NGULIG

Kemis Wage 19 Maret 2029

BENINGE EMBUN ESUK

Kebun Porang

1 Samuel 15:10-21

Jabur 23

Lukas 11:14-23

Sang Prabu Saul banjur ngandika marang Nabi Samuel: “Kula rak sampun ngestokaken sabdanipun Sang Yehuwah lan sampun nglampahi ingkang kadhawuhaken dening Sang Yehuwah dhateng kula lan kula mbandhang raja Agag, ratu ing Amalek, nanging tiyang Amalek sampun kula tumpes sadaya. Nanging rakyat sami mendheti jarahan ingkang rupi menda, punapa dene, lembu-lembu ingkang pethingan, ingkang dipun pisah saking ingkang pancen badhe kapejahan, badhe kakurbanaken sumaos dhateng Sang Yehuwah, Gusti Allah panjenengan, wonten ing Gilgal.” 1 Samuel 15:20-21

Jaman cilikanku mbiyen, nalika isih ana neng saktengahing tlatah “pegunungan seribu” olahraga sing murah tur ya meriah yakuwi bal-balan. Lho kok murah, lire piye? Lha yo genah, wong bal siji isi dinggo dolanan bocah sak’akehe, orasah etungan sewelas-sewelas, pokok’e sakeneke bocah. Lha ing sakjroning bal-balan kuwi ana istilah sing jenenge NGULIG, sing tegese ngendhani (meh ngango judul ENDHA wis kanggo..iki link'e...ENDHA) mungsuh ngrayah ball an uga nyegak “pergerakane”. Dadi sing isa NGULIG kuwi sing wasis bal-balan, sing lincah lan uga lipet, yen saiki ya kaya kang Leonell Messi lan Siwo Kristiano Ronaldo kae. Oiya, mbalik neng bab NGULIG mau. NGULIK kuwi ana ing olahraga bal-balan tujuane apik, merga nggawe strategi utawa siasat sing  sah utawa legal supaya menang. NGULIG kuwi beda karo diping (diving), merga kuwi reka-reka tiba ben wasit kapusan lan mungsuh entuk ukuman.

Bab NGULIK kang tujuane ala kuwi nate klakon neng Kitab Suci, yakuwi sing dilakoni dening raja Saul. Ana neng kitab 1 Samuel bab 15 dicritakne, kaya ngapa polahtingkahe raja Saul kanggo NGULIG nabi Samuel. Raja Saul ora sadhar yen Samuel kuwi utusane Gusti Allah, mula mikire ya isa wae dibupus utawa diULIG dening dewekne. Ananging Gusti pirsa lan utusan Samuel ngelik’ake. Ananging jenenge wae wis tumindak cidra, sanadyan wis dielikake, ya tetep wae NGULIK lan malah nyalahake wargane, masyarakate. Wong wis cetha wela-wela neng ngarep mata tumindak salah kok ya ijik isa NGULIG, kuwi mung isa dilakoni dening wong sing rasa pangrasane wis kethul-bunul ora tedas nggo ngiris katul!

Ing jaman saiki ya jik akeh menungsa sing wasise ngeram yen kon NGULIG, ora nyawang apa jabatane. Ana sing wong biasa tekan sing jarene “Tokoh Rohani”. Merga tumindak cidra lan wedi kelangan panggautan, mula NGULIG lan nyalahake liyan, lha pora bajindul yen kaya ngene iki. Jabatan karohanen lan uga “jubbah” wis ora ana artine yen dibandingake karo duwit lan kalenggahan. Kaya Saul sing salah lan tinampik dening Gusti ananging jik mbegegeg ora gelem lengser, nunggu disundhang dening Gusti Allah dewe. Lan ing pungkasane crita, Saul ya kesundhang dening Gusti, kamangka nalika dijak rembugan karo Samuel manut, mesti carane kesundhang ya luwih semuth.. (smooth).

“Jo, apa bener jare ana “tokoh” sing cetha wela-wela nyolok mata “konangan” njur ora gelem ngaku?” Lik Ndoleng sore kuwi sinambi wedangan nakoni Dalijo bab sing blas ora cetha.

“Hambuh Lik..takonmu wae ora cetha, njur njawabku kon piye jal? Wangsulane Dalijo sinambi nyuet MLDne.

“Aku dewe krungu ya mung sruwing-sruwing gek..takira  kowe paham”, Semaure Lik Ndoleng.

“Huss..rasah melu ngrembug para wong “joss”, sanadyan tumindake ya babarblas ora joss..” Nduk I’in melu cawe-cawe.

“Lho, kowe ngerti ta In?” Dalijo nakoni I’in.

“Haiyah, ngerti kang..iki kaya pokale paklik..seneng nyawang Yu Wasti, sanadyan wis dadi duwek’e kang Markun. Nalika konangan lan dielikne malah NGULIG rasak baene..” Mangsuli ngono I’in sinambi nglirik Lik Ndoleng sing sajak erosine meh mumbulll…

Mbah’e..

EGUH

Rebo Pon 18 Maret 2020

BENINGE EMBUN ESUK

Bibit Porang

Yeremia 2:4-13

Jabur 81

Mateus 5:17-19

“Mulane sing sapa ngorakake salah sawijining pepakon iki, sanadyan kang cilik dhewe, sarta memulang mangkono marang wong, iku bakal oleh papan kang asor dhewe ana ing Kratoning Swarga. Nanging sing sapa nindakake lan mulangake kabeh pepakoning Toret, iku bakal oleh papan kang dhuwur ana ing Kratoning Swarga. “Mateus 5:19

EGUH kuwi sawijining pambudidaya  sing ditindakne kanthi tujuan tertemtu. Ana sing tujuane supaya sing klakon apik, utawa luwih apik tinimbang sakdurunge. Ana uga sing tujuane supaya sing bakal klakon kahanan kanga la utawa elek. Sing baku tembung EGUH kuwi nduweni teges utawa arti sing merdeka utawa bebas saka kepentingan. Dene menawa ana kepentingan, kuwi ya urusane sing nduweni kepentingan, dudu kepentingane si tembung EGUH kuwi. EGUH pretikel (isa uga tinulis pertikel) kuwi nduweni arti sakabehing tumindak kang dilakoni kanggo nggayuh kahanan sing dikarepake, lan biyasane bab sing apik. Dene yen pambudidaya kang ora apik, mbuh istilahe, aku ya ora dong, sing mesti dudu EGUH pertikel.

Menungsa kuwi nduweni pikiran sing isa ndadekne uripe kebak EGUH, mbuh kuwi bab apik apa ya sing ora apik. Jenenge wae EGUH, mesti dadine  beda kaya kahanan sing asli. Isa kena kanggo conto yakuwi nalika neng ndalan, akeh bocah nom lan bocah tuwa sing numpak’I sepeda motor kanthi kahanan sing ora kaya nalika metu saka pabrik. Sepeda motor “dimodipikasi” sakpenake udele sing nduwe, kamangka pabrik anggone nggawe kudu ngliwati study kelayakan sing ragate dinggo tuku “wine” isa kawit bakule. Modipikasi sing dilakoni cah nom tumrap sepeda motore kuwi isa diarani EGUH, sanadyan dudu apik tujuane tumrap urip bebarengan.

Bab EGUH kuwi nate diwulangake Gusti, yakuwi nalika ana sing nduweni penemu bab rawuhe Gusti kuwi arep “ngEGUHke” Toret. Kuwi babar blas dudu tujuane Gusti Yesus  rawuh ing njagad, malah arep nyampurnakake. Malah bab Toret, Gusti menehi “ultimatum”, sing sapa nduweni EGUH sing ala,kanggo tujuan pribadine, bakalan nampani bebendu sing ora tinemu ing nalar. Mula saka kuwi, aja pisan-pisan ngEGUHne pangandikane Gusti, kanggo kepentingane dewe. Karo pangandika kuwi mung manut lan manut, aja kaya pasar kabeh dinyang.

“Jo, aku wingi ketemu pawongan, kayane pendito. Lha nggon gulune ana kalunge putih…priyayine jian sregepe ngeram” Lik Ndoleng mbukak obrolan sinambi nyumet jisamsune, sing tuku warunge Yu Wasti.

“Apa pendito kuwi mung siji tandane Lik, gulune ana putih-putihe?” Takone Dalijo, sinambi nyruput kopine lan nyumet MLDne..

“Weh, yambuh. Pokok’e ngertiku sing ana putih-putihe nggon gulune kuwi pendito” Wangsulane Lik Ndoleng sajak erosi.

“Wis..rasah tukaran. Saiki critakna Lik, apa entuk-entukanmu ketemu priyayi sing kandamu pendito kuwi?” Nduk I’in melu nyoal-nyael, kaya biasane, sinambi dondom sarunge bojone.

“Dekne jian EGUH banget bab urip. Ora nate leren, makarya terus. Lan sing joss, dewekne perduli banget karo sing sapa wae kesrakat. Direwangi mubeng sonjo marang papan-papan kang adoh dimen isa ngerti kahanane kanca-kancane. Pokok’e jian top markotop” Wangsulane Lik Ndoleng sajak mareme ngeram.

“Yen apik ayo ditiru Lik, aja malah kokean EGUH ben isa alesan wegah makarya karo Gusti. Alesane wis tuwa, jik kenomen, raisa teknologi kamangka bendina nyetatus lan sakpanunggalane. Ayo EGUH sing apik, ora EGUH sing  bab Yu Wasti wae, kuwi cengkah karo kersane Gusti” Dalijo malah kotbah kaya sing kulino nganggo kalung putih neng nggulune. Dene Lik Ndoleng krungu jeneng Wasti sinebut sajak njondil.

"Duss..malah tekan Wasti meneh, rindu cukk...!! Batine Lik Ndoleng

Mbah’e..

MILI

Selasa Pahing 17 Maret 2020

BENINGE EMBUN ESUK

Purwaning Dumadi 24:1-14

Jabur 81

Lukas 1:26-38

Maryam banjur munjuk, “Sumangga, kawula punika abdinipun Pangeran, kadhatengana kadosdene ingkang Paduka ngandikakaken.” Sawise mangkono malaekat banjur tindak, niar Maryam. Lukas 1:38

Tembung MILI (ana ing tata basal an ilat’e wong Jawa) kuwi isa ngemu teges ora mung siji. Ana MILI kang tegese ukuran, kayata: “lha dawane pirang MILI (meter), utawa isine  pirang MILI (Liter). Sakliyane ukuran, tembung MILI kuwi uga ndeweni arti kahanane barang, yakuwi lakuning kahanan, biasane kanggo ngarani lakuning banyu. Mula lakuning banyu isa diarani MILI. Sing isa kanggo kaca benggalaning urip kanggo menungsa bab banyu kang MILI, yakuwi tansah manut lan sabar ngadepi pepalang apa wae lan banyu kuwi mesti wae MILI menyang papann kang luwih endek. Nalika MILI, banyu mesti ngliwati maneka werna kahanan, ana sing nyenengake lan uga ana sing nganyelake, ananging banyu tetep MILI marang papan kang wis pinesthi dening kang Murbeng Dumadi..(Kaya resi wae..hehe..)

Bab MILI kuwi nate dilakoni dening kanjeng ibu Maryam, nalika kedu ngadepi kasunyatan sing cengkah karo kersane. Lire kepiye? Lha isa dibayangake kaya ngapa lungkrahe manah ibu Maryam, lagi wae “poligpop” merga wis isa tunangan karo “a’ak Ucup” eh mas Yusuf, lha kok entuk kanugrahan saka Gusti. Dene “nugrahaning” urip kuwi dirasakne ora kepenak,lha kudu mbobot (meteng) sakdurunge nikah lan kuwi merga pokal gawene Sing Murbeng dumadi. Coba para maos bayangke, pora ya atinene ibu Maryam kudu dilokdon…hehe..

Ananging sanadyan njondil kan gragapan merga kagete ngeram, ibu Maryam enggal nata ati lan njajal nyawang kersane Gusti Allah karo kahanan sing (bakalane) klakon ana neng uripe. Sakwise “rembugan” karo Malaekat, sakbanjure ibu Maryam isa nampa lan kanthi tatag matur, “ Maryam banjur munjuk, “Sumangga, kawula punika abdinipun Pangeran, kadhatengana kadosdene ingkang Paduka ngandikakaken.” Wangsulane ibu Maryam kuwi pratandha kapercayan sing wis golong-gilig marang kersane Gusti. Ibu Maryam sadhar, yen dedeg’e mung titah sing kudu pasrah meawa nampa kersane Gusti Allah Sang Juru Titah, merga yakin yen kabeh kersane kuwi ngener marang bab sing (luwih) apik. Ibu Maryam isa MILI ana ing dalan kang kinersakake dening Gusti.

Bab kahanan kang ndadekne kaget lan medeni kaya sing dialami dening ibu Maryam, saiki ya kayane lumaku. Kabeh pada wedi karo kewan sing ora isa disawang karo mri[at wadag, yakuwi korona. Saking wedine mula ana sing pengen negara dilokdon, sanadyan ora ngerti manfaate, mung loap-laop kaya jangkrik pengen kawin. Sejantine, lumatar “serbuan” si usil Korona, menungsa dijak lumebu ing weninge rasa batin, apa sing dadi kersane Gusti lumatar kahanan iki? Lan ana ing tata kapercayan, kersane Gusti kuwi kabeh apik. Mung wae akeh menungsa sing ora isa ngerti apik’e kersane Gusti, mung wasis yen maido lan sambat.

“Gara-gara korona dadi wedi ngandi-ngadi Jo…” Esuk kuwi sakwise Lik Ndoleng nglokdon uripe meh seminggu, wedangan mbek Dalijo.

“Salahe keweden Lik, digawe santai wae. Sauger awake dewe sehat lan urip teratur ora-orane si Korona kuwi menang karo tentarane awak sing digawe Gusti luwih kuwat” Semaure Daijo sareh, sinambi nyumet MLDne sing jik kebak.

“Bener kang Dal paklik, orasah gupuh melu keweden. Waspada perlu, ning aja kebangeten, santai wae ananging tetep ati-ati. Si Korona kuwi ora bakalan menang karo wong sehat, sehat awak lan pikire” Nduk I’in melu ngandani Lik Ndoleng.

“Lha ning ya aku meksa wedi je cah…mbuh kenapa apa iki ya…” Sambate Lik Ndoleng.

“Yowis, anggepen wae korona kuwi kaya Yu Wasti, mesti ora wedi malah digoleki..” Dalijo kumat njaragi bapakne cilik.

“Dussss…malah tekan kuwi meneh…!!!” Batine Lik Ndoleng.

Mbahe..

TUMATA

Rebo Legi 11 Maret 2020

BENINGE EMBUN ESUK

Yehezkiel 36:22-32

Jabur 128

Lukas 2:24-51a

RohingSun bakal Sunparingake supaya dumunung ana ing batinira sarta Ingsun bakal ndadekake sira padha urip manut sakehing katetepaningSun lan tansah nggondeli tuwin nindakake pranatan-pranataningSun. Sabanjure sira bakal padha manggon ana ing nagara kang wus Sunparingake marang leluhurira sarta sira bakal dadi umatingSun lan Ingsun bakal dadi Allahira.Ingsun bakal ngluwari sira saka ing sakehing dosaning kanajisanira sarta Ingsun bakal nukulake gandum tuwin kang banjur Sundadosake akeh apadene Ingsun ora bakal ndhatengake pailan maneh marang sira. Yehezkiel 36:27-29

TUMATA kuwi asale saka tembung “nata”, sing tegese mapanake ana ing papan kang sakmestini. Seka tumbung “tata” kuwi njur ana tembung-tembung liyane ing sakiwa tengene, kayata ditata, mranata lan uga TUMATA.  Mulane tembung TUMATA kuwi tegese kahanan sing wis apik, endah edi peni lan kuwi ndadekne kepenak lan enak disawang uga dirasakne. Dene proses tumeka ing kahanan TUMATA kuwi ya ora mayar, mesti rumpil lan ya uga ngrekasa. Kahanan TUMATA kuwi mesti ana sing nata, lan sing isa nata kuwi mestine wae ya nduweni kasekten lan uga kaprigelan, yen ora ya tangeh lamun isa nata supaya isa dadi TUMATA.

Crita Kitab Suci neng Kitab Yehezkiel bab 36 isa dadi kaca pengilon bab kahanan TUMATA. Ing crita kuwi dicethakne kaya ngapa merga tresnane Gusti Allah marang menungsa, mula Panjenengane kersamranata kahanane umat ngisrael sing maune bubrah langkrah ora karuan dadi TUMATA. Pancen ora mayar, merga wong-wong ngisrael jaman kuw “mbanggele” ngeram, mula sing isa nata supaya dadi TUMATA ya sing kagungan kasekten dalah kawicaksanan. Dene kersane Gusti mranata kuwi ya supaya umate ngisrael dadi luwih apik lan uga dadi luwih tentrem dalah rahayu. Sanadyan umat ngisrael kuwi mbanggele ngeram, ananging ya ana kalamangsane manut lan gelem ditata, sanadyan prosese ya suwi. Bedacritane menawa ora gelem diatata, mesti ora bakalan TUMATA. Lhaning ya kuwi, kawit mbiyen tekane saiki, akeh-akehe menungsa kuwi gelem nata ananging ora gelem ditata, mula ya menawa ana kahanan sing ora (durung) TUMATA, yaorasah kaget utawa bingung. Biasa wae lah..hehe..

Ing jaman saiki, bab kahanan kang TUMATA kuwi mestine wae ya dadi pepinginan tumrap sapa wae. Ananging anehe, gelem kahanane TUMATA ananging wegah nata lan uga ditata. Ing wanci iki, akeh wong sing hobine maido lan wegah tumandang, senenge mlayu yen diajak nata supaya kahanane TUMATA. Mula saka kuwi, yen sinau seka critane Kitab Yejzkiel 36, ayo pada siap ditata dening Gusti lumantara pranatan sing ana, sing pasamuan ya lumantar pranatan pasamuan, supaya kahanane urip enggal TUMATA. Yen wegah natal an ditata, ya rasah ngimpi tumaka ing kahanan kang TUMATA. Saiki pitakonane, apa kahanane ing sliramu wis padha TUMATA?

“Jo, apa ya sebabe kok saiki pasamua kuwi wegah ditata?” Takone Lik Ndoleng sajak rada serius.

“Hora mung saiki Lik, kawit mbiyen jamane ulo durung seneng nikah siri..”Dalijo mangsuline sajak clelek’an, kaya padatan sing pancen senenge clelekan.

“Lha yen ngono arep tekan kapan urip bebarengan iki isa TUMATA?” Lik Ndoleng  sajak peduli marang kahanan.

“Yo tekan sampeyan isa nglalekne Yu Wasti Lik..iklas yen Yu Wasti wis dadi duwek’e kang Markun. Sampek sampeyan mop on (move on) Lik. Yen durung mop on, jik mikire mung awake dewe terus, mokal isa TUMATA..” Nduk I’in njedul, nggawa kopi sinambi sesorah.

“Bajindull..lha iki serius kok malah tekan Wasti?” Lik Ndoleng sajak erosi..opss..emosi…

Mbah’e..

NGGRESULA

Senen Wage 9 Maret 2020

BENINGE EMBUN ESUK

Kebun Porang

Wilangan 21 :4-9

Jabur 128

Lukas 6:36-38

“Sawuse mangkono banjur padha budhal saka ing gunung Hor, metu ing dalan penere sagara Teberau, arep ngubengi tanah Edom; ana ing dalan bangsa mau wus ora bisa sabar maneh, banjur nglawan marang Gusti Allah lan marang Nabi Musa, pangucape: “Kenging punapa kula kok sami panjenengan kesahaken saking tanah Mesir? Punapa supados kula sami pejah wonten ing pasamunan ngriki? Ing ngriki boten wonten roti lan boten wonten toya, mangka kula sampun sami bosen dhateng tetedhan ingkang boten wonten raosipun punika.” Wilangan 21:4-5

Ora ndadak sekolah dhuwure ngungkuli langit, sing jenenge menungsa kuwi wasise ngeram yen mung kon NGGRESULA. Kuwi kabeh isane klakon merga “gawean” NGGRESULA kuwi pancen mayar, lha wong mung kari protes marang kahanan sing ora dikarepake. Nduweni kekarepan cerah lan ora udan, lha kok malah udan sedina muput, menungsa njur NGGRESULA. Nduweni kekarepan diladeni (kaya pasamua gekaje), eee..malah diajak ngladeni,mulakna ya NGGRESULA lan njur nggedumel  lan pasuryane mbethathut kaya Laron putus cinta.

Bab NGGRESULA kuwi nate klakon nalika bangsa ngisrael sing dipimpin nabi Musa lumaku saka Mesir tumuju Kanaan. Merga adohe ngeram lan malah diubeng-ubengke Gusti merga ndableg’e ngeram,  bangsa ngisrael rumangsa abot lan rekasa. Merga krasa abot lan rekasa kuwi ndadekne padha NGGRESULA. Nggresula merga urip dirasa luwih rekasa tinimbang neng Mesir, NGGRESULA merga  kudu lumaku marang papan kan aduuuuuuooh..lan angel dalah suwene ngeram. Kabeh kuwi sing marakne wong ngisrael NGGRESULA.  Sakliyane adoh lan angel, NGGRESULA’ne bangsa ngisrael kuwi ya merga ora dong karo kersane Gusti, mung nggugu karepe dewe. Yen ngerti kersane Gusti, mesti ora bakalan NGGRESULA, mulane ing jaman kapan wae, sing sapa NGGRESULA kuwi tegese ora ngerti kersane Gusti.

Bab NGGRESULA kuwi ora mung neng jamane Musa, ing jaman saiki ya nggladeg sak arat-arat. Saiki malah luwih nggegirisi, luwi parah. Sithik-sithik NGGRESULA, nesu lan masang praenan mbethathut medeni bayi turu. Sanadyan beda jaman, ananging sebab-musabab’e  NGGRESULA ing jaman saiki lan jamane bangsa ngisrael sing dipimpin Musa kuwi meh pada, yakuwi sing klakon ora jumbuh karo kekarepane. Lha yen kekarepane mung kanggo senenge dewe, mosok’o dituruti dening Gusti?

“Jo, aku jan ora mathuk karo “kebijakane” panitia pikenik ngenekne poting bab papan kang dituju!”, Lik Ndoleng sinambi sebal-sebul ndamoni kopi panase mbukak rembukan.

“Lha dijak musyawarah mupakat ora gelem, jak rembugan mung meneng wae, ditawakne papan-papane karo panitia mung meneng wae, malah tampange mbethathut kaya kinjeng kasmaran. Baren kudu milih lan dienekne poting, malah nggedumel jare aku ora milih…” Wangsulane Dalijo.

“Lha piye meneh, renek sing sreg aku bab papan sing dituju..” Alesane Lik Ndoleng.

“Padune wegah melu wae ndadak kokean lambe ta Lik…mbok rasah nyrimpeti lakune pasamuane Gusti. Rasetuju meneng wae, rasah bethothat-bethathut lan medeni bocah!” Nduk I’in njedul sinambi nggawa kimpul bakar.

“Ben wae ta In, kuwi ya jejangkepe jagad. Oiya, Yu wasti sidane melu ra In? Wong kang Markun dines, mula rasido melu” Dalijo mangsuli lan nyebut Yu Wati.

 “Sido kang, sanadyan kang Markun mbatalke. Ning jare diganti ponakane, mula kursine pas, raisa nyusul. Yen ana sing meh nyusul, papanke bagasi wae.” Semaure  I’in sinambi nglirik Lik Ndoleng sing sajak NGGRESULA ora sido melu pikenik.

Mbah’e..

NJALUK

Kemis Kliwon 5 Maret 2020

BENINGE EMBUN ESUK

Tanduran Porang

Yesaya 51:1-3

Jabur 121

Mateus 7:7-12

“Dadine yen kowe kang ala padha mangreti ing bab paweweh kang becik marang anak-anakmu, saya maneh Ramamu kang ana ing swarga, mesthi peparing kang becik marang wong sing padha nyenyuwun marang Panjenengane.” Mateus 7:11

Yen ana sing gelem “nyurpe”, gawean apa sing paling mayar dewe lan sing dadi idolane menungsa, mbokmenawa NJALUK kuwi sing nomer siji. Lire kepiye? Lha ya jelas, wong NJALUK kuwi ora paitan apa-apa, paling mung paitan ora isin wae.  NJALUK kuwi gawean sing ora ndadak sekolah dhuwure sundul langit wae mesti wis pintere ngeram. Merga saka mayare kuwi mulane akeh menunsa sing gaweane NJALUK. Jajal gatekne wae yen pada nganakne “Panyuraosing Alkitab”, njur tekan titi mangsane doa sapaat, mesti nju rebutan arep NJALUK didongakne, mulane njur “daftar peNJALUKane” jian sakrenteng kaya sepur Arga Ngemur.

Gusti Yesus nate memulang bab NJALUK. Neng Injil Mateus bab 7 dicethakake, yen sing sapa wae golek bakalane oleh, sing thothok-thothok bakalane dibukakne lawang lan sing NJALUK bakalane diwenehi. Ayat nats iki sing marakne wong akeh ngidolai, njur senengane mung NJALUK wae. Kamangka bab NJALUK vs diwenehi kuwi gumantung karo Gusti. Bener Gusti kuwi maha mirah, bener Gusti kuwi maha sugih, bener Gusti kuwi maha Kwasa, bener yen kabeh iki Kagungane Gusti,ananging ana siji sing kerep dilalekne. Lho apa ta kuwi? Gusti kuwi MAHA WICAKSANA. Merga maha wicaksana, mula sanadyan ngendikan sapa wae sing NJALUK bakalane diwenehi utawa diparingi, ananging yen penjaluk kui ora cunduk karo kahanan lan butuhe, ya ora bakalan diparingi.

Mulane, saka tulisan ringkes iki, ayo padha sadhar, yen unine pangadikane Gusti neng Kitab Suci kuwi aja mung ditampa mentah, kudu disaring lan dirasak-rasakne. Tujuane supaya paham lan sakbanjure sansaya sumarah ana ing kawicaksanane Gusti. Oja nganti menungsa kuwi malah “ngudeta” Gusti, rumangsa luwih kwasa tinimbang Gusti, njur isane mung prentah lan NJALUK wae marang Gusti.

“In, ngandi paklik kok durung njedul?” Takone Dalijo neng I’in.

“Ambuh kang,  mbokmenawa jik nesu..” Wangsulane Nduk I’in.

Weladalah, lha ngapa kok nesu, nesoni apa lan sapa? “ Dalijo nakokne bab nesune Lik Ndoleng.

“Wingi takelikne, pas aku nggodog banyu nggo gawe kopi. Wis taksemayani, dilukneh ya Lik, malah muni-muni kaya manuk Kacer pengen poligami kae. Bar kuwi raine ditekuk-tekuk njur nyetatus neng setori pisbuk..sing intine maido aku. Jare cahnom ora ngurmati wong tuwa, jare cahnom ora tanggap lan sakpiturute” Nduk I’in sajak wadul sakmareme.

“Cen kawit mbiyen Lik Ndoleng kuwi wonge NJALUK’an. NJALUK dipahami neng wegah mahami ponak-ponak’ane, NJALUK dingerteni ananging wegah ngerteni sedulur-sedulure, NJALUK didisikne, NJALUK diantemi uga..hehe” Dalijo mangsuli bab Lik Ndoleng rada erosi,eh emosi lan nembe mandeg nalika Lik Ndoleng njedul.

“Dus..takrungokne seka kulon ngomah jebule ngrasani aku ta cah?” Unine Lik Ndoleng njur lungguh neng lincak, dene Dalijo lan I’in mung mesam-mesem lan njur meneng kabeh.

Mbah’e..

RINUMAT

Senen Pahing 2 Maret 2020

BENINGE EMBUN ESUK

1 Para Raja 19:1-8

Jabur 32

Mateus 25 :31-42

Sawuse mangkono panjenengane nuli leyeh-leyeh lan sare ana ing ngisor wit rotem mau. Nanging dumadakan ana malaekat kang njawil panjenengane kalawan ngandika: “Tangia, mangana!” Bareng mirsani ing sakubenge, ing ulon-ulone ana roti panggang lan kendhi isi banyu. Banjur dhahar lan ngunjuk, tumuli sarean maneh. Nanging malaekate Yehuwah rawuh maneh kang kaping pindhone tuwin njawil panjenengane kalawan ngandika: “Tangia, mangana! Sabab manawa ora, lakunira mengko bakal kadohen tumrap sira.” Mulane panjenengane nuli wungu tuwin dhahar lan ngunjuk, sarta marga saka dayaning dhaharan mau panjenengane banjur bisa tindak nganti patang puluh dina patang puluh bengi suwene, nganti tekan ing gununging Allah, yaiku gunung Horeb

RINUMAT kuwi seka tembung lingga rumat, sing tegese ngoleni supaya aman lan luwih apik. Tembung lingga Rumat kudu diwenehi tambahan ben isa nduweni makna, isa Ngrumati, dirumat,kerumat lansakpanunggalane. RINUMAT tegese ana ing kahanan kang apaik merga ana sing ngrumati. Apa wae yen ana sing ngrumati mesti luwih apik tinimbang ora ana sing ngrumati. Semono uga menungsa, yen ora dirumati dening Gusti, ya tangeh lamun isa nduweni kahanan sing apik. Lha kahanane menungsa sing dirumat dening Gusti Allah kuwi sing diarani RINUMAT.

Nabi Elianate meh mutung, meh lampus diri merga ngadepi aboting momotaning urip. Rumangsa ora kuwat ngadepi momotaning urip, nabi Elia kepengin mati wae. Ananging kuwi ora dadi kersane Gusti, mula nalika nabi Elia mlayu merga wedi karo penganceme Issebel, lan tekan ing saktengahe pasamunan lan wis mutung wegah urip, Gusti ngrumati. Anggone ngrumati, Gusti nyawisi apa kang dadi butuhe Elia, yakuwi panganan, merga dewek’e luwe utawa ngelih. Wiwitane nabi Elia kaget, merga ana cawisan panagan, njur dipangan lan bali leren utawa turu meneh. Gusti ora sarujuk menawa menungsa sakbubare diberkahi njur turu meneh, mula kudu digugah, ditangekne lan dikon makarya meneh. Penakmen nampa berkah ananging mung tura-turu wae! Mbokmenawa ngono penggalihe Gusti.

Saka critane nabi Elia, isa dipethik pasinaon, sing sepisan yakwi bab tanggung jawab. Apa wae pakaryan peparinge Gusti, aja diendani, tampa lan lakoni. Gusti mesti njangkepi lan nyukupi. Dene kaping pindhone, berkah kuwi diparingake saka Gusti kanggo neruske pakaryane,ora dipek, dipangan njur meneng wae utawa malah turu. Nabi Elia nalika turu, disentak Gusti Allah dikon makarya meneh. Dene kaping telune, lumantar nabi Elia isa dipethik pasinaon bab apa ta sing diarani RINUMAT. Kuranga apa wae, abote kaya ngapa wae lan angele ora ukuran, yen wis kinersakne Gusti, mesti RINUMAT. Dene carane Gusti Allah ngumat kuwi maneka cara lan mesti unik lan nyenengake.

“Jo, nggumunku kok Markun kae bola-bali pisungsung, kok ana wae bandane jan-jane nyambut gawe liyane apa ta ?” Saka erosi Lik Ndoleng nggrundeli kang Markun.

“Kuwi ora masalah bandha, dud masalah okeh lan sithik. Kuwi masalah ati sing nduweni rasa syokur lan maturnuwun merga rumangsa RINUMAT dening Gusti”, Wangsulane Dalijo, sinambi nyumet eM eL De’ne.

“Emange sampeyan Lik, pelite ngeram. Lagi pisungsung ronggelo wae wis glelang-gleleng raukur. Kang Markun kuwi wong mituhu, tansah atur panuwun, ora nesu lan mutungan..”Nduk I’in melu cawe-cawe.

“Weh, aku a sok pisungsung lenn…”Semaure Lik Ndoleng.

“iya sewindu pisan, kuwi wae petunganmu jian kaya blantik..”I’in mangsuli lan Lik Ndoleng sajak kisinan, merga sanadyan RINUMAT dening Gusti ananging blas ratahu atur panuwun, kaya sing maca tulisan iki sinambi mesam-mesem dewe.

Simbahe..