WISIK

 

Rebo Kliwon 8 Juni 2022

BENINGE EMBUN ESUK

SPIRITUALITAS IKLAS

Wilangan 24 : 1-14

Jabur 48

Lukas 1 : 26-38

“Aku diparingi krungu sabdané Allah sing lugu. Klawan mata tinarbuka, aku weruh wahyuné Allah Kang Mahakwasa.” Wilangan 24 : 4

 

WISIK kuwi meh padha karo wangsit, lan malah okeh sing ngarani menawa kalorone kuwi sejatine kahanan sing padha tegese. ananging sejatine ing antarane WISIK lan Wangsit kuwi beda. WISIK kuwi wujud dhawuh utawa swara kang mampir ing pangrungoning batin lan kuwi asli saka Sing Maburesa Jagad kang wujude pancen Roh. Dene Wangsit kuwi sejatine swara kang njedul neng telenging batine menungsa amarga saka pengangen-angene dewe. Ben gampang kanggo conto yakuwi nalika mbiyen nembe rame-ramene nomer (SDSB, Togel, lsp), ora sithik wong sing nduweni pengangen-angen entuk nomer sekti, njur mara neng papan-papan sacral. Neng papan sacral (isa uga diarani angker utawa wingit), wis nduweni pengangen-angen entuk nomer, mula nalika rumangsa ana swarane batin utawa tandha liyane kuwi njur diolah dadi angka-angka, kuwi kinaranan Wangsit, dudu Wisik.

 

Ana crita Kitab Suci babagan WISIK kuwi, salah sijine neng kitab Wilangan bab 24. Neng kana dicritakne kepiye anggone Biléam nampa WISIK saka Gusti. Manut critane Kitab Suci, Biléam  dijaluk dening bangsa ngisrael kanggo nakokne kersane Gusti lan sakbanjure nglakoni apa kang dadi carane ngrumati percayane marang Gusti Allah. Oiya, mbiyen jan-jane ya  okeh tata-cara manembah, mula yen ora ngati-ati isa diarani klenik… Lumantar tata-carane Bileam manembah lan pancen deweke priyayi sing waskita lan titis, dewekne njur isa antuk dhawuh saka Gusti Allah, malah langsung krungu kanthi lugu. Siji meneh sing cetha kanggo mbedakne kuwi WISIK apa Wangsit lan apa malah mung angen-angen kamanungsan, yakuwi ancase swara kuwi. Yen swara kuwi ngener marang kabecikan kang sejati, kuwi mesti WISIK saka Gusti.

 

Njur saiki pitakonane, yakuwi kapan lan sapa sing isa nampa WISIK kuwi? Kabeh wong apa mung sakperangan wae? Wansgulane sederhana, kabeh wong isa antuk WISIK, sauger gelem netepi kersane Gusti ing sakwutuhe lan babagan wektune, saben wektu. Sing dadi paugeran utama yakuwi babagan nglakoni kersane Gusti sakwutuhe lan total, tanpa sangga-runggi. Sing dadi pepalang tumrap wong jaman saiki antuk utawa nampa WISIK kuwi merga “wedi” karo dogma agama manca sing wus ditampa tanpa tedeng aling-aling. Kamangka agama manca sing saiki dienut kuwi ya kalair saka “Rahime budaya”. 

 

Mula saka kuwi, saiki payo nggayuh WISIK saka Gusti Allah lumantar wani netepi kabeh dhawuh lan kersane Gusti Allah. Saiki payo lumebu marang donyaning Gusti Allah sing isa dilakoni. Lha donyaning Gusti Allah kuwi contone apa? Gusti Allah kuwi ora dhahar lan sare, mula payo njajal lumebu ing kahanan kuwi, mesti pengalaman kaya Bileam neng crita kitab Suci bakalan lumaku ing urip iki.

 

“Jo, sajake aku entuk WISIK saka Gusti, kowe dinawuhan nukokne aku udud suweni liamang sasi, wiwit seka sasi iki…” Unine Lik Ndoleng nalika sore kuwi jagongan neng Lincak Sor Talok.

“Weh, lha kuwi kok kepenak temen Lik? Aja-aja mung pokal-gawe sampeyan, ben kepenak  uripe sampeyan?” Iin sing krungu langsung muni seru, sajak nampik penemune Lik Ndoleng.

“Lha apa sampeyan wis wani cegah dhahar lan guling ta Lik?” Takone Dalijo.

“Weladalah, Ndoleng kok cegah dhahar lan guling, wong esuk rung sarapan wae wis misuh-misuh, uga apa wani cegah guling, wong nyawang Kasur dipepe wae langsung tutu..” Kang Solebo melu mangsuli.

“Kuwi dudu WISIK lho Lik, kuwi pengangen-angen, aja meneh WISIK, wong Wangsit wae dudu. Pancen saiki angel wong sing antuk WISIK, merga wedi karo aturane agam saka ngamanca…” Unine Dalijo sinambi nyjet udude.

 

Mula saka kuwi, mangga para pamaos BENINGE EMBUN ESUK sami urun pangertosan babagan WISIK lan Wangsit, menawi badhe sharing mangga kontak lumantar WA lan komentar ten kolame nggih..

 

Mbahe

 

LEMAH

 

Senen Pon 6 Juni 2022

BENINGE EMBUN ESUK

Yoel 2 : 18-29

Jabur 48

1 Korinta 2 : 1-11

Gusti Allah menggalih lemah kagungané; merga tuwuh welasé marang umaté. Panjenengané paring wangsulan, “Kowé saiki bakal Dakparingi gandum, anggur lan lenga zaitun, nganti kowé bakal padha wareg. Kowé bakal ora dirèmèhaké déning para bangsa menèh.

Yoel 2 : 18-19

 

Yen krungu tembung LEMAH, mesti sing njur njedul neng sakjroning pikiran paling ora rong perkara. Sepisan babagan barang kang ndadekne reget utawa ora resik, dene kang kapindone babagan ora nduweni daya kakuwatan. Sanadyan jik ana perkara liya kang isa njedul neng pikirane menungsa nalika krungu tembung LEMAH, ananging neng BENINGE EMBUN ESUK ing dina iki mung arep ngrembug babagan LEMAH sing asli, yakuwi barang utawa papan kang ora bisa ditinggalake dening titahe Gusti, klebu menungsa (sing maca tulisan iki muga-muga jik klebu..hehe).

 

Ngrembug babagan LEMAH sejtine ora bisa dipisah karo sejarah, merga menawa ora ana LEMAH, tangeh lamun menungsa isa urip tumeka ing wektu iki, wektu para sedulur maca tulisan iki. Lho,kok isa mengkono kepriye nalare? Nyatane aku ora urusan karo LEMAH ya jik urip, malah luwih kepenak uripke lan ora usah blepotan lendhut lan kucem merga lebu kang kabeh kuwi mula-bukane saka LEMAH? Pancen bener, saiki ora sithik menungsa sing isa urip tanpa lengsung gegayutan karo LEMAH, ananging menawa LEMAH ora ana sing ngrumat lan nesu, aja padha takon dosane! Yen nganti lemah nesu, mesti ora ana siji-sijia titahe Gusti kang tahan urip neng ngalam-donya iki.

 

Babagan LEMAH kuwi sejatine ora bain-bain, merga neng Kitab Suci ya okeh piwulang babagan kuwi. Salah sijine neng kitab Yoel, bab 2, neng kana dicritakne  nalika Gusti kersa menggalih LEMAH njur tuwuh piwelase. Lha ana apa kok nganti Gusti Allah menggalih lan tuwuh welase? Merga menungsa olehe  ngolah  LEMAH ora petungan. LEMAH diolah tanpa leren lan tanpa diwenehi wektu ngaso, uga LEMAH tanpa rinumat sing sakmestine. Merga saka kuwi kabeh, Gusti Allah njur duka, ora menehi pemetune LEMAH. Sakwise duka sawetara, Gusti Allah njur tuwuh Welase marang LEMAH, yakuwi nuwuhake tethukulan kang sakbanjure ngetokake who kang migunani titah liyane, klebu menungsa. Saka crita ing kitab Yoel cetha yen Gusti Allah nresnani LEMAH lan sejatine maringi dhawuh marang menungsa cikben melungrumat LEMAH saing sakmestine.

 

Ing jaman saiki wis arang menungsa sing gelem nggagas LEMAH, ana sing jinja yen dikon ngolah LEMAH, mula njur padha minggat neng kutha, kuwi merga wegah gepok-senggol karo LEMAH. Semono uga sing jik karep ngolah LEMAH, saiki wis ora mikir kepiye kahanane si LEMAH kuwi. Sing penting ditanduri lan kudu metu hasile, yen ora dirabuk nganggo rabuk kimia, sing ndadekne LEMAH lara kronis. Mula saka kuwi, yen Gusti Allah wae kersa menggalih lan njur trenyuh, kudune menungsa wani nuladha Gusti Allah lumantar miwiti nresnani LEMAH.

 

“Lik, jarene mbiyen nggon tegal lan sawah kuwi ing wektu-wektu kirunggan diwenehi Sajen ya?” Takone Dalijo marang Lik Ndoleng, sing nembe nyumet pituneme.

“Iyo, mbiyen sregep,saiki mbuh, padha lali kabeh…Yen ora kleru kuwi merga manut kapercayan anyar, sing kaya ngono kuwi klebu klenik Jo, babagan bener lan salahe, aku dewe ya ora dong babarblas..”Semaure Lik Ndoleng.

“Cen aku dewe ya njembleng lho Lik, wong jaman saiki kuwi cen aneh, lha tembung Sajen kuwi kanga sale saka Saji, njur ana Sesaji, menyajikan, lan kuwi wis biasa, ananging yen krungu tembung Sesajen kok kayane nesu lan ngamuk ya Lik?” Dalijo sajak melu esmosi.

“Lha iya, mbiyen LEMAH barang ya diaturi Sajen, lan nyatane uripe malah waras-wiris, ora ana kopit, ora ana setruk, ora ana darah tinggi, ora ana gula..lha saiki? Kabeh penyakit malah diternak menungsa..”Unine Lik Ndoleng melu emosi, nganti kleru anggone ngekep udud, mulane gidrah-gidrah merga genine udud kena lambene.

 

 

@mbahe

MOKSA

 

Setu Legi 4 Juni 2022

BENINGE EMBUN ESUK

2 Para Raja 2 : 1-15a

Jabur 104 : 24-34

2 Korinta 5 : 1-5

Lukas 1 : 5-17

“Sajroné padha nerusaké tindak padha ngandikan. Dumadakan ana kréta murub ditarik jaran murub misahaké wong loro mau, lan Nabi Élia kaangkat menyang swarga déning angin lésus”

2 Para Raja 2:11

 

MOKSA kuwi kahanan nalika raga, nyawa, jiwa lan Sukma bali menyang klanggengan utawa ana ing basane agama sinebut Swarga. Pancen ora gampang cikben isa MOKSA, wong nyatane ya ora kabeh wong isa ngalami, malah mung sithik banget sing isa sinebut MOKSA. Sing paling akeh ya nalika menungsa wis sepuh utawa tuwa, njur seda utawa pisahe raga,nyawa,jiwa lan Sukma. raga bali menyang asale kang awujud lemah, Sukma bali marang Gusti (yen ora luput nalika nglakoni urip neng alam-donya iki..) Biasane wong saiki ben luwih manteb babagan pengalamaning urip, njur nggoleki wangsulan lumantar piwulange agama lan kuwi isa saka Kitab Suci. njur piye olehe Kitab Suci mulang?

 

Neng Kitab 2 Para Raja 2, ana crita babagan nabi kang ngalami MOKSA, jenenge nabi kuwi Elia. Kitab Suci kanthi cetha nggambarake kepiye lakune nabi Elia MOKSA. “Sajroné padha nerusaké tindak padha ngandikan. Dumadakan ana kréta murub ditarik jaran murub misahaké wong loro mau, lan Nabi Élia kaangkat menyang swarga déning angin lésus” . Kanthi cetha Kitab Suci maringi kabar utawa inpormasi babagan MOKSA, ananging amarga dogma utawa ajrane greja babar-blas ora nggagas babagan kuwi, mula yen arep ngarani nabi Elia MOKSA, ya kayane wedi-wedi piye ngono…..Ananging pancen ora bisa diselaki,diendani yen neng Kitab Suci ana crita babagan MOKSA, mula neng tulisan BENINGE EMBEN ESUK dina iki, arep  (njajal) nyinau kepiye cikben isa kaya nabi Elia, isa MOKSA.

 

Uripe nabi Elia kuwi pancen jos temenan, peng-pengan anggone netepi timbalan leladi. Apa rekasa? Polll…nate meh diangkah patine dening raja lan bojone, nate mlayu merga wedi lan playune nganti tekan pasamunan gung liwang-liwung, nate kekurangan panganan lan ndilalah Gusti Allah wis kagungan aplikasi “gagakonlne”, njur dikongkon ngirimi nabi Elia roti neng pinggire kali saben kesuk. Pokoke, uripe nabi Elia kuwi pancen rekasane pol temenan, babarblas ora ana critane sing kepenak. Mula yen kepengin isa MOKSa kaya nabi Elia,apa ya padha siap urip rekasa?

 

“Jo, meh patang sasi ranjedul, ngapa wae kowe kuwi?” Takone Lik Ndoleng, nalika esuk kuwi ngasah arit neng dulomahe Dalijo.

“Semedi Lik, mranata diri ben pantes neng ngarsane Gusti” Semaure Dalijo sinambi nyumet udude sing saiki ganti Sampoerna.

“Ya apik, kuwi sing kudu dilakoni dening kabeh menungsa, mematut urip ben patut neng ngrasane Gusti. Sapa ngerti isa MOKSA kaya critane mbahe neng BENINGE EMBUNG ESUK dina iki” Semaure Lik Ndoleng meneh.

“Yen kowe isa MOKSA apa ya arep ajak-ajak Yu Wasti Lik? “ Takone Iin saka sisih Lor kandang, merga sajake jik nyapu latar sing wis kokean reged gegodongan.

“Jindulll..kok jik eling kuwi wae ta Innnnnn??!!!” Unine Lik Ndoleng, ora ketok nesu malah sajak seneng.

 

@mbahe

“