WONGROLAS

Jemuah Pahing 17 Januari 2020

BENINGE EMBUN ESUK

Purwaning Dumadi 27:30-38

Jabur 40:1-11

Markus 3:13-19

“Sawise iku Gusti Yesus tumuli minggah ing gunung sarta nimbali sapa wong kang dikarsakake lan iya banjur padha sowan ing ngarsane. Ana rolas kang ditetepake dadi kanthine, kang kautus nggelarake Injil” Markus 3:13-14

Ana WONGROLAS kang tinimbalan dening Gusti Yesus, kanggo ngrewangi Gusti Yesus ngayahi pakaryane. Bab kenganpa mung WONGROLAS , kok ora ditambahi apa disuda,kuwi satuspersen dadi “otoritase” Gusti Yesus. Sing baku, critane Kitab Suci bab sapa sing katimbalan kanggo makarya mirunggan karo Gusti Yesus kuwi mung WONGROLAS. Dene WONGROLAS kuwi wae, karo kabeh kitab Injil ora dicritakne apa wae kang ditindakne, sanadyan ana neng Injil Markus, kabeh tinimbalan kanggo makarya, sing salah sijine nundungi demit.

Saka WONGROLAS sing ditimbali dening Gusti Yesus, ana pasinaon-pasinaon apik sing isa dadi obor tumrap urip ing jaman saiki. Nalika ing jaman saiki akeh sing seneng dialem, ana sing pamer bab apa wae, seneng tampil lan disubya-subya, seneng pada “poto selpi”, njur dipajang neng hape, crita WONGROLAS sing ditimbali Gusti isa dadi kaca benggalaning urip. Saka WONGROLAS kang ditimbali kuwi ora kabeh pakaryane ditampilke, dicritakne dening Kitab suci. Sing dicritakake dening Kitab Suci paling ya mung Petrus, Andreas, Yakobus, Yohanes, Filipus, Natanael lan Thomas, kuwi wae mung sakcuil. Ananging sanadyan ora dipopulerke dening Kitab Suci, sanyatane mung Yudas saka Iskaryot wae sing mbalela,sing bedigasan uripe. Dene liyane tetp mempeng makarya, sanadyan ora dialem lan ditampilake.

Mbalik ing jaman saiki. Ing jaman saiki akeh sing gelemm,malah kepara seneng jenenge disebutake ana neng daftar panitia lan apa wae, ananging ora gelem makarya babarblas. Akeh sing mung senenge ditampilake bab pakaryane. Akeh sing senenge dialem,disubya-subya. Ketok’e mono iklas lan murwat apa sing dilakoni, ananging akeh sing kuwi mung merga ben terkenal, ben katon sing makarya. Lho, apa luput kuwi kabeh? Hora, ananging nuladha para murid’e Gusti Yesus sing WONGROLAS, ananging hora kabeh pakaryane dicathet neng Kitab Suci kuwi ya apik. Mulane, sing penting aja bab dialem lan dadi terkenal utawa populer, ananging ayo makarya jumbuh karo apa kang dadi peparinge Gusti Yesus, kaya para murid sing tetep makarya sanadyan ora cinathet neng Kitab Suci.

“Lho, Jo, jare dirimu melu dadi panitia bakti sosial, lha kok arang jenengmu disebut? Kamangka saben nyambut gawe ya ora nate leren..” Lik Ndoleng esuk kuwi sinambi ngopi, nakokne kridhane Dalijo neng panitia Baksos, sing kayane arang di-aplot potone.

“Niatku makarya kok Lik, ora arep nggolek populer..”Semuare Dalijo sinambi nyumet djarumsupere.

“Weh, lha penakmen sing mung pota-poto wae, ananging ora mbutgawe?” Lik Ndoleng sajak esmosi.

“Haiyahh..sampeyan kuwi maido sampeyan dewe ya Lik?Lha wong kereb dadi panitia, seneng jenenge disebut nalika acara-acara, nanging babarblas ratahu makarya..”Nduk I’in nyoal-nyael, sinambi metu nggawa kumbahan sing meh dipepe, mumpung ana panas.

“Lha kuwi bener kandane I’in Lik, sampeyan yen didapuk makarya,ya makarya, ajamung seneng jenenge tinulis ananging blas gah makarya.  Nuladha’a WONGROLAS sing dadi murid’e Gusti Yesus kae, ora kabeh dicritakne, ananging tetep makarya.” Dalijo njlentrehne critane Kitab Suci, dene Lik Ndoleng mung ngukuri sirah’e sing rambute mung kari 13 ler..

Mbah’e..

GEMBRUDUG

Kemis Legi 16 Jnauari 2020

BENINGE EMBUN ESUK

Yesaya 22:15-25

Jabur 40:1-11

Markus 3:7-12

“Gusti Yesus dalah para sakabate banjur sumingkir menyang ing sagara, akeh wong saka Galilea kang padha ndherekake. Uga saka ing Yudea, saka ing Yerusalem, saka ing tanah Idumea, saka ing sabrange bengawan Yarden, apadene saka ing tlatahe Tirus lan Sidon iya akeh kang padha sowan, awit wis padha krungu bab apa kang katindakake dening Panjenengane kabeh. Markus 3:7-8

Tembung GEMBRUDUG kuwi tegese mlakune wong akeh ing sakperangan papan lan kuwi ngener marang tujuan kang gumathok. Ing crita Injil Markus, GEMBRUDUG’e wong akeh kuwi merga pengen nderekne Gusti Yesus sing dipercaya isa nindakne apa wae ana ing uripe. Kuwi kabeh merga wong akeh sing GEMBRUDUG wis krungu lan malah ngalami pakaryane Gusti Yesus, mulane  sanadyan neng ngendi wae papan dununge Gusti Yesus, wong akeh tetep wae ngetutake lan nggoleki.

Menawa ing jaman mbiyen wong pada GEMBRUDUG ngetutake lan nggoleki Gusti Yesus kanthi tujuan ngalami pengalaman iman utawa spiritual, ing jaman saiki durung temtu sing pada “gembrudug” neng nggreja kae ya ngalami pitulungane Gusti lan kepengin tansah nggoleki Gusti Yesus. Isa wae anggone pada GEMBRUDUG kuwi merga mung pengen dolan, pengen ketemu kanca, mung wegah diarani ora nduwe agama lan sakpanunggalane. Durung temtu sing pada menyang nggreja kae arep nggoleki Gusti Yesus, biasane mung arep nuruti kekarepane dewe, mulane ya orasah pada gumun yen tekan nggreja pamite arep ngibadah,njur bablas turu.. Lha kui, sing maca karo mesam-mesem, mesti yen neng nggreja lungguh njur langsung mak less…turuuu..ngko tangine pas krungu tembung AMIN.

Sinau saka patrape urip wong akeh neng critane Injil Markus ing nduwur, ayo  saiki pada nitipriksa isine batine dewe-dewe. Apa anggone pada nderekne Gusti lan (sok-sok) nggoleki Gusti kuwi merga ngalami pitulungane Gusti Yesus ,apa mung ben diarani ora kapir, merga nduweni agama. Kuwi kabeh sing isa njawab ya diri pribadi, wong liya babar blas ora isa mengerteni kahanane ati siji lan sijine. Ayo pada takon marang awak’e dewe, apa ya GEMBRUDUG’e dewe iki merga arep serius nderekne Gusti,apa malah mung arep nuruti senenge dewe?

“Wingi kotbahe bab apa ya lik?” Takone Dalijo neng Lik Ndoleng, merga  wingi mulang sekolah minggu.

“Ambuh Jo, aku ya ora krungu. Sing kotbah ora cetha omongane, tur ya manggonku neng mburi , soundsysteme elek, swarane mung grak-grok-grak-grok kae..” Semaure Lik Ndoleng ora patio nggatekne.

“Oalahh..wong keturon pas wancine kotbah wae ndadak alesane sound’e elek, swarane sing kotbah ora cetah lan mik’e elek ta Lik..mbok rasah kokean alesan!!” Nduk I’in njedul, urun rembug lan sajak melehke Lik Ndoleng.

“Lhadalaaa..jebule sok rajin neng nggreja kuwi tujuane ora nderekne Gusti, ora ngetutake Gusti..hmm..lha njur apa tujuanmu Lik?” Takone Dalijo.

“Haiyah, kaya ra apal wae kang..mung ben isa nyawang Yu Wasti. Ndilalah wingi Yu wasti pikenik, mulane Paklik ya njur turu ngono wae..” Cetha wela-wela Nduk I’in anggone ngudani Lik Ndoleng.

“Dusss..konangan cahh..” Batinedene Lik Ndoleng misuh, dene raine katon mung plengah-plengeh kaya Kebo  dicokot Pitak..

Mbah’e..

NGADEG’A

Rebo Kliwon 15 Januari 2020

BENINGE EMBUN ESUK

Yesaya 51:1-16

Jabur 89 :5-37

Markus 3:1-6

Gusti Yesus banjur ngandika marang wong kang ceko, “Mara, ngadega ing tengah kene!” Markus 3:3

NGADEG kuwi nalika sikil dadi papan panyanggane awak, isa sikil siji lan uga sing lumrah nalika NGADEG kuwi ya sikil loro, luwih bakuh lan kuwat.  NGADEG kuwi dudu gawean sing angel utawa ngrekasa, merga kuwi klebu kahanan “natural” utawa alami tumrap titah’e Gusti. NGADEG kuwi klebu jejangkepe ngaurip, merga kuwi pasangane karo Lungguh. Yen mung lungguh terus ya ora kepenak, semono uga yen mung NGADEG wae, mesti ora penak babar blas. Sing paling penak ya ana kalamangsane NGADEG la nana kalamangsane Lungguh.

Ana crita neng Kitab Suci bab dhawuhe Gusti Yesus supaya NGADEG, yakuwi nalika  Panjenengane pinanggih kahanane wong Ceko,ndilalah ngepasi dina Sabat. Tumrap wong Yahudi  (agama Yahudi), makarya ing dina Sabat kuwi Haram, aluwung pada lara lan kepara mati tinimbang maraske wong lara neng dina Sabat. Mula nalika ngepasi Gusti Yesus ana ing Padaleman Suci lan uga ngepasi dina Sabat, ndilalah ana sing lara Ceko, wong-wong Yahudi pengen nyoba Gusti. Mengko yen nganti maraske sing lara, arep diukum lumantar “Pasal Toret”.  Lha nalika kuwi Gusti Yesus luwih melas marang sing lara Ceko, tinimbang mung netepi pranatan agama, sing kala mangsane malah njiret menungsa, mula njur ngendika marang sing lara, “Mara, NGADEGA ing tengah kene!”.

Dhawuh kuwi kaya thathit ing wayah awan, ora mung marang sing Ceko, ananging uga tumrap para ahline Toret. Ana ing kawicaksanane Gusti Yesus, welas asih kanthi tumindak kuwi luwih aji tinimbang mung ngerti pranatane agama anaging wegah nglakoni. Sing pada ngerti prananate agama anaging ora gelem nglakoni kuwi kaya wong Ceko,wong lempoh sing ora gelem NGADEG. Lha ing jaman saiki, sejatine akeh sing pada wegah NGADEG, sanadyan sejatine sing “bermasalah” kuwi tangane. Akeh warga greja sing matrabi urip kaya sing lara Ceko, sanadyan sing lara tangane, ananging ya wegah NGADEG. Mula saka kuwi, lumantar BENINGE EMBUN ESUK ing rebo Kliwon 15 Januari 2020 iki, ayo pada sadhar, yen akeh sing wegah NGADEG ora merga ora isa NGADEG, ning mung kakean alesan lan wegah tumandang makarya, jumbuh karo timbalane Gusti.

“In,  saiki kok aturane nggreja kuwi werna-werna wae ta?” Lik Ndoleng sore kuwi sajak ora bungah penggalihe.

“Lha apa ta Lik, pora ya biasa-biasa wae?” Semaure Nduk I’in.

“Lha kuwi, saiki pisungsung wae ndadak dicawisi amplop, mbok kaya mbiyen wae, bebas..”Wangsulane Lik Ndoleng, sinambi nyruput kopine sing sajak jik mongah-mongah.

“Padune pelit, wegah cucul kanggo pakaryane Gusti. Biasane rongewunan mula ya kokean sambat nalika ana sing rada beda” Dalijo mlebu karo nyumet udud’e, sing kayane dudu djarumsuper, merga regane (jare) wis mundak.

“Crigis Jo..rasah kokean reken..” , Lik Ndoleng sajak erosi karo Dalijo.

“Woles Lik..woless… rasah nesu. Wong sing dadi perkara rasa males lan pelit kok pranatan dadi mungsuh. Kuwi kaya andharane Simbah’e ing nduwur, sing Ceko tangane, ananging males NGADEG, mula njur dikon NGADEG Gusti. Lha saiki ya akeh lho, sing kaya crita Kitab Suci kuwi, klebu sing maca tulisan iki sinambi mesam-mesem..” Dalijo semaur sinambi maca WA, mbuh seka sapa.

Simbah’e..

ENDHA

Selasa Wage 14 Januari 2020

BENINGE EMBUN ESUK

Yeremia 1 :4-10

Jabur 89 :5-37

Markus 2:23-28

“Ewadene Sang Yehuwah ngandika marang aku: “Sira aja matur: Kawula punika taksih enem, nanging menyanga enggone sapa bae sira Sunutus, sira kudu mangkat, lan apaa bae kang Sundhawuhake marang sira, kudu sira tekakake. Aja sira wedi marang wong-wong iku, amarga Ingsun nganthi sira supaya ngluwari sira, mangkono dhawuh pangandikane Sang Yehuwah.” Yeremia 1:7-8

ENDHA kuwi salah sawijining kridha, yakuwi kridha nyumingkiri sawernaning bebaya sing bakalane nrajang. Dene carane ENDHA kuwi manekawerna, ana sing mingset, mlumpat,mlayu, ngglonsor lan sakliyane. Apa wae isa diarani ENDHA sauger kuwi ndadekne wal seka bebaya.  Sanadyan ENDHA kuwi teges wiwitane pambudidaya supaya ucul saka bebaya, ananging sejatine ENDHA kuwi ya samubarang tumindak kang tujuane isa ucul utawa ora ketrajang apa wae. Ngelmu ENDHA kuwi alamiah, mula saben wong ya nduweni lan tingkatane  macem-macem. Lan sing penting, kabeh wong nate “matheg” aji ENDHA iki ana ing uripe, klebu nabi ana ing Kitab Suci.

Nalika wiwitan ditimbali dening Gusti Allah kanggo nindakne dhawuhe, nabi Yeremia ya matheg aji ENDHA iki. Alesane jian wasise ngeram, merga jare dewekne ora isa ngomong lan jik enom. Ananging Gusti Allah ora isa dibulpus karo nabi Yeremia,  merga Gusti Allah nguningani kahanan sing bakal klakon. bener yen ing mengkone nabi Yeremia arep ngadepi kahanan kang sarwa abot, ananging Gusti mesti paring kekuwatan. Bener yen ing mengkone nabi Yeremia bakal ngadepi perkara sing ruwet tur rumit, ananging Gusti Allah prajanji bakal paring kawicaksanan. Merga dipangandikani dening Gusti Allah yen bakalane dijangkepi, mula ing tembe nabi Yeremia ya ora isa nggunakne ajian ENDHA kuwi ana ing uripe, lan ing tembe manut nut karo dhawuh lan timbalane Gusti.

Menawa ing jaman Kitab Suci, Gusti Allah nimbali menungsa kanggo nindakne pangandikane, ing jaman saiki ya semono uga. Menawa ing jaman Kitab Suci para nabi nate matheg aji ENDHA kango nampik timbalan, ing jaman saiki ya pada wae, bedane ing jaman saiki akih sing tetep wangkot ENDHA sanadyan dijelaske nganthi pol-polan, beda karo  jamane nabi Yeremia. Mula saka kuwi, ayo saiki pada ngiblat marang patuladane para nabi, ora mung manut kekarepane dewe kanthi alesan sing ndakig-ndakig.

“Lik, kenapa wingi didapuk dadi ketua komisi neng nggreja wegah?” Takone Dalijo marang Lik Ndoleng.

“Aku kuwi ngrumangsani Jo, ora mumpuni yen kon makarya neng komisi, aku tak nyengkuyung seka mburi wae, rasah neng struktur” Wangsulane Lik Ndoleng wuasise ngeram.

“Kawit mbiyen kok alesane monoton Lik, ora kreatif. Kuwi lakmung merga sampeyan ENDHA seka timbalan makarya saka Gusti ta?” Nduk I’in njedul lan kaya padatan, langsung nyemes Lik Ndoleng sakkemenge.

“Yungalah Lik, seprana-seprene nderek Gusti, kok alesane mung monoton. Wegah makarya wae ENDHA terus, gelem nampa berkahe wegah makarya. Amit-amit Lik..pora isin sampeyan kuwi?”Dalijo takon sinambi mojokne Lik Ndoleng, dene Lik Ndoleng mung presang-preseng kaya Manuk kelangan susuh.

Simbah’e

EL-BETEL

Senen Pon 13 Januari 2020

BENINGE EMBUN ESUK

Purwaning Dumadi 35:1-15

Jabur 89:5-37

Markus 2:18-22

“Yakub banjur tekan ing Lus ing tanah Kanaan, iya iku Betel; dheweke lan sakehe wong-wong kang padha ngetutake; sarta tumuli ngadegake misbyah ana ing kono, lan panggonan iku dijenengake El-Betel, marga ana ing kono Gusti Allah anggone nglairake kawontenane marang dheweke nalika ngungsi saka ing ngarepe sadulure” Purwaning Dumadi 35:6-7

EL BETEL kuwi  dudu basa Jawa, kuwi basa ngibrani, sing tegese Omahe Gusti Allah. Seka rong tembung, El sing tegese Allah, merga tata budaya Jawa, mula ora ilok yen mung nyebut Allah, mula ditambahai “Gusti” lan dadine Gusti Allah. Dene tembung Betel kuwi tegese Omahe Gusti Allah. Mula EL-BETEL kuwi yen dijarwakne isa nduweni tegese Gusti Allah Kang Makuwon Ana Ing Daleme. Crita bab EL-BETEL kuwi gegayutan karo Rama Yakub, kawiiwtan nalika mlayu ngendani amukane kakangne sing wis diapusi. Nalika kuwi Rama Yakub ngimpi kepethuk para Malaekat lan  sakbanjure papan kuwi dijenengake Betel.

Mula saka kuwi sejatine nalika nyebut BETEL, kuwi ndadekne Rama Yakub eling sepira gedene pangayomaning Gusti Allah (EL) marang dewekne. Merga pengalaman kuwi,mula sakbanjure papan kono diparingi tanda, digawekne omah kanggo manembah,mula diarani EL-BETEL. Dadi cekak aose, EL BETEL kuwi papan sing digawe kanggo manembah, merga ing kano diyakini makuwone Gusti Allah sing tansah paring pitulungan.

Ing jaman saiki, pengalaman kaya Rama Yakub kuwi sejatine okehe ora njamak, ananging carane natal an mapanke iman utawa kepercayan wis beda adoh karo jamane Rama Yakub. Wong ing jaman saiki ora nate rumangsa entuk pengancem abot ana ing uripe, mula ya ora nate ngalami kinayoman dening Gusti kanthi luwi ngedab-edabi. Wong jaman saiki kuwi kabeh mung “biasa-biasa” wae, ora ana tantangan sing rinasa abot. Bab mangan ya mayar, bab ngombe ya mayar, bab keslametan seka mungsuh ya aman lan sakteruse, mula ya arang sing nganti gelem “yasa Dalem Pamujan”, arang sing secara pribadi nggawe “Papan Pangabekti”

“Jo, sidane kapan arep mbangun gedung sekolah minggu? Kawit mbiyen kok durung klakon,jan-jane kurang apa ta?” Lik Ndoleng sore kuwi nakoni Dalijo.

“Mbuh Lik, rung nggenah kapan diwiwiti. Ananging bab sebab musababe aku ya rapatio dong..”Wangsulane Dalijo.

“Sakngertiku kurang dana apa biaya ngono lho Lik, kang…”Nduk I’in njedul karo nggawa kopi lan kimpul goring.

“Oalah, lhambok kaya critane Kitab Suci, bab Rama Yakub kae, ora ndadak ngenteni liyan kanggo mbangun Pedalamane Gusti, dewe wae kuwat.” Lik Ndoleng sajak dong bab Kitab Suci, mula memulang.

“Haiyah, orasah ngono Lik, wong sampeyan wae ya ora nduwe krentek..rasah kojah..”Semaure Nduk I’in.

“Gampang In, ben Paklik cucul kuwi, dadekne panitia bareng Yu Wasti, mesti bungahe eram lan njur pisungsung akih” Dalijo semaur sajak nyemes Lik Ndoleng, sing mung plecak-plecek kaya Cecak kelangan lemut.

Mbah’e..

DUMDIL

Minggu Pahing 12 Januari 2020

BENINGE EMBUN ESUK             

Yesaya 42 :1-9

Jabur 29

Para Rasul 10:34-43

Matius 3:13-17

“Punapadene Panjenenganipun sampun paring bebahan dhateng kula sadaya, martosaken dhateng sabangsa sadaya saha dados paseksi, bilih inggih Panjenenganipun punika ingkang pinasthi dening Gusti Allah dados Hakim tumrap tiyang ingkang gesang saha ingkang pejah.” Para Rasul 10:42

DUMDIL, kuwi seka rong tembungm yakuwi Andum sing Adil. Kayane mayar yen mung nyawang apadene maca, ananging yen nindakne, biyuh angele ora njamak. Dene sing kudu diDUM klawan aDIL kuwi oramung winates ing barang kang isa dipilah-piah, awit sing kudu di DUMDIL kuwi apa wae. Kuwi isa perhatian, kabar,piwulang lan sakpanunggalane. Dene sing marakne angel nindakne pagawean DUMDIL kuwi, ya merga rasa serik lan males kang isa ngwasani uripe menungsa. Merga serik karo Liyan, mula wegah andum kabar apik. Merga ego-ne dhuwur, mula nalika nampa kahanan utawa berkah sing enak, ya wegah ngedum karo liyan.

Ana piwulang apik saka Kitab Suci bab DUMDIL, yakuwi ana ing Para Rasul 10. Ing kana dicritakne kaya ngapa semangate Rasul Petrus ngedum sing adil bab kabar bungah seka Kitab Suci bab Gusti Yesus. Iki sejatine “prestasi joss” tumrap Rasul Petrus, merga sakdurunge Paska, dewekne mikir yen Sang Mesih, Gusti Yesus kuwi mung kanggo bangsa Yahudi. Ananging bubar lelakon paskah neng Yerusalem, Rasul Petrus binuka pangertene bab Gusti Yesus lan kabar kabungan sing kudu di DUMDIL marang sakehe para bangsa ing sakindenging jagad.

Saka piwulang Kitab Suci ing dina iki, ayo pada nyawang awak’e dewe-dewe, istilahe “instrospeksi”, apa yawis tumindak DUMDIL marang liyan ing kabeh kahanan sing kudune di DUMDIL kuwi. Yen pada gelem jujur, jik akeh sing jik tumindak mung gumantung senenge atine, yen ngepasi ora disenengi, aja meneh ngedum kabar, nyapa aruh wae angele oranjamak. Yen ing urip iki durung utawa wegah nindakne patuladan Kitab Suci bab DUMDIL, njur arep nuladha sapa urip iki? Mula saka kuwi, ayo enggal gage natal an nuladhai uripe Rasul Petrus, yakuwi siyap nindakne urip DUMDIL, andum sing adil bab kahanan sing apik.

“Lik, mbok aku nyuwun waipine” Sore kuwi Dalijo njaluk tetringan ben isa Weanan lan isa chating, mbuh mbek sapa.

“Wong kok senengane njalukan Joo..modall..”Semaure Lik Ndoleng sinambi nutuli androite, arep nata hotspote.

“Biyuhh..mung dijaluki waifi wae rembug’e tik pedes temen Lik?” Takone Dalijo sajak piye ngono.

“Haiyahhh..apa ta iki..sore-sore bar madhang  kok malah kemruwek kaya jangkrik rayahan Lombok?” Nduk I’in njedul sinambi muni-muni lan kaya padatan, nggawa wedang.

“Dulurmu lanang kuwi In, njaluk’an..”Semaure Lik Ndoleng.

“Biyuhh..lagi pian thil iki njaluk wae tik sambatmu naru-ara ta Lik. Yawis rasah dibuka waipimu. Tak tuku data dewe wae..”Dalijo mak klebat lunga, arep tuku data.

“Sampeyan kuwi pancene kebangeten kok Lik, wong mung dijaluki waipi ponakaan wae kok sambate pol-polan. Kuwi ora becik Lik, kudu adil ing sakndengah kahanan. Urip iki ora mung dewe, ning butuh liyan.” Nduk I’in ngotbahi Lik Ndoleng sing plecak-plecek neng kursi cedak jendela.

Simbah”e

NYINGKIRAKE

Setu Legi 11 Januari 2020

BENINGE EMBUN ESUK

1 Samuel 7:13-17

Jabur 29

Markus 2:13-17

“Nabi Samuel nuli ngandika marang wong Israel saumat kabeh mangkene: “Manawa kowe padha mratobat marang Sang Yehuwah kalawan gumolonging atimu. nyingkirna para allah liyane lan para Asytoret saka ing tengahmu lan adhepna atimu marang Sang Yehuwah lan padha ngemungna ngabekti marang Sang Yehuwah; Panjenengane banjur bakal mitulungi kowe saka ing tangane wong Filisti.” Wong Israel banjur padha nyingkirake para Baal lan Asytoret sarta mung ngabekti marang Sang Yehuwah. 1 Samuel 7:3-4

NYINGKIRAKE kuwi seka tembung Sumingkir, sing tegese pindah saka panggonan wiwitan, dene bab pindahe kuwi isa merga pindah dewe lan uga dipindahke. Mula saka kuwi tembung NYINGKIRAKE isa diartekna sabarang tumindak kanga rah utawa tujuane ngresiki apa wae sing isa ngregeti kahanan. Isa wae NYINGKIRAKE kuwi bab pepalangane dalan sing isa ngganggu lelakune, isa uga kuwi bab sing ndadekne uripe kedusang-dusang.

Nalika nabi Samuel makarya, wong-wong ngisrael nembe ngadepi mungsuh, salah sijine yakuwi saka bangsa Filisti.  Merga bangsa Filisti kuwate ngeram, mulane ya kereb nalika perang kasoran. Ngadepi kahanan kaya mengkene iki, nabi Samuel rumangsa yen bangsa ngisrael pada nduweni sesembahan sakluyane Sang Yehuwah, mula njur ngendika supaya pada NYINGKIRAKE apa wae sing dadi sesembahan lan mertobat. Bareng pada dilakoni ya ndadekne bangsa ngisrael menang nalika nggecak perang karo bangsa Filisti.

Saka andharan ing nduwur, sejatine isa dipethik pasinaon apik tumrap urip ing jaman saiki. Ing jaman saiki, sanadyan katon yen pada manembah marang Gusti lumantar cetha-wela-wela mangkat neng nggreja, durung temtu atine ngener marang Gusti Allah. Isa wae ragane neng nggreja, ananging pikirane ngrambyang ngandi-ngandi. Menawa kahanan iki sing klakon, enggal-enggal wae pada mertobat, pada NYINGKIRAKE apa wae sing dumunung neng ati lan pikiran sing isa ngruyak kapercayan marang Gusti.

“Piye Jo, desemberan pethuk Tarsi?” Sesuk kuwi Lik Ndoleng nakoni Dalijo bab Tarsi, awit merga kahanan, Lik Ndoleng lan Dalijo ora nate guneman meh rong sasi.

“Mbuh Lik, ora pethuk aku. Jare ora mulih” Semaure Dalijo sajak kuciwa.

“Rasah nggrantes kang Dal, eslow wae. Wong pancene Tarsi ya ora mulih” Semaure Nduk I’in nalika metu seka pawong nggawa kopi sing jik kemebul.

“Jik nyimpen rasa ta Jo?” Takone Lik Ndoleng.

“Ya jelas lah lik, rasa tresna merga Gusti Yesus..hehe. lha sampeyan jare I’in nalika natalan mbekethut wae, merga yu Wasti karo Kang Markun mesrane ngeram?” Dalijo malah mbalik takon tur ya semu ngece.

“Dus..malah mbalik..hmmm…Iin kuwi kok ya crita-crita ta Innnn” Pambengok’e Lik Ndoleng.

“Mulane resikana atine ben resik lik, ben aja serik. Sampayen jik nduwe PR jare simbahe, yakuwi NYINGKIRAKE sabarang rasa sing ora apik…” Nduk I’in mungkasi piwulange njur mlebu neng pawon.

Simbah’e..