WEWEH

Senen Kliwon 8 Juni 2020

BENINGE EMBUN ESUK

DalijoNdoleng In Video

GOPAKPULUT CHANEL

Ayub 38:39-39:12

Jabur 29

Mateus 5:38-42

“Apadene manawa kowe dipeksa dikon ngiringake lakune wong samil, iringna nganti rong mil. Yen ana wong njejaluk marang kowe, wenehana lan aja nulak wong kang arep utang marang kowe.” Mateus 5:41-42

 

Tembung WEWEH kuwi tegese menehi, dene sing diwenehake baba pa, ora mengaruhi tegese tembung. Mulane bab WEWEH kuwi isa dipilah dadi (paling ora) rong kahanan. Ana sing WEWEH bab apik lan uga ana kang WEWEH bab kang ora apik. Yen WEWEH sing ora apik wae, ora usah disinaoni,ora usah diwarahi kabeh wis padha wasise ngeram, annaging yen bab WEWEH sing apik, sing maedahi tumrap liyan, biyuhhh..angele ngeram. Lho apa sebab’e kok yen WEWEH bab sing becik kanggo liyan menungsa kangelan? Merga menungsa seneng yen awake dewe sing kepenak lan ora sithik sing seneng nalika liyan rekasa. Jajal wae para maos tulisan iki takon marang awake dewe-dewe, luwih seneng WEWEH apa diwehi? Ngko isa ngisi kolom komentar..

 

Bab WEWEH kuwi nate dadi pokok piwulange Gusti Yesus, nalika memulang marang wong akeh. Ing jaman kuwi menungsa seneng yen pribadine bungah lan marem, pokoke apa wae anggere marakne marem, dilakoni, raketang natoni liyan,kuwi urusan keri. Merga kahanan kang kaya mengkono kuwi, mula njur njedul pranatan-pranatan sing digawe kanthi tujuan supaya uripe menungsa kang bebarengan karo liyan kuwi luwih tumata. Ana salah sawijining pranatan kang diarani “Jus Talionis”, sing tegese, kabeh kudu imbang utawa padha. Yen ana sing nyaduk liyan, kudu diukum kang padha, yakuwi sing disaduk diwenehi wektu kanggo nyaduk sing nate nyaduk dewekne. Pranatan iki lumaku suii banget, ananging ora ngrampungi masalah-masalah sosial. Mulane Gusti Yesus njur mrantana maenh bab aturan kuwi kanthi tetales katresnan.

 

Yen dikeplak pipimu kiwa, wenehna pipimu tengen. Yen kon mlaku sekilo, mlakua rongkilo, yen kon ngancani mlaku sakmil, tutna rongmil lan sakpiturute. Ancase Gusti Yesus cetha, ben “ubengan” ukuman kuwi rampung. Merga yen mung nganggo pranatan “keseimbangan”, ora bakalan imbang ing saklawase. Yen disawang lan dirasakne pancen abot, dikon mlaku sekilo njur malah mlaku rongkilo kuwi obot. Ananging mung lumantar tata urip kang kaya mengkono kuwi, “siklus” dendam ilang. Pancen apa kang diwulangake Gusti Yesus beda karo pranatan lan adate menungsa, merga pancen kersane Gusti kuwi mesti cengkah karo karepe menungsa. Intine Gusti ndhawuhi menungsa WEWEH samubarang kan apik, ngluwihi pranatan kamanungsan. Mung kuwi “resep” urip dadi apik.

SESEREPAN BAB PORANG

 

Sanadyan diwaca mayar, ananging menawa ditrapke bab WEWEH kuwi angele ngeram,mula ya saben wektu tetep kudu diwulangake. Lho kok angel apa sebabe? Merga menungsa kuwi mung seneng nuruti kekarepane dewe. Liyan kuwi ana kalane disawang dudu menungsa, ananging mung obyek sing kudu isa ndadekne dewekne seneng,marem utawa puas. Nalika dirasa ora isa ndadekne senenge, gething kang sumanding. Sepisah meneh, WEWEH bab apik kuwi angel, ananging kersane Gusti kudu mengkono. Dene yen WEWEH babagan sing ora becik kuwi, biyuhh mayare ngeram.

 

“Jo, kena ngapa adimu wedok kawit seminggu iki mung bekothat-bekathut kaya Orong-orang lara untu?” Takone Lik Ndoleng.

“Hambuhh Lik, kurang gawean ngurusi wong nesunan. Ben wae, arep nesu ben kana,arep ngguyu ya ben kana..urusane Iin..” Semaure Dalijo sinambi milihi bibit Porang sing meh didhedher.

“Aku mung wegah yen kuwi merga salahku Jo..”Sambunge Lik Ndoleng.

“Rasah digagas abot-abot Lik, ben wae..yen Iin meh WEWEH babagan sing ora becik. Jan-janne kan kuwi merga wingi usul, mbok yen ngopi neng teras wae, ora neng Cakruk..njur tak wangsuli, nggon teras kuwi jik rung garing cet’e,mula ya nggon Cakruk wae.. Lha mung ngono wae kok nesu,njur praupane jian, memper Cacing sariawan..”Wangsulane Dalijo.

“Oalah, ngono ta. Ya cen bab WEWEH kuwi kudu sing apik, ora WEWEH sing ora apik. Kaya adimu Iin, WEWEH kon neson..hmm” Semaure Lik Ndoleng.

“Kudu kaya sampeyan ya Lik, yen dikon ndandani Gendeng warunge Yu Wasti, sanadyan sing kon nganti siji, isa sakomah mbok tiliki kabeh?”Unine Dalijo sinambi mak brabat mlayu nyang kamar mandi, meh adus.

“Trondolo ngremus Bendooo..kok ya tekan Wasti meneh…Dusssss!!”Lik Ndoleng sajak esmosi…

 

Mbah’e..

 

 

BLAKA 2)

Setu Pon 6 Juni 2020

BENINGE EMBUN ESUK

Ayub 38:22-38

Jabur 8

Matius 5:33-37

“Yen iya, kandhaa: iya, yen ora, kandhaa: ora. Saluwihe saka iku, asale saka pangawak dursila.”Mateus 5:37

 

Ndek tanggal 19 Januari 2019 jejere BENINGE EMBUN ESUK bab BLAKA, kang pokuse marang tumindak. Arane tumindak kuwi ana sing diweruhi liyan lan ora diweruhi liyan, ananging Sing Ngecet Lombok Pirsa. Ing dina iki jejere uga bab BLAKA, ananging kanthi undheran bab ngomong marang liyan,ora mung tumindak. BLAKA kuwi bab ngomong, yakuwi ngomongake sabarang jumbuh karo kahanane. Yen abang ya ngomong abang, yen ijo ya ngomong ijo. Iki bab sing wigati la nana ing papan kang pas, dudu neng pasar papane para bakul. Merga yen ana pasar, blaka kuwi “najis”…

 

Bab BLAKA kuwi nate dadi pokok piwulange Gusti Yesus, nalika mulang wong akeh bab guneman. Ora usah sumpah demi apa wae, merga ngucapke sumpah kuwi malah menehi teges yen kurang yakin marang apa kang diomongake. Kersane Gusti cetha, yen ya ngomong iya lan ora ngomong ora. Ja-jane mayare ngeram, ananging ora sithik menungsa sing ora gelem nglakoni. Okeh sing mubeng-mubeng kaya kitiran nalika meh ngomong sawijining bab. Mung ditakoni, kena ngapa kok wingi ora mangkat ngibadhah wae, biyuh alesane sak tronton..okehe ngeram. Mung diajak BLAKA wae angele ngeram.

 

Piwulang Kitab Suci saka Mateus 5 ayat 37 ngajak sapa wae nglakoni urip sing permana lan prasaja, ngomong apa anane utawa BLAKA bab kang kudune  diBLAKAkne. Kayata nalika ora mangkat ronda, ngomong wae males, orasah ndadak pidato utawa sesorah ngalor ngidul ngetan ngulon. Uga nalika diajak makarya ana neng pakaryane Gyusti, ngomong wae wegah,orasah ndadak mulang lan pidato munggah-mudun kaya bakul jamu. Ayo matrap urip BLAKA marang bab kang kudune BLAKA, orasah ndadak nganggo sumpah-sumpahan mbelgedes..

 

“Lik, sidane meh nandhur pirang kilo Porang’e?” Takone Dalijo neng Lik Ndoleng.

“Rong-rong kilo wae Jo, aku sumpah ora nduwe duit..” Ngomonge Lik Ndoleng.

“Pora nanggung nandhur rongkilo, wong tegalan tinggalane simbah kae enek yen mung 6000 meter?” Unine Dalijo.

“Sumpah Jo, aku randuwe duwit, jane mono ya pengen nandhur okeh..” Lik Ndoleng jik mangsuli bab yen ora nduwe duwit.

“Bussss…ngomong ora nduwe duwit, malah njanjeni Yu Wasti nukokne HP anyar, alesane Yu Wasti kon tuku dewe..” Iin njedul njur melu urun rembug.

“Weh, aja sembrana rembugan koe In..aja nudhuh sing ora-ora..Sumpah aku, ora ngerti karepmu”Lik Ndoleng sajak rada bingung.

“Haiyah, sing BLAKA wae Lik, WA sampeyan ora kekirim neng Yu wasti, kleru neng aku..” Iin muni ngono karo nyelehke kopi lan pacitan.

“Weladalah….jebule sampeyan jik tumindak kaya mengkono ta Lik?” Dalijo sajak kaget.

“Duss..jebul WA ku kleru neng sliramu ta In…asem…GUPAKPULUT meneh…Jindulll!!” Unine Lik Ndoleng.

 

Mbahe..

 

 

 

Mengedukasi Calon Petani Porang

RUMANGSA-ISA

Jemuah Pahing 5 Juni 2020

BENINGE EMBUN ESUK

Ayub 38:12-21

Jabur 8

Mateus 5:27-32

“Ing sajroning uripira apa sira tau ngundang marang gagat-raina lan mrenahake bangbang wetan,supaya padha nyekel poncoting bumi sarta ngebutake wong duraka? Bumi mau banjur salin rupa dadi lempung kang diecap, samubarang kabeh awujud kaya busana.

Ayub 38:12-14

Piwulange leluhur sing unine “dadi wong kuwi isa’a rumangsa, aja malah RUMANGSA-ISA, jebul wis dadi piwulange Kitab Suci kawit jaman kawak-lekak. Natane neng Kitab Ayub ana piwulang kang surasane kaya mengkono kuwi. Kaya kang tinulis neng Kitab Ayub 38 ayat 12-14, neng kana dicritakne kaya ngapa anggone Gusti ndukani Ayub, merga nduweni penemu sing ora jumbuh karo kersane Gusti. Ing rumangsane Ayub, dewek’e wong soleh,sing or nate luput. mula nalika tinempuh kahanan kang ora dadi kekarepane, njur rumangsa yen dewel’e ora nglakoni tumindak kang luput. ing sakjroning kahanan kang kaya mengkono kuwi, Gusti Allah menehi piwulang, yen urip kuwi kagungane Gusti,mulane menungsa ora pareng nyetir Gusti Allah,kudu manut. Meungsa kudu isa rumangsa yen sejatine mung Titah, aja RUMANGSA-ISA ing sakabehe.

Apa kang dialami Ayub ya klakon ing jaman saiki. Okeh wong sing RUMANGSA-ISA. Merga pangerten kang kaya mengkono kuwi,  mula ora sithik kang klakon tukar padudon, cengkah lan crah. Kuwi merga ana kang RUMANGSA-ISA lan angel dikon Isa Rumangsa. Cirine watak RUMANGSA-ISA kuwi akeh, kayata: Nesunan, mutungan,nggugu karepe dewe lan jik okehe pol, jare Dalijo sakndayak abuh..hehe. ngilanga watak utawa penemu RUMANGSA-ISA kuwi ya ora mayar,  butuh wektu suwe lan (mbokmenawa) ragad kang ora sithik. Yen kuwi penyakit, butuh rumah sakit lan dokter ahli kanggo mawaske wong-wong sing nduweni watak RUMANGSA-ISA.

Sinau saka Ayub, ing jaman saiki iki, ayo padha nglakoni urip kanthi andhap-asor, sumanak,sugih-ing esem lan uga nduweni prinsip ngalah. Yen wis nduweni prinsip kang kaya mengkono, mesti lakuning urip bebarengan iki isa enak lan kepenak, edi-peni rinasa lan sinawang. Mung wae, kabeh kuwi ora mayar, kudu wani ragad menawa ana sing nduweni penyakit RUMANGSA-ISA kanggone marasake, ana klera-klerune ngko malah bubrah kabeh..Mula kabeh kudu dingati-ati.

“Arep ngandi Lik?” Takone Iin, nalika weruh Lik Ndoleng numpak motor metik sing biasane dingo Iin.

“Arep nyang warung In, rada kesel mula nyilih honda metikmu. Aku wis nembung Ki Sro, bojomu, rasah kokean rembug..”Wangsulane Lik Ndoleng.

“Weh, ora bab oleh po orane Lik, ananging sampeyan isa ora numpaki honda metik?” Iin njlentrehake alesane nakoni.

“Barang ketok wae mosok ora isa In..” Muni ngono langsung nyoba nyetater, ananging mung ugat-uget kae, merga sajak’e Lik Ndoleng bingung. Ngepasi ngono kuwi njedul Dalijo, sajak bingung nyawang Lik Ndoleng nyoba nyetater honda metik.

“Kowe kuwi dolanan honda kaya cah cilik wae ta Lik..ayo neng cakruk, ngopi lan obong-obong congor..”Unine Dalijo, dene Lik Ndoleng sajak sansaya pucet, njur ketungka njedule Iin lanlangsung mbengok!

“Lha kok rung sida mangkat Lik,apa raisa nyetater……??” Sajak ingah-ingih Lik Ndoleng mudun saka jok motor metik lan tumuju Cakruk.

“Weladalah Lik, jebulmau kuwi arep lungan, meh nyetater raisa ta? Jabangbayikkkk..pora takin Iin?” Takone Dalijo.

“Jare isa kok kang, kabeh mayar wong barang ketok..ngono mau ngomong mbek aku..jebule ya..buuukkk…klepukk..”Unine Iin.

“Mulane Lik, aja RUMANGSA-Isa, ananging Isa’a Rumangsa. Awake dewe iki mung titah..rasah kemaki. Rasah nesu yen takomongi, aja rumangsa jos dewe, kabeh kon manut kowe Lik..” Dalijo malah njur mulang Lik Ndoleng, dene Lik Ndoleng nyruput kopine alonnn banget.

Mbah'e

DIPUNGGEL

Kemis Legi 4 Juni 2020

BENINGE EMBUN ESUK

                                                         KATAK BIBIT PORANG 

Ayub 38:1-11

Jabur 8

Mateus 5:27-32

“Mulane manawa mripatmu tengen dadi jalaraning piala, cuplaken banjur buwangen, amarga luwih becik kelangan salah sawijining peranganing badanmu katimbang badanmu sakojur kacemplungake ing naraka. Lan maneh manawa tanganmu tengen dadi jalaraning piala, kethoken banjur buwangen, amarga luwih becik kelangan salah sawijining peranganing badanmu katimbang badanmu sakojur kacemplungake ing naraka.” Mateus 5;27-32

 

DIPUNGGEL, asale saka tembung Munggel, sing tegese ngethog utawa medot supaya pisah lan dadi luwih cendak. Intine Munggul kuwi ndadekne kahanan pisah  utawa ora nyambung maneh,  mula saka kuwi tembung DIPUNGGEL tegese tumindak kanggo medot sabarang kang sinambungan. Umpamane pang utawa wit-witan, sakwise DIPUNGEL ya dadi pedot lan ora nduweni sambungan utawa relasi meneh, dene menawa sesambungan seduluran tumrap menungsa, sakwise DIPUNGEL yawis ora ana sesambungan maneh. DIPUNGGEL kuwi neng basane bebrayatan utawa rumah-tangga diarani dipegat.

 

DALIJO NGGAYA SIK

Ana piwulang Kitab Suci kang intine bab Mungel, yakuwi nalika Gusti Yesus mulang para murid bab pepalanging urip  nindakne kersane Gusti. Cetha neng piwulang kuwi, menawa sing dadi pepalang kuwi mripat, ya cungkil wae, menawa sing dadi pepalang kuwi tangan, tugel utawa DIPUNGGEL wae. Lha tujuanne apa kok menawa ora ana paedahe dinawuhan MUNGGEL? Kuwi njagani supaya ora ndadekne sakawak kabeh katut amarga lupute peranganing awak. Intine cetha, apa wae kang marakne ora becik kudu DIPUNGGEL. Aja ngrumati bab sing isa ndadekne rekasanin urip.

 

Piwulang kuwi,menawa dicakne neng tata panguripaning menungsa, mirunggan neng urip bebarengan ya luwih becik. Sapa wae sing patrap uripe isa marakne cilakan utawa rekasanin liyan, tinggal wae. DIPUNGEL wae, yen rumangsa ya ben njerit lan dibatalke nggone Munggel, ananging yen ora, yawis tinggal utawa DIPUNGGEL wae. Urip bebarengan kuwi kudu padadene nerti butuhe liyan, ora mung njaluk dinerteni butuhe ananging moh ngerteni butuhe liyan. Menawa ana sing durung nerti, diparingi ngerti, menawa sepisan rung dong ya pindho, menawa pindho durung paham ya ping telu, lan menawa ping telu ya ora paham, luwih becik yen DIPUNGEL. Tujuane ya ben ora nrusuhi lakuning urip bebarengan, mosok urip bebarengan ora isa maju mung merga mikirke “peranganing” brayat sing angel dijak maju.

 

Saka andharan in ndhuwur, ya kango sapa wae sing jik nduweni patrap urip ngrusak kawutuhunain brayat utawa panguripan bebarengan, ayo dielikake. Menawa wis angel dielikake, aja ditokne wae, tinggal utawa DIPUNGGEL wae, mbok menawa sakwise dipungel isa sadhar. Dadi repotin liyan kuwi isa dipadakne kemladeyan tumrape wit-witan. Anane mung ngganggu lan ngrepoti, ngrumati kemladeyan kuwi ya babar blas ora ana bathine, mula ya luwi becik DIPUNGGEL wae.

 

“Jo, ngapa awakmu kuwi kok malah bedandilan kaya mengkono?” Takone Lik Ndoleng, nalika awan kuwi neng kebon, nyawang Dalijo penekan Wit Nangka.

“Lha iki ta Lik, wite mung semene, jan-jane mbiyen isa ngetokne Who sing uakihe pol, njur saiki arang metu wohe, jebul kebak Kemladeyan..” Semaure  Dalijo, sinambi jik penekan lan Munggeli Kemladeyan.

“Awas lho kang, ngati-ati,kepleset ngko malah isa dadi rumatan..”Iin saka pojokan omah, sinambi nyapu melu alok-alok.

“Santai In, cen resiko reresik kuwi okihe pol..isa keneng tlutuhe Kemladeyan,isa tiba merga penekan,lan uga isa kena liya-liyane. Ananging sing jenenge Kemladeyan ya kudu DIPUNGGEL, ben ora dadi repote Wit Nangka iki..”Semaure Dalijo.

“Aku setuju penemumu Jo, sing dadi rereged kudu diresiki, sing dadi benalu kudu DIPUNGGEL, ben lancar kabeh..”Ujug-ujug Lik Ndoleng muni, jian kaya Resi kae. Lan sinambi nyedak, Iin njur nanggepi rembugane Lik Ndoleng.

“Sip Lik..aku ya setuju yen sampeyan jik indak-indik karo Yu Wasti, kudu DIPUNGGEL wae.”Unine Iin lan ditanggepi Dalijo.

“Weh, paklik arep DIPUNGGEL apane In?”

Durung klakon semaur, kesaut swarane Lik Ndoleng misuh.

“Jindulll..duss..malah tekan Wasti meneh!!!. Ora mangan nagkane mung malah GUPAKPULUTe.”Rada lirih olehe Lik Ndoleng muni.

 

Mbah’e..

 

 

 

 

 

NGRUKUBI

Selasa Wage 2 Juni 2010

                                        KATAK UNTUK BIBIT PORANG MUSIM DEPAN

                                                MINAT WA 085870480039

Yehezkhiel 39:7-8,21-29

Jabur 104:24-34,35b

Mateus 5:13-16

“Lan maneh wong nyumed diyan iku ora banjur dikurebi tompo, nanging ditumpangake ing jodhog, supaya bisa madhangi wong saomah kabeh. Samono uga padhangmu iya sorotna marang wong, supaya iku padha sumurup marang tindak-tandukmu kang becik, temah padha ngluhurake Ramamu kang ana ing swarga.” Mateus 5:15-16

 

NGRUKUBI kuwi pakaryan kang nduweni ancas supaya samubarang ora katon. Ngrukup, isa dipadakne kayadene nutup utawa ngaling-alingi samubarang. Mulane, apa wae kang dikrukubi mesti angel katon, utawa malah ora katon babar blas. Dene titah anggone NGRUKUPI kuwi nduweni alesan macem-macem lan siji dalah sijine mesti ora padha. Ana sing tumindak NGRUKUBI merga apa kang dilakoni ora becik, mestine wae merga ora becik ya sakisa-isane dikrukubi ben aman. Ana kang nindakne pakaryan NGRUKUBI supaya kasil, merga iki bab nggawe Vermentasi lan sakpanunggalane.

 

Ana pangandikane Gusti Yesus bab NGRUKUBI, kang tinulis neng Kitab Suci. Ing kana dicritakne bab kepiye anggone Gusti mulang lan ndhawuhi para murid, supaya ora NGRUKUP kabeh pagawean apik kang diduweni. Neng piwulang kuwi Gusti ngelikake yen sejatine menungsa kuwi titah apik kan digambarake kayadene Lilin. Lilin kuwi nduweni tugas madhangi,mula yen njur nyumet Lilin lan dikrukubi, mesti  ora nduweni paedah babarblas. Sing jenenge pepadhang ya kudu isa ketok saka sadengah papan lan ora kena didelikake neng papan kang primpen utawa malah dikrukubi, merga yen klakon kang mengkene iki, Pepadhang kuwi ora ana paedahe.

 

Ing jaman saiki, ora sithik menungsa sing NGRUKUBI berkah saka Gusti. Sing nduweni kapinteran padha NGRUKUBI kapinterane lan wegah diajak tumandhang makarya, sing nduweni lumbering bandha donya, NGRUKEBI banda donyane kanggo jejaga ben rumangsa aman saka pangenacem kekurangan banda, sing nduweni wektu longgar ya NGRUKEBI wektune merga wegah repot lan sakpanunggalane. Sinau saka piwulange Gusti, sapa wae sing maca tulisan iki njur sadhar (merga ora sithik sing maca ning ora sadhar..), payo padha andum sabarang kang apik, aja malah padha NGRUKUBI kang apik kuwi lan marakne liyan ora isa ngerti.

 

“Gek ngapa Jo, kok taksawang kawit mau mung nyawang hape wae?” Takone Lik Ndoleng neng Dalijo, nalika nembe cangkrukan neng Cakruk.

“Lha iya, aku ya kawit mau ngerti Kang Dal mung njingglengi hape wae..” Iin melu nimbrung rembugan.

“Weh, sliramu ta In? Wingi kok ora nyusul neng tegalan nengndi? Ditunggoni wedange malah blas ora njedul?” Takone Lik Ndoleng.

“Arep mangkat, malah kesandhung aku Lik, njur utah kabeh wedange..”Semaure Iin sinambi mbubuti suket neng cedak Cakruk.

“Joooo…nggatekne yen dijak caturan kuwi..” Lik Ndoleng sajak sansaya erosi.

“Hmm..iya Lik, iki nembe rampung anggonku ngeser tulisan lan pidio sing apik, mula aku kudu konsentrasi..”Dalijo semaur.

“Tulisan lan pidio bab apa ta jan-jane kuwi?”Takone Iin.

“Iki lho In, tulisan kaya renungan, ning basa Jawa padinan, sing nulis jian kaya ngomong biasa kae, sok-sok ya misuh barang. Lan Pidione okeh, ning aku nembe seneng nyawang pidio tutorial, iki bab nenandhur. Merga aku gek sinau luwih meneh bab nandhur Porang. Aku nglakoni ngene iki merga piwulange Gusti, ora NGRUKUBI sabarang kang apik. Aku ngrasa iki tulisan lan pidio apik, mula tak ser (share)”, Dalijo njlentreke cetha temenan.

“Weh, apa penting Jo bab ngeser kuwi? Aku ya kerep maca renungan kuwi, uga bab tutorial nandhur Porang, Milih Bibit Porang, tantangane nandhur Porang kuwi. Ananging ora tak ser,mung maca ngono wae..” Lik Ndoleng mnehe alesan.

“Cen sampeyan kuwi kawit mbiyen pelit kok Lik. Mung ngeser wae malesmu ngeram. Sampeyan kuwi isa diarani NGRUKUBI bab sing apik marang Liyan..” Iin malah melu ngoceh.

“Weh, yen ngono ya tak maca, njur taksere…ben okeh sing isa nampa lan nyawang samubarang kang apik..” Janjine Lik Ndoleng..

 

 

Mbah’e..

DIPULIHAKE

Senen Pon 1 Juni 2020

BENINGE EMBUN ESUK

                                                       KATAK BIBIT PORANG

                                                        MINAT WA 085870480039

Yoel 2:18-29

Jabur 104:24-34,35b

Mateus 5:1-12

“Ingsun bakal paring marang sira pulihe taun-taun kang pametune entek kamangsa dening walang alihan, walang kang mlumpat, walang kang kethaha lan walang kang ngrikiti, wadya-balaningSun kang gedhe kang Sunutus menyang ing tengahira Sira bakal padha mangan akeh, nganti wareg, sarta sira bakal memuji asmane Sang Yehuwah, Allahira, kang wus nandukake kaelokan marang sira, karodene umatingSun ora bakal nandhang wirang ing salawas-lawase.” Yoel 2:25-26

 

DIPULIHAKE kuwi tembung  kanga sale saka lingga “Mulih”, sing tegese bali marang kahanan wiiwtan, utawa bali marang omahe. Saka lingga Mulih mau njur isa dadi pirang-pirang tembung sing tegese isa beda-beda, sanadyan jik ana neng sakiwa tengene Mulih utawa bali marang mula bukane kahanan. Saka tembung Mulih njur isa dadi Pulih, yakuwi sakwise Mulih isa dadi Pulih, njur ana meneh tembung DIPULIHAKE, sing tegese digawa utawa didadekne Pulih. DIPULIHAKE klakon merga ora isa Pulih dewe, mulane sing nate DIPULIHAKE aja pada kumenthus lan kumlungkung.

 

Neng Kitab  Yoel ana crita bab pakaryane Gusti ndadekne PULIHE kahanane menungsa. Nalika jagad “tumandhang gawe” kanggo mranata kahanane kang wus rusak merga polah tingkahe menungsa, menungsa njur ngrasa rekasa lan nampa bebendhu. Sakjrone nemahi kahanan kang kaya mengkene iki njur sambat marang Gusti, kuwi pancen patrap menunga sajege urip neng ndonya,ora mbiyen ora saiki. Kokean polah lha bareng nemahi sengsara njur sambat marang Gusti. Mbalik neng critane Kitab Yoel, neng kana dicritakne kepiye kahanane menungsa amarga pambalelane, njur sambat njaluk pitulungan marang Gusti Kang Akarya Jagad. Merga disambati mau, njur Gusti Allah aprajanji arep mulihake kahanane menungsa, lan iki isa diarani yen kahanane menungsa sakwise apik merga DIPULIHAKE.

 

Saka crita iki, isa dijupuk piwulang becik, menawa kahanan apik kang dirasakne dening menungsa kuwi merga sejatine dudu usahane dewe, kuwi merga sih pielase Gusti Allah, kuwi merga DIPULIHAKE. Anane DIPULIHAKE ya merga menungsa ora isa nggawe kahanan kuwi Pulih dewe. Mulane tumrap sapa wae, sing jik rumangsa menungsa (sing wis ra rumangsa menungsa bebas..hehe..)aja pada kemaki, kemayu, kumenthus,gumunggung lan sakpanunggalane menawa nemahi kahanan apik, kuwi dudu pambudidayamu dewe, kuwi merga berkahe Gusti. Semono uga tumrap sapa wae sing nembe nemahi kahanan kang ora apik, ora usah keweden, Gusti mesti bakal ndadekne Pulih, kahanan kang lumaku bakal DIPULIHAKE. Dene syarate ben isa DIPULIHAKE kuwi mung mayar, sambat marang Gusti lan manut pranatane, wis kuwi wae.

 

“Jo, kira-kira kapan ya si dlondhong kecerit Topik Songolas iki minggat saka ngalam ndonya iki ya?” Lik Ndoleng esuk kuwi, nalika leren neng sor wit gedang,neng Kebon, nakoni Dalijo.

“Lho, kok sampeyan nyalahke Topik Songolas ta Lik? Luput Lik, iki janjane sing slah menungsa. Merga srakah, merga kokean pepinginan, njur  apa wae sing enak lan kepenak meh dikwasani menungsa, klebu omahe asli si Topik Songolas iki. Yen meungsane ora srakah kabeh meh diuntal, mesti si Topik Songolas anteng lan ora nggolek omah liya” Semaure Dalijo sinambi nyedak Lik Ndoleng, njur lungguh sumendhe neng Wit Klapa.

“Lho, ngono ta Jo penemumu. Hmm…isa dinalar uga ya, iki kabeh merga polahe titahe Gusti, sing jenenge menungsa, menus-menus kebak dosa iki..Tapi iki isa pulih pora ya Jo?” Takone Lik Ndoleng.

“Isa Lik, ananging ora pulih dewe, kudu DIPULIHAKE, lan kuwi mung Gusti Allah sing isa,awake dewe gari manut” Dalijo semaur.

“Iya Jo, setuju aku, lha tapi sliramu kok ora maskeran, kui isa diarani ora manut lho..”Lik Ndoleng sajak ngelikne Dalijo.

“Badalaaaaa..lha iki neng kebun mbegawe apa ya kudu maskeran Lik, kudu empan papanlah Lik..”Wangsulane Dalijo, sinambi mingket meh mbacutke anggone nyawiske lahan nggo nandur Porang musim ngarep.

 

Mbahe..