UKURAN

 

Selasa Wage 24 Nopember 2020

BENINGE EMBUN ESUK

Yesaya 33:17-22

Jabur 24

Lukas 21:1-4

Amarga wong-wong kabeh iku ngaturake pisungsung saka kasugihane, nanging randha iki ngaturake saka ing kamiskinane, malah nyaosake sakabehing darbeke kang kanggo urip.” Lukas 21:4

UKURAN,bokmenawa sing maca tulisa iki eis nate ngerti utawa paling ora krungu apa sing diarani UKURAN.  Lha jan-jane apa ta tegese UKURAN kuwi? Yen sakngertiku, UKURAN kuwi ya samubarang kang kena dinggo ngukur utawa ngetung, iki beda karo tembung ngukur kang amarga gatel. Hehehe. Kabeh kang ana ing ngalamndonya iki kayane isa diukur, dene pas apa kurang pas kuwi dudu bab sing penting. UKURAN kuwi isa uga kanggo pathokan, supaya kahanan kang lumaku ya gumathok, ora pating penthalitan.

 

Neng Kitab Suci ana piwulange Gusti Yesus bab UKURAN, yakuwi nalika padha ngibadah lan ngepasi pisungsung. Ndilalah ana pawongan rondho tur ya mlarat. Merga randha tur ya mlarat mulane pisungsunge sithik yen ngukure nganggo UKURAN menungsa. Lire kepiye? Ya cetha wae sithik, amarga gunggunge pancen hora okeh blas. Ananging sing aneh, sanadyan ana neng saawangane menungsa sithik, ana ing pamirsane Gusti jebul luwih gedhe tinimbang pisungsunge wong sing sugih. Gusti pirsa yen wong sugih kuwi pisungsunge dudu uripe, ananging mung saka kaluwihane bandhane, tegese yen rumangsa durung luwih ya tangeh lamun pisungsung.

 

Iki beda karo mbok randha, sanadyan sithik ana neng UKURAN kamanungsan,ananging kuwi pengajine padha karo uripe sedina kuwi. Kudu dieling, sanadyan sithik ana ing UKURAN menungsa, ananging amarga kuwi padha karo ajining uripe sedina,mula tumrap Gusti Yesus kuwi luwih gede,luwih okeh tinimbang pisungsunge para wong sugih. Ukurane Gusti Yesus yakuwi ajining urip, wong sugih sanadyan pisungsung okeh, ananging kuwi dudu uripe, mung  “Turahane” urip, dene sing ,mlarat mau  misungsungake uripe dewe, ajining uripe ing dina kuwi. Semilyar jik kalah aji karo molasewu, amarga duit molasewu kuwi isa kanggo urip wong mlarat sedina, dene similar kuwi ora ana ajine, merga kuwi dudu UKURAN uripe wong sugih. Menehi semilyar ora ngaruh apa-apa, merga ajine uripe limolas milyar, dene sing mlarat, menehi molasewu kamangka kuwi uripe sedina. Dadi cetha kan kersane Gusti?

 

Dadi bab pisungsung kuwi hota mung bab UKURAN okeh apa sithik, ananging bab ajining urip. Sewu rupiah isa luwih okeh ing pamirsane Gusti, menawa kuwi padha karo UKURAN uripe sedina. Dene sepuluh juta isa ora ana ajine neng ngarsane Gusti, amarga kuwi mung duwit turahan, ilanga sepuluh yuta jik nduwe simpenan mangatus yuta.

 

“Jo, kae si Markun mosok nukokne kalung bojone mung karo tengah gram,ngisin-isini..” Lik Ndoleng miwiti jejagongan lumantar ngrasani Kang Markun.

“Hambok ben, wong kuwi wujuding tresnane Kang Markun, rasah serik Lik.” Unine Dalijo.

“Jare pe en es kok ngirite ngeram, nukokne mas-masan bojone..wong aku sing du…” Rung sempat rampung Lik Ndoleng muni, ketungka njedule Nduk Iin, lan langsung nyamber rembug kaya bensing disiram geni.

“Dudu bojone isa nukokne gelang sangang gram ya Lik?” Unine Iin.

“Weh, lha sampeyan apa nukokne gelang Yu Wasti Lik?” Takone Dalijo, lan Lik Ndoleng rung koner mangsuli, diwangsuli Iin.

“Iyo kang, Yu Wasti crita mbek aku”

“Sanadyan mung karotengah gram, ananging kuwi luwih aji, merga kinatenan tresna kang tulus, beda mbek sing sangang gram, merga kuwi sesideman…” Unine Dalijo, sinambi nglirik Lik Ndoleng sing mung umbas-umbis kaya Yuyu Kasmaran.

“Jindulllll….” Batine Lik Ndoleng.

 

Mbah’e

DIGITIK

 Senen Pon 23 Nopember 2020

BENINGE EMBUN ESUK

Yeremia 46 :18-28

Jabur 24

Lukas 20 : 27-40

“Dene sira, he abdiningSun Yakub, aja wedi, -- mangkono pangandikane Sang Yehuwah --, amarga Ingsun nganthi sira, sakehing bangsa ing nagara, panggonan anggoningSun mbuyarake sira, iku bakal Sunsirnakake, nanging sira iku ora bakal Suntumpes, Ingsun bakal nggitiki sira manut ing angger-angger, nanging Ingsun babar pisan ora nganggep sira tanpa kaluputan.” Yeremia 46:28

DIGITIK, kuwi asale saka tembung Gitik, sing tegese barang cilik saka pang kayu utawa pring. Gitik kuwi pungsine kanggo NGGITIK, yakuwi nuthuk utawa nyabetake marang barang, kang tujuane ngener marang bab kang becik. Sing maca tulisan iki, sing umure luwih saka 40 tahun, sing asale saka ndesa, mesti nate angon. Lha mbiyen nalika ngepasi angon, biasane padha nggawa GITIK, kanggo Nggitik kewan kang dingon. Mbalik neng bab tembung Gitik, Nggitik lan DIGITIK, Gitik kuwi arane barangem Nggitik kuwi tumindak migunakne Gitik dene DIGITIK kuwi nampa Gitik anan ing uripe.

Bab Gitik kuwi nate tinulis neng Kitab Suci, penere neng Kitab Yeremia bab 46. Neng kana dicritakne bab kepiye anggone Gusti Allah anggone nresnani para menungsa ora mung dielus-elus thok, ananging uga kudu DIGITIK. Anane Gusti Nggitik menungsa kuwi tujuanne supaya menungsa tetep lumaku ana ing dalan kang kinersakake, ora menggok ngiwa apa nengen. Kuwi jian persis nalika mbiyen jaman angon, saben sapine arep menggok saka dalane, Gitik utawa “cethen” bakalan nanggor awake lan njur bali ngliwati dalan kang sakmestine.

Saka crita bab Gitik, Nggitik lan DIGITIK ing dina iki, ana pasinaon apik kanggo urip, yen anggone Gusti nresnani marang menungsa (klebu awake dewe) kuwi ora mung ngelus lan maringi, ananging ya nggitik lan ngongkon. Mula saka kuwi, yen ing urip iki rumangsa nampa kahanan kang ora gathuk karo kekarepan kamanungsa, aja kesusu sambat ora ditresnani Gusti, malah kuwi wujuding tresna, kuwi sakbenere nembe DIGITIK dening Gusti, supaya mbalik mlaku  neng dalan kang sakmestine.

“In, kae paklik kena apa kok wingi ora apa-apa,kok saiki mlakune ora patio jejeg?” TAkone Dalijo neng Iin.

“Mbuhhh, mau esuk tak tekoni, wangsulane kesandung, ngepasi mau bengi arep tuku udud neng warung” IIn wangsulan sinambi dondom.

“Weh, lha aja-aja tuku rokok kuwi mung alesane wae, tujuane palinga ya Yu…” Dalijo rasido mbacutake omongane, ketungga njedule Lik Ndoleng seka tritis.

“Dusss…wong tua klaran malah dadi rasanan!” Unine Lik Ndoleng, sinambi mapanake awake arep lungguh, lan pancen lakune kethakuran sajak rekasane ngeram.

“Kuwi jan-jane kena apa ta Lik?” Takone Iin.

“Kesandung, mau bengi arep tuku udud neng warung. Sirku neng Warunge Wo Kanem, jebul entek, ya sidane nyang warunge,,,”Lik Ndoleng durung kober ngrampungke omongane, kesusul Dalijo nimbrung.

“Warunge Yu Wasti ya Lik?Hmmmm, kuwi alesan wae Lik. Tur meneh mesti liwat dalan peteng, lha saiki dala aluse ngeram,mosok isa kesandung? Kuwi sampeyan nembe DIGITIK dening Gusti. Arep liwat mburi kan Lik?” Takone Dalijo.

“Oalah Likk, jebule kaya ngono larah-larahe, hmmmm…untung wae ora disrawat bendho kang Markun” Iin melu nesoni Lik Ndoleng.

“Jretttt..malah remuk iki” Batine Lik Ndoleng, merga arep muni seru wedi karo Mbah Samiyo, sing mbokmenawa maca tulisan iki.

mbahe..

BEGAL

 

Setu Legi 21 Nopember 2020

BENINGE EMBUN ESUK

Yesaya 44 : 21-28

Jabur 95:1-7a

Lukas 19:45-48

Gusti Yesus banjur lumebet ing Padaleman Suci, wong kang padha dedagangan ana ing kono padha ditundhungi kabeh, padha dipangandikani mangkene: “Ana tulisan: PadalemaningSun iku dalem pamujan, kok kokdadekake susuh begal.” Lukas 19:45-46

 

Mbokmenawa wae kabeh sing maca tulisan iki ira ana sing kinaranan BEGAL, yen tegese tembung BEGAL kuwi bab pawongan kang tumindak ngrayah barang darbene liyan kanthi meksa. Kuwi kabeh amarga kahanane ngindonesa sing jejeg’e minangka negara hukum, kabeh ditata lan diatur kanthi adedasar hukum. Ananging yen tegese tembung BEGAL kuwi sakabahe tumindak kang kinantenan patrap meksa supaya klakon kekarepane, mbokmnenawa kabeh sing maca tulisan iki wis isa sinebut BEGAL, amarga ya ora arang tumindak meksa liyan murih klakon kekarepane dewe.

 

Bab BEGAL kuwi nate dingendikakne Gusti Yesus nalika tindak neng Pedaleman Suci, ing kono Panjengane mirsani patrap lan tumindake wong akeh sing memper BEGAL. Papan Pamujan malah dinggo nguja mareme kekarepan kamanungsan. Neng Injil Lukas disebutake bab tumindake wong akeh, yakuwi “…padha dedagangan..” Lho, lha apa salah dedagangan kuwi?Ora salah! Njur kira-kira kena ngapa kok Gusti duka nalika pirsa ana wong dedagangan? Apa merga neng Pedaleman Suci? Hora, merga kuwi sejatne ora neng njero Papan Pamujan, ananging neng “Selasare”, dadine doltinuku sejatine lumrah, sing dadi lantaran dukane Gusti kuwi bab motif utawa ancase pada dedagangan. Lgo, lha nalare kepiye?

 

Lumrah neng jamane Gusti Yesus nalika ngabekti nggawa korban langgo jangkebe ngabekti, lha sing adoh tinimbang nuntun sapi utawa wedus, saka para penggedene pedaleman suci wis dicawisi. Ancase sejatine apik, ananging suwening-suwe, njur kuwi dinggo srana nggolek kauntungan kelompoke. Kuwi sing marakne Gusti duka lan ngamuk. Merga kebranang nuruti kekarepaning kamungsan, mula menungsa njur nduweni watak BEGAL. Ing jaman saiki mbokmenawa ya okeh sing jik nduweni watak BEGAL, lan kuwi sok ditutupi patrap-patrap karohanen, kuwi gaswat lan nggegirisi. Mula saka kuwi, sakdurunge diobrak-abrik dening Gusti, aluwung watak BEGAL kuwi disingkirake wae, ben sing ana mung watak Begawan, sing anane mung welas asih.

 

“Wis krungu Lik, yen kang Markun pisungsung tipi nggo nggreja?” Sore kuwi Dalijo miwiti rembugan bab kang Markun sing nembe wae pisungsung tipi kanggo nggreja.

“Haiyah, paling-paling ngutang..” Lik Ndoleng semaur, sajak ora kepranan.

“Ngutang ya ora apa-apa, sing penting ancase kanggo kabecikan, tinimbang babarblas..” Wansulane Dalijo, lan durung rampung anggone wangsulan wis disrobot rembug dening nduk Iin.

“Ealahhh Lik, padune sampeyan ora gelem cucul, ora gelem andum, geleme mung yen diwenehi, jian kuwi kaya piwulange mbahe nang BENINGE EMBUN ESUK, dina iki, jejere BEGAL..” Pambengoke Iin, sinambi ngudak kopi neng pawon.

“Lha tenan ta, aku setuju, okeh wong sing dudu BEGAL ananging awatak BEGAL lan ya kerep tumindak mBEGAL,…” Dalijo melu nimbrung bab BEGAL, ketungka tekane Iin, nggawa kopi lan roti Shiratake, sing bahane seka Porang.

“Ati-ati Lik, jongasi mBEGAL atine Yu Wasti” Unine Iin, lan Lik Ndoleng muni lirih, merga wedi dipisuhi sing maca tulisan iki.

“Trondoloooo….mesti dikumbah ponakan loro iki aku….hmmm”

 

Mbah’e..

ISIN

 

Jemuah Kliwon 20 Nopember 2020

BENINGE EMBUN ESUK

1 Babad 17:1-15

Jabur 95:1-7a

Lukas 19 :41-44

Bareng Sang Prabu Dawud wus lestari anggone dedalem ing karatone, Sang Prabu ngandika marang Nabi Natan: “Lah kula punika ngenggeni karaton kajeng eres, mangka pethi prajanjianipun Pangeran Yehuwah kok wonten ing sangandhaping tendha.” 1 Babad 17:1

 

Meh saben wong sing jik normal utawa lumrahe mesti jik nduweni rasa sing diarani ISIN, yakuwi rasaning urip sing ora kepenak amarga ana kahanan sing dirasa ora lumaku kanthi bener lan pener. Sing nate ngrasakne ISIN, mengko oleh komentar neng ngisor, kuwi tumrap sing hora pelit kuota, merga yen pelit, biasane njaluk dibukakne liyan, njur gari nampa wujud dadi lan maca thokthil. Ananging ya ora apa-apa, ora usah ISIN wong ya ora ana ukumane. Hehe..

 

Mbalik neng crita kaya jejere tulisan BENINGE EMBUN ESUK iki, yakuwi bab NISI, eh kleru ISIN ding. Nats neng 1 Babad 17 ayat siji kuwi  nggambarake bab kaya ngapa rasa ISIN sing ndubilah gede sing dirasakne dening Dawud. Lha kok ISIN kuwi lire ana apa? Kuwi merga dewekne ngrumangsani, Pedaleman Suci mung saka tenda, kamangka omahe digawe saka samubarang kang regane tikel tekuk karo regane tenda kang mung murahe ngeram. Rasa ISIN kuwi sing mrakne Dawud sowan nabi Nathan, njur sambat, lan njaluk pamrayogi kepiye ben isa nelukake rasa ISIN kuwi mau.

 

Ing crita Kitab Suci pancen Dawud ora bakalan nggawe Pedaleman Suci kuwi, merga sing bakalane nggawe Pedaleman Suci kuwi anake, Soleman. Ananging sedya mulya saka krenteging atine Dawud isa dadi kaca pangilon tumrap sapa wae, sing rumangsa jare dadi warga greja. Yen Dawud wae ISIN nalika nyawang lan krasa (merga akeh sing isa nyawang ananging ora nduweni rasa) aneh merga Pedaleman Suci babarblas ora ana ajine tinimbang omahe, muga-muga wae sing maca tulisan iki ya isa rumangsa, ora rumangsa isa. Apa sing dirasakne Dawud kuwi sejatine kamplengan kanggo menungsa sing jarene “Nderek Gusti” lan uga “Percaya Gusti”, amarga kahane Dawud ya memper, saiki okeh sing omahe dewe dibangun apike pol-polan, ananging nalika “Pedalemane Gusti” rusak, bocor,reged,jamuren lan sakliyane, mung meneng wae, nyawang wae wegah, ethok-ethok ora weruh.

 

“Lik, wis umbruk pira ndandani kamar mandi  nggreja kae?” Takone Dalijo marang Lik Ndoleng.

“Weh, kuwi pora urusane panitia to Jo? Lha sakliyane kuwi aku ya lagi garingsring, kasatan iki..”Lik Ndoleng semaur, sajak ngendani kekarepane Dalijo.

“Kokean alesan Lik, muni kasatan kok wingenane nukokne kuota Yu Wasti? Aku dikandani Yu Wasti dewe, jare mbok jatah ben sasi “ Iin njedul, sinambi nyemes Lik Ndoleng pol-polan.

“Mbok sinau saka dawud neng Kitab Suci kae ta Lik, ISIN nalika kahanane Pedaleman Suci ora gontho, lha saiki mung dijak melu umbrug mbangun Kamar Mandi greja wae kok alesanmu “entek-amek, kurang-golek”, Iin sajak erosi.

“Lhaa, raktenan ta…yen urusane Yu Wasti wae ora enek dienek-enekne, ISIN nalika ketok ora nduwe, ananging bareng urusane karo Pedaleman Suci, alesanmu Likkk…hmmmm” Unine Dalijo, kabeh ngroyok Lik Ndoleng.

“Aja seru-seru kang, kae sing pada maca tulisane mbahe ya okeh sing mung maca, kuwi wae nunut kon mbukakne kancane, wegah mbukak dewe..hihi. Yen Lik Ndoleng bab mbukak ya senenge ngeram, mbukak Yu Was….” Iin rung klakon muni, wis disenggak Lik Ndoleng.

“Dusssss…jirutttt!!!” Malah konangan..ISIN aku cahh…” Unine Lik Ndoleng, yen iki misuhe serune ngeram, beda mbek sing maca, mung mesam-mesem kaya Kinjeng Kasmaran.

 

Mbahe..

 

TUMEMEN

 

Kemis Wage

  19 Nopember 2020

BENINGE EMBUN ESUK

1 Para Raja 22:13-23

Jabur 95: 1-7a

Lukas 19 :11-28

“Pangandikane Gustine: Apik banget pagaweanira, heh, abdi kang becik. Sarehne sira tumemen ing bab kang sapele, mulane sira sunparengake nguwasani kutha sapuluh. Lukas 19:17

Tembung TUMEMEN kuwi linggane Temen, sing tegese nyambut gawe ngayahi ayahan kanthi serius utawa basane padinan tenanan, ora sembarangan utawa gojekan. Tembung TUMEMEN kuwi mung kanggo titah kang kinaranan menungsa, amarga ora ana kewan isa diarani makarya utawa nyambut gawe kanthi TUMEMEN. Racak’e sing nyambut gawe utawa makarya kanthi TUMEMEN kuwi amarga dewekne mangerti apa kang kudu dilakoni, sapa sing paring dhawuh lan uga amarga pakaryan kuwi isa marakne uripe luwih mulya lan makmur.

 

Piwulange Gusti Yesus anan neng Injil Lukas bab 19, ngajak sapa wae sing nyinaoni eling lan (kudune) waspada, yen sejatine urip iki kaya pasemon neng Kitab Injil Lukas kuwi. Urip iki sejatine mung “silihan” saka Gusti. Amarga mung silihan, ya kudu dilakoni kanthi TUMEMEN, amarga nalika tekan ing titi mangsane, sing jenenge silihan kuwi ya kudu dibalekne. Yen saumpama nyilih njur tekan titi mangsane ora isa mbalekna, mesti sing nyilihi ya nduweni hak kanggo menehi ukuman.  Cethane, Gusti Yesus ngersakne menungsa kudu isa makarya kanthi TUMEMEN, mbuh apa kuwi sing diayahi. Aja ngasi ing tembene, nalika Gusti rawuh njur disebratake amarga ora makarya kanthi TUMEMEN.

 

Mula saka kuwi, payo kabeh wae, makarya kanthi TUMEMEN, mirunggane nalika pakarya kuwi ya pakarya mirunggan kanggo lancar lan ranca’e pakaryane Gusti. Kudu dieling piwulange Gusti kang tinulis ing Injil Lukas 19, yakuwi nalika ora makarya kanthi TUMEMEN, ing wekasane bakalan diarani “..abdi kanga la!..”. Biyuhh, mendah kaya ngapa nalika ing wekasaning jaman, wis rumangsa makarya pempengan, ananging merga kuwi dudu ngayahi kersane Gusti, njur diarani “abdi kanga la”. Mula saka kuwi, tumrap sapa wae, nalika ana ayahan-ayahan mirunggan, aja selak lan endha, aja kokean alesan, lakoni wae, mesti Gusti wus nyawisi bebulihe.

 

“Jo, ngandi paranmu, rongsasi muput ora ngetok kuwi?” Takone Lik Ndoleng, nalika klunuh-klunuh mlaku seka tritisan ngomah.

“Semedi Lik, ngayahi ayahan peparinge Gusti” Wangsulane Dalijo, jik kaya padatan, sinambi klepas-klepus karo MLDne.

“Lha apa ayahan sing mbok lakoni, kok kayane seriuse ngeram?” Takone Lik Ndoleng meneh.

“Ya sing mbiyen kae, ngolah lemAH, merha kuwi berkahe Gusti AllAH, kuwi caraku polAH ben isa mamAH..” Semaure Dalijo.

“Okeh sing nakokne sliramu lho Jo” Unine Lik Ndoleng.

“Haiyah, palinga ya mung lamis, lha entuk pirang perkara kok nakone aku Lik?” Dalijo semaur ananging ya takon.

“Hambuh, blas aku raweruh. Takono Iin kae, sajak’e paham dewekne” Unine Lik Ndoleng.

“Apa Lik, kok nyebut jenengku? Kabare Yu Wasti apik, saiki rada langsing” Mbuh piye karepe Iin, malah semaur bab Yu Wasti, jian ora TUMEMEN olehe wangsulan, dene Lik Ndoleng misuh-misuh kaya padatan.

“Jindullllll, malah tekan Wasti meneh, dadi rindu iki aku” Batine Lik Ndoleng.

 

mbahdalijo

NYAWANG

 

Senen Pahing 28 September 2020

BEINGE EMBUN ESUK

Para Hakin 14 :1-20

Jabur 28

Lukas 9:43b-45

Sang Simson tindak menyang ing Timna lan ana ing kono mirsa sawijining prawan bangsa Filisti. Para  Hakim 14:1

NYAWANg, meh saben wong isa nglakoni gawean iki, amarga lumrahe titah mesti wus dijangkepi dening Sang Juru Titah Sejati, apa kang dadi kabutuhane. NYAWANG kuwi sawijining tumindak kang migunakake netra utawa mripat kanggo nglakonine. Dene mripat kuwi ya salah sijine “panca Indra”, ananging ing jaman kang sarwa maju iki, tembung NYAWANG kuwi ora mung nalika nggunakne mripat kang wujud’e loro kang manggon ana neng pasuryan iki, amarga batin wae ya isa NYAWANG. Mulane, ing tulisan BENINGE EMBUN ESUK dina iki, aku arep nulis bab NYAWANG kang ora mung nalika nganggo mripat kang manggin neng rai iki, ananging uga mripating batin.

 

Crita Kitab Suci dina iki salah sijine saka Para Hakim bab 14, ing kono sing dadi lakon crita yakuwi Simson. Neng bab 14 iki diwiwiti bab kepiye kahanane Simson. Wiwit kekarepane “dolan” menyang daerah Timna, njur tumeka ing kana isa NYAWANG salah sawijineng wong wadon ing antarane akeh wong wadon. Sanadyan mesti wae okeh sing ayu tur ya mempluh-mempluh, ananging ana ing paNYAWANGe Simson, sing paling esip tur ya iyes, lan ndadekne dewekne “Ailapyupul”, kuwi mung siji, yen ora kleru jenenge Tukini. Yen kleru muga-muga sing maca tulisan iki liwat www.semestasetya.blogspot isa komen lan ngralat. Hehe.. Oiya, sakwise Simson NYAWANG Tukini, dewekne njur nandang lara kasmaran, lan (mbokmenawa wae ) njur ngetokne ajian Gombalemukiya, kang marakne si Tukini klepek-klepek. Sakwise Tukini klepek-klepek karo aji gombalemukiya saka Simson, njur Simson mulih, lapuran marang bapa lan biyunge, njur kon nembungake. Iki jian sopan temenan, yen cah lanang saiki, kenal, sikat, njur nunggu diparani wong tuwane sing wadon kan tanggungjawab. Hehe

 

Mbalik neng bab NYAWANG. Simson pinaringan piranti kanggo NYAWANG, njur saka NYAWANG mau isa tuwuh rasa gumun, sakwise gumun njur tertarik, sakwise tertarik njur pengen nduweni. Kuwi “Alur Logika” lumrah tumrap menungsa. Meh kabeh sing maca tulisan iki mesti ngono, NYAWANG, Gumun, Tertarik, lan pengen Nduweni. Bab isa nduweni apa ora kuwi, ya kari begjane awak..hehe. Kaya Simson, kabeh sing maca tulisan iki ya nduweni piranti kanggo NYAWANG, mung wae ora isa gumun njur atur panuwun marang kang nggawe sesawangan apik lan endah kuwi. Kudune, sakwise NYAWANG, digatekne, njur isa tuwuh rasa Gumun. Yen Simson sakwise  NYAWANG njur gumun,tertarik lan pengen nduweni, tumrap awake dewe, ya ayo NYAWANG, Gumun lan sakbanjure atur panuwun marang kang nitahake Sesawangan kang nggumunake kuwi. Yen isa nglakoni kaya mengkono, mesti uripe tentrem poll. Tangi turu neng WC, njur ngetokne banyu, swarane “kricik-kricik..” dirungu lan yen kober ya disawang, njur eling yen kuwi pirantine Gusti Allah kanggo sehate menungsa, sakwise mengkono njur ngaturake panuwun. Hayo, sapa sing mau esuk nglakoni kang kaya mengkono?

 

“Jo, ngapa kok esuk-esuk metu seka kamar mandi malah mesam-mesem kaya wong edan?” Takone Lik Ndoleng esuk kuwi nalika makani weduse lan weruh Dalijo metu saka kamar mandi mesam-mesem.

“Aku isa NYAWANG Gusti Allah Lik?” Semaure Dalijo, sinambi njupuk winih Porang kang meh didheder.

“Ora apus-apus Jo, mosok Gusti Allah ana neng kamar mandi?” Lik Ndoleng sajak gumun, lan merga gumun, njur nyedak Dalijo, sinambi njupuk MLD duweke Dalijo sing neng cedak Pacul.

“Serius Lik, aku isa NYAWANG Gusti Allah, nalika isa nguyuh, merga kuwi takimani minangka carane Gusti nyehatake aku. Jajal wae ora isa nguyuh seminggu, kaya ngapa rasane?” Takone Dalijo.

“Haiyah, angel kang yen Paklik kon isa NYAWANG kabeh kahanan isa nemokne Gusti, merga kanggone Paklik, sing isa nemokne Gusti kuwi mung nalika NYAWANG Yu Wasti” Swarane Iin saka njero pawon, mbuh sinambi ngapa.

“Trondoloo  gowang..cah siji kae kaok ya krungu..ananging pancen kok Jo, NYAWANG Wasti kuwi rasane..jiann..” Lik Ndoleng nggrememng dewe,malah kaya wong waras kae..

 

Mbah’e..

GAMAN

 

Kemis Pon 24 September 2020

BENINGE EMBUN ESUK

Yehezkhiel 12 :17-28

Jabur 25:1-9

Lukas 9:1-6

Kacarita Gusti Yesus nimbali sakabate rolas, padha kaparingan kasekten lan panguwasa misesani dhemit lan marasake lelara. Para sakabat banjur padha mangkat njajah sakehing padesan, ngabarake Injil sarta marasake wong lara saenggon-enggon. Lukas 9:1,6

 

GAMAN kuwi sawijining kahanan kang isa awujug barang utawa malah ora awujud. Dene gunane GAMAN kuwi ya kanggo makarya, jumbuh karo pungsine. Akeh kang isa kinaranan GAMAN, kayata: Arit kuwi minangka GAMAN kanggone wong sing arep ngarit utawa babat-babat, Pacul kuwi minangka GAMAN kanggone wong tani kanga rep macul, Graji kuwi GAMAN tumrape wong sing arep nuking kayu, mbuh kuwi dinggo ngethok apa dinggo nyigar. Sing cetha, GAMAN kuwi piranti sing pungsine kanggo ngrewangi pakaryan, supaya luwih mayar lan cepet. GAMAN kuwi isane nduwe pungsi ya nalika digunakne, apik’a kaya ngapa menawa ora digunakne, tangeh lamun isa maedahi tumrap menungsa.

 

Crita neng Injil Lukas bab 9  ayat siji tekan enem, nyritakake bab GAMAN, yakuwi pirantining urip peparinge Gusti Yesus. Dene wujude GAMAN kuwi dudu Arit,Pacul utawa Graji, ananging kasekten. Para sekabate Gusti Yesus ditimbali, njur diparingi GAMAN kang awujud kasekten. Anane diparingi GAMAN kang awujud kasekten kuwi, amarga meh diutus ngayahi pakaryan, dadi GAMAN kuwi ora mung kanggo pantes-pantes, ananging supaya digunakne makarya. Kabeh ditindakne dening Gusti, yakuwi bab menehi GAMAN kang awujud kasekten marang para sekabat amarga meh diutus makarya kaya pakaryan kang ditindakake dening Gusti. Manut kawicaksanane Gusti Yesus, lumantar GAMAN Kasekten kuwi, para sekabat isa ngayahi ayahan, isa nelukake maneka werna pepalang, kang wujude apa wae.

 

Sakwise nampa GAMAN saka Gusti, para sekabat mangkat, saperlu ngayahi ayahan peparinge Gusti. Para sekabat percaya lumantar GAMAN peparinge Gusti mau kabeh ayahane isa klakon kanthi lancar. Kuwi kabeh dilakoni dening para sekabat, amarga ngerti yen GAMAN kuwi isane migunane nalika digunakne.Saksektine kaya ngapa GAMAN, ananging nalika ora digunane, ora ana paedahe babarblas. Iki minangka pepeling kanggo para wong sing (jarene ngaku) kresten, sing sejatine wis diparingi GAMAN kasekten, supaya ngayahi pakaryan manut dhawuhe Gusti, ora manut karepe dewe, supaya dayane kasekten si GAMAN kuwi njedul.

 

“In,jebule dulurmu lanang Dalijo kuwi wasise ngeram ngobahake pacul, jian aku gumun karo cah siji kae..” Lik Ndoleng ngrasani Dalijo, nalika lungguh neng cakruk sinambi nyawang Iin mepeni kumbahan.

“Wong gawean ketok mata wae kok ndadak nggumun ta Lik, kabeh anggere dilakoni mesti isa klakon” Wangsulane Iin lan njur tanpa dingerteni Lik Ndoleng, Dalijo njedul saka sisih kidul omah.

“Ngrasani Yu Wasti Lik?” Takone Dalijo, sinambi lungguh, takone sajak ngenyek Lik Ndoleng, merga ngomonge sinambi mesem sajak ngece.

“Dengkulmu mlocot kuwi Jo, iki lagi ngrasani awakmu sing jebule wasis ngolah lemah, nyawiske lahan nggo Porang kuwi” Lik Ndoleng semaur sinambi rada erosi sithik.

“Menungsa urip kuwi wis dijangkepi karo Gusti, dede wujude macem-macem Lik, jejangkep kuwi GAMAN utawa kasekten. Dene GAMAN utawa Kaesekten kuwi kudu dicakne, ora mung diseimpen wae, supaya migunani” Dalijo semaur wasise ngeram, jian kaya resi seka perengan Gunung.

“Kaya sampeyan kuwi Lik,  diparingi GAMAN dening Gusti, ananging ora tahu digunakne, malah sing digunakne mung Aji Pangglembukan, nggo ngglembug Yu Wasti” Iin muni ngono, njur  makcengekrat mlebu ngomah, dene Lik Ndoleng mung ndomblong, lan batine ya misuh.

 

Mbah’e..

NYRITAKNE

 

Rebo Pahing 23 September 2020

BENINGE EMBUN ESUK

Yesaya 41:1-13

Jabur 106:1-12

Lukas 8:19-21

Haleluya! Padha saosa puji sokur marang Pangeran Yehuwah, awitdene Panjenengane iku sae! Sih-susetyane iku langgeng ing salawase. Sapa kang bisa nyaritakake pakaryaning Sang Yehuwah kang linuwih, tuwin martakake sakehing pangalembana marang Panjenengane? Jabur 106:1-2

Menungsa kuwi nduweni okeh kodrat, saka okehe kodrat mau , ana sing  arang disadari utawa dimangerteni, sanadyan meh saben wektu dilakoni, yakuwi kodrat crita bab apa wae. Dene ayahan crita kuwi isa diarani NYRITAKNE. Dene sing dicritakne ya maneka werna, malah meh kabeh dicritakne marang liyan. Ing jaman saiki, NYRITAKNE kahanan kuwi isa dipilah dadi rong bagean. Sing sepisan, nalika NYRITAKNE kahanan kang rekasa utawa susah, kuwi isa diarani sambat utawa ing basane jaman saiki BAPER. Dene kang kapindo, nalika NYRITAKNE kahanan kang sukses utawa berhasil, mengko diarani pamer utawa malah sombong lan sakpanunggalane. Pancen menungsa kuwi titah sing nggumunake temenan.

 

Neng Kitab Jabur ana piwulang kang wujud’e pangudharasa, dene sing ngudharasa ya juru Jabur. Dene pangudharasa kuwi bab sapa kang isa NYRITAKNE kabeh pakaryane Gusti Allah sing pancen ngedab-edabi. Manut Juru Jabur, saking okehe pakaryane Gust Allah, mula bingung apa ya isa NYRITAKNE pakaryan kuwi. Bingunge Juru Jabur kuwi ora ateges njur ora NYRITAKNE pakaryane Gusti, ananging crita’a kaya ngapa, kuwi ora bakalan isa NYRITAKNE kabeh pakaryane Gusti Allah.

 

Saka Critane Juru Jabur, isa dipethik pasinaon apik. Sing sepisan, sanadyan menungsa tangeh lamun NYRITAKNE pakaryane Gusti Allah kang akehe ngeram iki, ananging tetep isa NYRITAKNE manut apa kang dirasakne lan dialami. Saka kahanan iki, mulane ayo migunakne “Bakat Alamiah” saka Gusti iki kanggo NYRITAKNE pengalamaning urip iki, merga pengelaman urip iki sejatine crita bab pakaryane Gusti Allah. Ayo, sing kulina crita, mbuh liwat WA, PB lan liya-liyane, enggal dicritakne kabeh pengalamaning urip minangka paseksi Pakaryane Gusti.

 

“Lik, suk wulan ngarep entuk jatah mimpin acara bulan keluarga, kon crita pengalamaning urip” Dalijo menehi info paklik’e sing bagus dewe sak alas kethu.

“Weh, aku kuwi ora nduweni crita apa-apa Jo, mbok aja aku..” Semaure Lik Ndoleng menehi alesan.

“Weh, lha crita isa nglakoni urip tumeka saiki kuwi kan isa dicritakne ta Lik?” Sambunge Dalijo.

“Kuwi dudu crita Jo, kuwi urip sing biasa-biasa, dadi orasah dicritakne” Alesane Lik Ndoleng.

“Yowis kang, yen paklik wegah takwakilane bab crita pengalamaning uripe. Ngko takcritakne kabuuuuuuuuuueeeeehhhh bab lelakone mbek Yu Wasti. Lelakon indhak-indhike, lelakon njowal-njawile..ben takcritakne sakelingku” IIn sinambi njupuki klambi sing dipepe langsung muni sajak sengol.

“Dussssss….ya yen ngono tak crita dewe wae. Tak NYRITAKNE pengalaman uripku, lan ing kono jebul kabeh Pakaryane Gusti” Wangsulane Lik Ndoleng sinambi ngukuri sirahe sing rambute mung kari telulasler.

 

Mbah’e..

ANGKER

 

Selasa Legi 22 September 2020

BENINGE EMBUN ESUK

Purwaning Dumadi 28 : 10-17

Jabur 106 :1-12

Lukas 8 :16-18

Bareng Yakub tangi saka anggone turu, banjur ngucap: “Satemene Sang Yehuwah ana ing panggonan kene, aku ora ngreti.” Yakub wedi lan ngucap: “Saiba angkere panggonan iki, iki ora liya padalemane Gusti Allah lan iki gapurane swarga.”

Purwaning Dumadi 28:16-17

 

Nalika krungu tembung ANGKER, ora sithik wong sing njur mrinding, kuwi amarga wedi. Sanadyan durung nate ngalami apa-apa neng papan kang kinaranan ANGKER,ananging perbawane tembung ANGKER kuwi jian pol temenan. Lha jan-jan’e apa ta tegese tembung ANGKER kuwi? Tembung ANGKER kuwi tegese yakuwi kahanan kang ora lumrah, dene ora lumrahe kuwi isa bab sing marakne seneng lan uga marakne wedi, kuwi sejatine artine tembung ANGKER. Ananging merga kahanan, tembung sing sejatine netral kuwi njur dadi mung nduweni arti kang sansaya ciut, kuwi ya merga pokale menungsa. Dadi dudutane, tembung ANGKER kuwi ora kudu marakne wedi,  merga isa wae kuwi kahanan kang nggumunake, mula bubar maca tulisan BENINGE EMBUN ESUK iki, ora usah wedi liwat cedak kuburan, cedak danyangan lan cedak papan pangibadah, santai wae ya..

 

Neng Kitab Suci ana crita bab papan dalah kahanan sing diarani ANGKER, yakuwi crita nalika rama Yakub nembe tindakan. Nalika kuwi nembe kesel, njur nggolek papan kanggo ngaso. Amarga nembe mlaku, mbuh arep ngapeli Lea po Rakhel, aku dewe durung dong..hehe..mulane nalika kesele ngeram ya njur ngaso lan turu ing sadengah papan, merga wektu kuwi durung isa pesen hotel liwat aplikasi internet..hehe. Lha nalika ngaso njur turu kuwi rama Yakub ngimpi. Dene ngimpine jian jos temenan, ana andha dawa utawa dhuwure ngeram, sundul langit. Lan lumatar andha mau Gusti Allah wira-wiri munggah mudun nemoni dewekne. Bareng tangi njur sadhar lan rumangsa yen papan kang dinggo turu kuwi ANGKER, amarga kuwi manut penemune rama Yakub omahe Gusti Allah. Mulane, sakwise kuwi, rama Yakub njur ngawe tanda yen ing papan kono kuwi jan-jane omahe Gusti Allah, mula kudu diurmati, ora sembrana!

 

Saka crita ing ndhuwur isa dipethik pasinaon, yen sejatine kabeh papan lan kahanan kuwi omahe Gusti lan ing kono Gusti kersa dipethuki sapa wae sing gelem methuki. Eling, Gusti kersa dipethuki, merga jagad iki pancen omahe Gusti! Gusti kersa dipethuki neng ngendi wae lan kapan wae, mung menungsa wae sing wegah methuki, apa meneh menehi tenger yen kabeh papan ing njagad mokamat iki omahe Gusti. Menawa eling utawa sadhar yen kabeh papan  kuwi ANGKER, merga ing kono Gusti anal an kabeh kahanan kuwi ya ANGKER, merga Gusti pirsa, kudune menungsa kuwi ora tumindak sing ora migunani, didelikna kaya ngapa Gusti pirsa, wong kabeh papan kuwi ANGKER, merga kabeh omahe Gusti. Ditutupana kaya ngapa, Gusti pirsa, merga kabeh kahanan kuwi ANGKER,amarga dipirsani dening Gusti. Jal piye yen wis ngene iki, kabeh jebule ANGKER Luuurrrr!!

 

“ Jo,ndek minggu wingi apa diumumke neng warta greja?” Takone Lik Ndoleng neng Dalijo.

“Iyo, diumumke..”Dalijo semaur sinambi milihi Bibit Porang sing meh ditandur merga udane sajake wis muntub-muntub.

“Disebutake jumlahe pira Jo?” Takone Lik Ndoleng sajak sansaya penasaran.

“Weh, lha iki baba pa sing diumumake ta Lik?” Dalijo leren anggone makarya, njur lungguh neng Sor Wit Gedang, njupuk MLDne lan disumet, gerr..

“Hmm..anu..kui lho Jo, aku pisungsung khusus. Ora okeh sih, tapi lumayan, “ Semaure Lik Ndoleng.

“Rasah kuatir Lik, ora’o diumumake wae Gusti pirsa, merga jarene Mbah’e, kabeh papan lankahanan kuwi dipirsani Gusti, utawa isa diarani ANGKER..” Wangsulane Dalijo, Lan sakdurunge mbacutake rembug, Iin njedul nggawa kopi lan kimpul bakar, lan kaya padatan, muni sakrasane.

“Mulane aja sempulitan karo Yu Wasti wae Lik, sanadyan kang Markun ora ngerti tur ya sajake mung mesam-mesem wae, Gusti ngerti lho. Awas kesiku Gusti nembe sambat! “Unine Iin, lan Lik Ndoleng langsung abang ireng, kukur-kukur sirahe sing rambute mung kari limang las, mlunthun kae!!

“Jindulll…kenek neh!!” Batine Lik Ndoleng!

 

Mbah’e..

 

NGAPUSI

 

Senen Kliwon 21 September 2020

BENINGE EMBUN ESUK

SEDULUR TANI PORANG

Purwaning Dumadi 27 :1-29

Jabur 106:1-12

Lukas 8 :4-15

Ibu Ribkah ngandika marang Yakub kang putra: “Aku mau ngrungokake bapakmu anggone ndhawuhi Esap kamasmu: Aku golekna kewan bebedhagan, banjur olahen kang enak, dakpangane lan sawuse iku kowe dakberkahi ana ing ngarsane Sang Yehuwah, sadurunge aku mati. Mulane saiki, engger, anakku! Rungokna kandhaku kaya kang dakprentahake marang kowe iki mangkene:

Purwaning Dumadi 27:6-8

Aku yakin mbolokin, yen sapa wae sing maca tulisan iki, mbuh gede-cili,lanang-wadon, tua-enom, lemu-gering lan jinis-jinis lyane, mesti wis nate NGAPUSI. Lho kok isa? Ya isa wae, lha wong NGAPUSI kuwi pancen “Bakat Terpendam” sing diduweni kabeh titahe Gusti sing kinaranan Menungsa, menus-menus kebak dosa. Sing rumangsa ora nate NGAPUSI, isa komplen,isa protes, kuwi neng kolom komentar,hehe.  Lho, lha sejatine apa ta tegese NGAPUSI kuwi? NGAPUSI kuwi asale saka tembung lingga Apus, tegese mbusak utawa ngilangi. Mulane NGAPUSI kuwi tegese tumindak kanthi sengaja kang ancas utawa  tujuane nglangi sing anal an digenti liyane. Njur NGAPUSI kuwi salah apa bener? Dosa apa ora? Ben luwih cetha, ayo sinau saka Kitab Suci.

 

Neng Purwaning Dumadi bab 27 cetha wela-wela bab tumindak NGAPUSI, dene sing tumindak kuwi malah tokoh sing klebu populer neng tradisi Kristen, yakuwi Ribkah, Ishak lan Yakub. Dene ESap sing sejatine korban malah ora patio populer, mbuh apa dosane eyang Esap kuwi. Mbalik neng bab NGAPUSI. Ribkah kuwi olehe NGAPUSI bojo lan anak’e pancen kliwatan. Yakub diajak NGAPUSI marang bapakne lan kangmase, dene tujuane NGAPUSI kuwi kanggo Ngrayah apa sing dudu hak’e utawa darbene. Ribkah ora ngajeni bojone, ora nyawang anake pembarep sing wis rekasa makarya. Amarga tresna kang ora imbang, mulane marakne ana korban. Emane, tumindak apus-apus kuwi malah dialem dening (sebagean) greja, mulane ya arang ana wong sing jenenge Esap utawa Esau, kamangka dewekne kuwi korban apus-apus lan wong sing sregepe makarya ora ukur. Okeh sing malah “ngidolai” Yakub, kamangka (ingatase wong lanang) gaweane cupar, mung turut pawon, ngrewangi mbokne,lan gelem dijak NGAPUSI. Jian tobatt tenan..

 

Ing jaman saiki bab NGAPUSI kuwi ya ijik populere ngeram, mbuh kuwi stadium dhuwur apa mung cendek, sing cetha bab bakate menungsa sing kinaranan NGAPUSI kuwi jik okeh sing “mbudidayakan”. Yen eling karo crita Kitab Suci, amarga tumindak NGAPUSI kuwi, si Yakub njur keplantrang tekan papan adoh lan tundane ngrekasa merga rumangsa dosa, mula kanggone sing maca tulisan iki, ya orausah NGAPUSI. Merga ora NGAPUSI kuwi jujur lan jujur kuwi merdika. Sing ora sarujuk, manga rembugan neng kolom komentar, aja pelit-pelit komentar, ora mbayar..hehe..Pelit duwit lumrah, ananging pelit ide kuwi kebangeten..

 

“Lik, jare wingi entuk “komisi” merga ngedolke lemahe siwo Maruta, kok mbokcilik Trinil jik sambat butuh duwit?” Takone Iin marang Lik Ndoleng, bab komisi ngedolake lemahe Siwo Maruta.

“Oiya Lik, entuk mangyutonan ya Lik? Joss..pisan-pisan nukokne MLD Lik, aja pelit-pelit kaya sing kulino maca tulisan BENINGE EMBUN ESUK iki..hehe” Dalijo ngompori rembug.

“Dus, aja seru-seru cah! Klakon krungu mbokmu cilik mengko. Iki arep tak nggo butuh..menenga. Nyohh Jo, nggo MLDmu, In, iki nggo tuku dawet,senenganmu..” Muni ngono Lik Ndoleng menenhi duwit marang Iin lan Dalijo, mung rongpuluhan ewon.

“Biyuh pelitmu Lik…hmm..mesti iki arep tumindak NGAPUSI, iki mesti njanjeni Yu Wasti” Dalijo mak clemong muni Yu Wasti.

“Oiya Kang, wingi Yu Wasti nakoni aku, apa paklikmu dodolan sapi ta In, kok arep nukokne aku gelang..Ngono kang..”Iin muni sajak sumringah.

“Lhaa..raak tenan ta…arep NGAPUSI merga Yu Wasti..” Dalijo mbengok, lan saka pawong Bulik Trinil muni.

“Ora papa In,Jo..paklikmu kuwi cen bakate NGAPUSI. Aku ora kaget..tak tokne wae, ben njlungup dewe..”

“Trondolooooo…sidane konangan menehh..Dusss!!!”Batine Lik Ndoleng misuh-misuh, arep muni wedi dipleroki sing kulino maca BENINGE EMBUN ESUK.

 

Mbah’e..

NDEREKAKE

 

Setu Pon 19 September 2020

BENINGE EMBUN ESUK

PORANGE DALIJO

Zefanya 2 :13-75

Jabur 145 :1-8

Lukas 8:1-3

Sawise iku ora let suwe Gusti Yesus banjur tindak njajah kutha-kutha lan desa-desa martakake Injil Kratoning Allah, kadherekake dening sakabate rolas, lan uga dening wong wadon sawatara kang wis padha kawarasake anggone kasurupan dhemit utawa anggone nandhang lelara warna-warna,.. Lukas 8:1-2b

 

Tembung NDEREKAKE kuwi linggane nderek, sing tegese melu lumantar mlaku ana mburine. Amarga mlaku ana neng sisih mburo, mula nalare ya mesti ngliwati dalan sing diliwari sing diderekake, utawa ditutake. Saka tembung nderek mau njur dadi NDEREKAKE, sing tegese ngetutake kanthi sadhar tumeka ngendi wae papan kang katuju dening sing diderekne utawa sing ditutake. Mulane yen ana sing NDEREKAKE njur malah mandeg ana neng ndalan, kuwi ora mungkin tumeka papan kang dadi ancase sing diderekne.

 

Crita Kitab Suci, cethane neng Injil Lukas bab 8 ayat 1-3, ngajak sapa wae sing gelm maca lan ngrasakne, ngerti apa kang dadi kersane Gusti.  Gusti tindak saperlu mbabar kabar kabungan bab Kratoning Swarga, dene tindake Gusti ora mung neng sapanggonan, kudu menyang ngendi-endi panggonan. Anggone tindak kuwi Gusti ora piyambakan, ananging diderekake karo para siswane lan para wong wadon sing wis mertobat merga dislametake. Mula saka kuwi, para siswane Gusti lan pawa wong wadon isa kinaranan nembe NDEREKAKE Gusti.  Sing pada NDEREKAKE Gusti ora iyik kokean takon arep nengndi wae tindake Gusti, sing cetha, ngandi wae Gusti tindak, tetep NDEREKAKE.

 

Saka crita Kitab Suci ing ndhuwur isa dipethik pasinaon apik, sing sepisan, para siswa lan para wong wadon kuwi NDEREKAKE utawa ngetutake merga sadhar, mula ora nate protes menyang ngendi wae tindake sing diderekake. Ora kena ngenyang, apa meneh malah ngenerake Gusti kudu mrana lan mrene. Iki kudu dadi pasinaon marang sapa wae sing jarene “Nderek” Gusti, sing jik seneng ngenyang bab dalane Gusti, malah kepara ngenerake tindake Gusti, ora “ngiringake” malah NGGIRING Gusti. Kaping pindone, para wong ndesa sing ndilalah kerawuhan Gusti njur antuk piwulang apik, ora nduweki dewean, mula kudu iklas menawa Gusti njur jengkar menyang papan liyane. Beda kayo pasamuan saiki, pomeneh gekaje, kudune manggon neng sakpanggonan, metu sithik wae wis dirasani ora karuwan..

 

Saka andharan ing nduwur, payo saiki pada nakoni awake dewe-dewe, rasah nakoni liyan, apa wis wani soroh nyawa anggone NDEREKAKE Gusti, NDEREKAKE kersane Gusti? Apa malah kabeh dinyang persis kaya Bakul Neng Pasar kae, kabeh dinyang? Mulane, sing jik nduweni hoby lan bakat ngenyang kersane Gusti, lan ngenyang bab NDEREKAKE Tindake Gusti, ndang elinga, sakdurunge kukut  jagade.

 

“Lik, sampeyan didapuk dadi ketua panitia natal 2020, kuwi hasile rapat wingi bengi, lha sampeyan diundang ora mangkat”, Unine Dalijo, menehi kabar Lik Ndoleng bab dewekne didadekne ketua panitia natal 2020.

“Weh, desember kuwi jik pandemic ya Jo, mula rasah natalan, natalan online wae” Semaure Lik Ndoleng sinambi njupuk MLDne Dalijo, merga wis tanggal rada tuwek, mula isa nggo alesan njaluk.

“Iki ya natalan dalam kesederhanaan, merga pandemic. Mulane kudu dirancang sing sakpenere” Dalijo jik ngaturi alesan bab natalan.

“Lha apa ora wedi yen mengko digropyok wong akeh, merga ngumpulake wong sakndayak bengkah. Mending natalan online wae, rasah nganggo panitia” Lik Ndoleng jik alesan wasise ngeram.

“Haiyahhh, padune wegah, mula alesane pol,kokean alesan sampeyan Lik” Iin njedul, sinambi nggawa kopi lan gedang kapok goring.

“Sareh In, aja kesusu ngamuk paklik..” Rada lirih Dalijo mbisiki Iin ben Lik Ndoleng ora miring.

“Lha Yu Wasti dadi panitia apa ora Kang?” Takone Iin.

“Dadi, dewekne sekretaris, lan sekretaris kuwi hubungane karo ketua In..lha iki paklik ana kesempatan malah a..” Durung nganti Dalijo mbacutake tembunge, keselak Lik Ndoleng nyaut rembug.

“Weh, Wasti melu panitia ta? Yen ngono aku tak gelem dadi..” Unine Lik Ndoleng, lan gentian, durung kelar anggone muni, kesusul Iin nylekop.

“Lhaaa rak tenan ta, nggere ana jeneng Yu Wasti, mesti sumringah…hmm. Kamangka desember kuwi Yu Wasti karo Kang Markun meh liburan,hunimun, neng Mbali” Iin muni sakrasane, dene Lik Ndoleng mung misuh sinartan kukur-kukur sirahe sing mlunthun, merga rambute kari 13.

 

“Dusss..Jindulll!!” Batine Lik Ndoleng.

LILA

 

Jemuah Pahing 18 September 2020

BENINGE EMBUN ESUK

Najum 2 : 3-13

Jabur 145:1-8

Lukas 7:36-50

Ing kutha kono ana wong wadon kang wis kondhang anggone dadi wong dosa. Nalika krungu, yen Gusti Yesus lagi dhahar ana ing omahe wong Farisi mau, dheweke banjur mrono karo nggawa gendul marmer isi lenga wangi, nuli ngadeg karo nangis ana ing sawingkinge sampeyane Gusti Yesus, nganti luhe crocosan nibani sampeyane, banjur diusapi kalawan rambute, diujungi sarta dijebadi kalawan lengane wangi mau. Lukas 7:37-38

 

Tembung LILA kuwi mayar nalika nulis lan ngucapake, ananging angel menawa nglakoni. Apa meneh yen bab LILA kuwi gegandengan karo samubarang kang dadi klangenane. Isa dinggo conto, nalika kelangan duwit, sanadyan cacahe ora okeh, ananging amarga duwit kuwi mesti dadi klangenane menungsa, mesti angel LILA utawa iklas. Isa wae pirang-pirang wektu mung mikirkake ilange duwite. Iki beda menawa sing ilang kuwi dudu samubarang kang dadi klangenane, mesti bungahe ngeram.

 

Crita Kitab Suci ing dina iki ngajak sapa wae sing kober maca tulisan BENINGE EMBUN ESUK eling lan waspada, yen kahanan LILA kuwi ora sembarangan. Nalika Gusti Yesus nembe mampir neng omahe wong Parisi, mampir merga diampirake, njur ditutke wong okeh, salah sijine wong wadon sing dianggep wong sing dosane gedene ngeram, kamangka jan-jane dosane luwih gede wong lanang lho ya. Hehe. Lha nalika nyedaki Gusti Yesus, wong wadon sing jarene dosane pol-polan mau nggawa lenga sing wangi dewe turya larange ngeram, diwadahi gendul marmer tur ya anyar. Lha lenga kuwi ora dicaosake Gusti njur didol dadi duwit, ananging malah disuntakake neng sampeyane Gusti Yesus lan njur diusapi nganggo rambute.

 

Gusti Yesus pirsa yen sing dilakoni dening wong wadon kuwi adedasar rumangsa dosane gede, mula kabeh diayahi kanthi LILA. Wong sing LILA kuwi racake ora ngetenug ragad utawa duwit, sing dilakoni adedasar LEGAWAning rasa.  Lenga wangi sing dinggo njebadi sampeyane Gusti Yesus kuwi larange ngeram, mbokmenawa yen saiki isa dinggo tuku portuner, ananging amarga ing pamawase wong wadon kang jarene dosa mau kuwi ajine ora ngluwihi pangapurane dosa saka Gusti, mula ya dilakoni kabeh kanthi LILA. Apa kang dilakoni wong wadon mau entuk pangalembana saka Gusti, lan malah para sekabate, nalika Gusti mlebu ngomah, aja meneh njebati nganggo lenga wangi sing larang regane, lha wong mijik’e sampeyane nganggo banyu wae ora kober. Biasane wong-wong sing rumangsa cedak karo Gusti, pelite ngeram. Arang sing LOMA lan LILA, sing okeh medite poll..Lha kuwi, sing maca maro mencereng, kuwi tandane wong sing medit, geleme nampa ananging moh menehi. Hehe..

 

“Jo, ngandi paranmu, kok sewindhu ora njedul?” Takone Lik Ndoleng menyang Dalijo, nalika jagongan neng Lincak Sor Talok.

“Weh, lha kok mung sewindu Lik, aku wis se-abad olehku ndelik” Semaure Dalijo sajak njarak pakne Cilik sing bagus dewe sak kandang pitik.

“Serius Jo, kowe disemantakne. Kae Mas Heri, putrane pak guru sing mbiyen sok ngakon nggawakne alang-alang nggo tali dautan, nakokne. Wis tak wnagsuli, yen awakmu lagi semedi, njaluk wangsit” Lik Ndoleng menehi katrangan bab inpormasine.

“Iya Lik, matur tengkiyu ya. Aku ora njedul kuwi merga aku sinau iklas, LILA marang samubarang kang ilang saka ing uripku” Semaure Dalijo sajak serius.

“Weh, iki baba pa ta Jo?” Takone Lik Ndoleng.

“Ya baba pa wae Lik” Semare Dalijo, njur sakdurunge dibablasakeomonge, njedul Iin.

“Kuwi Lik, sinau Iklas, LILA yen kasunyatane Yu Wasti kuwi wis duweke kang Markun. LILA lan kabeh dilakoni kanthi bungah. Kaya bungahe wong GKJ yen bubar dadi malejelis kae lho” Unine Iin.

“Duss, malah tekan Wasti meneh In!! Aku meh nglalekne malah mbok elingake, mbuh yen iki mengko aku kedanan meneh” Semaure Lik Ndoleng.

“Edan kok dirancang, kuwi sengaja ngedan Lik!!” Unine Iin njur mak klepat menyang pawon.

 

Mbah’e..