TETEG

Rebo Pon 5 Agustus 2020

BENINGE EMBUN ESUK

Yesaya 43 : 1-7

Jabur 1-7,15

Mateus 18 :15-20

Nanging saiki mangkene pangandikane Sang Yehuwah kang nitahake kowe, he Yakub, kang mangun kowe, he Israel: “Sira aja wedi, awit Ingsun wus nebus sira, Ingsun wus nimbali sira kanthi nyebut jenengira, sira iki kagunganingSun. Manawa sira nyabrang ing banyu, Ingsun bakal nganthi marang sira, utawa ngliwati kali-kali, sira ora bakal keli; manawa sira lumaku liwat ing geni, sira ora bakal geseng, lan urubing geni ora bakal ngobong sira. Yesaya 43 :1-2

 

TETEG kuwi kahanan, yakuwi kahanane sapa wae kang wani  ngadepi samubarang tanpa rasa giris utawa wedhi babarblas. Ora gampang nduweni rasa TETEG, amarga okeh bab sing isa ndadekne ilange rasa TETEG kuwi. Dene babagan sing isa ndadekne tuwuhing rasa TETEG kuwi ya okeh, isa kuwi amarga rumangsa nduweni daya kekuwatan linuwih, isa amarga  rumangsa nduweni bekingan sing kuwat lan sakpanunggalane. Perangan ping loro sing sinebut neng nduwur kuwi sing arep dadi pancatan renungan BENINGE EMBUN ESUK dina iki.

 

Menungsa isa nduweni rasa TETEG, salah sijine menawa sadhar yen nduweni bekingan. Ra percaya, takon wae para preman lan gentho sing sangare medeni jangkrik kae, mesti nduweni bekingan, mbuh sapa lan apa wujud’e. Ana crita neng Kitab Suci bab “Bekingan”, lan sing njanjeni menehi Bekingan kuwi malah Gusti Allah dewe, jale kudune apa ora nduweni rasa TETEG sing ora ukur gedene. Kuwi klakon nalika nabi Yesaya sugeng, nalika kuwi bangsa ngisrael nembe ngalami kahanan kanga bot banget, saking abote nganti ora wani nglakoni apa-apa. Mirsa kang kaya mengkono kuwi, Gusti Allah lumantar nabi Yesaya ngendika yen bakal dadi bekinge wong ngisrael ing sadengah kahanan. Kuwi kapangandikake supaya wong-wong ngisrael ing jamane Yesaya nduweni rasa TETEG sing gede lan kuwi njalari wani ngedepi urip.

 

Kaya ing jamane nabi Yesaya, ing jaman saiki bab giris lan wedi kuwi lumrah, mula ora sithik menungsa sing ora TETEG ngadepi mangsa kang bakalane klakon. sinau saka Kitab Suci, ayo padha sadhar yen sejatine Gusti Allah kuwi siap “Mbekingi” kabeh wong sing nduweni sedya mulya urip neng dalaning pepadhang. Ora usa dikuwasani dening rasa wasumelang, ananging ayo ngadepi urip kanthi TATAG, mbuh kaya ngapa kahanan kang bakalane klakon.

 

“Jo, apa jan-jane sing marakne sliramu kuwi wani nandhur Porang sakmono okehe kuwi?” Takone Lik Ndoleng marang Dalijo, nalika Dalijo nembe ubyeg milihi Bibite Porang.

“Kemantepan Lik, kuwi sing marakne aku TETEG, sanadyan  pepalange ya okehe ngeram” Wangsulane Dalijo, sinambi milihi bibit Porange.

“Apa mung kuwi alesanmu isa kaya mengkono niatmu gedene ngeram nandur Porang kuwi?” Lik Ndoleng jik nerusne pitakonane.

“Kang Dal kuwi rumangsa yakin yen bakalane diberkahi dening Gusti Lik, merga mlaku neng dalan kang pener. Jarene Mbah’e, kang Dal nduweni bekingan, yakuwi Gusti dewe” Iin melu nimbrung rembugan.

Ajeg In, nimbrungan kowe kuwi…” Lik Ndoleng sajak nesu merga Iin melu-melu.

“Kaya sampeyan Lik, genah Yu Wasti wis duwek’e Kang Markun, tetep wae jik mbok jowal-jawil..” Unine Iin, lan banjur mak brabat arep nyang warung.

“Jindullll…malah kuwi meneh! Jretttt!!!” Batine Lik Ndoleng.

 

Mbah’e..

 

KEWEDHEN

Selasa Pahing 4 Agustus 2020

BENINGE EMBUN ESUK

Purwaning Dumadi 32:3-21

Jabur 17 :1-7,15

Mateus 18 :1-5,12-14

Sabaline kongkonan banjur padha matur marang Yakub: “Kula sampun sami sowan dhateng ingkang raka Esap, saha panjenenganipun sampun bidhal kadherekaken tiyang sekawan atus perlu methuk panjenengan.” Ing kono Yakub wedi banget, lan atine miris, mulane para bature, wedhuse, sapine lan untane banjur diperang dadi rong pantha. Purwaning Dumadi 32 :6-7

Tembung KEWHEN kuwi linggane wedhi, sing tegese ora wani. Dene bab ora wani kuwi karo apa utawa sapa, ora penting, sing penting Wedhi kuwi ora wani ngadepi kahanan kang bakalan klakon. Saka lingga Wedhi kuwi njur isa dadi tembung KEWEDHEN, sing tegese kahanane tutah, mbuh kuwi kewan apa menungsa, sing gemeter poll amarga ora wani ngadepi kahanan. Sakliyane gemeter, sapa wae sing ngalami kahanan KEWEDHEN, isa ngrasuk halusinasi. Nyawang apa lan sapa wae jian Wedhine ngeram. Mbokmenawa ana sing maca tulisan iki, njur nate ngalami kahanan KEWEDHEN, ayo padha andum pengalaman. Dene andume pengalaman ya neng kolom komentar nggih..hehe. 

Mbalik neng kahanan KEWEDHEN, kuwi isane klakon mung nalika menungsa (yen titah liyane ora dong), nate nglakoni luput utawa kleru. Merga nate nindakne kaluputan utawa tumindak kang ora bener lan Pener, mula njur nemahi kahanan kang wedhi banget, utawa KEWEDHEN kuwi. Neng Kitab Suci ana crita bab pawongan kang ngalami kahanan KEWEDHEN, yakuwi Yakub. Merga wis ngrampas Hak Pembarep saka kangmase, mula njur minggat lan nggembol Wedhi sing ora karuwan. Yakub pancen luput, mula lumrah yen KEWEDHEN, lha wong dudu duweke kok dirayah, dirampas. Amarga KEWEDHEN kuwi mau, nalika meh kepethuk karo “sing ditatoni”, yakuwi ora liya kangmase dewe, si Esap, Yakub ngrancang tumindak kang Urik, supayane ben aman. Lha “urik’e” Yakub kuwi merga ngedum rombongan dadi rong grup, ancase menawa siji sirna, sijine isa mlayu. Ketok yen Yakub kuwi nduweni sipat licik poll.

Ing jaman saiki, patrap tumindak kaya Yakub kuwi jik nggladeg, akehe ngeram. Okeh wong sing tumindak murak-sarak,nabrak apa wae tatanan-tatananing urip mung merga kepengen marem. Okeh sing wani ngrampok utawa ngrayah sabarang kang dudu duwek’e, amarga kepengin lan ora isa ngendaleni pepinginan kuwi. Lan sakwise klakon banjur tuwuh rasa Wedhi sing gedene ngeram, utawa ginubet ing kahanan KEWEDHEN. Mula, supaya ora tumeka ing kahanan KEWEDHEN, aja tumindak murang-sarak lan sakumpama tumindak luput, enggal-enggal njaluk ngapura kanthi iklasing manah.

“Jo, wingi kae Sarkali ngapa mrene?” Takone Lik Ndoleng marang Dalijo bab dolane Sarkali.

“Dolan wae Lik, sinartan dewekne rumangsa luput, merga salah etung bab Bibit Porang sing dituku” Wagsulane Dalijo sareh.

“Weh, lha apa kowe ngerti yen sejatine kapusan Jo?” Takone Lik Ndoleng.

“Ora, mung wae Sarkali jujut kok Lik, ngrumangsani nampa sing dudu darbek’e, mula njr dolan lan njaluk ngapura. Dekne crita, janjane wedhi, ananging luwih ngrasa KEWEDHEN nalika ora jujur” Semaure Dalijo sinambi nyumet MLDne.

“Kuwi Lik, diconto! Aja kaya sampeyan, tumindak murang-sarak,malah bungah. Jarene hebat isa ngulik kang Markun. Ya kan Lik, sampeyan ora rumangsa salah nalika njowal-njawil Yu Wasti? Malah sajak bungahmu ngeram..” Iin kaya biasane, njedhul lan melu nyemproti Lik Ndoleng.

“Trondolo buntungg…Kok ya tekan Wasti ta Innnn??” Batine Lik Ndoleng.

Mbah’e..

KESANDHUNG

Senen Legi 3 Agustus 2020

BENINGE EMBUN ESUK

Purwaning Dumadi 31 :22-42

Jabur 17 :1-7,15

Mateus 17 :22-27

Nanging supaya aku kabeh aja dadi sandhungan tumrap wong-wong iku, kowe mancinga menyang sagara. Iwak kang kena kokpancing dhisik dhewe iku cekelen, angapna cangkeme, kowe bakal nemu dhuwit patang drakhma ana ing jerone. Jupuken bayarna marang wong-wong iku, kanggo Aku lan kowe.” Mateus 17:27

Mbokmenawa saka kabeh sing maca tulisan iki, ora ana siji-sijia wae sing durung nate KESANDHUNG. Kabeh wis nate ngalami. KESANDHUNG kuwi lelakoning urip, nalika sikil kang dingo mlaku nabrak samubarang. Lumrahe KESANDHUNG kuwi ya karo barang kang atos lan gede, ananging ana neng patrab piwulange wong Jawa, ana sebutan KESANDHUNG angin, mbuh kaya ngapa kahanane. Sing cetha, KESANDHUNG kuwi okeh rekasane, arang sing kepenak, klebu sing KESANDHUNG tresna.

Amarga KESANDHUNG kuwi rekasa, mulane Gusti Yesus nate maringi piwulang, supaya sakjroning gesange ora dadi Sandhungan, sing tegese kahanan utawa barang kang marakne wong liya KESANDHUNG. Crita Kitab Suci neng Injil Mateus bab 17 ayat 22-27 nyritakne kepiye anggone Gusti tumindak, supaya ora dadi sandhungan liyan. Dene kang dadi perkara kang katindakake dening Gusti kuwi, yaiku pakaryan kang lumrah, dudu gawean kang hebat, wong mung perkara pajeg kanggo Pedaleman Suci. Yen ing jaman saiki mbokmenawa ya pisungsung wulanan, supaya butuhe greja cukup. Gusti pirsa yen pitakonan bab Pajeg Pedaleman Suci kuwi mung jebakan, mula ya kudu diwangsuli kanthi wicaksana. Sing cetha, Gusti Yesus ora kersa dadi Sandhungan liyan.

Ing jaman saiki ora sithik wong sing dadi Sandhungan, mbuh kuwi dilakoni kanthi sadhar apa ora. Lan merga dadi Sandhungan,mula ya okeh uga wong sing KESANDHUNG. Dene cethane dadi Sandhungan kuwi ya ora macak dadi kayu apa meneh tunggak, ananging sikep lan polahe sing marakne liyan KESANDHUNG. Mula saka kuwi, yen ana sing maca tulisan iki njur rumangsa nadhe dadi Sandhungan, enggal-enggal ngowahi patraping urip, dene sing nate KESANDHUNG, kudu luwih dingati-ati. Tetep eling lan waspada.

“Jo, ngandi paranmu telugndina ora ngetok, okeh sing nggoleki sliramu lho?” Takone Lik Ndoleng.

“Aku pokus nyawiske lahan Porang Lik, so kora kober njedul…”Semaure Dalijo sinambi nyumet MLDne.

“O..kiraku nglalu merga mikirke Tarsi.” Wangsulane Lik Ndoleng.

“Emange aku sampeyan Lik, sanadyan wis dadi duweke liyan jik mbok upakara wae..”Dalijo semaur sareh.

“Wis rasah regejegan, ngko malah dadi kaya sing diwulangke mbah’e kuwi. Sijine dadi Sandhungan lan sijine KESANDHUNG..” Iin njedul lan bablas muni sakserune, sanadyan swarane cempreng kaya blek ditabuhi.

“Sareh In, aku kuwi angon wektu, olehku ora njedul merga njajal,pengen ngerti sepira butuhe kowe kabeh kaor aku. Wong njedul wae durung mesti menehi apa-apa. paling kopi ta In?” Unine Dalijo.

PENJALUK

Rebo Legi 29 Juli 2020

BENINGE EMBUN ESUK

KEBON PORANG

Wulang Bebasan 1 :1-7

Jabur 119 : 121-128

Mateus 17 : 1-9

Petrus banjur matur marang Gusti Yesus: “Gusti, iba saenipun, bilih kawula sadaya wonten ing ngriki. Manawi Paduka marengaken, kawula badhe damel pondhokan tetiga, satunggal kagem Paduka, satunggal kagem Nabi Musa saha satunggalipun malih kagem Nabi Elia.” Mateus 17:4

 

PENJALUK kuwi asale saka tembung Njaluk, sing tegese tumindak lumantar rembugan lan basa isyarat, kang ancase nampa samubarang saka liyan. Anane Njaluk kuwi amarga rumangsa ora nduwe, utawa rumangsa kurang. Njaluk kuwi uga amarga tuwuh pepinginan lan ing pungkasane, anane Njaluk kuwi supaya nampa lan marem. Dene tembung PENJALUK kuwi tegese sabarang tumindak kang katujokake marang liyan, supaya liyan kuwi nuruti kekarepane. Masalah apa kang dadi kekarepane lan klakon apa ora PENJALUK kuwi, beda perkara. Ananging kabeh kang aran PENJALUK kuwi, ancase supaya kekarepan keturutan. Dene bab PENJALUK kuwi isa dipilah dari loro, PENJALUK becik lan PENJALUK kang ora becik.

 

Ana crita neng Kitab Suci bab PENJALUK, malah menawa dirasa lan disawang klebu PENJALUK becik. Crita kuwi ana ing Injil Mateus bab 17 ayat 1-9. Ing kana dicritakne nalika Gusti Yesus munggah gunung lanngajak sekabate cacah telu. Nalika tekan nduwur lan para sekabat ngrasakne pengalaman kang rinasa ngepenakake, mula njur nduweni PENJALUK marang Gusti. Dene PENJALUK’e kuwi  yakuwi supayane Gusti kersa nampa ide lan usule Petrus, sing arep ngyasakne pondokan utawa tenda. Dene ancase nggawe pondokan utawa tenda kuwi supaya Gusti Yesus krasan, amarga nembe sapatemon karo Elia lan Musa. Ananging PENJALUK kang rinasa apik kuwi babarblas ora direken utawa digagas dening Gusti. Bubar “janjiane” karo Elia lan Musa rampung, Gusti Yesus ngajak mudun cah telu kuwi.

 

Mrangguli kahanan kang kaya mengkono kuwi, Petrus ora nesu, ora mutung, ora ngamuk. Sanadyan ide utawa usule jian blas ora digagas, Petrus jik bergas, jik setya tuhu nderek lan nderekake Gusti.  Iki pasinaon apik bab kaimanan, bab nderek Gusti. Nderek Gusti lan nyenyuwun utawa ngejokne PENJALUK marang Panjenengane kuwi ora kudu kabeh dituruti, kudu manut kawicaksanane Gusti. Sanadyan ana ing penganggepe dewe ide utawa usul kuwi joss kotos-kotos, top-markotop, ananging menawa ora dadi kersane Gusti, ya kudu manut.ora pareng nesu..Hayo, kuwi sing maca sinambi mencereng kaya Banteng putus cinta, enggal mesem,aja njekathut kaya mengkono!!! Hehe..

 

“Jo, sakumpamane mbesuk Porang sing mbok tandur ora ngetokne hasil apik kepiye sikepmu?” Takone Lik Ndoleng neng Dalijo, nalika esuk kuwi wedangan neng dulngomah.

“Weh, ya taktampa kanthi legawa Lik..Aku mung ngayahi jatahku, aku nduweni PENJALUK marang Gusti, supaya tanduran Porangku ngetokne hasil sing apik. Ananging kabeh mbalik marang Gusti” Semaure Dalijo sajak solehe ngeram.

“ Wah… jian wicaksana temenan wangsulanmu Jo..apik..josss!!” Tanggepane Lik Ndoleng, sinambi ndudut MLDne Dalijo, alesane rung kober neng warung.

“Kabeh kabutuhan Porang takusahakne takcukupi Lik, merga aku nduweni PENJALUK marang Porang, mbesuk genti nyukupi butuhku. Kuwi kang tansah takaturke minangka pandonga marang Gusti. Lan aku yakin, hasil kuwi ora bakalan nyelaki pambudidaya..” Dalijo njlentrehake penemune bab PENJALUK, pambudidaya lan Hasil ing tembe.

“Setuju awakmu aku kang. PENJALUK,usaha lan tegen kuwi syarat utama anane hasil. Aja kaya sampeyan Lik, sembrana tumindak ananging njaluk sukses. Kaya olehmu mbiyen nyedaki Yu Wasti. Merga mung inggrang-inggring mula ora kasil..” Iin semaure, njur bablas makklebat arep neng warung.

“Trondollo buntungg!!! Kok malah tekan Wasti menehh!! Dusss…” Batine Lik Ndoleng, merga meh muni isin, wong tulisan wae ngko jik diedit…hehe

 

Mbah’e..

 

NULIS

Selasa Kliwon 28 Juli 2020

BENINGE EMBUN ESUK

KANG DALIJO MLUKU

1 Para Raja  4:29-34

Jabur 119 :121-128

Mateus 15 :1-2,10-14

Panjenengane nganggit bebasan telung ewu, lan kidungan sewu lima. Panjenengane nggubah kekidungan bab wit-witan, wiwit wit eres ing pagunungan Libanon nganti wit Hisop kang thukul ing tembok. Panjenengane uga ngandika bab kewan-kewan lan manuk-manuk tuwin bab kewan kang rumangkang sarta bab iwak-iwak. 1 Para Raja 4 :32-33

 

NULIS kuwi tegese  nggunakake apa wae kanggo mbentuk hurup utawa angka kang nduweni tujuan utawa ancas. Ora ana siji-sijia tulisan sing ora nduweni makna utawa arti, kabeh nduwe arti. Dene sing dikarepake “Nggunakake apa wae..” kuwi amarga saiki sing jenenge NULIS kuwi ora kudu nganggo Potlot utawa bullpen, kabeh isa dinggo NULIS, sing penting isa kebentuk hurup utawa angka. Sanadyan NULIS kuwi dudu gawean sing angel, mergane meh kabeh wong isa nulis, ananging ora okeh wong sing seneng NULIS. Ing kene NULIS kuwi ora mung mbentuk angka lan hurup, ananging mbentuk hurup lan angka kang nduweni arti sing ngluwihi tulisan kuwi.

 

Sanadyan ing jaman saiki ora okeh sing ngajeni tulisan, apa meneh sing NULIS, ananging ana crita neng Kitab Suci kang nyritakake bab NULIS kuwi. Raja Soleman kuwi “hobyne” NULIS, mula apa wae ditulis, kepethuk apa wae ditulis, ngrasa apa wae ditulis. Apa kang ditulis kuwi sakwise dirasakne lan kabeh disangkutake karo Gusti Allah. Mbokmenawa beda karo wong jaman saiki, senenge NULIS, ananging neng media sosial lan kuwi kanggo nyindiri Liyan, nguda-rasa kang mung mbenerake awake dewe. Mbalik neng crita Raja Soleman kang seneng NULIS. Kaya kang wus taktulis neng nduwur, Raja Soleman NULIS apa wae,ananging sakdurunge katulis, diasak-rasakne ndisik lan uga digandengake maro Gusti Alah. Mulane tulisane Raja Soleman okeh sing dadi warisan apik tekan jaman saiki, malah ora sithik wong sing seneng malah ngidolai marang tulisane Raja Soleman.

BIBIT PORANG

MINAT WA 085870480039

 

Anane Kitab Suci tumeka saiki  kuwi merga anane Tulisan. Dene anane Tulisan kuwi merga ana wong sing seneng NULIS, sanadyan arang sing saiki ngajeni Tulisan, apa meneh marang sing NULIS. Ananging, lumantar Tulisan kabar isa dimangerteni, Lumantar Tulisan ana Kitab Suci, lumantar Tulisan isa mangerteni ilmu pirang-pirang. Mulane, aja ngremehake Tulisan lan sing NULIS, amarga tanpa ana sing gelem NULIS, mokal ana Kitab Suci.

 

“In, jebule dulurmu lanang Dalijo kuwi nduweni hoby NULIS ya?” Takone Lik Ndoleng marang Iin.

“Weh wis suwene ngeram lho Lik kang Dal kuwi nduweni klangenan NULIS. Lha apa lagi ngerti?” Wangsulane Iin sinartan nakoni Lik Ndoleng.

“Lha kapan wektune NULIS kuwi, awan makarya, ana wektu longgar dinggo ngrumati  Porang. Njur kapan olehe NULIS?” Lik Ndoleng saja gumun.

“Ya kuwi pinter-pintere kang Dal olehe me-menej (istilahe Iin jian joss), wong andum wektu kuwi mayar,anggere gelem. Kaya sampeyan ya isa andum wektu kanggo tuku udud neng warunge Yu Wasti , sinambi njawil..” Unine Iin, sinambi nglirik Lik Ndoleng.

“Duss..malah kuwi meneh…hmmmm” Batine Lik Ndoleng. Dina iki Dalijo absen, nembe NULIS, ora nyetatus WA lho nggih..

 

Mbah’e..

IKLAS

Setu Pahing 25 Juli 2020

BENINGE EMBUN ESUK

1 Para Raja 2 :1-4

Jabur 119: 129-136

Mateus 14:1-12

“Aku iki bakal lunga ngliwati dalane samubarang kabeh kang ora langgeng, mulane atimu disantosa lan tumindaka kaya wong lanang. Nglakonana kawajibanmu kalawan setya marang Sang Yehuwah, Allahmu; karo maneh lakumu metua ing dalan pitedahe sarta lestarekna anggonmu ngenut sakehing katetepan, prentah, pranatan tuwin katemtuan, kaya kang katulis ing angger-anggere Nabi Musa, supaya samubarang kabeh kang koklakoni lan sakehing sedyamu bisa oleh gawe” 1 Para raja 2 :2-3

 

Iklas kuwi gawean sing ora abot, ananging sanadyan kaya mengkono ya ora sithik menungsa sing wegah nglakoni. IKLAS kuwi kahananing ati kang ora nduweni melik apa-apa, amarga nglakoni mung supaya kahanan apik sing klakon. sakliyane kuwi, IKLAS isa uga diwenehi arti, kahanan kang sumeleh nalika liyan sing nampa utawa nglakoni. Crita neng Kitab Suci, cethane neng 1 Para Raja 2 ayat 1-4 menehi gambaran bab IKLAS kuwi. Nalika kuwi Sang Prabu Dawud wus meh “mulih neng klanggengan” amarga wis sepuh, njur meling marang putrane, Soleman. Dene welinge supaya Soleman ngayahi urip kang tansah manut marang pepakone Sang Yehuwah. Dene ancase sakliyane kang putra tansah winengku karahayon, uga supaya kabeh sing bakalane dilakoni soleman ngetokne hasil.

 

Prabu Dawud sadhar yen salah siji ayahan sing bakalane diayahi putrane, yakuwi mbangun Pedaleman Suci. Merga saka kahanan kang sadar kuwi, mulane ana ing piwelinge marang putrane, Prabu Dawud ora nyisipke weling supaya jenenge digawa, utawa paling ora disebut sithik. Kabeh kuwi ora dilakoni dening Prabu dawud, amarga dewekne wis IKLAS sakiklas-iklase. Apa kang dilakoni dening Prabu Dawud kuwi ora mayar, amarga menungsa sakdurunge lumebu lan tumeka ing kahanan kang IKLAS kudu wani ngliwati dalan kang rumpil. Wani nelukake pepinginan dialem, pepinginan kudu nomer siji, pepinginan tansah katon ing samubarang. Dalan kuwi jian rumpile ngeram, mula ya ora okeh menungsa sing wis bener-bener tekan papan kuwi, klebu sing aca tulisan iki ya mbokmenawa okeh sing durung tekan ing kahanan IKLAS sing sakbenere.

 

Sinau saka lelakone Prabu Dawud, mula saiki ayo ngupaya supaya isa tumeka marang kahanan kang IKLAS sing sejati, ora mung iklas mung unine lambe, ananging iklas ing sakmestine. Iki ora mayar, merga nelukake ati kuwi angele ngeram, apa meneh wong Jawa, ngomong “damai sejahtera”, ananging atine jik njeggureng kaya barongan. Sanadyan ora mayar, ayo dilakoni, aja malah ngendani.

 

“ Jo, sakumpamane mbesuk sing padha mbok “silihi” bibit Porang kae Panen, ananging ora mbelekake biaya winih marang sliramu piye?” Takone Lik Ndoleng nalika nekani Dalijo sing nembe leren macul neng tegal kidul kali.

“Ya ora apa-apa Lik, sing penting digunakne sing sakmestine” Semaure Dalijo sajak rada krenggosan merga nembe macul.

“Weh, kan kuwi kowe rugi Jo?” Lik Ndoleng sajak bingung.

“Kuwi yen sing nyawang sampeyan Lik, kabeh mbok etung cara blantik”, Semuare Dalijo.

“Weh, ya kudu ngono, ben adil..yen kaya mengkono kepenaken sing mbok silihi..”Ujare Lik Ndoleng sajak wegah kalah.

“Aku IKLAS kok Lik, lan menawa klakon kaya sing mbok omongke kuwi, malah kuwi dadi srana nguji IKLASku, yenlulus ya apik,ananging yen aku jik njaluk dialem, tegese aku durung IKLAS. Kaya sampeyan wingi, nukokne aqua sakdus pas kerjabakti erte lan durung diomongne wae wis mrengut kaya Lele kelangan sungat” Jlentrehe Dalijo.

“Dusss!! Konangan..” Batine Lik Ndoleng.

 

Mbah’e..

 

NYEPELEKAKE

Jemuah Legi 24 Juli 2020

BENINGE EMBUN ESUK

KATAK BIBIT PORANG

Minat WA 085870480039

1 Para Raja 1 : 38-48

Jabur 119:129-136

Mateus 13 : 54-58

“Apa iku dudu anake tukang kayu? Embokne jenenge rak Maryam, lan sadulure Yakobus, Yusuf, Simon lan Yudas?” Mateus 13: 55

Yen ing tanggal 27 April 2020 BENINGE EMBUN ESUK nganggo Jejer NYEPELEKNE, ing dina iki jejer meh pada, yakuwi NYEPELEKAKE. Asale saka lingga Sepele, sing tegese kurang utawa mala hora nduweni aji babarblas. Saka tembung Sepele kuwi njur isa dadi pirang-pirang tembung lan ukara, salah lorone ya NYEPELEKNE lan NYEPELEKAKE. Dene artine tembung NYEPELEKAKE, yakuwi tumindak kang isa awujud tumandhanging raga lan uga pikiran kang mapanake samubarang ana ing papan kang Asor, utawa ngisor. Dene kang isa DISEPELEKAKE kuwi pirang-pirang, ana kahanan, ana pakaryan, ana barang lan uga ana uwong utawa menungsa. Racak’e sing seneng NYEPELEKAKE kuwi wong sing kumlungkung, gumunggung, kemaki lan kumenthus amarga rumangsa luwih ing sakabehe. Dene patrap NYEPELEKNE kuwi ya isa klakon lumantar pirang-pirang tumindak, ana sing mung plerak-pleruk kaya Yu Wasti, ana sing raine Njekathut kaya Kinjeng putus cinta lan sakliyane, jik okehe pol contone, para maos manga ditambahi neng kolom komentar..hehe

Bab tumindak NYEPELEKAKE kuwi nate klakon neng Kitab Suci, cethane neng Injil Mateus bab 13 ayat 54-58, lan sing disepelekake ora bain-bain, yakuwi Gusti Yesus. Ana ing panyawange wong Nazaret, Gusti Yesus kuwi ora luwih saka anak’e Pak Yusuf  si tukang kayu  Simbok Maryam. Gusti Yesus kuwi ya mung kakaneg si Yakobus, Simon, Yusuf lan Yudas, ora liya lan oraluwih. Wong-wong Nazaret rumangsa luwih ing samubarang, luwih sugih, luwih pinter, luwih pengalaman lan pokok’e luwih ing sakabehe, mulane ya NYEPELEKAKE Gusti Yesus. Ananging sanadyan DISEPELEKAKE, Gusti Yesus ora duka, ora nyetatus WA..opss..jamane Gusti durung ana WA ding…hehe. Gusti Yesus tetep ngayahi pakaryane, ora njaluk dialem lan disubya-subya. Gusti Yesus ya ora lapuran bab pakaryane marang para Sanhedrin, amarga kuwi wis pakaryaNe. Ing sisih liyane, Gusti Yesus sanadyan DISEPELEKAKE uga ora kagungan niat males. Ananging kang klakon neng Nazaret yakuwi ORA AKEH MUZIJAT, kuwi kabeh amarga gaweane wong-wong kono sing seneng NYEPELEKAKE!

Ing jaman saiki, kang klakon kaya neng Nazaret ing jamane Gusti Yesus ya nggladeg, sakarat-arat, sakndayak abuh jarene Dalijo. Okeh sing malah nduweni “hoby” NYEPELEKAKE, lan sajak bungahe ngeram nalika isa tumindak kang kaya mengkono kuwi. Mbokmenawa ing penemune tuwuh mengkene, “Yuh-yuh…mung gawean kaya mengkono wae,mung bab kaya mengkono wae ndadak diurusi…” utawa kang mengkene, “Jale isa mlaku pora yen ora ana aku..aku tak ethok-ethok ora nggagas ahh..”. Kuwi kabeh sah-sah wae, ananging sing kudu dieling, aja nganti sing DISEPELEKAKE kuwi Gusti Allah lan pakaryane. Isa wae tujuane NYEPELEKAKE menungsa, ananging dieling wae yen menungsa kuwi sejatine nembe nglakoni kersane Gusti. Mula saka kuwi, ayo pada sinau kaya crita ing Nazaret, sepisan saka Gusti Yesus sing DISEPELEKAKE, ora usah nesu lan ngupaya mbales, merga sing males wis ana “job’e” dewe. Dene kanggo sing senengane NYEPELEKAKE, padha elinga yen kabeh kuwi marakne kersane Gusti ora klakon. Kaya neng Nazaret, ora okeh Muzijat sing klakon, mula aja seneng NYEPELEKAKE…

“Wingi aku pethuk Mukidi Jo, ngajak crita lan ing pungkasane meling aku kon ngelikne sliramu, suaya ora neruske olehmu ndandur Porang. Jare awakmu ora bakat nandur, mesti mbesuk gagal” Lik Ndoleng miwiti rembugan mbek Dalijo.

“Wong kok senengane NYEPELEKAKE liyan, apa Mukidi wis nate nandur ta Lik?” Semaure Dalijo lan sinartan takon.

“Hambuh, aku dewe ya ora dong” Semaure Lik Ndoleng.

“Lha njur wangsulanmu piye Lik?” IIn njedul lan melu nimbrung nakoni.

Aku ya mung meneng wae, malah sajak setuju yen mengkone Dalijo ora bakalan kasil..” Semaure Lik Ndoleng.

“Haiyahhhh…kowe ya senengNYEPELEKAKE jebule Lik, kaya mbien nalika saingan nggayuh Yu Wasti, sampeyan NYEPELEKAKE kang Markun, jare PNS arep dipakani apa bareng Yu Wasti milih Kang Markun, njur sampeyan  anane mung muring-muring dewe…” Unine Iin cetha wela-wela.

“Jindulllllll…akhire tekan ini menehhhhh….Duuusss!!!” Batine Lik Ndoleng.

Mbah’e..