MBALEKNE

Senen Pahing 9 September 2019

BENINGE EMBUN ESUK

MBALEKNE

Yeremia 18:12-13

Jabur 2

Lukas 6:6-11

Gusti Yesus tumuli ngandika marang wong-wong mau: “Aku takon marang kowe: Apa kang kepareng ditindakake ing dina Sabat, gawe becik, apa gawe ala, nylametake apa ngrusak nyawa?” Sawise ngandika mangkono nuli mirsani mubeng marang wong-wong mau, banjur ngandika marang kang ceko: “Tanganmu athungna!” Wong mau iya banjur nindakake mangkono, wasana tangane waras. Lukas 6:9-10

Tembung MBALEKNE kuwi linggane Bali, sing tegese tumuju marang kahanan wiwitan. Saumpamane dolan, sing jenenge bali kuwi ya mulih. Semono uga bab MBALEKNE, iki wosing tembung ya mulih, ananging ora mulih dewe merga ora isa, mulane kudu diulihke. Merga jejer MULIH wis nate dadi jejering renunganBENINGE EMBUN ESUK, mula ya kudu ganti…hehe. Oiya, mbalik marang bab MBALEKNE, kuwi tegese ngulihake samubarang supaya bali  marang wiwit mulane. Jenenge wae ngulihake utawa MBALEKAKE supaya tekan papan kawitan, mesti ora kabeh isa lancer, isa wae nemahi pepalang-pepalang sing ora entheng. Ananging kaya ngapa’a wae merga niate wis golonggilig arep MBALEKAKE, ya kudu tekan sanadyan kudu soroh nyawa.

Ana crita neng Kitab Suci bab rekasane MBALEKAKE kahanan tumuju marang bab sing apik. Kuwi ditindakne dening Gusti Yesus. Nalika kuwi nembe dina Sabat, dina sing istimewa tumrap wong Yahudi. Lha ing kono Gusti kok malah marasake wong lara tangan, utawa ceko. Tumrap wong Yahudi, marasake wong lara kuwi gawean,mula ya dilarang merga dina Sabat. Kanggone wong Yahudi pranatan agama kuwi luwih aji tinimbang bab KAMANUNGSAN. Iki beda karo pamawas lan kawicaksanane Gusti Yesus, merga ana ing kawicaksanane Gusti Yesus, apa wae bab pranaan kuwi kudu arah lan tujuane MBALEKAKE marang jatining titah, menawa menungsa ya kudu mbalik apik kaya nalikane tinitahake. Ing kahanan iki, isa dimangerteni, menawa gawean MBALEKAKE titah marang kahanan kang sampurna utawa apik kuwi dalane rumpil banget, ananging rumpila kaya ngapa, Gusti Yesus tetep lewati,TABRAK wae sauger tujuane Pulihing Titah Marang Mulanira Tinitahake, yakuwi kahanan kang Apk.

dalan bali marang urip makmur

Ing jaman saiki, ora sithik wong sing wedi dalan rumpil kanggo MBALEKAKE kahanane titah. Akeh sing seneng ndelik lan umpet-umpetan ana saknjerone aturan-aturan. Angger dijak lumaku ing rumpiling dalan MBALEKAKE relasi ing antarane menungsa sing beda bab sabarang kahanan, jik enda, alesane nunggu rapat, aturane greja ora anal an sakpanunggalane. Intine jik pada jirih ngliwati rumpiling dalan kanggo MBALEKAKE kahanan ben pulih meneh.

“Lik, melu nyumbang ya, kan bar panen akeh. Iki meh ana acara Lintas Iman, relasi antar iman kuwi jik ringkih banget, mula kudu ana sing wani MBALEKAKE” Dalijo sore kuwi curhat karo Lik Ndoleng.

“Weh, tak rembugan karo mbokmu cilik Jo, kudu dibahas serius kiye” Wangsulane Lik Ndoleng sajak demokratis.

“Padune pelit wae kakean alesan Lik..bar panen kacang 7 ton pepayon puluhan yuta, sambati ngono wae nggaya arep taren mbokcilik sik. Yen nonton ledhek wae lansung jenggirat rasah taren” Ujug-ujug Nduk I’in nyauri sajak nesu.

“Sttt..rasah nesu In, sareh wae..cen angel dalane kanggo MBALEKAKE kahanan tumuju marang bab sing apik” Semaure Dalijo.

“Iyo kang, iki kaya grejane dewe ya, gekaje..hehe..”Nduk I’in klesak-klesik karo dulure lanang.

“Iyo, lan Paklik nate dadi majelis, malah dadi pejabat klasis, mula ya …hmm..anu…hmm..”Dalijo sajak mel klesak-klesik.

“Dusss…ngapa cah kelsak-klesik!?” Lik Ndoleng sajak nesu, merga rumangsa dirasani ponak-ponakane.

Ingkang sami maos, wanton mboten ngliwati rumpilimg margi kangge MBALEKAKE kahanan tumuju ingkang sae?

Kyai Tu Pong Ji..

NABRAK

Setu Kliwon 7 September 2019

BENINGE EMBUN ESUK

Yeremia 17:14-17

Jabur 139:1-6,13-18

Lukas 6:1-5

Gusti Yesus tumuli paring wangsulan, pangandikane: “Apa kowe padha maca bab apa kang katindakake dening Senapati Dawud sapandhereke kabeh nalika keluwen, anggone banjur lumebet ing Padaleman Suci, mundhut roti cecaosan, nuli didhahar, lan para pandhereke iya banjur padha diparingi, mangka ora ana kang kawenangake mangan iku kajaba mung para imam.” Nuli ngandika maneh: “Putraning Manungsa iku Gustine dina Sabat.” Lukas 6:3-5

Yen krungu bab NABRAK meh saben wong mikire sing ora apik lan uga ana korban sing nggegirisi. Tembung NABRAK kuwi tegese ambung-ambungan antarane barang loro utawa luwih kang ora sengaja utawa disengaja lan isa ndadekne karusakan. Seka tembung NABRAK iki njur ana tembung Tabrakan, Ketabrak lan Ditabrak, kabeh isa nekakake karusakan. Mbalik marang tembung lingga NABRAK, kuwi mesti ngemu teges negative lan iki ora isa diselaki, merga pancen kaya mengkono kahanane. Ananging pitakonane, apa ana NABRAK sing isa nuwuhake kahanan apik? Wangsulane ana, yakuwi nalika sing ditabrak kuwi samubarang kang ancene kudu ditabrak.

Piwulange Kitab Suci, bab NABRAK kuwi nate dipangandikakne dening Gusti Yesus, yakuwi nalika mulang bab dina SABAT. Tumrap wong Yahudi sing golongan Saduki lan Farisi, manut aturan kanthi kaku kuwi wis dadi nyawaning urip. Aluwung manut aturan agama tinimbang nulungi wong lara lan sekarat. Aturan luwih duwur ajine tinimbang kamanungsan. Lha mirsa kahanan sing kaya mengkene iki Gusti protes, gusti wani NABRAK sawernaning aturan sing ora nguwongake menungsa. Tumrap Gusti, sing paling utama kuwi kamanungsan, hakekat ajining kamanungsan lan aturan kuwi kudune ngarah marang pulihing kamanungsan kaya wiwit mula dititahne dening Gusti. Mula saka kuwi, menawa ana aturan sing ora nguwongake menungsa, kudune ya dijur-jur,kudu wani NABRAK. Pancen nalika NABRAK, ana tatu lan sing ketaton,ananging yen kuwi tujuanne apik lan sepisan meneh kanggo pulihing hakekat kamanungsan, NABRAK lan tatu ora dadi masalah. Oiya, masalahe mung sapa sing gelem NABRAK aturan sing ora nguwongake kamanungsan. Kuwi wae, siji thok thil!

“Jo, kok mau bengi ora mangkat sarasehan? Kamangka awakmu emsi lho?” Lik Ndoleng nakoni Dalijo bab mau bengi nglirwakne ayahan dadi emsi.

“Pulsaku entong Lik, dataku ya entong,arep ngabari ora isa. Aku kudu ngeterke ponakane Kang Markun, arep babaran, ora ana sing ngeterke. Mula akualuwung dipaido ora dadi emsi tinimbang nyawang ponakake kang MArkun klaran” Semaure Dalijo.

“Weh, kok wani NABRAK aturan pasamuan kowe Jo?” Lik Ndoleng sajak serius.

“Rapopo ya kang, sing penting isa nulungi sing butuh, ora kaya kowe sampeyan Lik, kadang nggolek-golek alesan saben entuk jatah dadi emsi!” Nduk I’in nyemes Lik Ndoleng sakkemenge.

“Duss..kenek menehhh cahh..” Batine Lik Ndoleng.

Mbahe..

REM

Jemuah Wage 6 September 2019

BENINGE EMBUN ESUK

REM

Yeremia 16:14-17:4

Jabur 139:1-6,13-18

Lukas 5:33-39

“Paduka nguningani manawi kawula lumampah utawi ngaso, saha salampah-lampah kawula Paduka uningani. Sabab saderengipun ilat kawula ngedalaken tetembungan, sayektosipun Paduka sampun nguningani punika sadaya, dhuh Pangeran Yehuwah. Paduka ngempit kawula saking ing wingking lan saking ing ngajeng, lan asta Paduka tansah Paduka ungkulaken ing kawula. Kawruh ingkang makaten punika langkung dening elok tumrap ing kawula, inggilipun ngantos boten kenging kawula gayuh.” Jabur 139:3-6

REM kuwi perangan sing wigati temenan tumrap sawernaning kendaraan sing bermotor apa dene sing ora bermotor, mbuh kuwi roda loro,telu,papat,enem lan sakpiturute. Sanadyan kahanane cuilik lan ora ketok, ananging bab fungsi, aja ditakoni. Sebab nalika REM kuwi nduweni fungsi sing pas, arang sing ngundamana ananging menawa ora nglakoni fungsine kaya biasane, prahara sing bakalan klakon. REM kuwi fungsine kanggo ngendeg lumakune kendaraan, sakliyane ngendek uga isa kanggo ngontrol lumakune kendaraan. bantera kaya ngapa yen wis di REM, mesti isa mandeg , utawa sak ora-orane luwih rindik tinimbang sakdurunge.

Juru JAbur nate mulang bab piye carane ngendaleni urip, utawa menawa disederhanakne ya kepiye carane mapanake REM ana ing urip neng ndonya iki. Pangerten bab kahanane Gusti Allah kuwi sing bakalane is dadi REM ana ing urip. Merga sadar lan ngerti yen Gusti Allah kuwi nguningani obah osiking kahanan, mulane menungsa (klebu sing maca tulisan iki) kudune sadhar lan ora usah tumindak sesideman, umpet-umpetan lan delik-delikan, merga kapan lan neng ngendi wae tumindak kuwi Gusti Allah pirsa. Yen kabeh menungsa pada paham bab iki, mesti isa dadi REM sing jian pakeme ora njamak, ananging sing klakon kuwi malah kaya mengkene, sejatine ngerti bab Gusti Allah, ananging ora gelem mapanake sing sakmestine. Sanadyan ngerti yen Gusti Allah pirsa, tetep wae lumaku sesideman,lumaku umpet-umpetan. Sanadyan wis dicawisi REM sing pakem, arang sing gelem nggunakne REM saka Gusti, mulane uripe kerep Blong lan nunjang palang nabrak apa wae sing ana neng kiwa lan tengene.

“Jo, wingi jare brita tipi ana kecelakaan neng dalan tol seka mbandung nyang njakarta ya?” Lik Ndoleng esuk kuwi nakoni Dalijo.

“Tumben weruh brita Lik, biasane mung ngindik kabar bab Yu Wasti?” Nduk I’in kaya padatan, nyoal-nyael kaya Ula dicedaki Pitik.

“Dusss…crigis In, aku kuwi ngapdet terus bab brita ya, ora kaya awakmu mung nonton brita selebrete wae” Wangsulane Lik Ndoleng.

“Iya Lik, tabrakan bruntun jare. Kuwi mula bukane REM sing ora berfungsi. Iki sejatine piwulange urip, yen urip iki ora nggunakne REM kanthi pas, isa ndrawasi sakabehe. Mula ayo migunakne REM lan  ngrumati Rem panguripan iki kanthi apik, caane mangerteni bab Gusti Allah sing mirsa sakparipolahe awake dewe” Dalijo semaur kaya tauziah kae.

Mbah’e..

NDUWENI

Rebo Pahing 4 September 2019

BENINGE EMBUN ESUK

IKI NDUWENANA

Yeremia 3:15-25

Jabur 58

Lukas 4:38-44

Bareng wis esuk Gusti Yesus miyos lan banjur tindak menyang ing panggonan kang sepi. Nanging wong akeh padha nggoleki lan iya ketemu. Kabeh padha nggondheli Gusti Yesus, supaya aja padha ditilar. Nanging padha dipangandikani: “Injile Kratoning Allah iku iya kudu Dakwartak-wartakake menyang ing kutha-kutha liyane uga, sabab iya iku prelune anggonKu kautus.” Panjenengane banjur memulang ana ing papan-papan pangibadah ing tanah Yudea. Lukas 4:42-44

NDUWENI kuwi saka tembung duwe, sing tegese nembe ana, dene bab sing ana kuwi isa barang lan uga kahanan. Cara gampange, duwe wektu kuwi kahanane bab wektu ana, sanadyan ora isa disawang, merga wektu kuwi dudu barang. Iki beda karo duwe Sapi, merga yen duwe Sapi kuwi kahanane bab barang lan isa disawang. Mulane tembung NDUWENI kuwi tegese kahanan sing mratelakake yen pawangon kuwi (rumangsa) duwe lan uga isa rumangsa ngehak’i apa wae. Ing kahanan kaya mengkene iki isa wae sejatine dudu hak’e utawa duwek’e, ananging rumangsa dadi hak’e. dadi rumangsa duwe sabarang kang dudu hak’e kuwi diarani NDUWENI.

Bab NDUWENI kuwi ora isa langsung diarani salah lan bener, gumantung kahanane. Sing rumangsa NDUWENI semangat apik, lan merga saka kahanan NDUWENI kuwi njur isa sregep makarya, iki bab apik. Ananging yen mung rumangsa NDUWENI lan sakbanjure ora oleh sapa wae melu nduwe, iki sing ora apik. Ana crita Kitab Suci bab (rumangsa) NDUWENI sing ora dadi kersane Gusti, yakuwi nalika ana ing kutha Kapernaum. Sakbubare marasake simbok mertuane Petrus, njur pengen nyepi,leren utawa ngaso saka rutinitas. Sanadyan sejatine Gusti Allah, ananging nalika matrab kamanungsan ya ngrasakne sayah, mula ya butuh “cuti”. Lha nalika kuwi, merga pakaryan-pakaryan kang ngedab-edabi, akeh wong kepengin NDUWENI Gusti, ngepek dewe lan ora iklas yen liyan ya melu rumangsa duwe. Ing kahanan kaya mengkene iki Gusti banjur lunga, ngeblas marang papan liyane. Gusti ora kersa ana wong-wong sing rumangsa mung dewek’e sing NDUWENI Panjenengane, awit Panjenengane kuwi duwek’e wong akeh.

NDUWENANA IKI

Rasa pengen NDUWENI dewe apa wae kang apik kuwi kawit mbiyen tekan saiki jik pancet dadi watak’e menungsa. Lan manut saka crita ing Lukas 4 ayat 38-44, menungsa ora pareng rumangsa NDUWENI dewe bab Gusti, kudu diddum karo liyan. Minaangka pasinaon tumrap sapa wae sing maca tulisan iki, bab NDUWENI kuwi apik, ananging nalika pengen NDUWENI dewekan lan liyan ora pareng melu NDUWENI, kuwi sing ora apik. Iki isa dipatrapi ana ing sabarang kahanan, kudu siap njereng apa wae sing kudune dijereng lan nyimpen apa wae sing kudune disimpen dewe. Dene bab NDUWENI Gusti Yesus kuwi kudu gelem andum-ingaduman karo liyan.

“Jo, kenapa Gusti Yesus kok ora kersa manggon neng Kapernaum, kamangka neng kana pendukunge uakih banget ik?” Pitakonane Lik Ndoleng marang Dalijo.

“Kuwi minangka piwulang Lik, ben aja pelit..kaya sing pada maca tulisan iki” Semaure Dalijo.

“Weh, yen ngono kudu siap andum-ingaduman iki ya Jo? Wah mathuk..aku cocok..” Sumeh Lik Ndoleng nanggepi wangsulane Dalijo.

“Njur rumangsamu isa njaluk jatah Kang Markun bab Yu Wasti ya Lik?” Nduk I’in kaya padatan, nyoal-nyael..
“Asemb kecut..dussss…kok ya ngerti wae ta kowe kuwi In…” Lik Ndoleng sajak mromong raine mula ketrucut misuh, kamangka biasane mung dibatin..

“Apal karo sampeyan Lik…”Semaure Nduk I’in cekak.

Rumangsa NDUWENI kuwi apik yen kanggo kabecikan, ananging yen mung kanggo kemareman ya apa apik..

Mbahe..

ERAM

Selasa Legi 3 September 2019

BENINGE EMBUN ESUK

Yeremia 3:1-14

Jabur 58

Lukas 4:31-37

Kabeh wong padha eram, banjur padha rasanan: “Tembunge kok ngedab-edabi banget! Kalawan wibawa lan panguwasa anggone ndawuhi para dhemit, temah padha metu.” Pawarta bab Panjenengane iku banjur sumebar tekan ing ngendi-endi ing tanah kono. Lukas 4:36-37

ERAM kuwi tegese padha karo Gumun, ananging jejer Gumun wis nate katulis neng tanggal 21 Maret 2019, mula ya kudu tak ganti jejere, ben rada ana pariasine. Mbalik neng bab ERAM, sing ndadekne ERAM kuwi mesti kahanan sing “ora lumrah”. Dene bab utawa kahanan “sing ora lumrah” kuwi isa bab sing positif utawa apik lan uga kahanan ala utawa negative. Pokok’e samubarang kang lumakune ora kaya padatan, kuwi isa ndadekne ERAM, umpamane yen ana Sapi Ngendeg, mesti akeh sing padha heboh tur ya gembrudug pengen nonton, semono uga nalika ana Pitik Manak Pedhet, mesti kabeh dadi ERAM.

Bab ERAM kuwi nate klakon nalika Gusti memulang ing Kapernaum. Ing papan pangibadah, ing dina Sabat, ngepasi memulang ana wong kepanjingan dhemit. Merga dhemite kliwat kurangajar lan marakne sing kepanjingan rekasa banget, mula ya kudu ditundung ben lunga. Nalika dhemit mau cecaketan karo Gusti, wis rumangsa wedi, mula banjur bengak-bengok sambat marang Gusti. Mirsa kahanan kaya mengkono Gusti enggal paring dhawuh supaya enggal lunga si dhemit kuwi mau. Lan saknalika sakwise ana “proses” sedelok, njur si dhemit lunga, mbuh nengdi.

Ngerti kahanan kaya mengkono kuwi mau, wong akeh kabeh pada ERAM. Iki isa diartekne yen lelakon kang kaya mengkono ora nate klakon, merga yen kereb klakon ora bakalan pada ERAM. Seka crita iki sejatine isa dijupuk pasinauon, sanadyan ana neng papan pangibadhah, malah isa wae kereb melu ngibadah, ananging bab Kepanjingan Dhemit kuwi tetep wae jik isa, artine dhemit ora wedi marang papan ananging wedi marang pawongan. Mula saka kuwi durung mesti wong sing sregep menyang papan pangibadah isa ilang dhemite, malah isa wae malah kuwi kanggo nylamurake tumindak alane. Lha pie carane niteni wong kuwi ora kepanjingan demit? Ya gampang, sauger lembah manah, sregep, andhap asor, loma lan sabarang kahanan sing apik, kuwi pratandha ora kadunungan dhemit. Ananging yen ana dhemit, enggal-enggal ditundung ben wong akeh padha ERAM.

“Jo, piye carane isa nglakoni urip kanthi tentrem, sabar lan sumeleh?” Lik Ndoleng takon marang Dalijo, sinambi ngopi neng sor talok.

“Latihan Lik…” Wangsulane Dalijo cekak.

“Weh, cah tuwek kaya aku kok ya jik kon latihan?” Semaure Lik Ndoleng.

“Tuwek’a yen durung isa ya latihan ta Lik” Nduk I’in melu semaur.

“Lha kepiye latihane cah?” Lik Ndoleng sajak penasaran.

“Dolana neng mae Kang Markun, sawangen mesrane Yu Wasti karo Kang Markun. Yen wis ora kemropok, brarti  wis ora ngrumati dhemit meneh Lik..” Nduk I’in sajak entuk kahanan kanggo nyemes Lik Ndoleng.

“Weh, cah gendeng..saranmu ora klebu nalar In..” Lik Ndoleng mangsuli sajak nesu.

“Lha rak tenan..jebule jik ngrumati dhemit cemburu…iki aku ERAM lik..ning bab sing ora positif..”Dalijo semaur sinambi nyumet djarumsupere..

Mbahe..

NE(P)SU

Senen Kliwon 2 September 2019

BENINGE EMBUN ESUK

Yeremia 2:23-37

Jabur 58

Lukas 4:16-30

“Apadene nalika jamane Nabi Elisa ing tanah Israel akeh wong kang budhugen, nanging siji bae ora ana kang kabirat najise, kajaba Naaman, wong Siria.” Kabeh wong kang ana ing papan pangibadah kono padha nepsu banget, krungu kang mangkono iku.” Lukas 4:27-28

Yen ana pitakonan pagawean apa sing paling gampang anggone menungsa nglakoni, mbokmenawa ora sithik sing sarujuk karo wangsulan iki, yakuwi NESU. Merga NESU kuwi ora usah sinau, ura usah kursus, ora usah sekolah, ora usah kuliah lan ora usah kejar paket, mung mayar lan murah. Kabeh wong isa nglakoni gewean NESU kanthi sampurna lan biasane njur marem utawa lega. Biasane sing ndadekne NESU saben wong kuwi bab kekarepan sing ora klakon. Nalika pengen turu malah dikonkon makarya, nalika pengen dolan malah dijak nyumbangm nalika arep mincing malah dijak rapat lan sakpanunggalane. Sejene sing wis sinebut, NESU biasane merga uripe kungkulan, utawa kalah ana ing babagan sing manut pikirane paling dadi keahlianne.

Merga saka NESU isa ngrusak samubarang, kahanan isa rusak, barang-barang isa pecah lan akeh sing ora apik menawa NESU kuwi klakon.

Jamanne Gusti Yesus memulang ya ana para wong sing ora trima ana sing luwih pinter lan wibawa bab tata pawulangan, mula njur NESU lan mbudidaya mateni Gusti Yesus. Mula ya pancen bener pangandikane Gusti Yesus ana neng Kitab Suci, yen sengit, gething lan kuciwa kuwi isa dadi lantaran wong memateni, merga NESU. Kaya para panggedene Papan Pangibadah, rumangsa gede lan pinter kdewe, mula nalika Gusti memulang la wong akeh pada eram utawa gumun, banjur NESU, ngamuk lan mbudidaya memateni. Kabeh klakon merga NESU, merga apa sing klakon beda karo apa sing dadi pepinginane.

Ing jaman saiki bab NESU ya jik pada wae. Menawa nduweni kekarepan lan ora klakon, banjur nesu, kaya balita njaluk permen lan ora dituruti kabeh diorak-arik. Yen sing (jare) diwasa, nalika nesu ing jaman medsos iki paling-paling nyetatus..hehe. Pada wadul marang bapa biyung medsos sing karang pisbuk, we’a,insetagram lan sakpanunggalane. Bab kuwi mengka akibate kaya apa, ora pada merduli, sing penting marem lan rasane Mak Plong..hehe. Lho apa NESU kuwi dilarang Kitab Suci? Ora, anggere empan papan la nana alesan sing tinampa umum, ora mung alesan sing tinampa awake dewe.

“Jo, wis maca setatusku we rung”? Lik Ndoleng esuk kuwi nakoni Dalijo bab setatus wea.

“Halah, paling-paling baper, ora digape Yu Wasti” Nduk I’in kaya padatan, nyoal-nyael.

“Crigis In, ngerti-ngertia wae..iki dudu bab kuwi ya…” Lik Ndoleng sajak senewen yen karo I’in.

“Lha nyetatus apa Lik?” Takone Dalijo sinambi nyumet djarumsupere.

“Aku nyindir Markun, dadi panitia kok rapat ratau mangkat. Aku NESU, kemropok Jo, wong ingrah-igrih ngono kok mbiyen Wasti gelem ya?” Keprucut Lik Ndoleng semaure.

“Lhadalahhh…mesti yen NESU mung sekitarane Yu Wasti lan kang MArkun..bangbayikk Likkk..”Nduk I’in rumangsa duwe mimis nggo mbedili Lik Ndoleng.

“Duss..ketrucut cahh..mbelgedesss!!” Batine Lik Ndoleng..

Mbah’e..

WONG CILIK

Minggu Wage 1 September 2019

BENINGE EMBUN ESUK

Wulang Bebasan 25:67

Jabur 112

Ibrani 13:1-8,15-16

Lukas 14:1,7-14

Gusti Yesus uga banjur ngandika marang wong kang ngaturi rawuh Panjenengane: “Manawa kowe nganakake pista ing wayah awan utawa bengi, kowe aja ngulemi mitra-mitramu, utawa sadulur-sadulurmu, utawa sanak-kadangmu utawa tangga-teparomu kang sugih-sugih, amarga iku bakal padha males genti ngulemi kowe, dadi kowe wis oleh piwales.Nanging, manawa kowe nganakake pista, ngulemana wong-wong kang mlarat, kang cacad, kang lumpuh lan kang wuta. Yen mangkono kowe bakal rahayu, amarga wong iku kabeh ora padha duwe kang dianggo males marang kowe. Dene kowe bakal tampa piwales besuk ing dina patangening para wong mursid.”Lukas 14:12-14

Yen dikon milih, saben wong pengen dadi “wong gede” tinimbang WONG CILIK, merga wong gede kuwi ngemu samubarang sing nyenengake. Wong Gede kuwi kinurmatan, Wong Gede kuwi kajen, Wong Gede kuwi terkenal, Wong Gede kuwi diladeni lan meh kabeh kahanan dinomerke siji. Beda karo WONG CILIK, samubarang sarwa keri dewe. Bab mangan ya keri dewe tur ya ora sing apik dewe, bab papan linggih  ya neng ngisor, bab popular utawa terkenal ya babarblas alias tangeh lamun. Mula saka kuwi arang sing gelem dadi WONG CILIK, lan malah akeh sing “Nggaya” dadi Wong Gede sanadyan sejatine kahanane cilik.

Piwulange Gusti ing minggu sepisan wulan September 2019 menehi pepling marang sapa wae sing maca tulisan iki, yen sejatine Gusti ngersakne kabeh miwiyi samubarang saka kahanan kang cilik. Merga saka cilik isa dadi gede, kuwi hokum alam. Bab cilik kuwi sing dadi undheraning piwulang. Nalika ana akeh wong sing kepengin dadi sing Gede, Gusti Yesus malah ndawuhi supaya miwiti lan nggatekake samubarang kang cilik utawa asor. Ing Lukas 14 dicritakne, yen nduwe gawe lan ulem-ulem, ulemana sing pada ora klebu petung, merga lantaran kuwi kowe kabeh antuk pandonga kang becik lan langgeng. Beda karo yen ngulemi wong Gede utawa terkenal, paling-paling mung nyumbang (rada) akeh utawa gede, ananging mesti ora ndongakne kanthi tulusing ati. Wong Gede sing diulemi kuwi tekan wae sok telat lan njaluk digatekake linuwih tinimbang liyan. Wis ngrepoti, ora ndongakne meneh, mula luwih becik nggatekne sing Cilik.

Ananging ya angel nggatekne sing CILIK, merga kabeh menungsa kepengin dadi sing Gede, sing terkenal utawa kawentar. Arang wong sing nduweni cita-cita dadi sing cilik utawa WONGCILIK. Mula saka kuwi,payo pada mbaleni urip kanthi nggatekake sing sederhana lan sing (katone) cilik lan asor.

“Jo, kok krenggosan seka ngendi?” Dina minggu esuk Dalijo sajak krenggosan mulih saka paran.

“Seka Nggreja Lik”, Wangsulane Dalijo.

“Weh, cah kenthir, kebaktian jam 7 jam 6 malah mulih seka nggreja ki karepmu piye?” Lik Ndoleng sajak mangkel karo Dalijo, ora bab esuk-esuk seka nggreja, merga kentekan udud lan biasane njaluk ududte Dalijo.

“Lha ngapa ta Kang, kok esuk umun-umun malah neng Nggreja kuwi?” Nduk I’in melu-melu iyik.

“Ngrewangi Kostere, ngresiki lingkungan greja, nyapu,lap-lap,nggawe wedang lan sakpanunggalane. Pengangkahku ngko kabeh beres lan kostere isa melu ngabekti” Semaure Dalijoo sinambi mak klebas mangkat nyang kali, arep adus, dene Lik Ndoleng mung ngowoh lan Nduk I’in ya mung gluwah-gluweh kaya manuk Kutut disamber Walang.

Mbahe..