuwi artine meh pada karo mangerteni, ananging NYUMURUPI kuwi luwih jero maknane. Yen ngerti kuwi mung sakderma nyawang lan paham bab sing katon, NYUMURUPI kuwi ngenani bab sing durung utawa malah ora katon. NUMURUPI kuwi gegeyutan karo tanda-tanda sing tansah obah mosik ana neng jagad iki, mulane supayane isa NYUMURUPI ya kudu landhep ing pangerten, dene supayane landhep ya kudu diasah ing sadengah kahanan.

Bab NYUMURUPI kuwi nate dadi pokok piwulange Gusti Yesus marang para sekabate. Lho lha ngapa kok kaya mengkono isa dadi pokok piwulange Gusti? Merga Gusti ngersakne para sekabate isa niteni utawa mangertini kabeh kahanane jagad lumantar prantandha sing tansah obah lan mosik ana ing panguripan iki. Nalika isa maca, tegese isa NYUMURUPI lan sakbanjure isa dadi pangati-ati ana ing uripe. Nalika isa NYUMURUPI kahanan lumantar tanda-tandane jagad, kuwi isa ndadekne menungsa isa eling lan waspada lan sakbanjure ngati-ati marang uripe. Dene yen ora isa (merga males lan ora gelem) maca obah osiking jagad, ya mengkone bakal kegiles lakuning jaman.

Ing jaman saiki, arang wong sing gelem sinau maca obah-mosiking kahanan, mulane ya arang sing saiki nduweni kawaskitan. Merga  saka ora isane maca obah osiking kahanan, mula akeh sing njur kaget nalika nemahi kahanan sing nggegirisi, kamangka sejatine Gusti wus paring tanda supaya menungsa isa NYUMURUPI tanda-tandaning jaman.

“In, tulung aja mbok  kunci kamar mandine, aku mengko lak kerep bola-bali menyang WC..” Sambate Lik Ndoleng nalika wis jagongan meh rongjam ora ndang digawekne wedang karo panokane wedok sing ayune sundul langit.

“Cah saiki angel disemoni Lik, ngertine dijublak..”Semuare Dalijo.

“Ora tak kunci lho Lik lawange kamar mandi.” Ngomong ngono I’in bablas nggeblas mbuh meh nengdi, babarblas ora nggagas Lik Ndoleng. Nalika meh adoh diparani Dalijo lan diomongi.

“In, wong disemoni Paklik kok ora ngerti? KAe paklik Ndoleng butuh mbok gekne wedang kopi, mulane mau nyemoni dirimu bab kamar mandi, wedi yen ngompolan merga kakean wedang, kamangka durung diwedangi babarblas..”Dalijo Njlentrehne neng I’in bab sambate lik Ndoleng, dene lik Ndoleng ya mung mesam-mesem karo nyekeli rambute sing mung kari limang ler.

Mbah’e..

LUNGA

Setu Pahing 23 Nopember 2019

BENINGE EMBUN ESUK

Yeremia 22:18-30

Jabur 46

Lukas 20:27-40

“Mara padha lungaa, sawangen pakaryane Sang Yehuwah, kang nuwuhake tetumpesan ana ing bumi, kang ngendhakake peperangan nganti tumeka ing pungkasaning bumi, kang mutung gandhewa sarta mapakake tumbak, kang ngobongi kareta perang kalawan geni. “Menenga lan ngretia, manawa Ingsun iku Allah! Ingsun kaluhurake ana ing tengahing para bangsa, linuhurake ana ing bumi!” Pangeran Yehuwah Gustining kang sarwa dumadi nunggil karo kita, Allahe Rama Yakub iku beteng kita. Jabur 46:8-11

Ora sithik sing nganggep yen LUNGA kuwi ngemu teges ala utawa ora apik. Tembung LUNGA kuwi tegese pindah seka papan siji menyang papan liya, dene bab jarak ora dadi ukuran. Mula sanadyan mung pindah rong senti wae ya isa diarani LUNGA. Seka tembung LUNGA sakbanjure ana maneka werna kahanan sing intine ya LUNGA, pindah panggonan. LUNGA ora nduweni tujuan jelas diarani minggat, LUNGA tanpa pamit diarani nglimpekne, lan sakpanunggalane. LUNGA akeh-akehe ngemu teges sing negatip. Lha apa ya kudu ngemu teges negatip kabeh tembung LUNGA kuwi? Ora!!

Tembung LUNGA ya isa nduweni nilai positip. Ana neng Kitab Suci, ana crita, pernahe pangandikane Gusti bab nilai positip seka tembung LUNGA. “Mara padha lungaa, pada sawangen pakaryane Sang Yehuwah…”Jabur  46 ayat 8. LUNGA ing kene ya tegese mingket saka panggonane, dene tujuane kanggo nyawang pakaryane Gusti, merga ora gelem LUNGA, ora gelem mingket lan mung mapan ana ing panggonane sing lawas, mula babarblas ora isa nyawang pakaryane Gusti Allah. Sing disawang mung samubarang kang ala, kang ora apik. Kuwi kabeh merga ora gelem LUNGA. Lho kena ngapa kok ora gelem LUNGA? Merga wis kadunungan roh males sing ndadekne ngobahke panguripan kuwi abote ora njamak.

LUNGA, kanggo pindah papan, LUNGA kanggo nyawang pakaryane Gusti kuwi sing dikersakne Gusti. Yen wis isa pindah papan utawa LUNGA, mesti isa nyawang kahanan sing beda lan mesti luwih apik tinimbang papane sing lawas. Dene LUNGA kuwi ya ora mayar, mbutuhke niat becik, semangat kang gede lan ora gampang mutung. Sing sapa wani LUNGA saka papan dununge sing lawas, mesti isa nyawang endahing pakaryaning Gusti.

“Lek, sidane moh dadi majelis ya?” Dalijo nakoni Lik Ndoleng nalika sore kuwi wedangan neng lincak sor Talok.

“Aku jik rumangsa ra mungguh, raisa,randuwe wektu, raisa ngomong lan jik akeh kekuranganku  Jo..” Semaure Lik Ndoleng.

“Haiyah..padune wegah repot wae Lik. Wegah mingket, wegah LUNGA saka kahanane saiki wae kakean alesan.”Nduk I’in njedul lan kaya padatan, nyoal-nyael nyemesi Lik Ndoleng.

“Weh, yen bener omongane I’in, sampeyan kudu pindah panggonan Lik, kudu LUNGA ben isa nyawang pakaryane Gusti..”Dalijo menehi wangsulan.

“Weh, kok pada nundung aku ta?Kok aku  kon LUNGA ki piye?Iki omah-omahku dewe! “ Lik Ndoleng sajak beda penampa.

“LUNGA kuwi tegese mindahke pola piker Lik..ora pindah omah” Semaure Dalijo. Lik Ndoleng mung mesam-mesem sajak kisinan.

Mbah’e

MBEGAL

Jemuah Legi 22 Nopember 2019

BENINGE EMBUN ESUK

MBEGAL REREGED

Yeremia 22:1-17

Jabur 46

Lukas 19:45-48

“Gusti Yesus banjur lumebet ing Padaleman Suci, wong kang padha dedagangan ana ing kono padha ditundhungi kabeh, padha dipangandikani mangkene: “Ana tulisan: PadalemaningSun iku dalem pamujan, kok kokdadekake susuh begal.”Lukas 19:45-46

MBEGAL kuwi patraping gawe Begal, sing gaweane ngrampas lumantar peksa sabarang darbening liyan. Yen pas tanggal 21 agustus 2019 tulisan BENINGE EMBUN ESUK wis nganggo jejer BEGAL, mula ing dina iki ya kudu beda, mulane jejer utawa judule ditambahi “M” yakuwi MBEGAL. Ora ana apike babar blas saka tumindak MBEGAL kuwi, merga nekakne kapitunan marang liyan. Yen artine MBEGAL sing asli kuwi njupuk kinantenan kekerasan apa wae darbene liyan, ing sisih liyane MBEGAL kuwi isa nduweni arti liya.

Neng Kitab Suci, pernahe neng Lukas 19 ayat 45-46 dicritakne bab Gusti Yesus sing duka, merga papan manembah sing kudune dinggo menembah marang Sing Akarya Jagad, malah didadekne papan kanggo nggolek kauntungan pribadi lan meneh anggone nggolek untung kuwi linambaran peksan. Dene peksan kuwi dilakoni dening pengarepe agama lelambaran pangerten agama sing keblinger. Kuwi kabeh sing marakne Gusti Yesus duka ora njamak. Ing jaman saiki ya isa klakon apa sing klakon ing jamane Gusti Yesus, yakuwi wong ngibadah ora merga arep manembah marang Gusti Allah, ananging mung nggolek kauntungan pribadi.

MBEGAL REGETING AWAKMU

Dene kanggo niteni tanda-tandane sing mung nggolek keuntungan pribadi kuwi kaya ngapa? Ya sing mangkat mung sakarepe dewe, ora manut pranatane Gusti, sing nalika mangkat manembah ora nate manut tata pangibadahe, teka njur turu yen ora dolanan HP lan sakpanunggalane. Kuwi kabeh klebu kahanan sing neng papan pangibadah ananging mung nggolek untunge dewe, nggolek mareme kekarepaning atine dewe, lan babarblas ora mikir liyan. Yen kuwi kabeh dilakoni, kuwi wis klebu nindakne pagawean MBEGAL, yakuwi MBEGAL kamulyane Gusti. Ana meneh sing manembah ananging mung njaluk pangalembana, mbuh apa wae gaweane mung pengene dialem wae, lan yen dipaido nesu lan ngamuk, kuwi yaw is klebu MBEGAL kamulyane Gusti.

“Jo, aku mundur wae seka panitia natalan” Sore kuwi Lik Ndoleng ngomong karo Dalijo, bab rencanane mundur seka panatia natalan 2019.

“Weh, ya ora apa-apa Lek, kuwi lakyo pilihan, ora ana wong siji-siji’a sing isa menggak” Wangsulane Dalijo sareh, sinambi klepas-klepus karo kancane sing sejati.

“Wealah, mung usul ora dirungokne wae njur nesu Lek…..kok tipismen sampeyan kuwi..”Nduk I’in njedul seka sisih omah, nggawa kresek ireng merga seka warung, mbuh isine apa.

“Rasah crigis melu-melu kowe In!!!” Pembentak’e Lek Ndoleng.

“Horaaaakkk….ngapa nggagas wong nesu. Nggagas sing pikirane mbocahi!” Ora kalah sogol I’in anggone mangsuli.

“Piye komentarmu Jo, aja mung meneng wae..!” Lik Ndoleng sajak tambah nesu.

“Weh, kabeh kuwi pilihan Lek, aja meneh mundur seka panitia natal, mundur seka kapercayan wae dudu urusanku, kuwi pilihanmu Lik. Aja rumangsa dadi wong penting, njur kabeh kudu manut usule dewe. Aja kadingalem, njaluk dialem terus. Kuwi kabeh pada wae karo MBEGAL, yakuwi njupuk kamulyane Gusti mung kanggo mereme dewe.”Dalijo semaur sinambi nyumet djarumsupere, merga sing sijine wis meh entek.

Mbah’e

MBUDEGI

Selasa Pon 19 Nopember 2019

BENINGE EMBUN ESUK

KEINDAHAN SENJA

Yesaya 66:1-13

Jabur 76

Lukas 19:1-10

“Mangkono uga Ingsun iya luwih remen tumindak sawenang-wenang marang para wong iku tuwin nekakake marang wong-wong mau apa kang ndadekake wedine; amarga manawa Ingsun nimbali, ora ana kang ngaturake wangsulan, manawa Ingsun ngandika, ora padha ngrungokake, nanging padha nglakoni kang ala ana ing paningalingSun sarta luwih seneng marang apa kang ora dadi karsaningSun” Yesaya 66:4

Tembung MBUDEGI kuwi asale seka tembung Budeg, sing tegese kahanan winates saka titah magepokan karo piranti pangrungone. Mula saka kuwi tembung MBUDEGI tegese tuminda sing memper kaya wong Budeg, kamangka sejatine ora ngalami kahanan kuwi. MBUDEGI kuwi sejatine krungu, ananging ethok-ethok ora krungu, dene tujuanne supaya ora kena pengaruh saka sumbering swara. Bab MBUDEGI kuwi ora saklawase negatip, merga ya ana sing nduweni watak positip. Yen wis tumindak bener lan pener, ananging tetep wae dipaido lan mung dirasani wae, apik ngempanke “Ajian” MBUDEGI, supaya ora krungu lan tetep fokus tumindak apik. Sing mbebayani nalika nindakne ajian MBUDEGI kuwi tumrap samubarang sing apik, iki isa nekakne bilai.

Neng Kitab Yesaya bab 66, neng kana dicritakne kaya ngapa dukane Gusti Allah merga pokal tingkahe para menungsa sing wis bola-bali ditulungi, ananging tetep wae ora nate manut kersane Gusti. Wong-wong ngisrael pada ditimbali dening Gusti ora nate wangsulan, sing tegese MBUDEGI, lha wong ya sejatine krungu swarane Gusti lumantar sabarang kahanan. Nalika Gusti ngendika (paring piwulang utawa kotbah), ora pada ngrungokake, tetep konsisten MBUDEGI lan malah nindakne kanga la ana ing ngarsane Gusti. Kabeh tumindake bangsa ngisrael jamane nabi Yesaya kuwi MBUDEGI lan kuwi kang ndadekne Gusti duka.

SALMON OMEGA 3

Ing jaman saiki bab MBUDEGI kuwi jian akehe ora njamak, akehe ya umpuk undhung. Meh saben wong saben ditimbali Gusti dijak makarya njur kabeh MBUDEGI, reka-reka utawa ethok-ethok ora krungu, kamangka krungu wae nganggo banget. Sakliyane “ajian” MBUDEGI, ing jaman saiki ya pada sektine ngeram, merga pada nduweni “Ajian Pangenda”, mula yen dijak makarya tumrap sabarang sing apik, ya mesti enda!

Pancen urip iki pilihan, mula ya kabeh bali marang sapa kang nglakoni. Ananging sing perlu didadekne penggalihan jero, apa ya pada wis siap yen ing mbesuk’e nampa utawa ngundhuh tanduran sing tinandur ing jaman saiki? Siyap nalika akibat seka sektine nggunakne ajian MBUDEGI kuwi kudu sinandang ing saklawase jaman? Yen pada ora siyap, ya ndang guwang wae rapalane ajian MBUDEGI kuwi ben ndang ilang saka urip.

“Rapat pembentukan panitia natalan kok ora mangkat ta Lik? Kamangka jian dienteni tenanan lho..”Dalijo ngelikake Lik Ndoleng merga diundang rapat pembentukan panitia natal ora mangkat.

“Weh, apa iya Jo? Aku kok  ora rumangsa entuk ik?” Sajak kaget, ananging ketok yen digawe-gawe, lIk Ndoleng ngendani ayahan.

“Haiyahhh…alesanmu ale wasis ta Lik….wong genah wingi bab ngrasani karo aku, yen arep ethog-ethog ora nampa undangan wae kok ndadak alesan ora nampa undangan? “ Nduk I’in semanta sinambi ngetokne kopi sing mak pyarrr…

“Weladalah…kok isa kaya mengkono ta Lik?” Takone Dalijo sareh, sinambi nyumet djarumsupere sing jik utuh merga ditinggali kancane sing wingi mulih seka kutha.

“Wong malah alesan jare wegah dadi panitia, merga  Yu Wasti ora dadi panitia..hayooo ngaku Lek!!?” Nduk I’in sajak erosi, nyemes Lik Ndoleng sakayange.

“Dussss…konangan meneh, malah iki diarani MBUDEGI…hmmmm..kalah terus mbek cah loro iki..Ning aku yay akin seyakin-yakine, yen sing maca tulisane mbah’e iki ya akeh sing nduweni aji MBUDEGI tingkat paripurna..”Batine Lik Ndoleng.

Mbah’e..

PENER

Setu KLiwon 16 Nopember 2019

BENINGE EMBUN ESUK

NILAI KEINDAHAN

Yesaya 59:15b-21

Jabur 98

Lukas 18 :1-8

“Apa Gusti Allah ora bakal maringi adil marang para pepilihane kang rina wengi padha sesambat marang Panjenengane? Lan apa Panjenengane anggone arep paring pitulungan diundur-undur? Aku pitutur marang kowe: Panjenengane bakal enggal maringi adil. Nanging manawa Putraning Manungsa rawuh, apa bakal manggih pangandel ana ing bumi?” Lukas 18:7-8

Ukara “Sanadyan bener ananging durung mesti PENER”, kuwi kegolong populer neng budayaning wong Jawa. Lho lha apa ana beda ing antarane Bener lan Pener kuwi? Ana, bener durung mesti PENER, dene yen PENER mesti kuwi bener. Bener kuwi samubarang sing petungane mung manut petungan matematika dene PENER kuwi ora mung babagan petungan matematika ananging uga bab rasa lan kahanan. Contone sing sederhana wae, Jujur kuwi apik lan Bener, ananging durung mesti PENER.

Babagan Bener lan PENER kuwi ya kereb dadi petungan ana ing tata panguripaning menungsa ing abarang kahanan, klebu ing babagan kaimanan utawa kapercayan marang Sing Nggawe urip. Ora sithik sing nduweni pikiran yen apa wae sing dadi pepinginane urip kuwi kudu dituruti dening Gusti Allah, ora nate mikir lan milah kuwi sejatine pepinginan apa KABUTUHAN.  Mula nalika apa kang dadi pepinginane ora klakon, njur semune nyalahake Gusti Allah, lan ngedoh marang kegiatan-kegiatan kaimanan utawa karohanen.

NILAI KESEHATAN

Manut piwulange Gusti Yesus ana ing Lukas 18 ia dadi pepeling marang sapa wae. Yen sakwuwene iki nduweni penemu yen apa wae sing dadi kebutuhane urip kudu klakon, ananging ora apa durung, kudu dimangerteni yen kabeh manut kersane Gusti. Yen menungsa rumangsa apa sing dadi kebutuhane kuwi wis “bener”, ananging ana ing kawicaksanane Gusti durung tentu PENER. Saka pangerten iki, saiki kudune pada nyadar yen sing sinawang Bener ana neng penemune, durung temtu PENER ana ing kawicaksanane Gusti.

Mula saka kuwi, payo pada eling lan waspada marang kabeh kahananing urip. Aja nganggep kabeh kuwi bener lan PENER. Bener durung mesti PENER, ananging sing PENER mesti bener. Bab lelakoning urip, yen nduweni penyuwun ora klakon, kuwi merga PENER ana ing pamawase Gusti. Dene menawa ana bab sing ndadekne susah, kayata kelangan,ora kasil lan sakpanunggalane, kudu dieling yen kuwi ya PENER ana neng pamirsane Gusti.

“Kok iki ora udan-udan ta ya..ya..apa moloekat sing dnes njadwal udan lali tugase ya Jo?” Sambate Lik Ndoleng, nalika nyawang ketiga sing meh tekan desember.

“Iki mesti apik ana ing pamirsane Gusti Lik” Semaure Dalijo sareh.

“Aja-aja luput kawicaksanane Gusti Jo?Lha Gusti pora mesakne para kadang tani sing rungisa nandur. Iki mesti kleru Gusti kuwi!!”Sajak sansaya erosi Lek Ndoleng.

“Rasah iyik Lik, iki kopine. Lan iki ya entuk titipan pitunem seka Yu Wasti..” Nduk I’in njedul, nggawa nampan isi kopi lan 76, sing jare seka Yu Wasti.

“Wah, jebul Wasti kuwi jik nggagas aku… Hmmmm..iki jos tenan, pancen wong kae wong apik..”Lik Ndoleng ngalem Yu Wasti entek amek kurang omek.

“Biyuuuuhh.mu ngalem Yu Wasti Lik..durung mbok cek bener apa ora. Lan pangalembanamu jebul ora PENER. Lha kuwi sing nukokne kang Dalijo” Nduk I’in nyangar pakne Cilik.

“Woooo..trembelane!! Bocah ora…asembbb” Sambate Lik Ndoleng sanadyan mung neng mbatine.

Mbah’e..

KEGUBET

Jemuah Wage 15 Nopember 2019

BENINGE EMBUN ESUK

APIK YEN IKI NGGUBET URIPMU

Yesaya 59:1-15a

Jabur 98

Lukas 17:26-37

“Astaning Yehuwah iku sanyata ora cupet kagem paring karahayon, lan pamirenge ora kurang landhep kagem miyarsakake; nanging kang dadi sesinggetan ing antarane kowe lan Gusti Allahmu iku sakehing pialamu, tuwin kang njalari Panjenengane asingidan ana ing ngarepmu, satemah banjur ora mireng, iku sakehing dosamu.” Yesaya 59:1-2

KEGUBET kuwi asale seka tembung lingga “gubet’, sing tegese kecencang barang sing memper tali utawa barang sing jinise memper tali, pokok’e sing isa dinggo naleni. Lingga gubet mau nalika ketambahan ater-ater “gi” njur ngemu teges yen nembe nandang utawa nembe nglakoni. Mula saka kuwi, tembung KEGUBET utawa ana uga sing ngarani “GINUBET” nduweni teges utawa arti nembe ketalenan utawa yen basa ngindonesa “sedang terlilit”. Dene isane ana ing kahanan KEGUBET utawa GINUBET kuwi merga polah tingkahe dewe. Yen diumpamakne bocah dolanan, lha menawa sing dinggo dolanan kuwi benang utawa tambang, kuwi isa ndadekne KEGUBET lan angel olehe nguculine, biasane nunggu pitulungan liyan.

Piwulange nabi Yesaya menehi pepeling marang sapa wae sing maca Kitab’e lan uga sing maca tulisan BENINGE EMBUN ESUK iki supaya ngati-ati ngadepi urip. Sing dimaksut ngati-ati, aja ngasi KEGUBET utawa GINUBET ing kahanan sing nggegirisi. Merga yen nganti KEGUBET, mesti angel obah utawa polah. Semono uga  nalika menungsa KEGUBET dening dosa, mesti kuwi sing bakalane ndadekne ora isa obah lan polah kanggo tumindak apik. Lan manut nabi Yesaya, tumindak kang luput lan nyingkeur kersane Gusti kuwi sing ndadekne menungsa ora isa obah, lane mane meneh kuwi kabeh sing ndadekne Astane Gusti ora isa mulung kanggo nulung. Iki dudu merga Astane Gusti kurang dawa, ananging manut nabi Yesaya, kuwi merga menungsa KEGUBET ing piala utawa dosa. Dadi GUBETAN kuwi marakne ndadekne sesinggetan, sing mbatesi menungsa karo Gusti Allah. Lan nalika nembe KEGUBET dening kahanan, ora sithik sing ora ndang sadhar, malah jik pancet nyalahne Gusti Allah.

SUPER

Ing jaman saiki, sing jarene jaman “digital”, meh kabeh isa marakne menungsa KEGUBET. Bab banda donya sing paling “rawan”. Mula saka kuwi, supaya ora KEGUBET marang kahanan sing nyingget sesambungan karo Gusti, kabeh dadekna srana aja tujuan. Banda kuwi sranan, kapinteran kuwi srana lan jabatan kuwi ya mung srana. Yen kabeh mung srana kanggo tujuan tinunggil karo Gusti, mesti ora bakal KEGUBETdening kahanan.

“Lik, ngampil duite Lik, lagi disambati kanca..” Dalijo sajak igah-igih nembung sing rada saru marang Lik Ndoleng.

“Mbok kon nemoni aku dewe kancamu kuwi..rasah liwat kowe..”Semaure Lik Ndoleng sinambi mbukak 76me, rada nggaya merga bar tuku dewe, ora njaluk Dalijo.

“Haiyah, kakean rembug Lek. Saiki kari njenengan oleh apa ora. Mikir sing positip wae. Wong ya iki sing nembung Kang Dalijo, mosok rapercaya” Nduk I’in njedul njur melu nyael rembugan.

“Ajegggg In, njedulmu mesti langsung nyemes tembung marang aku…hmmm..Mbok kowe kuwi kana nyilihi..”Semaure Lik Ndoleng sajak senewen.

“Yowis yen ora oleh Lik..eslow wae..hehe” Wangsulane Dalijo sinambi nyruput kopi.

“Kuwi merga kang Dal ngerti yen aku mesti ora ana..mulane sambat sampeyan. Lek, aja nganti banda kuwi Nggubet urip. Aja KEGUBET dening banda..” Nduk I’in kojah jian memper ustajah..

“Bener unine I’in Lik. Aja KEGUBET banda. Tulungana sing butuh..kuwi wae..” Dalijo nandeske rembug.

“Hmmm..jian wasis kabeh ponak-ponakanku iki…yowis sik takjupuk’e..” Njur Lik Ndoleng mlebu neng kamar, njupuk apa sing dibutuhke Dalijo.

Mbah’e..

NYAWIJI

Kemis Pon 14 Nopember 2019

BENINGE EMBUN ESUK

NGOPI JOSS

Yesaya 57 :14-21

Jabur 98

Awit mangkene pangandikane Kang Mahaluhur lan Kang Mahamulya, kang lenggah ing dhampar ing salawase lan kang asma Kang Mahasuci: “Ingsun lenggah ing papan kang dhuwur lan suci nanging uga nunggil karo wong kang rempu lan andhap-asor, prelu nyantosakake atine para wong kang andhap-asor sarta nguripake atine para wong kang rempu. Yesaya 57:15

NYAWIJI kuwi tembung sing tegese kumpul dadi siji. Dene sing kudu kumpul dadi siji ora mung winates ing raga, ananging sakabehe kahanane urip. Yen mung winates ana ing bab raga, kui mung gampang. NYAWIJI raga durung mesti NYAWIJI ing kasukman, dene menawa wis NYAWIJI kasukman utawa sakwutuhe, mesti bab raga yaw is NYAWIJI. Sing saiki gampang disawang ya mung winates NYAWIJI bab raga utawa “body fisik”, dene bab NYAWIJI kasukman durung temtu.

Bab NYAWIJI sakwutuhe kahanan kuwi dadi piwulange nabi Yesaya, ana neng Yesaya 57. Neng kana ditulis bab kaya ngapa Gusti Allah utawa Sang Yehuwah anggone aprajanji NYAWIJI marang kabeh kagungane sing ditresnani. Sanadyan neng dhampar kang suci, ananging ya nunggil karo para wong kang rempu lan ajur mumur atine. Lan titenane wong kang tinunggil karo Sang Yehuwah utawa NYAWIJI marang Kang Murbeng Rat kuwi uripe andhap asor lan lembah manah. Ora pamer nalika rumangsa tumindak becik lan netepi pranatan agama. Yen ana sing kemaki lan kumenthus nglakoni pranatan agama, kuwi sejatine ora NYAWIJI marang Kang Murbeng Rat. Dene ing jaman saiki, sing mung kepengin diarani soleh wae akehe ora njamak. Kaya sing wingi klakon  neng Medan, kuwi rumangsane nglakoni kersane Sang Murbeng Rat, kamangka mung bocah pekok lan pethug sing gampang diapusi liyan. Wong kaya ngono kuwi mung rumangsa NYAWIJI bab tata lahir, dene ing batine babar blas ora dumunung Kang Murbeng Rat.

MARI HIDUP SEHAT

Sing nduweni pikiran kaya sing nglakoni bom bunuh diri neng Medan kuwi sejatine ya akeh, wis rumangsa maren nalika rumangsa nglakoni (sithik banget) pranatane agama, ananging mung ana neng tata lahir. Dene ing tata kasukman, tata batin jian babar blas. Mbokmenawa sing maca tulisan iki ya jik akeh sing mung (rumangsa) NYAWIJI karo Sang Yehuwah, ananging mung ing  tata lahir, dene ing tata kasukman utawa batin, jik nolgede.

“Jo, kok dirimu kuwi sanadyan jik njomblo kok santai wae, babar blas ora kemrungsung?” Lik Ndoleng nakoni Dalijo naliko ngopi neng sor Talok.

“merga urip kuwi kan wewayangane dumununge Gusti ta Lik, mula aku kudu ngrungokne Swarane Gusti neng telenging batinku. Kuwi tak yakini merga Gusti kuwi NYAWIJI neng uripku” Semaure Dalijo sajak kaya Resi Sekti.

“Emange sampeyan Lik, nglakoni pranatane agama mung ben dialem Yu Wasti merga mung ngarep-arep isa pethuk lan nyawang..””Nduk I’in njedul mulih seka warung tuku mbakone Lik Ndoleng.

“Duss..kok ya pas terus ta In wektumu njedul. Mesti nyemes aku..hmmm..wis kene mbakone,,meh njaluk udude Dalijo pekewuh..” Unine Lik Ndoleng sinambi njupuk sakler djarumsupere Dalijo, sanadyan muni pekewuh..

Mbah’e..

MBALIK

Rebo Pahing 13 Nopember 2019

BENINGE EMBUN ESUK

MBALIK DADI APIK

Zakaria 8:1-17

Jabur 98

Lukas 17:11-19

“Panjenengane nuli mirsani wong-wong mau lan ngandika: “Kowe padha lungaa, awakmu tuduhna marang imam!” Kocapa, sajrone padha lumaku iku, padha birat najise. Ana siji kang bareng weruh yen wis waras, banjur cengkelak bali kanthi ngluhurake Gusti Allah kalawan suwara sora.” Lukas 17:14-15

Tembung MBALIK kuwi isa diartekne bali seka paran lan mulih marang omahe, isa uga diartekne mbalikne kahanan apa kang isa dibalik. Mulih seka lelungan kuwi isa diarani MBALIK, bali mulih utawa marani papan sing dipanggoni  sakdurunge ya isa diarani MBALIK, dene ndadekne kahanan beda panjer kuwi ya isa diarani MBALIK utawa malik. Neng tulisan iki sing meh dadi underaning rasa pangrasa yakuwi bab bali seka papan liya marani papan sing sakdurunge.

Crita neng Kitab Suci bab MBALIK nate klakon nalika ana wong cacah 10 (sepuluh) sing budhugen nyuwun marang Gusti Yesus ben diparingi waras. Dening Gusti ya diparingi sanandyan lumantar carane Gusti, yakuwi kon sowan neng ngarepe para Imam neng Pedaleman Suci. Iki aneh banget, lha wong  tumrap wong ing jamane Gusti kuwi sing lara budhugen diarani najis tumrap liyan, lha kok kon neng Pedaleman suci?Pora ya mengko njur dikepruki tentarane sing dikonkon dening para Imam? Ning ya jik pada mangkat, lan nalika neng tengah ndalan kabeh waras. Sakwise waras, ora kabeh MBALIK marang Gusti ngaturne panuwun. Sing MBALIK mung siji, kuwi wae wong Samaria. Kuwi sing nggumunake!

SEHAT

Pancen MBALIK kuwi dudu gawean sing mayar, akeh sing rekasane ngeram. Saiki ayo pada dibayangake bab wong Samaria sing MBALIK sowan marang Gusti. Umpamane jarak seka ketemu Gusti karo Pedaleman Suci kuwi seket kilo, njur nembe waras nalika wis malku 40 kilo, lha pora butuh jarak 40 kilo meneh kanggo kepanggih Gusti? Kuwi durung yen dimangerteni menawa Gusti Yesus ya ora meneng wae, mesti tindak merga pakaryane nyebar kabar kabungahan. Cethane, kanggo MBALIK kuwi wong Samaria mau mbutuhake niat,ragat lan uga tenaga. Yen ora ana niat sanadyan ana ragat, mokal klakon. mula sing paling dibutuhke kanggo MBALIK kuwi niat, dudu ragat. Ragat isa digoleki,isa disilihke liyan, ananging bab niat, kuwi kudu mrentul saka telenging batine dewe-dewe. Ing jaman saiki, niat kanggo atur panuwun lan sowan Gusti kuwi meh amblas digaglak kahanan,mula ya angel sing pada gelem MBALIK. Alesane akih banget, aku rasah nulis, ben sing pada maca wae sing “ndaftari” alesane dewe-dewe.

“Jo, suwe men ratahu njedul kuwi jan-jan’e kena apa ta sliramu?” Takone Lek Ndoleng neng Dalijo, merga pirang-pirang ndina mung meneng wae.

“Mbok men ta Lik, wong kang Dal ya duwe hak kanggo meneng. Sampeyan rasah iyik, malah penak ta dolan mae Yu wasti ora diolok-olok kang Dal?” Nduk I’in kaya biasane, nyoal-nyael.

“Dussss..mesti kowe In sing semaur, sing nyoal-nyael karo aku. Menenga wae ngko tak opahi..” Lik Ndoleng sajak kemropok merga sing nyauri dudu Dalijo, ananging I’in.

“Aku ora apa-apa Lik, mung pengen wae meneng..eslow…hening..hehe”Semaure Dalijo clelekan, babarblas ora ngetokne apa sejatine kahanane, merga cen jare Dalijo ya ora apa-apa.

“Weh, tenane Jo, aja-aja jik kangen lan kepikiran Tarsi?” Sinambi nyruput kopi lan nglirik Dalijo, Lik Ndoleng sajak ngece Dalijo.

“Basiyoo..kakek’ane..malah ngece terus cah tuwek siji iki..”Batine Dalijo.

Mbah’e..

BUNGAH

Rebo Kliwon 6 Nopember 2019

BENINGE EMBUN ESUK

Habakuk 3:17-19

Jabur 142

Lukas 14:25-33

“Sanadyan wit anjir boten medal sekaripun, sarta wit anggur boten wonten wohipun, wit jaitun wohipun damel gela, sanadyan pategilan-pategilan boten ngedalaken bahan tedha, menda sami medal saking kandhangipun, saha ing kandhang boten wonten lembunipun, ewasamanten kawula badhe asurak-surak wonten ing Pangeran Yehuwah, abingah-bingah wonten ing Gusti Allah ingkang ngluwari kawula. Sang Yehuwah, Gustiku iku dadi karosanku: Panjenengane damel sikilku kaya sikiling menjangan, Panjenengane marengake aku lumaku ing tengger-tenggerku. Habakuk 3:17-19

BUNGAH, meh kabeh menungsa ngupaya supayane isa tumeka ing kahanan iki, isa ngrasakne ka-BUNGAH-an sing saktemene. Lha sejatine BUNGAH kuwi apa ta? BUNGAH kuwi kahananing ati sing kepenak ing sakabehe. Merga BUNGAH kuwi kahanane Ati, mula sing paling penting atine, ora mawas lan gumantung marang liyane. Lho yen mung gumantung ati, mayar ta sejatine BUNGAH kuwi? Mengko ndisik, mayar tumrap sing wis isa “nyawang” lan mernahke samubarang lumantar ati kang wening.

Akeh sing nduweni penemu, yen bandane akeh mesti isa BUNGAH. Kuwi ora luput, ananging ya ora satus persen bener. Ana sing bandane umpuk undhung, ananging ati lan pikirane kokea sumelang. Wedi dicolong, wedi disaingi lan sakpanunggalane. Semono uga ora mesti yen sing “ora nduwe banda” kuwi njur otomatis BUNGAH, wong ya akeh sing sambat  ngaruara, nalika ora nduwe duwit utawa banda. Mula saka kuwi, BUNGAH kuwi sejatine kahanane urip sing atine wus sumeleh, nyawang kabeh mung minangka srana, dene tujuan utamane ya mung MANUNGGALING KAWULA GUSTI.

Neng Kitab Habakuk bab 3 ayat 17-19, ana paseksi sing jian apik tenan. Ing kana dicritakne kahanan urip sing kapetung ngrekasa. Ananging sanajan rekasa, tetep isa memuja lan memuji Gusti. Sanadyan kelangan apa kang dadi kalngenane, tetep isa mesem. Kuwi kabeh merga sing paling utama mung Gusti. Mulane sanadyan kelangan apa wae, lan uga ora panen apa wae, tetep isa BUNGAH. Kabeh kuwi mergane sing dadi underaning urip dudu banda, ananging Gusti Allah. Mula sing nulis Habakuk ya neksekake yen sing paling penting mapanke Gusti Allah ana ing “pusate” uripe. Sing nulis Habakuk, percaya yen kabeh mesti bakal diluwari dening Gusti.

Ing jaman saiki, arang sing mapanke Gusti dadi sing nomer siji. Sing nomer siji tetep jik banda. Ora percaya?Jajal, ana urusan greja, mirunggan yen meh mbangun lan butuh ragad, mesti panting pleruk, nolah-noleh kiwa tengen, nunggu siji lan sijine. Kuwi kabeh merga ing pikirane sing ana ya mung bab banda, BUNGAH kuwi nalika nduweni banda, ora nalika ngedum banda.

“Jo, kok jik isa mesam-mesem sliramu kuwi,kamangka sawah tegalmu ora panen blas, lan sapimu ya penyakiten?” Takone Lik Ndoleng naika sore kuwi ngopi neng sor talok.

“Lha kanggoku, BUNGAH kuwi nalika uripku takpasrahke Gusti kok Lik. Bab panen lan ora panen kuwi lakmung srana. Yen atine sumeleh, kabeh isa nggawe BUNGAH neng urip” Semaure Dalijo, sinambi nyumet djarumsupere.

“Aku sarujuk kang Dalijo. Urip kudu BUNGAH, sanadyan kahanane angel..” Nduk I’in melu rembugan.

“Ajeg In..wong kok ela-elu thok..mbok nduweni ide liyane..”Lik Ndoleng nyemprot rembug marang Nduk I’in..

“Ben, tinimbang sampeyan, BUNGAh mung yen tuku udud warunge Yu Wasti. Sisan nglirak-nglirik..”Semaure Nduk I’in sinambi nglirik, sajak ngece.

“Dussss…ndlogogg…bocah siji iki, mesti nyemesi aku..”Batine Lik Ndoleng, merga meh muni rawani karo sing maca BENINGE EMBUN ESUK..

Mbah’e..

NDELENG

Setu Legi 2 Nopember 2019

BENINGE EMBUN ESUK

NDELENG

Habakuk 2:5-11

Jabur 119:137-144

Yokanan 6:37-40

“Sabab karsane RamaKu iku, yaiku supaya saben wong kang ndeleng lan pracaya marang Sang Putra, iku nduwenana urip langgeng, sarta supaya Aku nangekna besuk ing wekasaning jaman.” Yokanan 6:40

NDELENG kuwi nyawang kanthi serius, mula beda karo mlengo. Yen mlengo, isa wae nyawang, ananging babarblas ora pokus,mung saklebatan wae. Iki beda karo NDELENG, merga yen NDELENG kuwi nyawang kanthi sakwutuhe urip. Nalika NDELENG, meh kabeh raga utawa awak iki nyengkuyung supaya paDELENGe isa ngerti sing saktemene. Mula saka kuwi, sapa wae sing wis NYAWANG mesti beda karo sing mung mengo, merga yen mung mengo mesti kurang isa paham.

Piwulange Gusti Yesus ana ing Yokanan 6 ayat 40 ngrembug bab NDELENG, yakuwi sing sapa wae NDELENG marang Sang Putra, mesti bakalan oleh urip langgeng. Ing piwulang iki ngemu teges,  aja sembrana olehe pada percaya marang Gusti. Bab percaya marang Gusti Yesus kuwi ora mung sakeplasan utawa mung klawan mlengo wae, ananging kudu pokus utawa serius. Dene pokus utawa serius kuwi ana ing tata basa Jawa isa dirangkum nganggo tembung NDELENG.

Ing jaman saiki, akeh sing mapanke kapercayan mung sakeplasan utawa sinambi mlengo, babar blas ora pokus. Tumrap sing kaya mengkene iki Gusti Yesus wis ngelik’ake, menawa ora bakalan wilujeng, merga ora NDELENG kanthi sakmestine. Ing jaman saiki, bab “nderek Gusti” kuwi kayane mung sampiran, sing paling utama (kayane) “Nderek karepe dewe!”. Apa wae isa dilakoni lambok abot lan resikone guediii, anggere kuwi karepe dewe, merga isa ndadekne muarem. Dene sing bab kersane Gusti, utawa NDELENG Gusti, kuwi isa digawe santai,sembrana lan ora serius. Hehe, rasah nesu sing pada maca, merga yen nesu, kuwi mbuktekne sing nglakoni ora NDELENG Gusti sing sakmestine..hehe

Dene kanggo NDELENG kuwi ya butuh sinau, ora makbuk makpethutug. Dene sinau kuwi ya kudu mangan wektu,lan akeh menungsa sing ora sabaran,kebeh dipadakne nggawe mie gorang, rongkedeppan mateng lan siyap dipangan. Merga saka angel kuwi, bab NDELENG ora nate digatekne, sing penting mlengo wae cukup! Kamangka kersane Gusti Yesus NDELENG, ora mung noleh sakeplasan.

PENUHI KEBUTUHAN NUTRISI ANDA

“Jo, dadi rasanan wong sakerte, ngapa patang windu ora njedul, ora andum berkah?” Lek Ndoleng sore kuwi nalika nyawang Dalijo thenguk-thenguk meneh neng Lincak Sor Talok langsung ndedes kanapa suwi ora njedul.

“Lagi NDELENG awakku dewe Lek, istilahe para maos tulisan iki “retret”, ananging pribadi, ora kroyokan kaya padatan. Tujuanku supaya arahing uripku pas karo kersane Gusti” Semaure Dalijo sinambi nyumet udud’e.

“Ngono kuwi Lek, urip kuwi pariasi, aja ndlujur kaya kreteg kali kae..” Nduk I’in melu-melu muni, nalika ngetokne kopi sing kayane jik panase eram, merga jik kemedul.

“Aku ya sok kaya Dalijo lho In, serius..ning mung kala-kala..mung yen butuh..” Lek Ndoleng Wangsulan.

“Yen kangen Yu Wasti ya Lek?” Takone Nduk I’in sinambi mlayu neng pawon.

“Dusss..jik bab Wasti wae cah siji iki..marakne rinduku menumpuk..”Gumrenenge Lik Ndoleng, dene Dalijo mung mesam-mesem, kaya duda meh rabi meneh..

Mbah’e..