NDLONGOP

Kemis Pahing 21 Mei 2020

BENINGE EMBUN ESUK

BIBIT PORANG

MINAT WA 085870480039

Lelakone Para Rasul 1:1-11

Jabur 47

Markus 1:15-23

Lukas 24:44-53

Nalika lagi padha tumenga ing langit ngawasake anggone Gusti sumengka iku, dumadakan ana priya loro jumeneng ing sacedhake, padha mangagem putih, kang tumuli mangandikani mangkene: “Heh, wong-wong Galilea, yagene kowe padha ngadeg tumenga marang langit? Gusti Yesus, kang sumengka marang ing swarga, nilar kowe kabeh iki, bakal rawuh maneh kanthi patrap kaya kang padha kokdeleng nalika Panjenengane minggah menyang ing swarga.” Lelakone Para Rasul 1:10-11

 

“Heh…wong-wong Galilea, yagene kowe padha tumenga marang langit?” Kuwi pitakonan kang ngemu kahanan duka saka para Malaekat marang para sekabate Gusti Yesus, nalika tinilar mbalik menyang Swarga. Kitab Suci nggambarake Swarga kuwi panggonane ndhuwur, mula nalika Gusti nilar ngalamndonya iki, ya digambarake munggah, mbuh mabur apa piye aku dewe ya ora dong, sing jelas, Kitab Suci nglapurake bab “Pindhahe” Gusti Yesus. Nalika kuwi ana para sekabat nderekake Gusti neng “Ruang Departure”, sakpinggire kutha, para sekabat malah NDLONGOP nyawang mendhuwur. NGLONGOP kuwi mantheng marang kahanan kang disawang lan kuwi nggumunake. Para sekabat padha NDLONGOP merga gumun, lan iki sejatine ora salah,ora luput, lha wong nyawang kahanan kang nggumunake kok ora olih gumun. lha yen ora luput kena ngapa Malaekat ndadak nyaruwe?

 

NDLONGOP merga gumun nyawang kahanan kang ora sakbaene kuwi lumrah, wajar. Ananging urip kuwi ora mung cukup NDLONGOP,urip kuwi kudu makarya. Para Malaekat ngelikake para sekabat kang nembe NDLONGOP, merga ana gawean kang didhawuhke Gusti Yesus lan kudu dilakoni sakwise Gusti “MUDIK” menyang Swarga. Para Malaekat pirsa yen para sekabat mung NDLONGOP wae, gaweane ora rampung, ora ndang ngetokne hasil. Aja NDLONGOP wae, ndang megawea,merga Gusti mengka meh bali ya nganggo patrap kang kaya mengkono. Pepeling saka Malaekat kuwi sejatine basaning katresnan. Para Malaekat tresna marang para sekabat, mula dielikake supaya ora NDLONGOP wae, supaya ora gumunan lan enggal tumandhang gawe.

 

Ing jaman saiki ya jik akeh sing senengane mung NDLONGOP wae. Dikandhani  neng kana ana “Mujijat”, njur regudug…pengen nyawang mujijat. Liya wektu ana kabar yen ing papan liyane ana mujijat, njur makregudug…marani mujijat, sakwise tekan papane ya mung NDLONGOP,njur gluwah-gluweh dewe, ora ndang makarya. Ana menh sing patrape NDLONGOP lan maido. Ora nate mangkat, ananging nalika pisan wae mangkat, njur kabeh dipaido, dikritik merga ora manut kekarepane, kuwi biasane cirine wong sing seneng NDLONGOP marang kahanan sakiwatengene.

Sinau saka crita bab Sumengkane Gusti Yesus, ndilalah iki dina pengetan mekrate Gusti Yesus, ayo eling yen Gusti Yesus ninggali gawean. Yen pengen nututi neng Swarga karo Gusti, ya ayo nglakoni gawean kang mbiyen ditindakne Gusti, aja mung NDLONGOP wae.

 

“Jo, aku jik gumun, kae lho bab Panene Porang pakde Wignya..jian pol tenen..” Lik Ndoleng ngomong, mbuh takon apa nggresula,ora genah intonasine.

“Lha njur aku kon ngapa Lik?” Takone Dalijo.

“Weh, aku kuwi ngabari sliramu kuwi lho..malah bingung” Semaure Lik Ndoleng.

“Aku wis ngerti Lik, lha kan panene karo aku..” Wangsulane Dalijo, sinambi milihi Bibite Porang.

“Lha iya, aku dong..kok ya jebul ana hasile ya nandhur Porang kuwi. Mbiyen mung disebratke, wohe malah nggo balang-balangan, kembange jare pakan Ulo..jian..” Gremengane Lik Ndoleng, mbuh gumun, mbuh getun lan ketungka swarane Nduk I’in seka samping omah, nggawa kacang panjang, arep dioseng, jare pesenane mbah’e.

“Mula aja mung NDLONGOP wae Lik. Aja mung nggumunan, ndang melu nandhur!!” Cluluk’e Nduk I’in.

“Asem Kecut Gula Legi, bocah iki mesti pakne cilik diolok-olok wae. Kae bojomu konen nandhur sisan..ben suk tahun ngarep panen..”Lik Ndoleng mbalik nyemes I’in.

“Uwis ya Lik, meh join karo Kang Tukiran Shoting..”Semaure Nduk I’in.

“Weh, malah nilapke aku jebule..hmm..” Lik Ndoleng sajak getun.

“Ora kang Markun, ora bojone I’in, kabeh nilapke njenengan Lik. Bojoone I’in ndisiki tuku bibit Porang, Kang Markun nyalip neng tikungan bab Yu Wasti…hehe” Dalijo sareh ngomonge, ananging jeruuuu…

“Bajindulllllll………..” Batine Lik Ndoleng.

 

Mbah’e..

ESTAPET

Rebo Legi 20 Mei 2020

BENINGE EMBUN ESUK

Pangandharing Toret 31:1-13

Jabur 93

Yokanan 16:12-15

Nabi Musa nuli nimbali Sang Yusak lan dipangandikani ana ing ngarepe sakehe wong Israel: “Disantosa lan ditatag atimu, awitdene kowe kang bakal lumebu bebarengan karo bangsa iki menyang ing nagara kang wus diprasetyakake kalawan supaos dening Sang Yehuwah marang leluhure yen bakal diparingake; dene kowe kang bakal mimpin nganti padha ndarbeni nagara iku. Pangeran Yehuwah piyambak kang bakal ngirid lakumu, Panjenengane piyambak kang bakal nunggil marang kowe, kowe ora bakal ditegakake lan ora bakal ditilar, mulane aja wedi lan aja semplah.” Pangandharing Toret 31:7-8

 

Neng nggon olah raga mlayu (lari) ana pirang-pirang jenis. Ana sing jinise jarak adoh, uga ana sing jenise jarak cedak, ana sing lomba mlayu dewe-dewe, ananging ya ana uga kang bebarengan utawa kekancan. Lha lomba mlayu sing kekancan kuwi sing diarani Lari ESTAPET. Dene modele Lari ESTAPET kuwi racak’e jarak cedhak, sakgrup ana wong papan, kudu dieling lho, kudu wong utawa menungsa kabeh! Saben wong kudu mlayu lan nggawa cuthik sing mengkone dikekne sing arep nerusake playune. Saben wong kudu mlayu kurang luwih 100 meter, lan sakdurunge cuthik diwenehake kancane sing arep neruske palyune, kudu nyedhak utawa nyegat playune kancane kurang luwih 15-20 meter, kanggo adaptasi. Sakbanjure sing wis menehake cuthik minangka tandha bala kuwi ngaso,leren, isa ngomba-ngombe la udad-udud. Kuwi crita ringkes apa kuwi ESTAPET.

 

Neng Kitab Suci ya ana crita bab ESTAPET, yakuwi crita bab nabi Musa lan Yusak. Ngrumangsani wis ora kuwat neruske laku menyang Kenaan, nabi Musa njur nimbali Yusak, dikandan-kandani bab kepiye mandegani bangsa sing ngeyele ngeram kuwi. Sakdurunge kuwi, Yusak yaw is “nyantrik” marang nabi Musa ya ora sedela. Dene perlune nyantrik kuwi, supaya luwih dong, luwih wasis anggone mimpin bangsa kuwi tumeka janjine Gusti Allah. Sing diarani nyantrik sakdurunge tumandhang dewe kuwi ya rekasa, kuwi ya isa dipadakne kaya bocah sinau cikben pinter, kudu wani rekasa. Apa sing dilakoni Yusak lan nabi Musa kuwi isa kanggo patuladan, siji lan sijine wani ngalah. Nabi Musa ngrumangsani kahanane, dene Yusak ya ngrumangsani, mula kabeh lumaku apik, ana ESTAPET kepemimpinan sing esip lan josse ngeram.

                             PIDIONE LIK NDOLENG

Ing jaman saiki bab ESTAPET kuwi ya lumaku neng kabeh papan lan kahanan. Ana neng saktengahe brayat ana ESTAET, neng pola pemrintahan ngindonesa iki ya ana ESTAPET, sanadyan do rebutan cutik nganthi direwangi gelut. Malah (jare) ya ana, neng nggreja barang bab ESTAPET kepemimpinan direwangi godres getih..jian njijikii..

Mbalik neng ESTAPET sing umum. Kabeh kudu ngalami ESTAPET, mbuh ing bab apa, mula ya aja males anggone sinau,sing ndisik ya kudu paham karo sing meh mbacutke, sing mbacutake ya kudu ngajeni sing ndisiki, ora oleh kemaki lan gembelengan. Ning jik ana wae, sing enom kemakine ngeram, glela-glelo kaya uler keket kokean badogan. Hehe.. Sing cetha, kabeh nate lan kudu ngalami apa kuwi ESTAPET.

 

“Jo, sstt..apa bener, jare neng nggreja kuwi ya ana rebutan kekuasaan?” Lik Ndoleng sore kuwi ujug-ujug malah ngrasani greja lan kekuasaan.

“Hambuh Lik, tapi kuwi ya lumrah, wong isine nggreja kuwi menungsa, beda yen isine watu po tunggak..”Semaure Dalijo sinambi nggawe rabuk kompos kanggo tanduran Porang.

“Lho, kok lumrah piye ta Jo?” Takone Lik Ndoleng saak gumun.

“Lha kan urip kuwi kaya ESTAPET ta Lik. Sing ndisik kudu masrahke marang sing keri. Lha sakjroning pasrah iki kabeh kudu wani ngalah, sing ndisik lan sing keri. Yen salah siji ragelem, bubrah!” Dalijo leren seka olehe ngompos, kanggo nljentrehke.

“Ning bab Yu Wasti aja mbok piker isa ESTAPET seka Kang Markun lho Lik…” Nduk I’in njedul lan langsung nyemes Lik Ndoleng.

“Basioo..cah siji ikii..dussss!!!” Unine Lik Ndoleng.

 

Mbah’e..

 

MUDIK

Selasa Kliwon 19 Mei 2020

BENINGE EMBUN ESUK

                                                            KATAK BIBIT PORANG

Pangandharing Toret 5:22-33

Jabur 93

Yokanan 16:5-11

“Sira mangkata lan tutura marang wong-wong iku: Padha balia menyang tarubmu.” Pangandharing Toret 5:30

 

MUDIK kuwi asale saka tembung Udik, sing tegese ndesa utawa kampong. Babar blas ora ana kepentingan saka tembung iki, merga mung saderma katrangan bab panggonan utawa papan. Saka tembung Udik kuwi njur isa dadi MUDIK, sing tegese tumuju marang Udik utawa Kampung/ndesa merga ana keperluan sing kliwat wigati. Neng ngindonesa iki, bab MUDIK wis dadi budaya sing mbalungsumsun, lan dilakoni nalika riyaya, mbuh kuwi riyaya apa wae. Merga wis mbalungsumsum mula nalika ana pepeling supaya riyaya tahun 2020 iki ora MUDIK ya jik akehe ngeram sing nekad MUDIK srana dalan sing jan-janne ya ngguyokne temenan. Ana sing reka-reka mlaku, ana sing nunut mobil box, lan liya-liyane. Kuwi kabeh nyethakne yen bab MUDIK kuwi nduweni papan kang gumatok ana ing atine menungsa.

 

MUDIK kuwi tegese mulih, mbalik marang kahanan wiwitan. Racak’e menungsa seneng karo kahanan  wiwitan,merga ing kono apa wae sepisanan dialami. Mula saka kuwi, sepisan meneh, ora nggumunake menawa okeh wong ing tahun iki sing nangis ngglolo, merga ora isa MUDIK, ora isa bali nyawang lan ngrasakne papan dalah kahanan wiwitaning urip. Yakuwi neng ndesa. Semono wigatine bab MUDIK, mula ya ora nggumunake nalika neng Kitab Suci Gusti Allah dhawuh, menungsa dikon “balik menyang tarub’e, bali mulih menyang omahe kang wiwitan.”. Pangandika kuwi isa diwenehi arti akeh, ananging neng BENINGE EMBUN ESUK dina iki, mung arep njupuk siji wae, yakuwi bab mbalik utawa MUDIK marang kahanan wiwitan.

 

                                                            VIDEO ANAK CERDAS

Ora isa diselaki menawa menungsa kuwi seneng sonjo, seneng saba, seneng dolan. Malah merga senenge sonjo, saba lan dolan ndadekne lali omah, lali ora MUDIK. Dene bab Sonjo, Saba lan Dolan kuwi isa diartekne bab urip. Uripe menungsa kuwi dititahake apik lan dinawuhan kudu tetep apik. Ananging apik ana neng ngarsane Gusti kuwi durung temtu ndadekne senenge menungsa. Kaya dene bab masakan, sanadyan ngomah wis dimasakne sing uenak manut kawicaksanane simbok biyung, ananging ya jik meksa ana sing ora doyan lan njur jajan. Pisan pindho ora dadi apa, ananging menawa bendina njajan, laky a colonthus! Saiki ora sithik menungsa sing “dolan” utawa “Sanja”, lan lali ora eling omah, ora gelem MUDIK. Mula manut pangandikane Gusti, ayo padha MUDIK, balik marang mula-mulanira bab apik lan endahe menungsa tinitahake. Padha balia marang TARUB peparinge Gusti Allah.

 

Sing saksuwene iki pada dolan menyang tumindak kang nyingkur saka kersane Gusti padha MUDIK’a. sing jik baperan, kemaki, kemayu, nesunan, ngamukan, malesan, sombong,angkuh, rumangsa bener dewe lan liyan tansah luput, pada MUDIK’a menyang tarub’e Gusti. Sing saksuwene iki cethete ngeram, cethile pol, uthile ranjamak, owahana patrap urip kang  kaya mengkono kuwi. MUDIK menyanga kahanan kang dikersakne dening Gusti.

 

“Jo, apa Markun sida tuku bibit Porang saka sliramu?” Takone Lik Ndoleng nalika sore kuwi jagongan neng nggubug Pinggir Sawah.

“Ya sida ta Lik, malah nambah limang kilo meneh, jare wis manteb,wis yakin mbolokin yen arep budidaya Porang.” Semaure Dalijo, sinambi ngoncori polybag isi winih Porang cilik-cilik.

“Aku kayane ya sida Jo, tikel pindho pesenku winih ya ..” Semaure Lik Ndoleng sajak wegah kalah karo Kang Markun.

“Lha sampeyan apa wis paham bab nandhur Porang ta Lik?” I’in sing nembe ngentasi jemuran melu cawe-cawe.

“Ya jan-jane durung…ananging isin aku yen kalah mbek Markun..” Lik Ndoleng semaur meneh.

“Ya ora apa-apa Lik pesen okeh, nandhur okeh, merga kuwi ateges nduweni pengarep-arep okeh neng tahun ngarepe. Yen ora nandhur ya ora nduweni pangarep-arep..mung wae ya kudu sinau serius. Aja alesane kalah menang Lik..”Dalijo ndemung kaya wong sing sok nganggo putih-putih neng gulune.

“Lha, yakuwi Lik, aku setuju karo kang Dal,  bab saingan negatip kuwi ora pener Lik, kudu wani MUDIK, mbalik marang tujuaning urip kaya kang dikersakne Gusti. Merga yen ngetung bab kalah lan menang, cen sampeyan ratahu mnang karo kang Markun, soal Yu Wasti wae ya jelas,cetha wela-wela yen kalah..” Nduk I’in muni ngono, sinambi mlebu ngomah ngindhit pakean sing wis garing, lan Lik Ndoleng misuh lirih lan raine katon njekethut kaya duwit nyewunan arep nggo jajan.

“Bajindullllll…kok ya tekan Wasti maning..Dussssss…!!!” Batine Lik Ndoleng.

 

 

Mbah’e..

 

 

 

KLUWUNG

Senen Wage 18 Mei 2020

BENINGE EMBUN ESUK

Purwaning Dumadi 9:8-17

Jabur 93

Yokanan 15:26-16:4a

Samangsa kluwung katon ana ing mendhung, iku bakal Sunpirsani satemah Ingsun banjur enget ing prasetyaningSun kang langgeng ing antaraning Allah lan kabeh makhluk kang urip, kabeh makhluk kang ana ing bumi.” Purwaning Dumadi 9:16

 

Jaman mbiyen, nalika nyawang ana KLUWUNG njur akeh sing nduweni penemu kang beda-beda. Ana sing bungahe ngeram, merga ujaring kandha tekane KLUWUNG kuwi pratandha ana Widodari mudun saka Khayangan, meh adus. Lha jare Khayangan kuwi banyune akehe poll, lan ya beninge ngeram, lha kok ndadak yak-yak’an tekan ndonya arep ngapa jal? Cen Widodari kurang gawean yak’e.. Ana meneh sing nduweni penemu, mbuh bener apa ora aku ya ora weruh, yen kalamangsane njedul KLUWUNG, kuwi pratandha yen ana Naga sing meh ngombe, lan mbokmenawa jik okeh penemu kang maneka werna bab KLUWUNG. Ora ana sing salah, merga kabeh kuwi arep nyritakne lelakon kan ana ing sakmburine crita kuwi.

 

Ana ing “wilayah” ilmiah, sejatine KLUWUNG kuwi isa dijlentrehake, yakuwi anane pembiasan banyu udan/ngepyur dening sunare srengenge. Mula saka kuwi, KLUWUNG mesti njedule yen awan, mbengi blas ora wani, cen KLUWUNG kuwi sanadyan endah ananging jirihe ngeram. Merga pembiasan banyu udan dening cahyaning srengnge, mula KLUWUNG yen esuk mesti njedul neng sisih kulone Sregenge, lan yen sore, njedul neng sisih wetane srengnge, kuwi wis dadi pathokaning jadagraya iki. Kitab Suci ya nate crita bab KLUWUNG, sing paling popular ya crita KLUWUNG ana neng sejarahe Rama Nuh. Bubar udan sing derese ngeram lan uga suwene polpolan, njur Rama Nuh (sakwise terang) metu saka Prahune. Udan wis kesel sajake, mula njur leren. Lha ing kahanan pungasaning udan kuwi si KLUWUNG njedul. Njedule KLUWUNG kuwi diagem Gusti minangka tandha, menawa paukuman kanggo jagad lumantar udan lan banjir bandhang, wis rampung.

 

Tumrap Rama Nuh (Lan sing baku sing nulis Kitab Purwaning Dumadi), tekane KLUWUNG kuwi ora mung diwenehi teges mung bab fenomena alam, ananging ing kono ngemu piweling,ngemu tandha lan ngemu piwulang. Rama Nuh isa maca lan pirsa, yen kuwi dadi tandha purna utawa rampunge ukuman kanggo jagad. Lumantar KLUWUNG, menungsa dijak nyawang kaendahaning titahe Gusti, lumantar KLUWUNG menungsa diajak eling bab rampunge paukuman, lumantar KLUWUNG menungsa dijak sadhar yen samubarang kang ana ing sakiwa-tengene urip iki isa kaagem dening Gusti minangka srana. Mula saka kuwi, sinau saka pengalamane Rama Nuh, ayo padha sinau bab kang tansah obah lan owah ing jagad iki, merga sejatine kuwi bahasane Gusti Allah kanggo titahe. Bab isa maca lan orane, gumantung menungsa(ne), gelem sinau apa ora, yen gelem mesti isa, ananging yen wegah, ya tangeh lamun.

 

“Kang,iki ana inpo apik, serius..” Nduk I’in nyedaki Dalijo neng Sor Wit Nangka sing nembe ngiseni polibek sing meh nggo mbibit Porang, merga persediaan bibit Porang kang Dalijo jian akahe ngeram..

“Ana apa, sajak urjen lan emergensi” Semaure Dalijo, ngebritis-britis nggaya kae.

“Paklik entuk jadwal ronda karo kang Markun. Mesti gayeng, ngko lak mesti dijak remi po gaple, njur dimungsuhke..” I’in njlentrehke, sajak kaya tau-tau’a ngrondha kae.

“Wah..iki jian joss kabare, iki hotnyus In..entuk garapan anyar…”Dalijo sajak sumringah, lan sakdurunge mbacutake anggone ngomong, ketungka njedule Lik Ndoleng saka pojokan kebun, mbuh seka ngendi.

“Ana apa ta cah, kok sajak bungah temen?” Takone Lik Ndoleng.

“Iki lho Lik, jadwal ronda anyar iki lho..” Semaure Dalijo.

“Lha ana apa karo jadwal anyar Jo?” LIk Ndoleng sajak wiwit penasaran.

“Kowe bareng karo kang Markun Lik, mesti gayeng. Iki tandha, kaya KLUWUNG sing dadi piwulange mbahe neng renungan BENINGE EMBUN ESUK ing dina iki..”Unine Dalijo, sajak sumringah.

“Weladalah…lha tandha apa, kok wasis temen olehmu maca kahanan Jo?” Sajak bingung Lik Ndoleng mbacutake takok’e.

“Pas jaga, ronda, ngko main gaple po remi, mungsuhmu Kang Markun, mesti gayeng, arep takundhangi cah-cah nom-nom nggo supporter, jago surak..” Wangsulane Dalijo sajak senenge ngeram.

“Baindullll..kakekane, jadwal ronda wong tua malah nggo dolanan..dusss..” Batine LIk Ndoleng, sajak getem-getem.

 

Mbah’e..

TRAH

Minggu Pon 17 Mei 2020

BENINGE EMBUN ESUK

Lelakone Para Rasul 17:22-31

Jabur 66:8-20

1 Petrus 3:13-22

Yokanan 14:15-21

“Sarehning kita punika trahing Allah, mila kita boten kenging gadhah pamanggih, bilih kawontenanipun Gusti Allah punika kadosdene jene utawi salaka utawi sela, ingkang kawujudaken dening kagunan saha kalangkunganipun manungsa.” Lelakone Para Rasul 17:29

 

Sing diarani TRAH kuwi tegese turun utawa leluhur. Nene patrap budaya Jawa okeh katrangan bab TRAH, kayata TRAH ratu rembesing madu, TRAH Priyayi, TRAH wli lan sakbanjure. Utawa menawa leluhur ya luwih mayar, leluhurku pahlawan, leluhurku tani, leluhurku dagang lan sakbacute. Mulane, sing dikarepke TRAH utawa leluhur kuwi sing ana gegayutane kato sejarah sing kawuri, lan sejatine nalika ngomong bab TRAH utawa leluhur kuwi mung arep ngomong bab tumindak. Yen tumindake apik, mesti sing pada ngomong mengkene, “Ya lumrah wae tumindake apik, lha wong dekne kuwi TRAH piyayi..”, lan uga ana sing maklum nalika ana sing tumindak ora becik, merga ya nyawang TRAH utawa leluhure. “Ora kaget, lha wong mbah tumekan buyut lan canggahe ya klakuane kaya mengkono..”

 

Dadi yen ngrembug bab TRAH utawa Leluhur, sing arep didadekne undheraning rembug kuwi sejatine tumindak, yen apik ya digathugne karo TRAH utawa leluhure, semono uga menawa ora apik. Piwulange Kitab Suci saka Lelakone Para Rasul 17 ayat 29 jian nyethakne bab tembung TRAH utawa leluhur kuwi. Manut katrangane Kitab Suci, lan kuwi piwulange Rasul Paulus, menungsa (klebu awake dewe) iki sejatine nduweni TRAH “Illahi”, sing tegese nduweni sesambungan langsung marang Gusti Kang Akarya Jagad. Wujud sesambungan kuwi mung isa dirasakne ana ing sajroning telenging batin, ora isa disawang liyan. Mula saka kuwi, bab sesambungan karu Gusti Allah kang awujud Roh kuwi ora isa dibiji, sanadyan gayane sok rohani, ananging yen tumindake ora apik, ya sejatine ora ngrumat TRAH Illahi.  TRAH Ilahi kuwi sing sejatine nyambungke menungsa marang klanggengan, ananging kerep menungsa nglalekne, merga dirasa ora ana ajine babar blas.

 

Manut piwulange Rasul Paulus, amarga awake dewe iki nduweni TRAH ILLAHI, mula ing sakmengko, sakwise ngrampungi urip neng alamndonya iki, mestine bali marang Gusti. Mula saka kuwi, sakjroning urip iki kudu tumindak utawa nglakoni tumindak kang didhawuhke Gusti Allah, ben isa dititeni yen kuwi minangka TRAH ILLAHI. Tumindak kuwi laku, ora mung omonga, ora mung status neng media social, ananging Lakuning Urip.

 

“Jo, wingi ora njedul ngandi?” Takone Lik Ndoleng, merga  wingi sedina ora ngetok babar blas.

“Kesele ngeram Lik, ngantuk’e poll..”, Wangsulane Dalijo, sinambi nyumet MLDne.

“Lha ngandi paranmu?” Takone Lik Ndoleng meneh.

“Netepi wajibing warga masyarakat, piket neng Posko Satgas Topik Songolas, mulih ngantuke ngeram gek Lik..” Dalijo njlentrehke kang dialami.

“Kuwi joss tenan Jo, sliramu nyontoni bab patrap urip neng masyarakat. Kudu mbok bacutke lho Jo..” Unine Lik Ndoleng.

“Kuwi merga Kang Dal rumangsa dadi TRAH ILLAHI lik, kuwi jare Mbah’e, mula sakparipolahe kudu apik. Sampeyan ya ngono Lik, aja mung mbija-mbiji apik lan ora, kudu melu tumindak. Aja mangkate ngronda mung yen neng pos papat, cedak warunge Yu Wasti. Yen kuwi wae, ora ndadak dikon mlayu banter lan disik dewe..” Unine Nduk I’in, sinambi ngladekne kopi lan gedang gorang.

“Bajindulll..kok ya tekan Wasti ta In??Hhmmmm…Jrett!! “Batine Lik Ndoleng.

 

Mbah’e..

 

 

BANYU

Jemuah Legi 15 Mei 2020

BENINGE EMBUN ESUK

Purwaning Dumadi 7 : 1-24

Jabur 66:8-20

Yokanan 15:12-17

“Anadene banjir gedhe mau anggone ngelebi bumi patang puluh dina; banyune saya agung njalari praune kangkat mumbul saka ing bumi.”  Purwaning Dumadi 7:17

 

BANYU, saben titah mbutuhake, ora ana sing isa urip ucul saka BANYU. Wujud’e BANYU kuwi mung sederhana lan mapan ana ing ngendi-endi panggonan. Sanadyan dibutuhake kanggo urip, ananging ana kalane menungsa lali utawa malah nglali marang BANYU, mula ya arang sing nengeri utawa ndokoni tenger marang apa wae kang ana sesambungane karo BANYU. Watak’e BANYU kuwi jian apik temenan, isa lumebu lumantar dala kang cilik utawa sempit lan secara natural, BANYU kuwi mung arep lumaku tumuju marang papan kang luwih endek. BANYU isane mili munggah, mung nalika ana sing nglantarake, menawa ora ya babarblas ora mungkin BANYU kuwi mili munggah.

                                                Bulbil Dorman Untuk Bibit. Minat WA 085870480039

 

Sanadyan BANYU kuwi anane neng ngendi wae panggonan, ananging tumekane BANYU kuwi kang marakne mbedakne menungsa olehe ngarani. BANYU sing tumeka bebarengan saka langit diarani udan, BANYU kang tumek ing wayah bengi lan esuk ngliwari gegodongan diarani EBUN, yen basa ngindonesane EMBUN. BANYU sing liwat lumantar menungsa malah uakehe pol jenenge, ana sing diarani Idu, Uyuh, Luh, Kringet lan okeh meneh. Dene BANYU kang tekane nginthil UDAN, lan cacahe jian okehe ora njamak, kuwi diarani Banjir.

 

Meh kabeh agama mapanke BANYU ana neng papan kang sinengker, ana sing dingo mbabtis, ana sing dingo wudlu, ana sing dingo wisuh lan adus, pokok’e kabeh nganggo BANYU minangka srana reresik. Neng Kitab Suci, uga ana akeh banget crita bab BANYU, salah sijine neng Purwaning Dumadi 7, neng kana BANYU diagem Gusti minangka piranti kanggo “Ndandani Jagad”, kuwi nalika jamane Rama Nuh. Merga saka polahe menungsa sing ora karuan, Gusti Allah ora trima yen jagadkang tinitahake kanthi ancas apik kuwi njur rusak, mula nalika kagungan krenteg “Ndandani”, Panjengane migunakne BANYU. Wiwitane dirusak sik, ngirid BANYU sakokeh-okeh, dikon nekani menungsa neng jagad, kuwi sing sakbanjure diarani banjir. BANYU sing tumekane ora karuan, isa ngrusak, sanadyan ana ing kawicaksanane Gusti,kuwi sejatine nembe “Dandan-dandan”.

 

Saka BANYU isa dijupuk pasinaon apik, sepisan, BANYU kuwi dibutuhake kabeh titah, ananging ya mung sakcukupe, nalika tumekane kokean lan bebarengan, malah isa ngrusak. Kapindone, samubarang kuwi kudu sakcukupe, kokean ora apik lan uga kesithiken ya ora apik. Dene kaping telune, lumantar critane Rama Nuh lan Banjir, menungsa ing jaman saiki isa eling, yen Gusti Allah isa ngagem apa wae kanggo lumakune karsane, lumantar BANYU Gusti Allah ngrumati,nguripi lan nyenengke menungsa. Ananging lumantar BANYU uga Gusti Allah isa nekakne bebendu kanggo menungsa, sanadyan kanggone Gusti kuwi mung srana anggone Dandan-dandan Jagad kagungane.

 

“Jo, apa kuwi yakin Porang sing mbok tandur kuwi dadi srana berkahe Gusti?” Lik Ndoleng nakoni Dalijo, nalika wis rada mbengi, merga wis peteng, Dalijo jik milihi Porang sing arep dingo bibit mungsa nandhur ngarep.

“Yakin lik, ngapa aku nglakoni pakaryan sing aku dewe ora yakin..” Dalijo semaur sinambi ndelehne bibit sing pungkasan, njur ngadeg lan njupuk MLDne, banjur disumet.

“Lha apa ora wedi ngko ora kaya sing mbok arepke?” Lik Ndoleng jik takon bab resiko ing mengkone.

“Urip yen mung dikwasani wedi lan kwatir, kapan lumakune Lik. Aku yakin, iki kabeh menawa ndak lakoni kanthi bener lan pener, bakalan dadi dalaning berkah..” Semaure Dalijo, njur linggih,lan ketungka tekane I’in, nggawa kopi kaya biasane.

“Mula dadi uwong kuwi sing yakin Lik..” I’in melu “mulang” Lik Ndoleng.

“Crigis In!!. Teka-teka melu rembug’an..” Umrenge Lik Ndoleng.

“Betul I’in Lik..” Dalijo melu mbelani I’in.

“Sampeyan kok saiki wis malih Kang, mbiyen yen nduweni keyakinan kaya mengkene mesti Tarsi ora ucul..” Ngomong ngono I’in njur mak klepat mlebu neng pawon.

“Asem kecut…bocah siji kuwiii…”Dalijo sajak nesu, sanadyan mung gojekan.

“Jik kangen Tarsi Jo?” Takone Lik Ndoleng.

“Crigis Lik!!”, Semaure Dalijo..

 

Mbah’e..