PALENTINE

Jemuah Kliwon 14 Pebruari 2020

BENINGE EMBUN ESUK

Kaimaman 26:34-46

Jabur 119:1-8

Markus 8:34-9:1

“Sanadyana mangkono, samangsa padha ana ing nagarane mungsuhe, iya bakal padha ora Suntampik lan ora Sunemohi, Ingsun ora bakal ndadekake tumpese lan ora bakal mbubrah prasetyaningSun karo wong-wong iku, awit dene Ingsun iki Yehuwah Allahe. Murih kaslametane wong iku Ingsun bakal ngengeti prasetyaningSun marang para leluhure kang wus Sunentasake saka ing tanah Mesir ana ing ngarepe para bangsa, supaya Ingsun dadi Allahe; Ingsun iki Yehuwah.” Kaimaman 26:44-45

Crita Kitab Suci bab mbalelane menungsa, pepeling saka Gusti Allah,mertobat lan urip kepenak, bar kuwi njur mbalela maneh kayane uakih banget. Apa meneh ana ing Kitab Perjanjian Lawas, ing kana dicitakne kaya ngapa polah tingkahe para menungsa sing ndableg lan ngeyele ngandubillah. Mula saka kuwi, supaya menungsa ora kokean polah lan ndadekne ati mongah-mongah, njur digawekne paugeran-paugeran utawa pranatan-pranatan. Tujuan utawa ancase paugeran utawa pranatan kuwi ya supaya menungsa eling lan waspada bab endi sing oleh dilakoni lan  ora olih dilakoni. Ananging sanadyan kaya mengkonoa, ya akeh sing tetep padha mbalela,ndableg..(mbokmenawa sing maca tulisan iki ya anal ho..hehe)

Kitab Kaimaman nyritakne bab apa kang dadi paugeran-paugeran saka Gusti Allah kanggo menungsa. Ora mung paugerane, ananging uga kaya ngapa gede lan jerone tresnane Gusti Allah marang menungsa. Saking gedene tresnane Gusti Allah marang menungsa, mula sanadyan wis nerak paugerane Gusti Allah lan nampa paukuman lumantar diuncalne neng negara kang beda, tetep wae dijaga dening Gusti Allah. Kaya sing tinulis ana ing Kitab Kaimaman 26 ayat 34-46. Neng kana dicethakne kaya ngapa kaluputan sing dilakoni dening menungsa lan uga paukumane. Anaging sanadyan kaya mengkono, Gusti ora negakne kagungane nampa paukuman suwe, sebab mbok’a diukum tetep wae dijaga keslametane. Paukuman saka Gusti Allah dudu merga gethinge Gusti, ananging malah kuwi wujud tresnane Gusti marang para kagungane. Mula saka kuwi menawa ana sing nate nerak paugerane Gusti Allah, njur rumangsa nampa paukuman, aja kuwatir. Katrenane Gusti Allah kuwi ngungkuli paukuman.

Saka kitab Kaimaman, ayo pada sinau bab lakuning urip, yen ing urip iki sejatine merga katresnane Gusti Allah. Menawa ana sing ngrasa uripe rada rekasa lan abot, aja kuwatir, kuwi mingaka carane Gusti mratelakake katresnane. Saking tresnane Gusti marang menungsa (jarene jarwa dasa saka menus-menus kebak dosa..hehe..) mula sanadyan luput lan kudu nglakoni paukuman, tetep wae djaga lan diayomi.

“Jo, tak jingglengi BENINGE EMBUN ESUK dina iki kok jian ora ana gathuk’ane babar blas ing antarane judul karo andharane?” Sajak serius Lik Ndoleng maca androite  lan uga takon marang Dalijo.

“Weh, kok padha karo aku Lik, iki karepe piye ta?” Nduk I’in melu urun  omong lan ndilalah gathuk karo Lik Ndoleng, kamangka biyasane banyu mbek lenga.

“Woooo..lha kurang tiliti..coba balenineh macane..”Semaure Dalijo sinambi ngisep MLD, klangenane sing anyar.

“Tetep ora ana ….”Meh bareng Lik Ndoleng karo Nduk I’in semaur, sakwise sawetara maca meneh.

“Hmmm…yaowis. Lha kuwi nggon jaket sampeyan kok ana sing mbedusul, kuwi apa Lik? Kok kayane aku ngerti..” Dalijo ngalihake konsentrasine I’in karo Lik Ndoleng saka androit marang jakete Lik Ndoleng, sing dingo merga jare atis. Bareng weruh, I’in njur mbengok.

“Lho, kok ana silperkuwin Lik, hayo arep kekne sapa?” Nduk I’in takon marang Lik Ndoleng.

“Weh, kok ya jik konangan ta cah..asemb..” Rada lirih Lik Ndoleng semaur, dene Nduk I’in sajak nduwe cara njarag Lik Ndoleng.

“Oiya, iki lak dina PALENTIN. Hmm..mesti silperkuwin kuwi arep sampeyan kekne Yu Wasti ya Lik?Ngko bengi kan ana rapat, mesti sampeyan mangkat, merga yu Wasti ya diundang, ndilalah ngepasi PALENTIN.” Nduk I’in nyemes Lik ndoleng, dene Lik Ndoleng mung klecam-klecom kaya jomblo nduwe coklat okih pas PALENTINE.

KESED

Rebo Pon 12 Februari 2020

BENINGE EMBUN ESUK

Wulang Bebasan 6:6-23

Jabur 119:105-112

Markus 8:1-26

“He wong kesed, maranana semut, lakune titenana lan dadia pinter. Sanadyan semut iku ora ana kang mimpin, ora ana kang ngatur lan ora ana kang manggedheni, iya padha keklumpuk rejeki ing mangsa panas, lan tandho pangan ing mangsa panen.” Wulang Bebasan 8:6-8

KESED kuwi dudu sing dipasang neng ngarep lawing, nggo ngresiki sandal apa sikil sing reget. KESED kuwi patrap urip sing wegah nyambut gawe, utawa nglakoni apa wae. KESEP kuwi wiwit tuwuh seka pikiran lan sakbanjure dilakoni dadi patraping urip. Wong KESED kuwi angel dijak ngapa wae sing gegayutan karo pakaryan. Sing dipikir mung enak lan kepenak. Dijak investasi wedi lan sujono, dijak kerja jare rekasa, dijak maju malah turu lan sakteruse. Senengane udad-udud sinambi ngopi lan ndemung ora mbrejaji.

Bab KESED kuwi nate dadi pitutur ana ing Kitab Wulang Bebasan. Ing kana menungsa dikon ngaca karo patrap urip kewan sing kinaranan Semut. Semut kuwi sanadyan ora ana sing mandegani, ananging nyambut gawe saktulusing ati. Beda karo menungsa,nymabut gawe mung yen diawasi. Semut kuwi makarya kanggo ngrancang urip sing luwih penak, lan kuwi mung lumantar kerja. Beda karo menungsa, sing senenge mung ngimpi urip penak ananging wegah ngobahke awak. Semut kae ya ora nate tukar padudon sanadyan ana sing nalika nggotong panganan ora ketok babar blas gaweane, malah yen para maos BENINGE EMBUN ESUK kera nyepadakne, nalika nggotong panganan sing meh disimpen, ana sing malah numpaki, ora melu nggotong. Sanadyan mengkono, ara dimungsuhi lan dipateni. Iki beda karo menungsa, nalika wis rumangsa nymaut gawe lan nyawang liyan ora melu cawe-cawe, unine wis ora nggenah.

Semut kuwi ngrancang kahanan sing luwih apik lan uga sengkut makarya, sanadyan ora dikon lan diawasi. Semut kuwi nduweni naluri kanggo cecawis, beda karo menungsa KESED, sing mikire mung turu lan turu. Mula saka kuwi, apik yen sing pada maos tulisan iki enggal sengkut makarya, cecawis kanggo kahanan ing tembe, ben isa ngawekani nalika ana kahanan kang mbebayani.

“Lik, ayo nanduri kebon dulkali..ben nggo celengan mbesuk..”Dalijo ngajak Lik Ndoleng.

“Rasudi Jo, urip kok kokean pikiran. Urip kuwi dinikmati, orasah kemrungsung..gawe penak wae..” Semaure Lik Ndoleng.

“Sinauo karo Semut kae Lik, makarya nggo cecawis . aja mung udad-udud an tura-turu..”Nduk I’in melu mangsuli.

“Urip beriman kok keweden bab sesuk, kuwi tandane ora beriman..” Lik Ndoleng jik isa mangsuli.

“Lik, Yu Wasti yaw is nandur lho” Dalijo nyebut ajian sing marakne Lik Ndoleng njenggirat.

Simbahe..

RERESIK

Selasa Pahing 11 Februari 2020

BENINGE EMBUN ESUK

CARANE RERESIK

2 Para Raja 23:1-8,21-25

Jabur 119:105-112

Markus 8:14-21

“Sang Nata nuli dhawuh marang Imam Agung Hilkia, para imam pangkat loro lan para kang padha jaga lawang, supaya padha nyingkirake saka ing padalemaning Sang Yehuwah sakehing piranti kang digawe kanggo Baal lan Asyera lan kanggo sakehing wadya-bala ing langit, iku kabeh tumuli padha diobong ana ing sajabaning kutha Yerusalem ana ing ara-ara ing sapinggire kali Kidron, dene awune digawa menyang ing Betel. 2 Para Raja 23:4

RERESIK (meh pada karo NGRESIKI, ananging iki wis katulis ing 14 September 2019) kuwi tembung daden, linggane Resik (bab tema RESIK wis nate katulis tanggal 1 November 2018) sing tegese kahanan kang tanpa regetan babar blas. Seka Lingga “Resik” kuwi njur ketambahan “re” sing yen kanggo tembung Resik isa dadi tanda pagawean. Beda karo “re” kanggo tembung Reget, merga tegese kuwi nudhuhne kahanan. Mbalik neng tembung RERESIK, kuwi tegese pagawean kang nduweni ancas supaya kahanane Resik. RERESIK kuwi isa lumantar sabarang kahanan, sing penting kuwi ndadekne resik. Isa lumantar disaponi, dipel, dilap,disingkirke lan diobong utawa dipendem lan sakpanunggalane. Sing baku,sakwise RERESIK kahanane dadi resik,edipeni nyenengake. Dene RERESIK kuwi ya butuh tenaga,tekad lan niat lan uga rasa wani. Yen nduwe niat lan tekat, ananging ora nduweni kewanen, mesti ora bakalan klakon nglakoni RERESIK.

Bab RERESIK kuwi nate ditindakne dening Yosia, sang nata ing Yehuda nalik jumeneng nalendra. Nalika kuwipatrap uripe wong-wong Yehua jian ora nggenah, sanadyan okeh sing nindakne pangibadah, ananging kuwi mung lamis, mung sing katon, merga ing tata tumindak blas ora manembah marang Gusti Allah. Kuwi kabeh isa dititeni nalika ing saknjeroning Pedaleman Suci akeh piranti kanggo manembah marang reca sing dudu Sang Yehuwah. Mirsani bab kang kaya mengkono, ratu Yosia duka lan paring prentah supaya nganakne RERESIK, ngresiki sabarang kang ala ing Padalemaning Sang Yehuwah. Sing diprentah kabeh wong  kang ana ing Yehuda, ora pilih-pilih. Dene tujuane RERESIK kuwi supaya kabeh resik lan mbalik manembah marang Sang Yehuwah.

Yen ing jamane ratu Yosia, sing padha nindakne pangibadah mung kebak ing lamis, semono uga ing jaman saiki ya akeh sing lamis. Sing katone manembah marang Gusti, ananging ing sakjroning ati jik akeh “brahala” sing dumunung. Jika akeh sing padha satru, padha jothakan, pada neson. Sanadyan katone ngibadah lan manembah neng papan pangibadah, akeh sing jik nduweni rasa serik, pelit utawa uthil-methitil, jika akeh sing jik nyimpen “wuh” ana neng atine. Lha kahanan kang kaya ngono kuwi sing kudune dianakne ayahan RERESIK. Mula sing sapa jik rumangsa ana ing atine jik ana rasa serik, gething,nesu,uthil methitil lan drengki srei sarta mung nguber bandha, enggala padha RERESIK, cikben mungguh ana ing ngarsane Gusti Allah.

“Jo, kira-kira sing maca tulisane mbahe iki ana sing kudu nganakne ayahan RERESIK pora ya?” Takone Lik Ndoleng, sinambi klepas-klepus udud, merga jik tanggal (rada)nom.

“Weh, ya kuwi jelas Lik, lha kae sing maca sinambi mesam-mesem, sajak kaya ngilo neng ngarep kaca, kae mesti jik akeh sing kudu diresiki, jik kudu nganakne RERESIIK..” Wangsulane Dalijo, sinambi nyruput kopi gaweane dewe, merga I’in lagi pikenik.

“Lha yen awakme apa ya jik kudu nglakoni RERESIK Jo?” Lik Ndoleng nakoni Dalijo.

“Kuwi mesti Lik, merga bendina tansah nglakoni salah, luput.. Lha sampeyan Lik?” Semaure Dalijo, sinambi nakoni Lik Ndoleng.

“Weh, yen aku ya…emm..aku ya..” Semaure Lik Ndoleng sajak gugup.

“Jik kudu nyambat tangga teparo ya Lik, merga regete akehe poll..Jik nggolek wektu njawil Yu Wasti ya? Paling ora nyolong nyawang yu Wasti…” Dalijo kaya padatan, njarak Lik Ndoleng, lan Lik Ndoleng raine dadi mbranang merga erosi..

Simbahe..

TOBAT

Senen Legi 10 Februari 2020

BENINGE EMBUN ESUK

2 Para Raja 22:3-20

Jabur 119:105-112

Markus 8:11-13

“..sarehne sira wus nalangsa lan wus ngesorake awakira ana ing ngarsaning Sang Yehuwah nalika sira krungu bab paukuman kang Sunpangandikakake tumrap panggonan iki lan kang padha manggon ing kene, yaiku manawa bakal padha dadi pagiris lan dadi ipat-ipat, sarta ing sarehne sira nyuwek-nyuwek panganggonira lan nangis ana ing ngarsaningSun, tuwin Ingsun iya wus midhangetake iku, -- makaten pangandikaning Sang Yehuwah, -- mulane lah sira bakal Suntunggilake kalawan para leluhurira lan sira bakal kapetak ing pakuburanira kalawan tentrem, apadene mripatira ora bakal nyumurupi sakehing kasangsaran kang bakal Sundhatengake ana ing panggonan iki.” Para utusan mau iya banjur padha ngaturake wangsulan iku marang Sang Nata.” 2 Para Raja 22:19-20

TOBAT, kuwi tembung sing cekak lan katon mayar anggone nglakoni, ananging durung mesti mayar temenan nalika kudu nglakoni sing sakmestine. Lho kok isa mengkono? Iya, merga TOBAT kuwi ora mung winates ana ing tembung, ananging kudu kelakon ana ing tumindak. Nalika mung ana ing tembing, mayar banget ngomonge, ananging sing diarani TOBAT kuwi tumindak, sing tegese mbalik saka kahanan sing ora pas lan tumuju marang papan sing sakmestine.

TOBAT sing  pas kuwi nate kalkon lan isa dadi patuladan saka crita neng Kitab Suci. Neng 2 Para Raja 2 22:3-20. Ing kana dicritakne kaya ngapa cara TOBAT (nelangsa) sing sakbenere.  Dene lakuning TOBAT kuwi lumantar adat lan tradisi sing lumrah. Ing jaman Para Raja 2, lakuning TOBAT yakuwi  lumantar nyuwek-nyuwek penganggo lan uga ngeblegi awu ana ing sirahe. Nyuwek-nyuwek penganggo lan uga kalawan nangis kuwi mratandakne getun sing jero banget, lan getun kuwi ora ngelingi marang kahananing awak, merga mung ngener marang Gusti Allah. Getun utawa TOBAT sing jik isin, dudu tumindak kang bene rana ing ngarsane Gusti.

Ing jaman saiki akeh TOBAT sing mung ana neng lambe, mung ngomong thok ananging tumindak’e babarblas ora ana. Akeh sing wasis nalika muni TOBAT, ananging sesuk-sesuk’e njur mbaleni tumindak sing luput lan nate kaapura, kanthi wasis ananging lamis. TOBAT wis ora ana maknene sakliyane mung tembung, merga ora ana tumindak sing nandakne yen kuwi bener-bener TOBAT sing mbalik saka tumindak sing luput tumuju marang tumindak kang apik.

“Lik, wingi sing kotbah sapa?” Takone Dalijo marang Lik Ndoleng bab sing kotbah saja neng nggrejane, merga dewekne nyumbang neng omahe kancane, sisan neng nggreja cedak omahe kancane.

“Aku linggih neng mburi Jo, ora ketok lan ora krungu swarane”, Wangsulane Lik Ndoleng sajak bingung.

“Weh, lha pora maca Warta Greja?” Dalijo jik nguyak.

“Ora kumanan gek Jo.. Lha tekaku rada telat…anu hmm…”Sajak  wiwit kewuhan Lik Ndoleng olehe wangsulan.

“Haiyahh..ndadak kokean alesan Lik..wong wingi ora mangkat neng nggreja wae alesan neka-neka..Jare wis TOBAT ora arep ngapusi, kok malah mbok baleni?” Nduk I’in tanpa tedeng aling-aling mbukak lamise Lik Ndoleng. Dene Lik Ndoleng mung kaya padatan, mesam-mesem tanpa rumangsa salah..

Simbahe..

NYUWIL

Setu Wage 8 Februari 2020

BENINGE EMBUN ESUK

Yesaya 29:13-16

Jabur 112:1-9

Markus 8:1-10

“Wong akeh mau banjur padha kadhawuhan linggih ana ing lemah. Sawuse mangkono Gusti yesus banjur mundhut roti pitu mau, lan sawise saos sokur, nuli dicuwil-cuwil sarta diparingake marang para sakabat supaya didum-dum marang wong akeh mau lan iya banjur diwaratakake.”Markus 8:6

NYUWIL, kuwi tegese misahake sawetara bagian saka induk utawa pusate. Nyuwil kuwi sithik, merga yen akeh ora isa diarani NYUWIL. Apa wae sing dicuwil mesti bakalan kalong utawa susut lan malih dadi luwih sithik. Akeh wong sing ora gelem NYUWIL darbek’e yen kuwi barang sing nduweni pangaji kang gede, dene yen ora ana pengajine, gampang olehe NYUWIL malah maro ya oleh. Sanadyan bab sing mayar, merga ora mbutuhake kuliah tekan  sundul langit, ananging bab NYUWIL kuwi ya isa angel tumrap sing nduweni watak pelit,uthil lan ora gelem andum-inganduman.

Bab NYUWIL kuwi nate ditindakne dening Gusti Yesus, nalika ngadepi wong akihe buanget kang keluwen. Nalika ngadepi wong akeh sing keluwen, Gusti Yesus ora ngakon pada lunga, ananging ndawuhi supaya para sekabate nyawisi pangan. Amarga anane mung sithik, mula ya kudu dicuwil-cuwil. Sakwise dicuwil-cuwil banjur diedumake, ora disimpen dewe. Sakwise dicuwil njur diddum-dumke, jebule wong akeh banjur warge lan malah kepara turah akeh. Kamangka rotii sing dicuwil lan diedum ora akeh, mung ana limang rep lan sing butuh wong patangewunan. Kabeh kang ditindakne Gusti Yesus marane wong akeh gumun, lan merga saka gumun kuwi sakbanjure langsung tambah kapercayane. Lumantar NYUWIL roti, nandakne yen Gusti Yesus maringi piwulang supaya urip lan berkah kuwi kudu dindum, ara dipek lan disimpen dewe.

Ing jaman saiki bab NYUWIL “roti” kuwi ya ora gampang, merga akeh sing pada mbledig kasugihan kanggo awake dewe. Merga pengen sugih, mula akeh sing padha korupsi, akeh sing padha ora jujur lan sakpanunggalane. Ing kahanan kang kaya mangkene, kudune sing padha maca tulisan iki sadhar, yen jik kerep wegah NYUWIL rotine, malah kepara ana sing gogrok lan dijupuki liyan wae, diuyak sakecekele. Akeh sing paham bab patuladan lan piwulange Gusti Yesus, ananging sithik sing gelem nindakne tumindak kaya Gusti Yesus. Mula yen akeh sing pada keluwen ya lumrah wae, merga wegah NYUWIL rotining panguripane.

“Lik, ngampil artane nggih, kalih “ewu” mawon..” Dalijo ngomong wuasis merga nduweni karep mirunggan.

“Weladalah, kok mlipir Jo basamu? Hmmm…kuwi merga meh ngutang kan?” Wangsulane Lik Ndoleng.

“Inggih Paklik…” Wangsulane Dalijo.

“Aku lagi sepi, ora nduwe duwit..”Sengol Lik Ndoleng olehe wangsulan.

“Muga-muga klakon sing mbok omongke Lik..”Nduk I’in melu cawe-cawe.

“Weh, iki merga Dalijo ngowahi adat, ndadak basa nrithil In..”Jawabe Lik Ndoleng.

“Haiyah, sampeyan nggere duwe karep karo Yu Wasti ya mengkono, lan malah kabeh mbok kekne yen urusane karo Yu Wasti..”I’in njawab lan njur ditinggal nyang pawon, dene Lik Ndoleng praupane langsung mbranang sajak nesu.

Simbahe..

MANGAP

Jemuah Pon 7 Februari 2020

BENINGE EMBUN ESUK

MANGAP BERHADIAH

Yesaya 29:1-12

Jabur 112:1-9

Markus 7:31-37

Sawise mangkono Gusti Yesus banjur tumenga ing langit lan unjal ambegan, nuli ngandika marang wong mau: “Efata!” tegese: mengaa! Sanalika kupinge padha kabuka, ilate kaudharan, banjur bisa caturan teteh. Markus 7:34-35

MANGAP kuwi tegese mbukak tutug. Dene ancas utawa tujuane mbukak mau ya werna-werna, isa merga reflex kanthi tujuan gerak kesehatan, isa uga merga nembe ngendikan utawa omong-omong, isa uga merga nembe mangan utawa liyane. Sing baku, MANGAP kuwi tumindak lumrah sing isa dilakoni sapa wae. Ananging tembung MANGAP kuwi ia diwenehi arti utawa teges sing :negative”, nalika kanggo ngarani sapa wae sing ngomonge ora ditata lan marakne liyan tatu. Saben tembung sing ndadekne liyan tatu, kuwi njur ana tetembungan sing (rada) saru, “Nggere MANGAP kok  ora ditata..”. Ing kene tembung MANGAP kuwi isa diartekne ngomong sing ora nggenah lan natoni liyan.

KANGGO SING MIGRAIN

Dina iki BENINGE EMBUN ESUK ngajak sapa wae sing (gelem) maca ngrasak-ngrasakne piwulange Gusti Yesus. Dene sing dadi pokok piwulang yakuwi nalika Gusti Yesus nambani wong bisu, sing tegese ora isa ngomong (MANGAP), nganti tumeka ing mari utawa warase. Dene carane Gusti nambani kuwi unik, sing lara diajak sumingkir, banjur “nggawe” ramuan (ramuane aja ditiru lho ya..), lan dioleske lan ilate sing bisu didemek. Kuwi sing ndadekne sing bisu isa MANGAP utawa menga lan kuwi kang ndadekne dewekne (sing maune bisu) isa caturan meneh. Isa caturan tegese isa ngomong, isa ngetokne ide, isa ngetokne uneg-uneg .

Ing jaman saiki sejatine akeh wong sing pada “bisu”, merga padha ora isa (gelem) ngomong. Merga saka kahanan “bisu” kuwi, mulane siji lan sijine ora isa ngerti apa kang dadi kekarepane lan kuwi sing ndadekne “komunitas” utawa pasamuan angel majune. Yen dijak rembugan mung monthag-manthug wae, mbuh kuwi dong apa ora, yen dijak diskusi malah teklag-thekluk wae, ananging bareng metu wedang lan pacitan, banjur teges lan telap-telep katon yen waras-wiris. Lha sing nandhang kaya mengkene iki sing kudu disowanake marang Gusti, ben ditambani. Dene tujuane ditambane ya ben isa pulih, isa MANGAP meneh sing tegese isa caturan, isa rembugan, isa disksi kanggo tujuan sing apik bebarengan.

“Lho, jam yahmene kok wis balik Jo, aja-aja mbolos ora sida satasehan?” Takone Lik Ndoleng sing lungguh neng lincak sor Talok,merga dewekne ora mangkat sarasehan,alesane “M”, males.

“Lha arep suwe piye Lik, arane wae sarasehan, ananging dijak diskusi malah mung meneng wae, dijak ngomong malah pating klesik, bareng ditutup sarasehane, njur metu wedang teges kabeh. Aku njur mulih wae..” Wangsulane Dalijo, sajak mendem rasa kuciwa.

“Weh, jebule pada angel dijak caturan dijak rembugan ta..kuwi kudu takkek’I trik, ben wasis caturan, ben MANGAP..” Lik Ndoleng sajak nduweni trik sing jos.

“Haiyah, sampeyan kuwi gelem mangkat wae kujijat kok Lik, ndadak kokean rembug. Nggere dijak alesane enek wae. Paling gelem mangkat yen neng mae Yu Wasti.” Nduk I’in semaur lan sajak pedes nyemes Lik Ndoleng.

“Weh, bocah iki nggere MANGAP mesti pedese ngeram..Dussss…!” Batine Lik Ndoleng, merga meh muni pekewuh karo para priyayi sing maca tulisan iki sinambi mesam-mesem, merga yen dijak sarasean yan arang gelem MANG…..(opss..mangga dilanjutne nggih..)

Simbahe..

MODIPIKASI

Kemis Paing 6 Februari 2020

BENINGE EMBUN ESUK

KLIK IKI YEN PENGEN SUKSES

Pangandharing Toret 4:1-14

Jabur 112:1-9

Markus 7:24-30

“Pitutur kang dakprentahake marang kowe iki aja padha kokwuwuhi lan iya aja kokkurangi, supaya kowe padha nggatekna pepakene Sang Yehuwah, Gusti Allahmu kang dakprentahake marang kowe.” Pangandharing Toret 4:2

Wis umum dadi sesawangan ing padinan, ana pit motor sing swara knalpote njerit-njerit kaya prawan nyawang dudha mesem, wis umum nalika neng ndalan ya sliwar-sliwe ana pit motor rodane cuilik, setange digawe mingkus kaya pitik angrem, uga sesawangan mobil sing dipasangi ban miring. Mbuh kuwi sejatine tujuane apa, ning ya sing nganggo diswang marem,mongkog lan malah kayane sansaya kemaki. Ban pit motor dipasangi sing cilik, ban mobil dipasang miring, setang pit motor digawe njingkrem kuwi kabeh isa diarani MODIPIKASI. Dene tembung MODIPIKASI kuwi tegese ngowahi  wujud lan isine,  sanadyan ora mbubrah total. Sanadyan dipasangi ban cuilik, ananging pit motor ya tetep isa mlaku,ning ya bab “kenyamanan” ora dong.

Bab MODIPIKASI kuwi ora luput, malah apik sauger tujuane nambahi fungsi, dene MODIPIKASI sing tujuane nyudha utawa ngurangi fungsi, kuwi sing ora apik. Apa meneh ora mung  ngurangi fungsi,malah uga isa marakne nuwuhake bebaya marang kahanan. Kabeh sing wis dadi produk masa, kayata pit motor lan mobil kuwi sakdurunge diuncalke neng pasaran, wis ngliwati “studi kelayakan” sing ketat lan ragate larange raukur, mula yen njur ana sing MODIPIKASI ananging nyudha fungsine, kuwi apa ora ngece marang sing nggawe? Njajal wae para maos BENINGE MEBUN ESUK iki, yen apa sing wis digawe njur digunakne beda karo tujuan wiwitan lan kuwi malah nekakne kapitunan, apa ya ora nesu?

OBAT TURU

Bab MODIPIKASI kuwi jebul wis dadi karaktere menungsa seka jaman mbiyen. Paham karo karaktere menungsa sing kaya mengkono kuwi, nabi Musa mulang lan meling, supaya para umat sing dipimpin tansah setya netepi piwulange Gusti. Setya kanthi netepi kabeh apa kang dingendikakne Gusti, ora olih di MODIPIKASI. Nabi Musa sdhar yen para umat sing dipimpin kuwi “kreatipe” pol lan seneng MODIPIKASI apa wae, klebu dawuhe Gusti. Mbokmenawa sing maca tulisan iki ya ana sing nate (malah kerep??) MODIPIKASI apa kang dadi dhawuh pangandikane Gusti? Kudune ngibadhah malah nyang sawah, kudune sinau malah turu lan sakpanunggalane.

“Jo, kok grejane dewe ora ngalkoni pisungsung “perpuluhan” ya?” Takone Lik Ndoleng neng I’in lan Dalijo sing lagi nyawang androite dewe-dewe.

“Ssst..jare mbahndito, etungan basa jawa sepuluh kuwi sejinah Lik..wedi yen perpuluhan dadi perjinahan..”Dalijo semaur sakenane.

“Apa ya yen ditrapke arep perpuluhan ta Lik? Gaya sampeyan iyak-yak’o! Persembahan mingguan wae raluwih seka mangewu wae kokean iyik.. “ Wangsulane I’in sajak mendem rasa erosi.

“Weh aku kuwi mung takon In, kok malah kok kumbah kaya ngene?” Lik Ndoleng sajak isin lan kaget.

“Kuwi kabeh sing diarani MODIPIKASI. Pasamuan saiki kreatipe poll..pisungsung wulanan dirapel, kaya pajekan kae, kebaktian nyicil ya ana, sedina pas minggu mangkat ping 4 njur sesasi ora mangkat. Pokok’e apa wae yen isa arep di MODIPIKASI, sing penting marem. Kebaktian wae tujuane marem, ora kanggo kamulyane Gusti..” Dalijo kojah sakkemenge, dene Lik Ndoleng theklak-thekluk sajak ngantuk.

Simbahe..